CNI International News

ဘန်ကောက်၊ ဧပြီ ၂၈

မြန်မာနိုင်ငံတွင် ဖြစ်ပေါ်နေသော နိုင်ငံရေး ပဋိပက္ခဖြေရှင်းနိုင်ရေး မြန်မာနှင့် တရုတ်၊ အိန္ဒိယတို့ကဲ့သို့ အိမ်နီးချင်း နိုင်ငံများမှ အစိုးရများ အပါအဝင် ပညာရှင်အဖွဲ့ ကိုယ်စားလှယ်များသည် နယူးဒေလီ၌ တွေ့ဆုံ ဆွေးနွေးခဲ့ ကြောင်း Bangkok Post သတင်းတွင် ဖော်ပြသည်။

မြန်မာနိုင်ငံတွင်းရှိ ပဋိပက္ခကို လျော့ပါးစေရေး လျှို့ဝှက် ကြိုးပမ်းမှု အစိတ်အပိုင်းတစ်ခုအဖြစ် ယခုကဲ့သို့ တွေ့ဆုံ ဆွေးနွေး ခဲ့ခြင်းဟု သတင်းရင်းမြစ်နှစ်ခုက ပြောသည်။

၂၀၂၁ ခုနှစ်၊ ဖေဖော်ဝါရီလမှ စတင်ခဲ့သည့် မြန်မာ့နိုင်ငံရေး ပဋိပက္ခကြောင့် လက်နက်ကိုင် တော်လှန်မှုများ ပေါ်ပေါက်လာခဲ့သည်။

ယခု သီတင်းပတ်အတွင်း ပြုလုပ်ခဲ့သည့် ဆွေးနွေးပွဲသည် ပြီးခဲ့သည့်လက ထိုင်းတွင် စတင်ခဲ့သည့် လမ်းကြောင်း ၁.၅ (Track 1.5) ၏ အစိတ်အပိုင်း တစ်ခုဖြစ်ကာ ၂၀၂၁ ခုနှစ်၊ ဧပြီတွင် သဘောတူထားသော ငြိမ်းချမ်းရေး စီမံကိန်းအား အကောင်အထည်ဖော်ရန် ပျက်ကွက်မှုဖြင့် နစကအပေါ် အာဆီယံအဖွဲ့အတွင်း မကျေလည်မှုများ ရှိနေချိန်၌ ပေါ်ပေါက်လာသည်။

NUG ၏ ၀န်ကြီးချုပ် မန်း၀င်းခိုင်သန်းနဲ့ PDF ရဲဘော်များကိုတွေ့ရစဉ်

အင်္ဂါနေ့က ဆွေးနွေးပွဲကို မြန်မာ၊ အိန္ဒိယ၊ တရုတ်၊ ထိုင်း၊ ကမ္ဘောဒီးယားနှင့် လာအိုတို့အပြင် အာဆီယံဥက္ကဋ္ဌ နိုင်ငံ ဖြစ်သော အင်ဒိုနီးရှားတို့ပါ တက်ရောက်ခဲ့သည်ဟု အမည်မဖော်လိုသော သတင်းရင်းမြစ်များက ပြောသည်။

NUG အဖွဲ့အား ဆွေးနွေးမှု လုပ်ငန်းစဉ်များသို့ ထည့်သွင်းရန်လည်း အစည်းအဝေး တက်ရောက်ခဲ့သူများက စိတ်ပါဝင်စားမှုရှိသည်ဟု သတင်းအရင်းအမြစ် တစ်ခုက ပြောသည်။

NUG သည် တော်လှန်ရေး အဖွဲ့အစည်းတစ်ခုဖြစ်ကာ ယင်းကို အကြမ်းဖက်သမားများဟု နစကဘက်က ကြေညာထားသည်။

NUG နှင့် နစက တို့အကြား တရားဝင် စကားပြောဆိုမှု မရှိခြင်းကြောင့် NUG နှင့်တရားဝင် ဆွေးနွေးမှု လုပ်ဆောင် လိုနေသည်ဟု သတင်းအရင်းအမြစ်က ပြောသည်။

ထိုအခင်းအကျင်းကို ဆွေးနွေးမှုတွင် ပါဝင်သူများက မျှော်လင့်နေသည်ဟုလည်း ပြောသည်။

ယခုကိစ္စများနှင့် ပတ်သတ်၍ Reuters ၏ မေးမြန်းမှုကို အိန္ဒိယ၊ ထိုင်း နိုင်ငံခြားရေးဌာနများအပြင် နယူးဒေလီရှိ တရုတ်သံရုံးဘက်မှ ပြန်လည် ဖြေကြားခြင်း မရှိသေးသလို နစက၏ ပြောခွင့်ရပုဂ္ဂိုလ်ကိုလည်း ဆက်သွယ်၍ မရသေးပေ။

ယခု ကိစ္စများနှင့်ပတ်သက်၍ သတိပြုမိခြင်း မရှိဟု အင်ဒိုနီးရှား နိုင်ငံခြားရေးဌာန ပြောခွင့်ရပုဂ္ဂိုလ် တစ်ဦးက ပြန်လည် ဖြေကြားသည်။

ဘန်ကီမွန်းနဲ့ ဗိုလ်ချုပ်မှူးကြီးမင်းအောင်လှိုင်ကိုတွေ့ရစဉ်

NUG အနေဖြင့် အိမ်နီးချင်းနိုင်ငံအပြင် ဒေသတွင်း နိုင်ငံများနှင့် တွေ့ဆုံဆွေနွေးမှု လုပ်ဆောင်ရန် လမ်းဖွင့်ထား သည်ဟု ပြောခွင့်ရပုဂ္ဂိုလ် ဦးကျော်ဇော်က ပြောသည်။

အင်္ဂါနေ့ တွေ့ဆုံမှုကို အိန္ဒိယပညာရှင်များအဖွဲ့က လက်ခံ ပြုလုပ်ခဲ့ခြင်းဖြစ်ကာ ယင်းတွင် ဘက်ပေါင်းစုံမှ အကြမ်း ဖက်မှု လျော့ချရေး၊ ဆွေးနွေးပွဲများ ကျင်းပနိုင်ရေးနှင့် လူသားချင်း စာနာမှု အကူအညီများ ပို့ဆောင်ရေးတို့ ပါဝင် သည်ဟု ဒုတိယ သတင်းအရင်းအမြစ်က ပြောသည်။

နောက်ထပ် အစည်းအဝေးကို လာအိုတွင် ကျင်းပသွားမည်ဟုလည်း ယင်းက ပြောသည်။

နစကသည် အနောက်နိုင်ငံများ၏ ဖယ်ကျဉ်ခြင်းကို ခံထားရသော်လည်း ရုရှားနှင့် ကူးလူးဆက်ဆံမှု မြင့်တက် လျက် ရှိသည်။

မကြာသေးခင်ကလည်း ထိုင်းမှ ကိုယ်စားလှယ်များနှင့် တွေ့ဆုံခဲ့သည်။ သံတမန်ဟောင်း တစ်ဦးဖြစ်သူ ဘန်ကီမွန်း (Ban Ki-moon) သည်လည်း မြန်မာနိုင်ငံသို့ သွားရောက်ခဲ့ကာ အကြမ်းဖက်မှုများကို ချက်ချင်း ရပ်တန့်ရန် တနင်္လာနေ့က တောင်းဆိုခဲ့သည်။

Source: Bangkok Post