CNI International News
ခါတွမ်၊ ဧပြီ ၂၇
ဖြုတ်ချခံထားရသော သမ္မတဟောင်း အိုမာအယ်လ်-ဘာရှား (Omar al-Bashir)အား ခါတွမ် (Khartoum)မြို့ရှိ စစ်ဆေးရုံတစ်ခုတွင် ထိန်းသိမ်းထားသည်ဟု Al Jazeera သတင်းတွင် ဖော်ပြသည်။
ဆူဒန်စစ်တပ်နှင့် RSF လက်နက်ကိုင် တပ်ဖွဲ့တို့အကြား တိုက်ခိုက်မှုများ ပေါ်ပေါက်လာခဲ့ပြီးနောက် ဘာရှားကို ထိန်းသိမ်းထားရာ ထောင်မှ ဆေးရုံသို့ ရွှေ့ပြောင်းထားခြင်း ဖြစ်သည်။
ခိုဘာ (Kober) ထောင် ကျန်းမာရေး ဝန်ထမ်းများ၏ ထောက်ခံမှုဖြင့် ဘာရှားနှင့် ထောင်သား ၃၀ ခန့်ကို အလီယာ (Aliyaa) ဆေးရုံသို့ ရွှေ့ပြောင်းထားကြောင်း ဆူဒန်စစ်တပ်က ဗုဒ္ဓဟူးနေ့တွင် ပြောသည်။
ဘာရှားသည် ၎င်း၏ အစိုးရဟောင်း အဖွဲ့ဝင်များနှင့်အတူ ဘာရီ (Bahri) မြို့ရှိ ခိုဘာထောင်တွင် ဖမ်းဆီးခံထားရ ခြင်း ဖြစ်သည်။ လက်နက်ကိုင် အဖွဲ့နှစ်ခု၏ တိုက်ခိုက်မှုများတွင် ခိုဘာထောင်လည်း ပါဝင်ခဲ့ကာ ထောင်ဖောက်မှု တစ်ခု ဖြစ်ခဲ့သည့် တနင်္ဂနွေနေ့တွင် ထောင်သားများစွာ ထွက်ပြေးလွတ်မြောက်ခဲ့သည်။
အပြန်အလှန်တိုက်ခိုက်နေတဲ့ စစ်ဗိုလ်ချုပ်ကြီး နှစ်ဦးကိုတွေ့ရစဉ်
ဘာရှားတွင် အပြစ်မရှိကြောင်း သက်သေပြရန်အတွက် တိုက်ပွဲများ ပြီးဆုံးမည့် အချိန်ကိုစောင့်နေသည်ဟု သူ၏ မိသားစုဝင်များက ပြောကြောင်း ဆူဒန်မြို့တော်ရှိ သတင်းထောက်က ပြောသည်။
ထောင်မှ ထွက်ပြေး လွတ်မြောက်လာသော ရာဇဝတ်သား ၂၅၀၀၀ ခန့်သည် ခါတွမ်မြို့၏ ဥပဒေမဲ့ အခြေအနေကို ပိုမိုဆိုးရွားစေခဲ့ကာ လုယက်မှုများနှင့် လမ်းမများပေါ်တွင် အုပ်စုဖွဲ့ လှည့်လည်သွားလာ နေမှုများကြောင့် မလုံခြုံမှု အခြေအနေမှာ ပို၍ ဆိုးရွားလာသည်ဟု ဒေသခံများက ပြောသည်။
ဘာရှားသည် ၂၀၁၉ ခုနှစ်တွင် ရာထူးမှ ဖယ်ရှားခံ ခဲ့ရသူဖြစ်ကာ ၎င်းအား လက်ရှိအချိန်တွင် တိုက်ခိုက်နေကြ သည့် ဆူဒန်စစ်တပ်နှင့် RSF တို့၏ ခေါင်းဆောင် ဗိုလ်ချုပ်ကြီးနှစ်ဦးက ပူးတွဲဖြုတ်ချခဲ့သည်။
အိုမာအယ်လ်ဘာရှားကိုတွေ့ရစဉ်
ထောင်ဖောက်မှုအတွင်း ဘာရှားအစိုးရ၏ ထိပ်တန်းအရာရှိ အနည်းဆုံး လေးဦးခန့် လွတ်မြောက်သွားခဲ့ကာ အခြေအနေများ ပြန်လည်တည်ငြိမ်လျှင် လာရောက် အဖမ်းခံမည်ဟု ၎င်းတို့၏ အသံဖိုင် ထုတ်ပြန်ထားသည်။
လက်ရှိ ဖြစ်ပွားနေသော ဆူဒန်နိုင်ငံတွင်းမှ အာဏာလုပွဲတွင် ဆူဒန်ပြည်သူများဘက်မှ ရပ်တည်သည်ဟု ထောင်မှ ထွက်ပြေး လွတ်မြောက်သွားသူ အာမက် ဟာရွန် (Ahmed Haroun) က ပြောသည်။
အာမက်သည် ဘာရှားအစိုးရ၏ ထိပ်တန်းအရာရှိ တစ်ဦးအဖြစ် တာဝန်ထမ်းဆောင်ခဲ့ သူလည်းဖြစ်သည်။
ဘာရှားနှင့် အာမက်တို့ နှစ်ဦးစလုံးကို ၂၀၀၃ ခုနှစ်မှ ၂၀၁၈ ခုနှစ်အတွင် ဒါဖာ (Darfur) ဒေသတွင် လူသားချင်း စာနာမှုဆိုင်ရာ ရာဇဝတ်မှုများ၊ စစ်ရာဇဝတ်မှုများ၊ အစုလိုက် အပြုံလိုက် သတ်ဖြတ်မှုများဖြင့် နိုင်ငံတကာ ရာဇဝတ်မှုတရားရုံး ICC က အလို ရှိနေသည်။
Source: Aljazeera
