CNI International News
ကိယက်ဗ်၊ ဧပြီ ၂၈
ရုရှားနှင့် စစ်ပွဲအတွင်း နေတိုးအဖွဲ့ဝင်များနှင့် မိတ်ဖက်နိုင်ငံများသည် ယူကရိန်းအား ထောက်ပံ့မည်ဟု ကတိ ပြုထားသည့် တိုက်ခိုက်ရေးယာဉ်များ၏ ၉၈ ရာခိုင်နှုန်းကျော်ကို ပေးပို့ခဲ့ပြီးဖြစ်သည်ဟု နေတိုးအဖွဲ့အကြီးအကဲ ဂျန်းစ်စတိုတန်ဘာ့ဂျ်က ကြာသပတေးနေ့တွင် ပြောကြောင်း အေပီမှ ဖော်ပြခဲ့သည်။
ထိုထောက်ပံ့မှုများက တန်ပြန်ထိုးစစ် ဆင်မှုများ လုပ်ဆောင်ရန် စီစဉ်နေသည့် ယူကရိန်းအတွက် ကြီးမားသော အထောက်အကူလည်း ဖြစ်သည်။
ကျဉ်ကာယာဉ် ၁၅၅၀ ၊ တင့်တား အစီး ၂၃၀ အပြင် တခြားသော အသုံးအဆောင်များနှင့်အတူ ယူကရိန်း မဟာမိတ်များသည် ခဲယမ်း အရေအတွက်များစွာကို ထောက်ပံ့ပေးခဲ့ရုံမက ယူကရိန်းစစ်တပ်အတွက် တပ်ရင်း အသစ် ၉ ခုကို လေ့ကျင့်ပေးခြင်းနှင့် လက်နက်တပ်ဆင်ပေးနိုင်ခဲ့သည်ဟု နေတိုးအဖွဲ့၏ အထွေထွေအတွင်း ရေးမှူး ဂျန်းစ်စတိုတန်ဘာ့ဂျ် (Jens Stoltenberg)က ပြောသည်။
နေတိုးအဖွဲ့၏ အထွေထွေအတွင်းရေးမှူး ဂျန်းစ်စတိုတန်ဘာ့ဂျ်ကို တွေ့ရစဉ်
တပ်အသစ်များတွင် တပ်ဖွဲ့ဝင် ၃၀၀၀၀ ကျော် ပါဝင်သည်ဟု ယူဆရကာ နေတိုး၏ မိတ်ဖက်နိုင်ငံများဖြစ်သော ဆွီဒင်နှင့်သြစတြီးယားတို့ကလည်း ယူကရိန်းသို့ စစ်ဘက်သုံးယာဉ်များ ထောက်ပံ့ပေးခဲ့သည်။
ထောက်ပံ့မှုများက ယူကရိန်းအတွက် ၎င်းတို့ နယ်မြေများ ပြန်လည်သိမ်းပိုက်ရေး လုပ်ဆောင်ရန် အထာက် အကူ ဖြစ်စေသည်ဟု နေတိုးအဖွဲ့အကြီးအကဲက ဘရပ်ဆဲလ် (Brussels) တွင် သတင်းထောက်များကို ပြောခဲ့သည်။
တရုတ်သမ္မတ ရှီ (Xi) နှင့် တယ်လီဖုန်းဖြင့် ဆက်သွယ်ပြောဆိုမှု လုပ်ဆောင်ခဲ့သည်ဟု ယူကရိန်းသမ္မတ ဇာလန်းစကီး(Zelenskyy) က ထုတ်ပြန်ပြောဆိုခဲ့ပြီးနောက် တစ်ရက်အကြာတွင် နေတိုးအဖွဲ့က ထိုသို့ ပြောဆိုခဲ့ခြင်း ဖြစ်သည်။
ဇာလန်းစကီးက ၎င်းသည် ရှီနှင့် အဓိပ္ပါယ်ရှိသော ဖုန်းပြောဆိုမှုတစ်ခုကို အချိန်အတန်ကြာ လုပ်ဆောင်ခဲ့ ကြောင်း ပြောသည်။
ယင်းက ရုရှားကျူးကျော်စစ် စတင်သည့် တစ်နှစ်ကျော်ကြာ ကာလအတွင်း ယူကရိန်းနှင့် တရုတ် ခေါင်းဆောင် တို့အကြား ပြောဆိုဆက်သွယ်မှုရှိသည်ကို ပထမဆုံးအကြိမ် သိရှိရခြင်းလည်း ဖြစ်သည်။
ယူကရိန်းစစ်ပွဲအတွင်းက မြို့ပျက်ကြီးကိုတွေ့ရစဉ်
ဗုဒ္ဓဟူးနေ့ ဖုန်းပြောဆိုမှုသည် ၎င်းအတွက် အထောက်အပံ့ ဖြစ်စေသည်ဟု ဇာလန်းစကီး၏ ပြောစကားအပြင် ရှီ၏ လုပ်ရပ်အပေါ် အနောက်အုပ်စု အရာရှိများ၏ ကြိုဆိုမှုရှိသော်လည်း ယင်းသည် ငြိမ်းချမ်းရေးအတွက် တိုးတက်မှု တစ်စုံတစ်ရာ ပေါ်ပေါက်လာနိုင်ဖွယ် မရှိပေ။
ရုရှားနှင့်ယူကရိန်းတို့သည် ငြိမ်းချမ်းရေးအတွက် သတ်မှတ်ချက်များကြား လုံးဝကွဲပြားနေပြီး တရုတ်သည် လည်း ရုရှား၏ ကျူးကျော်မှုကို ဝေဖန်ရန် ငြင်းဆိုထားသည်။
တရုတ်အစိုးရသည် ရုရှားအား အမေရိကန်၏ လွှမ်းမိုးမှုကို တွန်းလှန်ရန်သံတမန်ရေး မဟာမိတ်အဖြစ် ရှုမြင်ထားခြင်းကြောင့် ဖြစ်သည်။
နေတိုးအဖွဲ့ဝင် ၃၁ နိုင်ငံအနေဖြင့် ယူကရိန်းစစ်တပ်ကို အဆင့်မြှင့်တင်ရေး ဆက်လက် ထောက်ပံ့ ပေးသွား မည်ဖြစ်ကြောင်း နေတိုးအရာရှိကပြောပြီးနောက် ရုရှားတို့ သိမ်းပိုက်ထားသည့် ယူကရိန်းနယ်မြေများကို ပြန်လည် သိမ်းယူနိုင်ခြင်းက ငြိမ်းချမ်းရေး ဆွေးနွေးပွဲများ ပေါ်ပေါက်လာချိန်တွင် ယူကရိန်းအတွက် ညိုနှိုင်း ဆွေးနွေးရန် ခိုင်မာမှုရှိသော အနေအထားကို ရောက်ရှိစေသည်ဟု ပြောသည်။
Source: AP
