CNI News

၂၀၂၂ ခုနှစ်၊ နိုဝင်ဘာ ၁၉

ရက္ခိုင့်တပ်တော်(AA)၏ ရခိုင်ပြည်နယ် ခွဲထွက်ရေး ရည်မှန်းကြိုးပမ်းချက်ကို ဗမာလူထုတစ်ရပ်လုံးက ထောက်ခံကြမှာ မဟုတ်ဘူးဟု မြန်မာ့နိုင်ငံရေးလေ့လာသုံးသပ်သူ တရားလွှတ်တော်ရှေ့နေ ဦးကြီးမြင့်က ပြောသည်။

၂၀၂၁ ခုနှစ်၊ ဖေဖော်ဝါရီ ၁ ရက်နောက်ပိုင်း ဖြစ်ပေါ်လာသည့် နိုင်ငံရေးပြဿနာသည် ဗမာလူမျိုးစု အချင်းချင်းကြား မကြေလည်၍ ဖြစ်ပေါ်လာသည့် ပြဿနာဟု ULA/AA ဘက်က မြင်နေကြကြောင်း ၎င်းက ပြောသည်။

ဦးကြီးမြင့်က “ရခိုင်ကတော့ ခွဲထွက်ဖို့ပဲ လုပ်နေတယ် သူတို့ကတော့ ဒီဖက်ကို သူတို့က အပြတ်ပြောထားပြီးသားပဲ သူတို့ အချင်းချင်း ရန်ဖြစ်နေတာပဲ၊ ကျုပ်တို့နဲ့ မဆိုင်ဘူးတဲ့၊ ဗမာ၊ ဗမာချင်း ရန်ဖြစ်နေတာတဲ့ သူတို့က အဲဒီလိုမြင်တယ် ရခိုင်က၊ သူတို့က ခွဲထွက်မှာ သူတို့လည်း တကယ်ကြတော့ စစ်တပ်က သူ့ကို ဖိထားရင် စစ်တပ်က သူကလည်း ခွဲမထွက်နိုင်ဘူး။ တကယ် ခွဲထွက်တယ်ဆိုတာ လွယ်တာတော့ သိပ်မဟုတ်ဘူး။ နောက် ဗမာလူထုကြီး တစ်ရပ်လုံးကလည်း ခွဲထွက်တာကို ဘယ်သူမှ ထောက်ခံကြမှာ မဟုတ်ဘူး။ ခွဲထွက်တာကိုတော့ ထောက်ခံမှာ မဟုတ်ဘူး။ ကျန်တဲ့ဟာတော့ ထောက်ခံမှာ စစ်အစိုးရကို တိုက်မယ်၊ အဲဒါတွေ ခွဲထွက်သွားမယ်ဆို တဲ့ အထိတော့ ဗမာလူထုတော့ အဲဒီလောက်ထိတော့ သူ့ကို အားပေးမှာ မဟုတ်ဘူး။ အဲဒီလို ရှိတာကို။ ဒါကြောင့် မို့လို့ ဗမာပြည်ဟာ ပြည်တွင်းစစ်က ကြာနေမယ့် သဘောရှိတယ်” ဟု CNI သတင်းဌာနသို့ ပြောသည်။

 ရခိုင်ပြည်နယ်က လမ်းဆုံတစ်နေရာကို တွေ့ရစဉ်

မိမိတို့၏ နိုင်ငံရေး ရည်မှန်းချက်သည် အနိမ့်ဆုံး အဆင့်အနေဖြင့် ရှမ်းပြည်နယ်အတွင်းက ‘ဝ’ ကိုယ်ပိုင်အုပ်ချုပ်ခွင့်ရတိုင်းနှင့်တူညီသော နိုင်ငံရေးအဆင့်အတန်းမျိုးကို ရလိုကြောင်း ရက္ခိုင့်တပ်တော် (ULA/AA) ၏ တပ်မှူးချုပ် ဗိုလ်ချုပ်ထွန်းမြတ်နိုင်က ထုတ်ဖော် ပြောကြားထားသည်။

လက်ရှိတွင် ULA/AA အနေဖြင့် နိုင်ငံတကာ အသိအမှတ်ပြု အာရက္ခနိုင်ငံအစိုးရတစ်ရပ် ဖြစ်ရန် ကြိုးစားနေ သည့် ကာလဖြစ်ကြောင်း ၂၀၂၂ ခုနှစ်၊ စက်တင်ဘာ ၁၉ ရက်က ပြုလုပ်သည့် သတင်းစာ ရှင်းလင်းပွဲတွင် ULA/AA ၏ ပြောရေးဆိုခွင့်ရှိသူ ဦးခိုင်သုခက ပြောကြားခဲ့သည်။

ရခိုင်ပြည်ကို ယခင်ကတည်းက ဗမာဘုရင်များ ပိုင်ဆိုင်သည်ဟု ပြောလိုသည့် သဘောမျိုးလားဆိုသည်ကို မေးခွန်းထုတ်လိုကြောင်း ရခိုင်နိုင်ငံရေးသမား ဦးဖေသန်းက CNI သတင်းဌာနသို့ ပြောသည်။

၂၀၁၆ ခုနှစ်၊ မိုင်ဂျာယန်မြို့မှာ တွေ့ရသည့် တိုင်းရင်းသားလူငယ်များ 

၎င်းက “ရခိုင်တွေ ခွဲထွက်မှာကို ဗမာလူမျိုးတွေက လက်မခံဘူးဆိုတာ တခြားတိုင်းရင်းသားတွေတော့ မပြောတော့ဘူးပေါ့ဗျာ၊ ဗမာကတော့ သူတို့နိုင်ငံ ရခိုင်က သူတို့ နဂိုကတည်းက ပိုင်တယ်ဆိုတဲ့ သဘောမျိုး ပြောတာ လား မသိဘူး။ အဲဒီလူကို ပြန်မေးချင်တာကတော့ ရခိုင်ပြည်ကို ဗမာတွေ ဗမာဘုရင်တွေ သိမ်းပိုက်တာ ကျူးကျော်မှု မဟုတ်ဘူးလား။ အစကတည်းက တစ်နိုင်ငံတည်းမို့လို့ လာပြီးတော့ ဗမာအလံ စိုက်တာလား။ ဒါမှ မဟုတ် ကိုယ့်နိုင်ငံနဲ့ကိုယ် သီးခြားနေတဲ့အခါမှာ လာပြီးတော့ ဗမာဘုရင်တွေ ကျူးကျော်ပြီးတော့ သိမ်းပိုက်တာ မဟုတ်ဘူးလား။ အဲဒီလို မခံစားရဘူးလားလို့ဘဲ ကျနော်က ပြန်မေးချင်ပါတယ်” ဟု ပြောသည်။

လက်ရှိတွင် ရခိုင်ပြည်နယ်၌ ULA/AA သည် လူထုထောက်ခံမှု ပိုမိုရရှိနေပြီး မြန်မာ့တပ်မတော်နှင့်လည်း တိုက်ပွဲများ ဖြစ်ပွားနေသည်။

ရခိုင်ပြည်နယ်တွင် ULA/AA နှင့် တပ်မတော်တို့ ၂ နှစ်နီးပါး ရပ်နားထားသည့် တိုက်ပွဲမှာ ပြီးခဲ့သည့် ဩဂုတ်လ အတွင်းက တကျော့ပြန် ပြန်လည်ဖြစ်ပွားခဲ့သည်။