CNI News
၂၀၂၂ ခုနှစ်၊ ဇူလိုင် ၂၅
ကိုဂျင်မီနှင့် ကိုဖြိုးဇေယျာသော် အပါအဝင် လူလေးဦးကို နစကမှ သေဒဏ်စီရင်ချက် ချလိုက်သည့်အတွက် ပြည်သူလူထု၏ တုံ့ပြန်မှုမှာ ပို၍ ကြီးမားလာမည်ဖြစ်ကြောင်း တရားလွှတ်တော်ရှေ့နေ ဦးကြီးမြင့်က CNI သတင်းဌာနသို့ ပြောသည်။
အဆိုပါ သေဒဏ်စီရင်ချက်ကြောင့် ပြည်သူ့ကာကွယ်ရေးတပ် (PDF) များမှာလည်း တုံ့ပြန်မည်ဟု ကြေညာထားပြီး ဖြစ်ကြောင်း၊ ပြည်သူလူထု၏ တုံ့ပြန့်မှုမှာလည်း ၁၀ ဆ ပြန်ပြီး တုံ့ပြန်မည်ဖြစ်ကြောင်း ၎င်းက ပြောသည်။
ဦးကြီးမြင့်က “PDF တွေတော့ ကြေညာထားတယ်လေ၊ ဒီလို ပြည်သူ့ကိုယ်စား ဒီမိုကရေစီသမားတွေ သတ်ရင် လုံးဝငြိမ်မခံ နေဘူး။ လက်တုံ့ပြန်မယ်လို့ ကြိုတင် ကြေညာထားပြီးသား၊ နောက်ကမ္ဘာကြီးကလည်း တစ်ကမ္ဘာလုံး ဝိုင်းပြီး အမေရိကန်၊ ဥရောပသမဂ္ဂ၊ ပြင်သစ်၊ အာဆီယံ၊ အဲဒီလို ဝိုင်းကန့်ကွက်နေတဲ့ကြားက သတ်တာမို့ ကမ္ဘာကြီးကိုလည်း ဂရုမစိုက်ဘူး။ ပြည်တွင်းကိုလည်း ဂရုမစိုက်ဘူး။ နောက်ဆုံး လမ်းကြောင်းကို ရွေးလိုက်ပြီလို့၊ ကြေညာရာ ရောက်တယ်၊ တကယ်လည်း သူတို့ နောက်ဆုံးလမ်းကြောင်း ရောက်နေပါပြီ။
အရှင်ထွက်ရရင်ရ မရရင်လည်း အသေပဲထွက်ရ ဆိုပြီးတော့ စစ်တိုက်နေပြီ ဖြစ်လို့ ပြည်သူလူထုကလည်း စစ်ရေးနဲ့ တုံ့ပြန်ဖို့က အနိုင်ယူနိုင်ရင်ယူ၊ နိုင်အောင်တိုက် မနိုင်ရင်တော့ သေဒဏ်ပေးထားတဲ့ သူတွေ ၄၊ ၅၊ ၈၀ လောက်ရှိတယ်၊ တစ်ယောက်ပြီး တစ်ယောက် သတ်ပစ်လိမ့်မယ်၊ တစ်အချက် အနေနဲ့ လူထုအပေါ်မှာ အဆ ၃ တိုးပြီး ရက်စက်လိမ့်မယ် ဆိုတာကတော့ အသေအချာပဲလို့ ဆရာတော့ ဒီလိုမြင်တယ်ပေါ့၊ သို့သော် ပြည်သူလူထုရဲ့ တုံ့ပြန် မှုကလည်း ၁၀ ဆလောက်ပြန်ပြီးတော့ တုံ့ပြန်လာမှာဖြစ်လို့ သူတို့ရဲ့ နောက်ဆုံးရက်တွေက မကြာတော့ဘူးလို့ ဒီလိုလည်း မှန်းဆလို့ ရတာပေါ့” ဟု ပြောသည်။
ကိုဂျင်မီနှင့် ကိုဖြိုးဇေယျာသော်တို့ကို တွေ့ရစဉ်
ကိုဂျင်မီ၊ ကိုဖြိုးဇေယျာသော်၊ ကိုလှမျိုးအောင်၊ ကိုအောင်သူရဇော်တို့ လေးဦးကို ဥပဒေလုပ်ထုံး လုပ်နည်းများနှင့်အညီ ပြစ်ဒဏ်စီရင် ဆောင်ရွက်ပြီးစီးကြောင်း ယနေ့ (ဇူလိုင် ၂၅ ရက်)တွင် နစက၏ ပြန်ကြားရေးဝန်ကြီးဌာနပိုင် သတင်းစာ များတွင် ဖော်ပြခဲ့သည်။
သေဒဏ်စီရင် မည်ဆိုပါက နောက်ဆုံးအနေဖြင့် မိသားစုဝင်များနှင့် တွေ့ဆုံခွင့်ပေးရကြောင်း၊ မိသားစုနှင့် တွေ့ဆုံပြီးပါက ရက် ၂၀ ခန့် အချိန်ပေးရကြောင်း အကျဉ်းထောင်လက်စွဲဥပဒေနှင့် မညီကြောင်း ဦးကြီးမြင့်က ပြောသည်။
၎င်းက “သေဒဏ်ပေးထားတဲ့ လူတွေက ၄၊ ၅၊ ၈၀ လောက်ရှိတယ်၊ အဲဒါ တန်းစီထားရတာ၊ အဲဒါကို ကျော်ပြီးတော့ ဒီ ၄ ယောက်ကို ကျော်ပြီးတော့ အတည်ပြု ပေးလိုက်တာ၊ သေဒဏ် အတည်ပြုပေးပြီး သတ်လိုက်တာ၊ ဒါလည်း လုပ်ထုံး၊ လုပ်နည်းနဲ့ မညီဘူး” ဟု CNI သို့ ပြောသည်။
၈၈ ငြိမ်းချမ်းရေးနှင့် ပွင့်လင်း လူ့အဖွဲ့အစည်းမှ ကိုဂျင်မီနှင့် အမျိုးသားဒီမိုကရေစီအဖွဲ့ချုပ် (NLD) အမတ်ဟောင်း ကိုဖြိုးဇေယျာသော် တို့ကို အကြမ်းဖက်မှု တိုက်ဖျက်ရေး ဥပဒေပုဒ်မ ၄၉(က)၊ ၅၀(ဈ)နှင့် ၅၀(ည)တို့ဖြင့် ဇန်နဝါရီ ၂၁ ရက်က သေဒဏ် အမိန့်ချမှတ်လိုက်ကြောင်း နစက-က ထုတ်ပြန်ခဲ့သည်။
