CNI International News

ဗာတီကန်စီးတီး၊ မေလ ၄

ယူကရိန်းသို့ ရုရှားထိုးစစ် အဆုံးသတ်ရန် ကြိုးပမ်းမှုတစ်ရပ် အနေဖြင့် ပုပ်ရဟန်းမင်းကြီး ဖရန်စစ်သည် မော်စကိုမြို့သို့ သွား ရောက်၍ သမ္မတ ဗလာဒီမာပူတင်နှင့် တွေ့ဆုံဖို့ ကမ်းလှမ်းခဲ့ကြောင်း အေပီသတင်းအရ သိရသည်။

ယခု ရုရှားကျူးကျော်မှုသည် မြောက်အတ္တလန္တိတ်စစ်စာချုပ်အဖွဲ့ (နေတိုး)၏ အရှေ့ဘက်သို့ ချဲ့ထွင်မှုအပေါ် လက်တုံ့ပြန်ခြင်း ဖြစ်နိုင်ကြောင်း ပုပ်ရဟန်းမင်းကြီးက ပြောကြားခဲ့သည်။

ပုပ်ရဟန်းမင်းကြီး၏ ဗာတီကန်နိုင်ငံခြားရေးဝန်ကြီး ကာဒီနယ် ပီထရိုပါရိုလင် မှတစ်ဆင့် ယခုကဲ့သို့ ကမ်းလှမ်းမှုကို ရုရှား ကျူးကျော်မှု စတင်ပြီး ရက်သတ္တ ၃ ပတ်ကတည်းက ပြုလုပ်ခဲ့ခြင်းဖြစ်ကြောင်း ၎င်းက ဆက်လက် ပြောကြားခဲ့သည်။

Corriere della Sera သတင်းစာနှင့် ဖရန်စစ်တို့ တွေ့ဆုံ မေးမြန်းခန်းတွင် ၎င်းက “ရုရှားနှင့်ပတ်သက်၍ ဗာတီကန်သည် ရှုပ်ထွေးနေသော မူဝါဒဖြင့် အဖြေရှာ မတွေ့သေးကြောင်း၊ အကြောင်းရင်းမှာ ရုရှားနိုင်ငံရှိ ရှေးဟောင်း ခရစ်ယာန် အသင်း တော် တစ်ခုဖြစ်သည့် Orthodox Church နှင့်ဆက်စပ်ကြောင်း” အလေးပေး ပြောကြားသွားခဲ့သည်။

လွန်ခဲ့သော နှစ်ပေါင်း ၁၀၀၀ ကျော်ကတည်းက ရောမမြို့နှင့် ကင်းကွာသွားခဲ့သည့် ရုရှား Orthodox Church အပေါ် ဆက်ဆံ ရေး ပြန်လည် ကောင်းမွန်လာစေရေး ကုစားရန်အလို့ငှာ ပုပ်ရဟန်းမင်းကြီး အနေဖြင့် မော်စကိုမြို့သို့ သွားရောက်ရန် ဆယ်စုနှစ်များစွာ ကြိုးစားခဲ့သော်လည်း မော်စကိုဘက်မှ ဖိတ်ခေါ်ကမ်းလှမ်းခြင်း အလျဉ်းမရှိခဲ့ပေ။

ပုပ်ရဟန်းမင်းကြီးနဲ့ ပူတင်(GETTY IMAGES)

“ဟုတ်ပါတယ်။ ကရင်မလင်ရဲ့ ခေါင်းဆောင်အတွက် အခွင့်အလမ်းတချို့ ရနိုင်ဖို့ လိုအပ်ပါလိမ့်မယ်။ ဒါပေမယ့် ကျနော်တို့ကို လာခဲ့ဖို့ တုံ့ပြန်တာ မရှိသေးပါဘူး။ ပူတင်က လက်ခံတွေ့ဆုံတာ မလုပ်ချင်တော့မှာ စိုးရိမ်မိပေမယ့် ကြိုးစားကြည့်တုန်းပါ” ဟု ဖရန်စစ်က Corriere della Sera သတင်းစာသို့ ပြောကြားခဲ့သည်။

ဖရန်စစ်သည် ပြီးခဲ့သည့် မတ်လ၌ ရုရှား Orthodox Church အကြီးအကဲ ပက်ထရီအက်ချ်ကီရေးနှင့် ဗွီဒီယို ခေါ်ဆိုမှုပြုခဲ့ပြီး မိနစ် ၄၀ ကြာ စကားပြောခဲ့သည်။

မကြာသေးမီ ရက်သတ္တပတ်များအတွင် အနောက်နိုင်ငံများက ကာကွယ်ရေး အသုံးစရိတ် တိုးမြှင့်လိုက်ကြောင်း ကြေညာခဲ့ရာ ဖရန်စစ်က လက်နက်ရောင်းဝယ် ဖောက်ကားခြင်း လုပ်ငန်းကို မကြာခဏ ရှုတ်ချခဲ့သည်။

သို့သော် ကက်သလစ် လူမှုရေးဆိုင်ရာ အယူဝါဒနှင့် ရုရှားကျူးကျော်စစ်ကို ခုခံရန်အတွက် ယူကရိန်းနိုင်ငံသားများ၏ အခွင့် အရေး ဘက်မှလည်း ဖရန်စစ်က ရပ်တည်ပြောကြားခဲ့သည်။

Source: AP

CNI International News

ကိုလံဘို၊ မေလ ၄

ကျွန်းနိုင်ငံ တစ်နိုင်ငံဖြစ်သည့် သီရိလင်္ကာတွင် အဓိက အတိုက်အခံပါတီက ဝန်ကြီးချုပ် မဟိန္ဒာရာဂျာပက်ဆာနှင့် ၎င်း၏ အစိုးရအဖွဲ့ကို ဖြုတ်ချရန် ရည်ရွယ်ချက်ဖြင့် အယုံအကြည်မရှိဟု ကြေညာချက် တစ်စောင်ကို မေလ ၃ ရက်တွင် ထုတ်ပြန်ခဲ့ သည်။

ထို့အပြင် နိုင်ငံ၏ အဆိုးရွားဆုံး စီးပွားရေး အကျပ်အတည်းမှ ရုန်းထွက်၍ ကောင်းမွန်သည့် လူနေမှု အဆင့်အတန်း ဖန်တီးပေးဖို့ ဖွဲ့စည်းပုံအခြေခံဥပဒေက ပေးအပ်သော တာဝန်များကို လက်ရှိအစိုးရ ပျက်ကွက်ခဲ့သည်ဟု အပြစ်တင် ရှုတ်ချခဲ့ ကြောင်း အေပီ သတင်းတစ်ပုဒ်တွင် တွေ့ရသည်။

အစိုးရအပေါ် အယုံအကြည် မရှိတော့ကြောင်း လွှတ်တော်အတွင်း မဲခွဲဆုံးဖြတ်ပေးရန် တောင်းဆိုသည့် အဆိုကို ဆာဂျစ်ပရီ မာဒါစာ ဦးဆောင်သော ပြည်သူ့အင်အားပေါင်းစည်းပါတီ (UPF) မှ အဖွဲ့တစ်ဖွဲ့က သီရိလင်္ကာဥက္ကဋ္ဌ မဟိန္ဒာယာပါ အာဘေးဝါ ဒါနာ ထံသို့ တင်သွင်းခဲ့သည်။

ဝန်ကြီးချုပ် ရာဂျာပက်ဆာနှင့် ၎င်း၏ညီဖြစ်သူ သမ္မတ ဂိုတာဘာယာရာဂျာပက်ဆာတို့ နုတ်ထွက်ပေးရေးအတွက် နိုင်ငံအနှံ့ တောင်းဆိုဆန္ဒပြနေချိန်၌ ယခုကဲ့သို့ အတိုက်အခံပါတီက အပြောင်းအလဲတစ်ခုသို့ ဦးတည်လာခဲ့ခြင်းဖြစ်သည်။

ရာဂျာပက်ဆာနှင့် အစိုးရအဖွဲ့ကို အာဏာရပါတီအဖြစ်မှ ဖြုတ်ချရန် အမတ်နေရာ ၂၂၅ ဦးပါရှိသည့် လွှတ်တော်ထဲတွင် အများစု မဲနိုင်မှ အထမြောက်မည်ဖြစ်သည်။

UPF ပါတီသည် ထိုသို့ မဲခွဲဆုံးဖြတ်ရာတွင် ၅၄ မဲသာ ရရှိနိုင်ဖွယ်ရှိသော်လည်း အတိုက်အခံ ပါတီငယ်များနှင့် လက်ရှိ အာဏာ ရ “သီရိလင်္ကာပြည်သူ့တပ်ဦး” ပါတီမှ ဘက်ပြောင်း သွားသူများထံမှ မဲများရရှိရန် မျှော်လင့်ထားသည်။

သီရိလင်္ကာအစိုးရ နုတ်ထွက်ပေးရန် တောင်းဆိုနေကြ(GETTY IMAGES)

လက်ရှိ အာဏာရပါတီသည် မဲ ၁၅၀ နီးပါး ဆုပ်ကိုင်ထားသော်လည်း စီးပွားရေး အကျပ်အတည်းနှင့် အယုံအကြည်မရှိ မဲ များကြောင့် ဘက်ပြောင်းသူဦးရေ များလာလျှင် အားပျော့သွားနိုင်သည့် အလားအလာလည်း ရှိနေသည်။

UPF ပါတီသည် တစ်ချိန်တည်းမှာပင် သမ္မတကိုလည်း ပစ်မှတ်ထား၍ အယုံအကြည်မရှိ အဆိုတင်သွင်းသွားမည်ဟု ကြေညာ ခဲ့သော်လည်း လွှတ်ကိုယ်စားလှယ် အများစုကြားတွင် ၎င်းကို ရာထူးမှ နုတ်ထွက်ရန် တွန်းအားပေးနိုင်မည့်ပုံ မပေါ်ပေ။

သီရီလင်္ကာသည် နိုင်ငံခြားချေးငွေ အကြေပေးဆပ်မှုကို ဆိုင်းငံ့ထားရန် မကြာသေးမီက ကြေညာခဲ့ရပြီး ဒေဝါလီခံခဲ့ရသည်။ ၂၀၂၆ ခုနှစ်အရောက်တွင် ပေးဆပ်ရန် စီစဉ်ထားသည့် နိုင်ငံခြား ဒေါ်လာ ၂၅ ဘီလီယံအနက် ယခုနှစ်အတွက် ဒေါ်လာ ၇ ဘီလီယံသာ ပြန်ဆပ်နိုင်ခြေရှိသည်။ ထို့ပြင် သီရိလင်္ကာ၏ နိုင်ငံခြား အရန်ငွေကြေး ပမာဏမှာ ဒေါ်လာ ၁ ဘီလီယံ အောက် သာ ရှိနေသည်။

ထိုသို့ နိုင်ငံခြားငွေ အကျပ်အတည်း အဆိုးဆုံးဖြစ်လာ၍ ပြည်ပမှ တင်သွင်းကုန် ကန့်သတ်ခဲ့ရပြီး လောင်စာဆီ၊ မီးဖိုချောင်သုံး ဓာတ်ငွေ့၊ ဆေးဝါးနှင့် အစားအသောက်ကဲ့သို့ မရှိမဖြစ် နေ့စဉ်သုံး ကုန်ပစ္စည်းများ ပြတ်လပ်နေခဲ့ရသည်။

Source: AP

CNI International News

မက်ဒရစ်၊ မေ ၄

ပီဂါးဆပ် spyware နှင့်ပတ်သက်၍ အမျိုးသားလုံခြုံရေးအငြင်းပွားမှုများ တိုးလာနေချိန်၌ ဖုံးကွယ်ထားစရာ ဘာတစ်ခုမှ မရှိကြောင်း စပိန်အစိုးရက မေလ ၃ ရက်တွင် ပြောကြားခဲ့သည်။

ယင်း spyware ကိစ္စသည် စပိန်ဝန်ကြီးချုပ်၏ လက်ကိုင်ဖုန်းထဲသို့ ဟက်ကာနှင့်အမည်မသိ ထောက်လှမ်းရေး အေးဂျင့်က ကက်တလိုနီးယား ဒေသခွဲထွက်ရေးသမားများနှင့် ဆက်စပ်၍ ခြေရာခံထောက်လှမ်းခြင်းလည်း ပါဝင်ကြောင်း အေပီသတင်းတစ်ပုဒ်တွင် တွေ့ရသည်။

လိုအပ်ပါက အစိုးရဌာနဆိုင်ရာစာရွက်စာတမ်းများ ခွဲခြားသတ်မှတ်ခြင်းအပါအဝင် စပိန်နိုင်ငံအတွင်း ဆိုရှယ် လစ်ဦးဆောင်သော ညွန့်ပေါင်းအစိုးရအနေဖြင့် တရားစီရင်ရေးအာဏာပိုင်များနှင့် အစွမ်းကုန် ပူးပေါင်း ဆောင်ရွက်သွားမည်ဖြစ်ကြောင်း ကက်ဘိနက်အဖွဲ့ပြောခွင့်ရသူအမျိုးသမီး အစ္စာဘယ်ရိုဒရီဂွက်ဇ် (Isabel Rodriguez) က ကတိပြုခဲ့သည်။

မကြာသေးမီက ထောက်လှမ်းရေးမွှေနှောက်ခံရမှုအတွက် နိုင်ငံရေးထိခိုက်နစ်နာမှုများကို ထိန်းသိမ်းရန် အစိုးရ အနေဖြင့် ကြိုးပမ်းနေရခြင်းကြောင့် အပတ်စဉ် ဝန်ကြီးအဖွဲ့အစည်းအဝေးအပြီး၌ ထူးခြားသော လုံခြုံရေး ကျိုးပေါက်မှုများနှင့်ပတ်သက်၍ ရိုဒရီဂွက်ဇ်သည် မေးခွန်းထုတ်စရာအများအပြားနှင့် ရင်ဆိုင်နေရသည်။

ဝန်ကြီးချုပ် ပီထရိုဆန်ချက်ဇ်နှင့် ကာကွယ်ရေးဝန်ကြီး မာဂရီတာရိုဘဲလ်တို့၏ လက်ကိုင်ဖုန်းများအတွင်းသို့ နိုင်ငံတကာအစိုးရအဖွဲ့အစည်းများကို ဦးတည်ပစ်မှတ်ထားသော ပီဂါးဆပ် spyware သည် ယမန်နှစ်က ကူးစက် ခံခဲ့ရကြောင်း စပိန်အစိုးရက မေလ ၂ ရက်တွင် ပြောကြားခဲ့သည်။

စပိန်နိုင်ငံ အရှေ့မြောက်ပိုင်း ကက်တလိုနီးယားဒေသရှိ ခွဲထွက်ရေးလှုပ်ရှားမှုနှင့် ချိတ်ဆက်ထားသည့် လူပေါင်း ဆယ်ဂဏန်းမျှ၏ လက်ကိုင်ဖုန်းများထဲသို့ ပီဂါးဆပ်သည် မည်သည့်အတွက် ကူးစက်ခံရခြင်းကို ရှင်းပြရန် အစိုးရ အပေါ် ဖိအားပေးခံနေရပြီဖြစ်သည်။

စပိန်တွင် လျှို့ဝှက်ထောက်လှမ်းရေးဆိုင်ရာစစ်ဆင်ရေးများသည် တရားစီရင်ရေးအာဏာပိုင်များ၏ သဘောတူ ခွင့်ပြုချက်လိုအပ်သည်။

ဆိုက်ဘာကိရိယာများကို အလွဲသုံးစားလုပ်မှုနှင့် စပ်လျဉ်းပြီး ဥရောပတွင် စိုးရိမ်မှုများ တိုးလာနေချိန်၌ ယခုကဲ့သို့ စပိန်အစိုးရဘက်မှ ထုတ်ဖော်ပြောဆိုမှု ပေါ်ပေါက်လာခဲ့ခြင်းဖြစ်သည်။

ဥရောပလွှတ်တော် (ပါလီမန်) အဖွဲ့သည် ဟန်ဂေရီ၊ ပိုလန်နှင့် ဂရိနိုင်ငံအစိုးရများအား ထောက်လှမ်းရေးမှုများနှင့် ဆက်စပ်နေသည်ဟု စွပ်စွဲခဲ့ပြီး ပီဂါးဆပ် Spyware လှုပ်ရှားမှုများအကြောင်း စုံစမ်းစစ်ဆေးမှုကို ယခင်လက စတင်ခဲ့သည်။

Source: AP

CNI International News

မော်စကို၊ မေ ၄

ရုရှားသမ္မတ ဗလာဒီမာပူတင်နှင့် ပြင်သစ်သမ္မတ အီမန်နွယ်မက်ခရွန်တို့ မေလ ၃ ရက်တွင် တယ်လီဖုန်းဖြင့် ဆက်သွယ်ပြောကြားခဲ့ရာ ယူကရိန်းအစိုးရဘက်မှ အလေးအနက်ကြိုတင်ပြင်ဆင်မှု မတွေ့ရသေးသော်လည်း ရုရှားအနေဖြင့် တွေ့ဆုံဆွေးနွေးရေး လမ်းဖွင့်ထားဆဲဖြစ်သည်ဟု ပူတင်က ပြောကြားခဲ့ကြောင်း ကရင်မလင် သမ္မတနန်းတော်သတင်းစာရှင်းလင်းပွဲ၌ ထုတ်ဖော်ကြေညာခဲ့သည်။

“ရုရှားသမ္မတက ပြင်သစ်သမ္မတကို ယူကရိန်းကိုယ်စားလှယ်တွေနဲ့ စေ့စပ်ညှိနှိုင်းရေး အခြေခံချဉ်းကပ်ပုံ ချဉ်းကပ် နည်း ရှင်းပြခဲ့ပါတယ်။

အထူးသဖြင့် ကိယက်ဗ်ရဲ့ ရှေ့နောက်မညီတဲ့စကားတွေနဲ့ အလုပ်သဘောဆွေးနွေးမှု ကြိုတင်ပြင်ဆင်တာ မတွေ့ရပေမယ့် ရုရှားကတော့ တွေ့ဆုံဆွေးနွေးရေး လမ်းဖွင့်ထားတုန်းပါလို့ ကျနော်တို့ သမ္မတက အလေးပေးပြောကြားခဲ့ပါတယ်” ဟု ကရင်မလင်က ကြေညာခဲ့သည်။

ဥရောပသမဂ္ဂ (EU) နိုင်ငံများသည် ယူကရိန်းတပ်ဖွဲ့များ ကျူးလွန်သောစစ်ရာဇဝတ်မှုများကို လျစ်လျူရှုထား ကြောင်း ပူတင်က မက်ခရွန်ကို ဆက်လက်ပြောကြားခဲ့သည်။

“ယူကရိန်းတပ်ဖွဲ့တွေ ကျူးလွန်ခဲ့တဲ့ စစ်ရာဇဝတ်မှုတွေနဲ့ ဒွန်ဘတ်စ်ဒေသမှာ ငြိမ်းချမ်းစွာ နေထိုင်တဲ့ အရပ်သား တွေကို သတ်ဖြတ်မှုတွေ၊ မြို့ရွာတွေကို အပြင်းအထန် ဗုံးကြဲတာတွေကို EU အဖွဲ့ဝင်နိုင်ငံတွေက လျစ်လျူရှုခဲ့ပါ တယ်လို့ ပူတင်က ပြောခဲ့ပါတယ်” ဟု ရုရှားသမ္မတရုံး၏ ထုတ်ပြန်ချက်တွင် ရေးသားထားသည်။

ထိုသို့ စစ်ရာဇဝတ်မှုများ အဆုံးသတ်ဖို့ အနောက်အုပ်စုက ကိယက်ဗ်အာဏာပိုင်များကို ဖိအားပေးပြီး ယူကရိန်း ထံသို့ လက်နက်ထောက်ပံ့မှု ရပ်ဆိုင်းသင့်ကြောင်း ရုရှားက ထောက်ပြခဲ့သည်။

၎င်းအပြင် ပူတင်နှင့် ပြင်သစ်သမ္မတတို့သည် ကမ္ဘာ့စားနပ်ရိက္ခာဖူလုံရေးကိုလည်း နှီးနှောတိုင်ပင်ခဲ့ကြသည်။

“ကမ္ဘာ့စားနပ်ရိက္ခာဖူလုံရေးအတွက် ပြင်သစ်က စိုးရိမ်နေကြောင်း” ကရင်မလင်သတင်းစာရှင်းလင်းပွဲတွင် ပြောကြားခဲ့သည်။ ထိုစိုးရိမ်မှုဖြစ်ပွားရခြင်းမှာလည်း အနောက်နိုင်ငံများ၏ ပိတ်ဆို့အရေးယူမှုကြောင့်ဖြစ်ကြောင်း တာ့စ်သတင်းဌာနက ဆက်လက်ရေးသားဖော်ပြသည်။

“ဒီအခြေအနေမှာ အနောက်နိုင်ငံတွေရဲ့ပိတ်ဆို့အရေးယူမှုတွေကြောင့် အနေအထားပိုဆိုးလာတယ်လို့ ပူတင်က ပြောခဲ့ပါတယ်။ ကမ္ဘာလုံးဆိုင်ရာ ထောက်ပံ့ပို့ဆောင်ရေး အခြေခံအဆောက်အအုံတွေရဲ့ အရေးပါမှုကို ဦးစားပေး ပြောခဲ့တာဖြစ်ပါတယ်” ဟု ကရင်မလင်က သတင်းထုတ်ပြန်ခဲ့သည်။

မကြာသေးမီက ပြင်သစ်သမ္မတရွေးကောက်ပွဲတွင် နောက်ထပ်သက်တမ်းအတွက် မက်ခရွန် ရွေးကောက်တင် မြှောက်ခံရခြင်းကိုလည်း ပူတင်က ဝမ်းမြောက်ကြောင်း မုဒိတာစကား ပြောကြားခဲ့သည်။

ယခု တယ်လီဖုန်းဖြင့် ဆက်သွယ်ပြောဆိုမှုသည် ပူတင်နှင့်မက်ခရွန်တို့အကြား မက်ခရွန်၏သမ္မတအဖြစ် ဒုတိယ သက်တမ်း အရွေးခံရပြီးနောက် ပထမဆုံးအကြိမ် ဆက်သွယ်ပြောဆိုမှုဖြစ်သည်။ ပြီးခဲ့သည့် မတ်လ ၂၉ ရက်တွင် အဆိုပါခေါင်းဆောင်နှစ်ဦးသည် နောက်ဆုံးအကြိမ် တယ်လီဖုန်းခေါ်ဆိုခဲ့ကြသည်။ အလားတူ ဧပြီ ၃၀ ရက်တွင် မက်ခရွန်သည် ယူကရိန်းသမ္မတ ဗိုလိုဒီမီယာဇာလန်းစကီးနှင့် တယ်လီဖုန်းခေါ်ဆိုခဲ့သေးသည်။

Source: တာ့စ်သတင်းဌာန

CNI International News

ဝါရှင်တန်၊ မေလ ၃

နျူကလီးယားစစ်ပွဲတွင် အောင်နိုင်သူမရှိဟု ရုရှားနှင့်အမေရိကန်တို့ သဘောတူခဲ့ကြကြောင်း အိမ်ဖြူတော် သတင်းပြန်ကြား ရေးတာဝန်ခံ ဂျန်ဆာကီက မေလ ၂ ရက်တွင် ပုံမှန်ကျင်းပသည့် သတင်းစာ ရှင်းလင်းပွဲ၌ ပြောကြားခဲ့သည်ဟု တာ့စ်သတင်း ဌာနက ရေးသားဖော်ပြခဲ့သည်။

“ဒါဟာ နျူကလီးယားစစ်ပွဲ မဟုတ်ဘူးလို့ ရုရှားဘက်က ရှင်းရှင်းလင်းလင်း ပြောထားပြီး ဖြစ်ပါတယ်။ အဲဒါကို ကျမတို့ သဘောတူပါတယ်”ဟု ဂျန်ဆာကီက ပြောကြားခဲ့သည်။

အမေရိကန်သမ္မတ ဂျိုးဘိုင်ဒန်အနေဖြင့် ယူကရိန်းသို့ အမေရိကန်တပ်များ စေလွှတ်ရန် ဆန္ဒမရှိကြောင်း ၎င်းက ဆက်လက် ပြောကြားခဲ့သည်။

“သမ္မတရဲ့အမြင်ကို ကျမ မှတ်သားပါတယ်။ ပြီးတော့ သူ့ရဲ့ရပ်တည်ချက်က ဒီစစ်ပွဲကို တိုက်ဖို့ အမေရိကန်တွေကို မြေပြင်မှာ နေရာချထားတာမျိုး မရှိပါဘူး။ ဒါကို အမေရိကန်နိုင်ငံသားတွေ သိအောင် ကျမတို့ ထပ်လောင်း အတည်ပြုပါတယ်” ဟု ဂျန်ဆာကီက ရှင်းပြခဲ့သည်။

ယူကရိန်းနိုင်ငံတဝန်း ဖြစ်ပေါ်နေသည့် အခြေအနေသည် မြောက်အတ္တလန္တိတ် စစ်စာချုပ်အဖွဲ့နှင့် ရုရှားတို့အကြား သွယ်ဝိုက် သော စစ်ရေးပဋိပက္ခ (proxy war) အဖြစ် ပြောင်းလဲသွားသည်ဆိုသည့် အဆိုကိုလည်း ၎င်းက ငြင်းပယ်ခဲ့သည်။

ပူတင်နဲ့ဘိုင်ဒန်

“ဒါဟာ သွယ်ဝိုက်စစ်ပွဲ (proxy war) မဟုတ်ပါဘူး။ တကယ်ဖြစ်နေတာက ရုရှားနဲ့ယူကရိန်းအကြား စစ်ပွဲပါ။ နေတိုး မပါပါ ဘူး။ အမေရိကန်ကလည်း ဒီပွဲမှာ ဝင်မတိုက်ပါဘူး။ ဒါမျိုး ထပ်မပြောဖို့ အရေးကြီးတယ်လို့ ကျမ ထင်ပါတယ်။ ကရင်မလင်က ဒီစစ်မျက်နှာမှာ ဒါမျိုးစကား ပြောနေတာ ကြားရပါတယ်” ဟု ၎င်းက သတင်းထောက်များကို ပြောကြားခဲ့သည်။

ရုရှားသမ္မတ ဗလာဒီမာပူတင်သည် ဒွန်ဘတ်စ်ဒေသရှိ သမ္မတနိုင်ငံ နှစ်နိုင်ငံမှ ခေါင်းဆောင်များက အကူအညီ တောင်းခံလာ သည်ဟု အကြောင်းပြလျက် အထူးစစ်ဆင်ရေး အမည်တပ်ထားသော ကျူးကျော်မှုကို ဖေဖော်ဝါရီ ၂၄ ရက်တွင် စတင်ခဲ့သည်။

မော်စကိုသည် ယူကရိန်းနယ်မြေများကို သိမ်းပိုက်ရန် အစီအစဉ် မရှိသော်လည်း လက်နက်ဖြုတ်သိမ်းရေးနှင့် နာဇီကင်းမဲ့စေ ရေး လုပ်ဆောင်ရန် ရည်ရွယ်သည်ဟု ပူတင်က ပြောကြားခဲ့သည်။ မော်စကိုအပေါ် အနောက်အုပ်စု ပိတ်ဆို့ အရေးယူမှုများ သည် ရန်လိုသည့် လက္ခဏာရှိနေကြောင်း မတ်လ ၁၆ ရက်တွင် ပူတင်က စွပ်စွဲခဲ့သည်။

Source: တာ့စ်သတင်းဌာန

CNI International News

လန်ဒန်၊ မေလ ၃

အီလက်ထရောနစ် စစ်ဆင်ရေးကိရိယာများ၊ ဘက်ထရီသုံး တန်ပြန်ရေဒါစနစ် အပါအဝင် ယူကရိန်းသို့ စစ်ရေး အကူအညီ စတာလင်ပေါင် သန်း ၃၀၀ (အမေရိကန်ဒေါ်လာ ၃၇၅ သန်း) ထပ်မံ ပေးအပ်သွားမည်ဟု ဗြိတိန်အစိုးရက မေလ ၂ ရက်တွင် ကြေညာခဲ့ကြောင်း ရိုက်တာသတင်းအရ သိရသည်။

ယူကရိန်းနိုင်ငံအတွင်းသို့ ဖေဖော်ဝါရီ ၂၄ ရက် ရုရှားကျူးကျော်စစ် စတင်ပြီးနောက်ပိုင်း ဗြိတိန်ထံမှ တင့်ကားဖျက်ဒုံးကျည် ၅၀၀၀ ကျော်၊ လေကြောင်းကာကွယ်ရေးစနစ် ၅ ခု အပါအဝင် တခြား ခဲယမ်းမီးကျောက်၊ ဖောက်ခွဲရေးပစ္စည်းများ ပေးပို့ ကူညီခဲ့သည်။ ရုရှားထိုးစစ်ကြောင့် ယူကရိန်းနိုင်ငံတဝန်း လူပေါင်းထောင်နှင့်ချီ၍ သေဆုံးခဲ့ပြီး အများအပြား ဒဏ်ရာရခဲ့ ကြသည်။

ယူကရိန်းသို့ မကြာသေးမီက စစ်ရေးအကူအညီ ဒေါ်လာ ၃ ဘီလီယံ ပေးအပ်ခဲ့သော အမေရိကန်ကလည်း နောက်ထပ် ဒေါ်လာ ဘီလီယံ ၂၀ ကျော် အတည်ပြုပေးရန် အမေရိကန် ကွန်ဂရက်လွှတ်တော်ထံသို့ သမ္မတ ဂျိုးဘိုင်ဒန်က ယခင် ရက်သတ္တပတ်၌ တောင်းဆိုခဲ့သည်။

မြောက်အတ္တလန္တိတ်စစ်စာချုပ်အဖွဲ့(နေတိုး) နိုင်ငံများသည် ယူကရိန်းသို့ လက်နက်ခဲယမ်း အဆက်မပြတ် တင်ပို့၍ တစ်ဆင့် ခံ စစ်ပွဲဆင်နွှဲနေကြောင်း ပြီးခဲ့သည့် သီတင်းပတ်၌ ရုရှားက စွပ်စွဲခဲ့သည်။

ယူကရိန်းကို ထောက်ပံ့ပေးခဲ့တဲ့ တင့်ကားဖျက်လက်နက်များ

ရုရှားသည် နယ်မြေသိမ်းယူရန် ရည်ရွယ်ချက်ဖြင့် ရန်လိုသည့် စစ်ပွဲကို စတင်ခဲ့ကြောင်း၊ ပိုမိုကျယ်ပြန့်သော ပဋိပက္ခဖြစ် အောင် လှည့်ပတ်ခြိမ်းခြောက်နေကြောင်း ယူကရိန်းနိုင်ငံနှင့် အနောက်အုပ်စုတို့က တုံ့ပြန်စွပ်စွဲခဲ့ကြသည်။

ညဘက်မြင်ကွင်းသုံး ကိရိယာများ၊ ဂြိုဟ်တု အသွားအလာတားဆီးမှု ကိရိယာများ၊ ယူကရိန်းတပ်ဖွဲ့ဝင်များနှင့် အရပ်ဘက် အရာရှိများအတွက် သံချပ်ကာယာဉ်များ၊ ဒရုန်းများလည်း ဆက်လက် ပေးအပ်သွားရန် စီစဉ်နေကြောင်း ဗြိတိန်ဝန်ကြီးချုပ် ဘောရစ်ဂျွန်ဆင်၏ရုံးက သတင်းထုတ်ပြန်ခဲ့သည်။

ဗြိတိန်သည် စစ်ရေးအကူအညီများ သိသိသာသာ ပေးအပ်ခဲ့သော်လည်း ယခုအချိန်အထိ ယူကရိန်းထွက်ပြေးလာသည့် ဒုက္ခသည် ၅ သန်းကျော်အနက် အနည်းငယ်ကိုသာ လက်ခံ၍ ခိုလှုံခွင့်ပေးခဲ့သည်။ ပြီးခဲ့သည့် သီတင်းပတ်၌ ယူကရိန်းနိုင်ငံသား ၈၆,၁၀၀ ကို ပြည်ဝင်ခွင့်ဗီဇာ ထုတ်ပေးခဲ့ရာ ၎င်းတို့အနက် ၂၇,၁၀၀ မှာ ဗြိတိန်နိုင်ငံအတွင်းသို့ ရောက်ရှိလာခဲ့သည်။

Source: Reuters

CNI International News

ဂျေရုဆလင်၊ မေလ ၃

အဒေါ့ဖ်ဟစ်တလာသည် ဂျူးလူမျိုးမှ မြစ်ဖျားခံ၍ ဆင်းသက် ပေါက်ဖွားလာသူဖြစ်ကြောင်း ရုရှားနိုင်ငံရေးဝန်ကြီး ဆာဂျေ လာဗရော့၏ ပြောကြားချက်ကို အစ္စရေးက မေလ ၂ ရက်တွင် ပြင်းပြင်းထန်ထန် ရှုတ်ချခဲ့ပြီး ထိုပြောကြားချက်မှာ နာဇီ မီးလောင်တိုက်သွင်းမှု၏ ကြောက်မက်ဖွယ်ကောင်းပြီး ခွင့်မလွှတ်နိုင်စရာ လိမ်လည်လှည့်ဖျားမှုသာ ဖြစ်ကြောင်း တုံ့ပြန်ခဲ့ သည်။

လာဗရော့၏ ပြောကြားချက်ကို အနောက်အုပ်စု ခေါင်းဆောင်များကလည်း ရှုတ်ချခဲ့ကြပြီး ယူကရိန်းသမ္မတ ဗိုလိုဒီမီယာ ဇာလန်းစကီးက “ရုရှားသည် ဒုတိယကမ္ဘာစစ်၏ သင်ခန်းစာများကို မေ့သွားပြီ” ဟု စွပ်စွဲခဲ့သည်။

ရုရှားနှင့် ဆက်ဆံရေး သိသာစွာ ယိုယွင်းလာသည့် အရိပ်အယောင် ပြသလာသော အစ္စရေးနိုင်ငံခြားရေးဝန်ကြီးက ၎င်းနိုင်ငံ အတွင်းရှိ ရုရှားသံအမတ်ကို ဆင့်ခေါ်၍ တောင်းပန်စကား ပြောကြားရန် တိုက်တွန်းခဲ့သည်။

“ဒီလို လိမ်ညာမှုတွေဟာ ဂျူးတွေကို သူတို့ကျူးလွန်ခဲ့တဲ့ သမိုင်းတလျှောက် ကြောက်စရာကောင်းတဲ့ ရာဇဝတ်မှုတွေအတွက် သူတို့ကိုယ် သူတို့ စွပ်စွဲဖို့ ရည်ရွယ်တာပဲဖြစ်တယ်” ဟု အစ္စရေးဝန်ကြီးချုပ် နာ့ဖ်တလီဘန်းနက်က ကြေညာချက် တစ်စောင် ထုတ်ပြန်၍ ပြောကြားခဲ့သည်။

“မီးလောင်တိုက် အသွင်းခံခဲ့ရတဲ့ ဂျူးလူမျိုးတွေကို နိုင်ငံရေး ရည်ရွယ်ချက်ရှိရှိ ပြောဆိုနေတာတွေ ချက်ချင်း ရပ်တန့်ပါ” ဟု ၎င်းက ဆက်လက် ပြောကြားခဲ့သည်။

ဟစ်တလာ(GETTY IMAGES)

ယူကရိန်းသမ္မတ ဇာလန်းစကီးသည် ကိုယ်တိုင်က ဂျူးလူမျိုးဖြစ်ပါလျက် ယူကရိန်းအပေါ် ရုရှား မည်သည့် အကြောင်းကြောင့် နာဇီရှင်းလင်းရေးဟု ပြောကြားရပါသလဲဟု မေးခွန်းကို လာဗရော့က မေလ ၁ ရက်တွင် ပြန်လည်ဖြေကြားရာ၌ အထက်ပါ အတိုင်း အခိုင်အမာ မှတ်ချက်ချခဲ့ခြင်း ဖြစ်သည်။

“သူတို့က ဂျူးဖြစ်ရဲ့သားနဲ့ ဘာကြောင့် နာဇီဆန်တယ်လို့ အပုပ်ချခံရတာလဲလို့ သူတို့က ပြောလာရင်တော့ ဟစ်တလာဆို တာလည်း ဂျူးနွယ်ဖွားလို့ပဲ ကျနော် ထင်ပါတယ်။ ဒါကို အထူးတလည် ပြောစရာမလိုပါဘူး” ဟု လာရော့က Rete ရုပ်သံ လိုင်းနှင့် အင်တာဗျူးတွင် အီတလီစကားပြန်မှတဆင့် ပြောကြားခဲ့သည်။

“ဂျူးကိုယ်တိုင်ပဲ ဂျူးဆန့်ကျင်ရေး ကိုယ့်ကိုယ်ကို ပြန်လုပ်ကြတယ်လို့ ဂျူးပညာရှိတွေ ပြောခဲ့တာ ကြာပါပြီ” ဟု လာဗရော့က ထပ်လောင်း ပြောကြားခဲ့သည်။

လာဗရော့၏ မှတ်ချက်များနှင့်ပတ်သက်၍ ရုရှားက နှုတ်ဆိတ်နေကြောင်း ၎င်း၏ညစဉ် ဗွီဒီယိုမိန့်ခွန်းတွင် ဇာလန်းစကီးက ပြောကြားခဲ့သည်။ ထိုသို့ နှုတ်ဆိတ်နေသည့် သဘောမှာ ရုရှားခေါင်းဆောင်များသည် ဒုတိယကမ္ဘာစစ်၏ သင်ခန်းစာ အားလုံး ကို မေ့လျော့လိုက်ပြီဖြစ်ကြောင်း ပြသသည်ဟု ၎င်းက ဆက်လက် ပြောကြားခဲ့သည်။

အစ္စရေးဝန်ကြီးချုပ် နာ့ဖ်တလီဘန်းနက် (GETTY IMAGES)

“အဲဒါမှမဟုတ် သူတို့ဟာ ဒီလိုသင်ခန်းစာတွေကို တစ်ခါမှ မလေ့လာဖူးတာလည်း ဖြစ်နိုင်တယ်” ဟု ဇာလန်းစကီးက ပြောကြားခဲ့သည်။

ရုရှားနိုင်ငံခြားရေးဝန်ကြီး၏ မှတ်ချက်သည် အန္တရာယ်များသော စကားကို ဆန့်ကျင်ပြောဆိုခြင်းအတွက် ကမ္ဘာအတွက်ပါ တာဝန်ရှိကြောင်း အမေရိကန်နိုင်ငံခြားရေးဝန်ကြီး အင်တိုနီဘလင်ကင်က တုံ့ပြန်ခဲ့သည်။

ဟစ်တလာ၏ အဘိုးတော်စပ်သူတစ်ဦး၏ နောက်ခံဇစ်မြစ် အထောက်အထားကို သေချာစွာ မသိရသော်လည်း ဂျူးလူမျိုးဖြစ် နိုင်ကြောင်း ခိုင်မာသည့် အထောက်အထား မတွေ့ရဘဲ ထင်ကြေးပေးမှုအဆင့်သာ ရှိသည်ဟု ရိုက်တာသတင်းတွင် ဆက် လက် ရေးသားထားသည်။

အစ္စရေးနိုင်ငံဆိုင်ရာ ရုရှားသံရုံး (သို့မဟုတ်) မော်စကိုရှိ လာဗရော့ထံသို့ ရိုက်တာက သဘောထား မှတ်ချက် တောင်းခံခဲ့သော် လည်း ချက်ချင်းတုံ့ပြန်ခြင်း မရှိပေ။

ဖေဖော်ဝါရီလ ရုရှားကျူးကျော်မှု စတင်ပြီးနောက် အစ္စရေးက ယူကရိန်းကို ထောက်ခံကြောင်း ပြောကြားခဲ့သည်။ သို့သော် အိမ်နီးချင်း ဆီးရီးယားနိုင်ငံတွင် အင်အားကောင်းနေသည့် ရုရှားနှင့် ဆက်ဆံရေး မတင်းမာစေရန် အစ္စရေးက သတိထားခဲ့ပြီး ရုရှားအပေါ် တိုက်ရိုက် ဝေဖန်ခြင်းများကို ကျူးကျော်မှု အစောပိုင်းကာလ၌ ရှောင်ရှားခဲ့သည့်အပြင် ရုရှားနှင့်ပတ်သက်၍ တရားဝင် ပိတ်ဆို့ အရေးယူမှုများလည်း မပြုလုပ်ခဲ့ပေ။

Source: Reuters

CNI International News

ရုတ်ဒ်တောင်း၊ မေလ ၃

ဗြိတိသျှဗာဂျင်ကျွန်းစု(BVI)ကို ဗြိတိန်၏ တိုက်ရိုက်အုပ်ချုပ်ရေးအောက်တွင် ထားရှိရန် အဆိုပြုချက်အား ရာနှင့်ချီသော ကျွန်းသူကျွန်းသားများက ကန့်ကွက် ဆန္ဒပြခဲ့ကြောင်း အယ်လ်ဂျာဇီးယား သတင်းအရ သိရသည်။

အမေရိကန်ပိုင် မီယာမီမြို့တွင် မူးယစ်ဆေးဝါး စွဲချက်ဖြင့် BVI ဝန်ကြီးချုပ်ကို ဖမ်းဆီးလိုက်ပြီးနောက် မေလ ၂ ရက်တွင် အဆိုပါ ချီတက်ဆန္ဒပြမှုများ ဖြစ်ပွားခဲ့သည်။

ဘုရင်မကြီး အဲလိဇယက်၏ နယ်မြေဆိုင်ရာ ကိုယ်စားလှယ်က ဧပြီ ၂၉ ရက်တွင် ထုတ်ပြန်သည့် အစီရင်ခံထဲတွင် “ BVI ရှိ ဒေသခံများ၏ ရပိုင်ခွင့်များအနက် အုပ်ချုပ်မှု အဆင့်အတန်းများ ပြန်လည်ရယူရန်အတွက် လန်ဒန်က တိုက်ရိုက်အုပ်ချုပ်၍ ထိရောက်စွာ ဆောင်ရွက်သင့်ကြောင်း ” ဖော်ပြထားသည်။

ထိုရက် မတိုင်မီကပင် BVI ဝန်ကြီးချုပ် အင်ဒရူးဖာဟိုင်း (Andrew Fahie) နှင့် နယ်မြေဆိုင်ရာ ဆိပ်ကမ်းများ ညွှန်ကြားရေးမှူး တို့ကို အမေရိကန် အာဏာပိုင်များ၏ စစ်ဆင်ရေးကြောင့် အကျဉ်းချထားခဲ့သည်။

မေလ ၂ ရက်တွင် တက်ကြွ လှုပ်ရှားသူများသည် တော်တိုလာ (Tortola) ကျွန်း၊ ရုတ်ဒ်တောင်း (Road Town) ရှိ မြို့တော်ဝန် ဂျွန်ရန်ကင် (John Rankin)၏ ရုံးခန်းအပြင်ဘက်တွင် စုဝေး၍ “ ဗြိတိန်အုပ်ချုပ်ရေး အလိုမရှိ ” ဟူသော ဆိုင်းဘုတ်များ ကိုင် ဆောင်ကာ ကြွေးကြော်ခဲ့ကြသည်။

“ ဗြိတိန်အစိုးရနဲ့ ကမ္ဘာကို ကျနော်တို့ ပေးချင်တဲ့ သတင်းစကားကတော့ ဒီမြေကို တိုက်ရိုက်အုပ်ချုပ်လို့ မရဘူးဆိုတာပါ ” ဟု ဆန္ဒပြသူတစ်ဦးဖြစ်သည့် လုဟော့ဒ်စမစ် (Luce Hodge-Smith) က ပြောကြားခဲ့သည်။

ဗြိတိန် ဝန်ကြီးချုပ်(GETTY IMAGES)

ယခုဆန္ဒပြပွဲသည် အစီရင်ခံစာပါ တွေ့ရှိချက်များကို ဆွေးနွေးရန်အတွက် ရောက်ရှိလာသူ အာရှနှင့်အရှေ့အလယ်ပိုင်းဆိုင်ရာ ဗြိတိန်နိုင်ငံခြားရေးဝန်ကြီး အာမန်ဒါမေးလင်း (Amanda Miliing) ၏ ခရီးစဉ်နှင့်လည်း တိုက်ဆိုင်နေသည်။

“စုံစမ်းရေးကော်မရှင်က အစီရင်ခံစာ ထုတ်ပြန်ပြီးတော့ မနေ့ကပဲ BVI ကို ကျမရောက်လာခဲ့ပါတယ်” မေးလင်းက မေလ ၂ ရက်တွင် တွစ်တာလူမှုကွန်ရက်၌ ရေးသားလွှင့်တင်ခဲ့သည်။

“BVI ရဲ့ ပြည်သူတွေ အကောင်းဆုံး အကျိုးစီးပွားဖြစ်ထွန်းဖို သဘောထားအမြင်ကို နားထောင်ဖို့၊ BVI ခေါင်းဆောင်တွေ၊ အတိုက်အခံတွေ၊ လူမှုအဖွဲ့တွေနဲ့ ကဏ္ဍအသီးသီးက ကျွမ်းကျင်သူတွေနဲ့ ထိတွေ့ဆက်ဆံဖို့ မျှော်လင့်ပါတယ်” ဟု ၎င်းက ဆက်လက် ရေးသားထားသည်။

BVI သည် ကာရေဘီယံ ပင်လယ်အတွင်းရှိ ကိုယ်ပိုင်အုပ်ချုပ်ခွင့်ရ ကျွန်းစုဖြစ်ပြီး ခန့်မှန်းခြေ လူဦးရေ ၃၅,၀၀၀ ခန့် နေထိုင် ကြပြီး ၎င်း၏ ကာကွယ်ရေးနှင့် နိုင်ငံခြားရေးမူဝါဒတို့ကို ဗြိတိန်အစိုးရက နိုင်ငံရပ်ခြား နယ်မြေတစ်ခုအဖြစ် ကြီးကြပ် အုပ်ချုပ် သည်။

ထိုနယ်မြေသည် ကမ္ဘာ့ထိပ်တန်း ကမ်းလွန် အခွန်ကင်းလွတ်ခဲ့ရသည့် စခန်းများထဲမှ တစ်ခုဖြစ်ပြီး ဒေသန္တရအစိုးရနှင့် ဗြိတိန်၊ လန်ဒန်အစိုးရ နှစ်ရပ်စလုံးက နယ်မြေအတွင်း တရားမဝင် နိုင်ငံခြားငွေ စီးဆင်းမှုကို လျစ်လျူရှုထားကြောင်း အကျင့်ပျက် ခြစားမှု တိုက်ဖျက်ရေးသမားများက စွပ်စွဲထားကြသည်။

Source: Aljazeera

CNI International News

မော်စကို၊ မေ ၂

ရုရှားအစိုးရသည် မေလ ၉ ရက်တွင် အောင်ပွဲခံနေ့သီးခြားသတ်မှတ်၍ ယူကရိန်းစစ်ဆင်ရေးကို အဆုံးသတ်မည် မဟုတ်ကြောင်း ရုရှားနိုင်ငံခြားရေးဝန်ကြီး ဆာဂျေလာဗရော့က အီတလီနိုင်ငံမှ မီဒီယာဆက် (Mediaset) ရုပ်သံ လိုင်းနှင့် အင်တာဗျူးတွင် ပြောကြားခဲ့သည်ဟု ရုရှားအာဘော် တာ့စ်သတင်းဌာနက ရေးသားဖော်ပြသည်။

“ကျနော်တို့တပ်ဖွဲ့တွေဟာ အောင်ပွဲနေ့ဆိုတာ အပါအဝင် တိကျတဲ့ရက်စွဲတစ်ခုသတ်မှတ်ပြီးတော့ ဒီလို အယောင် ပြလုပ်ဆောင်ချက်တွေ လုပ်မှာမဟုတ်ပါဘူး” ဟု မီဒီယာဆက်၏ မေးခွန်းတစ်ခုကို လာဗရော့က တုံ့ပြန်ခဲ့သည်။

“ကျနော်တို့ အမြဲတမ်းလုပ်နေကျပုံစံအတိုင်းပဲ မေလ ၉ ရက်ကို အလေးအနက် ဂုဏ်ပြုသွားဖို့ ရှိပါတယ်” ဟု ၎င်းက ထပ်လောင်းပြောကြားခဲ့သည်။

ယူကရိန်းတွင် ရုရှား၏အထူးစစ်ဆင်ရေးအရှိန်အဟုန်သည် အရပ်သားများနှင့် ၎င်းတို့တပ်ဖွဲ့ဝင်များအတွက် အန္တရာယ်များ ဦးစွာလျော့ပါးသက်သာရေးအပေါ် မူတည်ကြောင်း ၎င်းက ဆက်လက်ပြောကြားခဲ့သည်။

မိမိတို့စစ်ဆင်ရေးသည် အရပ်သားများ ဘေးကင်းမှုအာမခံရန်နှင့် ယူကရိန်းအရပ်သားများထံ ရုရှားခြိမ်းခြောက်မှု မရောက်ရှိစေရန် သေချာတိကျစွာ ရည်ရွယ်စီစဉ်ထားကြောင်း၊ ထိုးစစ်လက်နက်များနှင့်ပတ်သက်၍ အနောက် နိုင်ငံများအနေဖြင့် မိမိတို့စစ်ဆင်ရေးသေးသိမ်အောင် ကြိုးစားနေကြသည့် နာဇီအတွေးအခေါ် ပျံ့နှံ့မှုမှာ ဆက်စပ် နေကြောင်း လာဗရော့က သဘောထားမှတ်ချက်‌ပေးခဲ့သည်။

“NBC သတင်းတွေမှာ ဒါတွေ တွေ့ဖူးတယ်။ National Interest မဂ္ဂဇင်းလည်း ကျနော် ဖတ်ရပါတယ်။ ၁၉၃၅-၁၉၃၈ ခုနှစ်တုန်းကလိုမျိုး နာဇီတွေနဲ့ စစ်ရေးဂိမ်း မကစားဖို့ သတိပေးတာမျိုးပါတဲ့ လေသံပြင်းတဲ့ ဆောင်းပါး တွေလည်း အခုတလော ပေါ်လာတယ်ဗျ” ဟု ၎င်းက အီတလီရုပ်သံလိုင်းသို့ ရှင်းပြခဲ့သည်။

Source: တာ့စ်သတင်းဌာန