CNI Sport News
၂၀၂၆ ခုနှစ်၊ ဇွန်လ ၁
စကော့တလန်အသင်းဟာ ဒဏ်ရာရရှိသွားတဲ့ နာပိုလီအသင်းကွင်းလယ်လူ ဂီလ်မောရဲ့နေရာမှာ ယူနိုက်တက် အသင်းရဲ့ဆယ်ကျော်သက်ကစားသမား တိုင်လာဖလက်ချာကို ၂၀၂၆ ကမ္ဘာ့ဖလားပြိုင်ပွဲလူစာရင်းထဲ အစားထိုး ရွေးချယ်ခဲ့ပါတယ်။
အသက် ၁၉ နှစ်အရွယ်ရှိ တိုင်လာဖလက်ချာဟာ ကူရာဆောအသင်းကို ၄ ဂိုး-၁ ဂိုးနဲ့ အနိုင်ရခဲ့တဲ့ ခြေစမ်းပွဲမှာ စကော့တလန်အသင်းအတွက် ပွဲဦးထွက်အဖြစ် လူစားဝင်ပါဝင် ကစားသွားခဲ့တာပါ။
ဂီလ်မောဟာ ဒီပွဲရဲ့ ပထမပိုင်းမှာ ရခဲ့တဲ့ ဒူးဒဏ်ရာကြောင့် စကော့တလန်အသင်း လူစာရင်းကနေ နုတ်ထွက်ခဲ့တာ ဖြစ်ပါတယ်။
ဒါရင်းဖလက်ချာရဲ့သားဖြစ်သူ တိုင်လာဖလက်ချာဟာ ဒီရာသီမှာ ယူနိုက်တက်အသင်းအတွက် လူစားဝင်အဖြစ် ၂ ပွဲ ပါဝင်ကစားခဲ့တာပါ။
တိုင်လာဖလက်ချာရဲ့အမွှာညီအစ်ကို ဂျက်ကတော့ အင်္ဂလန်အသင်းကို ကိုယ်စားပြုဖို့ ရွေးချယ်ထားပါတယ်။
စကော့တလန်အသင်းနည်းပြ စတိဗ်ကလာ့ခ်ဟာ တိုင်လာကို ကစားသမားတချို့နဲ့အတူ အသင်းရဲ့လေကျင့်မှုပြုလုပ်မယ့် လူစာရင်းထဲ ခေါ်ယူခဲ့တာ ဖြစ်ပါတယ်။
စကော့တလန်အသင်းနည်းပြစတိဗ်ကလာ့ခ်က ဒဏ်ရာရခဲ့တဲ့ ဂီလ်မောအတွက် သူဝမ်းနည်းမိပြီး အသင်း တစ်သင်းလုံးဟာ သူ့အတွက် စိတ်မကောင်းဖြစ်နေကြတယ်လို့ ပြောခဲ့ပါတယ်။
ဒါ့အပြင် စတိဗ်ကလာ့ခ်က တိုင်လာဖလက်ချာရဲ့စွမ်းဆောင်ရည်ကို အားလုံးက အထင်ကြီးခဲ့တဲ့အတွက် သူနဲ့ပတ်သက်ပြီး သံသယမရှိဘူးလို့ ပြောခဲ့တာပါ။
စကော့တလန်အသင်းဟာ ကမ္ဘာ့ဖလားပြိုင်ပွဲမတိုင်မီ နောက်ဆုံးခြေစမ်းပွဲအဖြစ် ဇွန်လ ၆ ရက် နယူးဂျာစီမှာ ဘိုလီးဗီးယားအသင်းနဲ့ ယှဉ်ပြိုင်သွားမှာဖြစ်ပါတယ်။
၁၉၉၈ ပြိုင်ပွဲနောက်ပိုင်း ကမ္ဘာ့ဖလားပြိုင်ပွဲကို ပထမဆုံး အကြိမ် ယှဉ်ပြိုင်ခွင့်ရခဲ့တဲ့ စကော့တလန်အသင်းဟာ အုပ်စု C မှာ ဘရာဇီးလ်၊မော်ရိုကို၊ဟေတီအသင်းတို့နဲ့ ကျရောက်နေပါတယ်။
Source: BBC
