CNI Sport News
၂၀၂၅ ခုနှစ်၊ ဩဂုတ် ၂၂
စပါးနဲ့ ချယ်လ်ဆီးအသင်း အပါအဝင် ပရီးမီးယားလိဂ် ထိပ်သီးအချို့ရဲ့ စိတ်ဝင်စားမှု ခံနေရတဲ့ အင်္ဂလန်ကြယ်ပွင့် မော်ဂန်ရော်ဂျာစ်က အက်စတွန်ဗီလာအသင်းမှာ ပျော်ရွှင်တယ်လို့ ပြောခဲ့ပါတယ်။
မော်ဂန်ရော်ဂျာစ်က “ကျနော် ဗီလာမှာ ပျော်ရွှင်နေပြီး ဘောလုံးကစားရတာကို နှစ်သက်ပါတယ်။ တခြားဘယ် အရာကိုမှ ကျနော် မစဉ်းစားပါဘူး။ လာမယ့် ၁၂ လ ဒါမှမဟုတ် အနာဂတ်မှာ ဘာဖြစ်မလဲဆိုတာ ကျနော် မခန့်မှန်းနိုင်ပါဘူး။ ကျနော်ဟာ ဘောလုံးကို ပျော်ပျော်ရွှင်ရွှင် ကစားပြီး ကျနော်လုပ်နိုင်တဲ့ အရာကို လူတိုင်းကို ပြသခဲ့ပါတယ်”လို့ The Times ကို ပြောခဲ့တာပါ။
စပါးအသင်းဟာ ခရစ္စတယ်ပဲလေ့စ်အသင်း ကြယ်ပွင့် အီဇီကို အာဆင်နယ်အသင်းထံ လက်လွှတ်ခဲ့ရပြီးနောက် မော်ဂန်ရော်ဂျာစ်ကို ခေါ်ယူဖို့ ပစ်မှတ်ထားလာခဲ့တယ်လို့ သတင်းတွေ ထွက်ပေါ်ခဲ့ပါတယ်။
ချယ်လ်ဆီးအသင်းကလည်း ပြီးခဲ့တဲ့ရာသီမှာ ခြေစွမ်းပြသနိုင်ခဲ့တဲ့ မော်ဂန်ရော်ဂျာစ်ကို စောင့်ကြည့်မှုတွေ ပြုလုပ်နေတာပါ။
မော်ဂန်ရော်ဂျာစ်ကိုတွေ့ရစဉ်
ဒီလို သတင်းတွေ ထွက်နေပေမယ့် မော်ဂန်ရော်ဂျာစ်ဟာ အက်စတွန်ဗီလာအသင်း အတွက်သာ အာရုံစိုက်ထားပြီး သူ့ရဲ့စာချုပ်ဟာ ၂၀၃၀ ခုနှစ် နွေရာသီအထိ ရှိနေပါတယ်။
အသက် ၂၃ နှစ်အရွယ်ရှိ မော်ဂန်ရော်ဂျာစ်ဟာ ပြီးခဲ့တဲ့ရာသီက အက်စတွန်ဗီလာအသင်းအတွက် ၅၄ ပွဲ ကစားခဲ့ ပြီး ၁၄ ဂိုး သွင်းယူကာ ဂိုးဖန်တီးမှု ၁၆ ကြိမ် ပြုလုပ်နိုင်ခဲ့တာပါ။
အဲဒါကြောင့်လည်း မော်ဂန်ရော်ဂျာစ်ဟာ ပရော်ဖက်ရှင်နယ် ဘောလုံးသမားများ အဖွဲ့အစည်းရဲ့ တစ်နှစ်တာ အကောင်းဆုံး လူငယ်ကစားသမားဆုကို ရရှိခဲ့ပါတယ်။
အက်စတွန်ဗီလာအသင်းက မော်ဂန်ရော်ဂျာစ်ကို အသင်းရဲ့အဓိက ကစားသမားအဖြစ် သတ်မှတ်ထားပြီး ဆက်ထိန်းသိမ်းဖို့ ဆုံးဖြတ်ထားတာပါ။
ပရီးမီးယားလိဂ် အဖွင့်ပွဲစဉ်မှာ နယူးကာဆယ်အသင်းနဲ့ ဂိုးမရှိ သရေကျခဲ့တဲ့ အက်စတွန်ဗီလာအသင်းဟာ ပွဲစဉ် ၂ အဖြစ် ဘရန်ဖို့ဒ်အသင်း အိမ်ကွင်းသွားရောက် ယှဉ်ပြိုင်ရမှာ ဖြစ်ပါတယ်။
Source: Goal
