CNI Sport News
၂၀၂၄ ခုနှစ်၊ ဇန်နဝါရီ ၁၈
ဘရန်ဖို့ဒ်အသင်း တိုက်စစ်မှူး အိုင်ဗန်တိုနေးက ထိပ်တန်းကလပ်မှာ ကစားချင်ပြီး ဆုဖလားတွေကို စိန်ခေါ်ချင် တယ်လို့ ပြောလိုက်ပါတယ်။
အိုင်ဗန်တိုနေးက “ကျနော်ဟာ ထိပ်တန်းအသင်းမှာ ကစားချင်သလို လူတိုင်းလည်း ထိပ်တန်းအသင်းမှာ ကစား ကာ ဆုဖလားတွေအတွက် တိုက်ပွဲဝင်ချင်ကြပါတယ်။ အခုအပြောင်းအရွှေ့မှာ ထိပ်တန်းကလပ်တစ်သင်းက ဝင်ရောက်လာပြီး မှန်ကန်တဲ့ ငွေပေးချေမှုပြုလုပ်မယ့် အချိန် ဟုတ်/မဟုတ်တော့ ဘယ်သူက သိနိုင်မှာလဲ။ ဒါပေမယ့် ကျနော်ဟာ ကွင်းထဲမှာ အကောင်းဆုံး လုပ်ဆောင်ဖို့ကိုသာ အဓိက အာရုံစိုက်သွားမှာပါ “လို့ Sky Sports ကို ပြောခဲ့တာပါ။
အိုင်ဗန်တိုနေးဟာ FA ရဲ့ လောင်းကစား စည်းမျဉ်းချိုးဖောက်ခဲ့တဲ့အတွက် ၈ လကြာ ပိတ်ပင်ခံခဲ့ရတဲ့ ပွဲပယ် ပြစ်ဒဏ်ဟာ ပြည့်သွားပြီဖြစ်တာကြောင့် ဘရန်ဖို့ဒ်အသင်းအတွက် ပြန်လည်ကစားခွင့်ရပြီ ဖြစ်ပါတယ်။
အင်္ဂလန်ကစားသမားဟာ အစောပိုင်းတုန်းက ပွဲပယ်ပြစ်ဒဏ် ကျခံနေရတဲ့အချိန်အတွင်း သူ့ကို ပံ့ပိုးပေးခဲ့တဲ့ ဘရန်ဖို့ဒ်အသင်းကို ကျေးဇူးတင်ပြီး ပြန်ပေးဆပ်သွားမယ်လို့ ပြောခဲ့တာပါ။
အိုင်ဗန်တိုနေးနဲ့ ဘရန်ဖို့ဒ်အသင်း နည်းပြကို တွေ့ရစဉ်
ဒါပေမယ့် အိုင်ဗန်တိုနေးဟာ ထိပ်တန်းအသင်းမှာ ကစားချင်တဲ့အကြောင်းကို ထပ်ပြီးပြောလာခဲ့တာ ဖြစ်ပါတယ်။
အိုင်ဗန်တိုနေးရဲ့ မှတ်ချက်ကြောင့် သူ့ကို ခေါ်ယူဖို့ စိတ်ဝင်စားနေတဲ့ ချယ်လ်ဆီးနဲ့ အာဆင်နယ်အသင်းတို့ဟာ ဇန်နဝါရီအပြောင်းအရွှေ့မှာ ခေါ်ယူနိုင်ဖို့ တွန်းအားပေး လုပ်ဆောင်သွားဖို့ ရှိနေပါတယ်။
ဘရန်ဖို့ဒ်အသင်းနည်းပြ သောမတ်စ်ဖရန့်ခ်ကတော့ အိုင်ဗန်တိုနေးကို ခေါ်ယူချင်တယ်ဆိုရင် အသင်းတွေအနေနဲ့ မယုံနိုင်ဖွယ်ကောင်းတဲ့ ကမ်းလှမ်းမှုမျိုး ပြုလုပ်ရမယ်လို့ ပြောထားခဲ့ပါတယ်။
အသက် ၂၇ နှစ်အရွယ်ရှိ အိုင်ဗန်တိုနေးဟာ ပြီးခဲ့တဲ့ရာသီက ဘရန်ဖို့ဒ်အသင်းအတွက် ၃၅ ပွဲ ပါဝင်ကစားပြီး ၂၁ ဂိုး သွင်းယူထားနိုင်ခဲ့တာပါ။
အိုင်ဗန်တိုနေးဟာ ပြီးခဲ့တဲ့ရက်သတ္တပတ် အနည်းငယ်ကတည်းက ပွဲတွေပြန်လည်ယှဉ်ပြိုင်နိုင်ဖို့ သူ့ကိုယ်သူ ပြင်ဆင်မှုတွေ ပြုလုပ်နေပြီး အခုလအစောပိုင်းက ဘရန်ဖို့ဒ်(ဘီ)အသင်းအတွက် ဟက်ထရစ်ဂိုး သွင်းယူနိုင်ခဲ့ ပါတယ်။
အိုင်ဗန်တိုနေးဟာ ဒီအပတ်ကစားမယ့် နော်တင်ဟမ်ဖောရက်စ်အသင်းနဲ့ ပွဲမှာ ဘရန်ဖို့ဒ် အသင်းအတွက် ပါဝင် ကစားပေးနိုင်တော့မှာ ဖြစ်ပါတယ်။
Source: Goal
