CNI News

၂၀၂၅ ခုနှစ်၊ ဧပြီ ၄

မြန်မာနိုင်ငံ၊ မန္တလေးတိုင်းဒေသကြီးအတွင်းမှာရှိသည့် ငလျင်ဘေးဒဏ်သင့် ပြည်သူများကို ကျန်းမာရေးကူညီ စောင့်ရှောက်မှု ပေးနေသည့် နိုင်ငံတကာနှင့် ပြည်တွင်း ပရဟိတဆေးပေးခန်းများကို အောက်ပါအတိုင်း တွေ့ရသည်။

လက်ရှိ မြန်မာနိုင်ငံတွင် ရုရှား၊ အိန္ဒိယ၊ တရုတ်၊ ၊ ဘူတန်တို့မှ ယာယီဆေးရုံများ တည်ဆောက်၍ ကျန်းမာရေး စောင့်ရှောက်မှုပေးနေပြီး ပြည်တွင်းမှ ဆေးပေးခန်းတချို့ကလည်း ဆေးဝါးများ အခမဲ့ပေးအပ်နေသည်။

CNI News

၂၀၂၅ ခုနှစ်၊ ဧပြီ ၃

ငလျင်ဘေးဒဏ်သင့်နေသော မြန်မာနိုင်ငံသို့ ကူညီကယ်ဆယ်ရေးအဖွဲ့များ စေလွှတ်၍ တရုတ်အစိုးရက မြန်မာပြည်သူများကို ကျန်းမာရေးစောင့်ရှောက်မှုများ ပေးအပ်လျက်ရှိသည်။

လက်ရှိတွင် တရုတ်အစိုးရသည် ငလျင်ဘေးသင့် ပြည်သူများကို ကူညီနိုင်ရေးအတွက် ကူညီကယ်ဆယ်ရေးအဖွဲ့များ စေလွှတ်၍ ပိတ်မိ ပြည်သူများ ရှာဖွေကယ်ဆယ်ရေး လုပ်ပေးနေသလို စားနပ်ရိက္ခာ၊ ဆေးဝါးနှင့် တခြားသော လိုအပ်သည့် ပစ္စည်းများ ထောက်ပံ့ပေးလျက်ရှိသည်။

ထို့နောက် မန္တလေးမြို့ လမ်း ၃၀၊ ၇၂ လမ်းနှင့် ၇၃ လမ်းကြားတွင် CHINESE MEDICAL Team ကိုထား၍ ယာယီဆေးရုံဖွင့်လှစ်ကာ ကျန်းမာရေးစောင့်ရှောက်မှု ပေးလျက်ရှိကြောင်း ဒေသခံများက ‌ပြောသည်။

CNI News

၂၀၂၅ ခုနှစ်၊ ဧပြီ ၃

မြန်မာနိုင်ငံ၊ မန္တလေးတိုင်းဒေသကြီး၊ ချမ်းမြသာစည်မြို့နယ်ရှိ လေယာဉ်ကွင်းအဟောင်းတွင် India Medical team က ယာယီဆေးရုံ ဖွင့်လှစ်ထားပြီး ကျန်းမာရေးစောင့်ရှောက်မှုများ ပေးအပ်လျက်ရှိသည်။

အိန္ဒိယသည် အဖွဲ့ဝင် ၁၁၈ ဦး ပါဝင်သည့် စစ်မြေပြင် ယာယီဆေးရုံအဖွဲ့ကို မန္တလေးမြို့သို့ ပို့ဆောင်ခဲ့ပြီး ခုတင် ၂၀၀ ဆံ့ ယာယီဆေးရုံကို တည်ဆောက်၍ ကျန်းမာရေး စောင့်ရှောက်မှုများ ပေးလျက်ရှိသည်။

အဆိုပါ ယာယီဆေးရုံသည် လူနာ ၁၀၄ ဦးကို ခွဲစိတ်ကုသမှုများ အပါအဝင် ကျန်းမာရေး စောင့်ရှောက်မှုများ ပေးထားပြီဟု မြန်မာနိုင်ငံဆိုင်ရာ အိန္ဒိယသံရုံးက ထုတ်ပြန်ခဲ့သည်။

ဆေးဝါး ကုသမှုများနှင့် ကျန်းမာရေး စစ်ဆေးမှုများ ပြုလုပ်လိုပါက ဖုန်း 0994245995၊ 0969239701 တို့ကို ဆက်သွယ် ချိတ်ဆက်၍ သွားနိုင်ကြောင်း သိရသည်။

အိန္ဒိယသည် မတ်လ ၂၈ ရက်က ဖြစ်ပေါ်ခဲ့သည့် ငလျင်ဘေးနှင့်ပတ်သက်ပြီး မြန်မာနိုင်ငံသို့ လူသားချင်း စာနာထောက်ထားမှု အကူအညီများ အပါအဝင် ကူညီကယ်ဆယ်ရေးအဖွဲ့များ စေလွှတ်၍ ထောက်ပံ့ပေး လျက်ရှိသည်။

CNI News

၂၀၂၄ ခုနှစ်၊ ဒီဇင်ဘာ ၁၆

စစ်ကိုင်းတိုင်းဒေသကြီး၊ နာဂကိုယ်ပိုင်အုပ်ချုပ်ခွင့်ရဒေသတွင် ကျေးလက် ဆေးပေးခန်းများ ရှိသော်လည်း ကျန်းမာရေးဝန်ထမ်း အလုံအလောက် မရှိခြင်းနှင့် ဆေးဝါးများ အလုံအလောက်မရှိခြင်းကြောင့် ကလေးငယ်များ ဖျားနာပါက ခေါင်ရည်တိုက်ကုနေရသည်ဟု နာဂအမျိုးသားပါတီ(NNP)ဥက္ကဋ္ဌ ဦးရှုမောင်က CNI သတင်းဌာနသို့ ပြောသည်။

နာဂ‌ဒေသသည် လမ်းပန်းဆက်သွယ်ရေး ခက်ခဲသည့် ဒေသဖြစ်၍ ဆေးဝါးရောက်ရှိရန် ခက်ခဲပြီး ကျန်းမာရေး အသိပညာ အားနည်းခြင်းကြောင့်လည်း အသက်ဆုံးရှုံးရသည့် လူနာများလည်း များစွာရှိနေသည်။

နာဂဒေသရှိ ကျေးလက် ဆေးပေးခန်းများတွင် ကျန်းမာရေးဝန်ထမ်း မရှိသည့်အတွက် ငွေကြေးတတ်နိုင်သည့် ဒေသခံတချို့က စစ်ကိုင်းတိုင်းဒေသကြီးအတွင်းက ဟုမ္မလင်းနှင့် ခန္တီးမြို့သို့ သော်လည်းကောင်း၊ မန္တလေးမြို့သို့ လည်းကောင်း သွားရောက် ဆေးကုသကြသော်လည်း လက်ရှိတွင် ကုန်ကျစရိတ် များပြားသည့်အတွက် မသွားနိုင် ကြတော့ကြောင်း နာဂအမျိုးသားပါတီ(NNP)ဥက္ကဋ္ဌ ဦးရှုမောင်က CNI သတင်းဌာနသို့ ပြောသည်။

နာဂဒေသကို တွေ့ရစဉ်

၎င်းက “အဆင်ပြေသလိုပေါ့ ပါရာစီတမော့မရှိရင် တချို့ရွာတွေမှာဆိုရင် ခေါင်ရည် တိုက်လိုက်တယ်။ ခေါင်ရည် တိုက်လိုက်ရင် ဆေးတိုက်ဖို့လည်း မရှိဘူး၊ ဆေးခန်းလည်း မရှိတော့ မိဘတွေက ခေါင်ရည်တိုက်လိုက်ရော။ ကလေးက မူးပြီး၊ မှိန်းပြီးတော့ အိပ်ပျော်သွားတာပေါ့။ အိပ်ပျော်သွားတော့ ဖျားတာကို မသိတော့ဘူး။ အိပ်ယာထ လာတယ်၊ နည်းနည်း ပြန်လန်းဆန်းလာတဲ့အခါ အားအင် ပြန်ပြည့်လာတဲ့အခါမှာ အဖျားကျသလို ထင်ရတယ်ပေါ့ နော်။ အဲဒီလိုမျိုးတွေလည်း ရှိတယ် ဝမ်းနည်းစရာပဲ။ နတ်ကိုးကွယ်တဲ့ဝါဒနဲ့ ကုရတဲ့ နေရာတွေလည်း ရှိတယ်။ တချို့ နည်းနည်းပါးပါး ပိုက်ဆံရှိတယ်။ ပိုက်ဆံတတ်နိုင်တဲ့ သူတွေကျတော့ ပါရာစီတမော့ ဝယ်တိုက်လိုက်၊ ဟိုနားက ဆေးနည်းနာနဲ့ ဒီနားက ဆေးနည်းနာနဲ့ အဲဒီလိုမျိုး လုပ်နေရတဲ့ သူတွေလည်း ရှိတယ်။ နည်းနည်း အခြေအနေကောင်းတဲ့ မိသားစုတွေကျတော့ ခန္တီးလောက်ကို ဆင်းတယ်၊ ဟုမ္မလင်းလောက်ကို ဆင်းတယ်။ မန္တလေးဘက်မှာ ဆေးသွားကုကြတယ်။ ဒါကလည်း ကုန်ကျစရိတ်က တော်တော်လေး မြင့်တဲ့အတွက်ကြောင့်မို့ အများစု မသွားနိုင်ကြတော့ပါဘူး” ဟု ပြောသည်။

နန်းယွန်းမြို့နယ်ရှိ ရွာအများစုတွင် ကျေးလက် ဆေးပေးခန်းများ ဆောက်လုပ်ထားပြီး ဖြစ်သော်လည်း ကျန်းမာ ရေး ဝန်ထမ်းများ အလုံအလောက် မရှိသည့်အတွက် ဒေသခံပြည်သူများ ကျန်းမာရေးပိုင်းဆိုင်ရာ အခက်အခဲ ဖြစ် နေကြကြောင်း၊ လက်ရှိ နိုင်ငံရေး အခင်းအကျင်း ကာလတွင် ပို၍ ခက်ခဲသည်ဟု နန်းယွန်းမြို့ ဒေသခံတစ်ဦးက CNI သတင်းဌာနသို့ ပြောသည်။

၎င်းက “နန်းယွန်းမှာလည်း ဆေးရုံတော့ ရှိတယ်။ မြို့နယ်ဆေးရုံ ရှိတယ်။ ဒါပေမယ့် ပန်ဆောင်မှာလည်း တိုက်နယ်ဆေးရုံ ပုံစံမျိုးရှိတယ်။ ဒါပေမယ့် ဆရာ/ဆရာမတွေ လုံလောက်မှုက လုံးဝကို မရှိဘူး။ ဆရာဝန်လည်း ၁ ယောက်၊ ၂ ယောက်ပဲရှိတယ်။ ဆရာ/ဆရာမတွေ နည်းနည်း ရှိတယ်။ ဆေးဝါးလိုအပ်ချက်လည်း အများကြီး ရှိ တယ်။ နောက်ပြီးတော့ ဆေးရုံရဲ့ facilities အပိုင်းတွေ အများကြီး လိုအပ်ချက်ရှိနေတဲ့ အခြေအနေမျိုးမှာ တကယ် နင်လားငါလားဖြစ်တဲ့ အခြေအနေမျိုးဆိုရင် အများကြီး စိန်ခေါ်မှုတွေတော့ ရှိပါတယ်။ အရင်ကတည်းက လည်း ရှိခဲ့တယ်။ အခုလက်ရှိ တိုင်းပြည် အခက်အခဲကြားမှာတော့ ပိုပြီးတော့ ခက်ခဲပါတယ်” ဟု ပြောသည်။

ရန်ကုန်၊ မန္တလေး စသည့် တိုင်းဒေသကြီးနှင့် ပြည်နယ်များမှ ကျန်းမာရေး ဝန်ထမ်း အများအပြားသည် ဝေးလံ သည့် နာဂဒေသသို့ သွားရောက် တာဝန်ထမ်းဆောင်မှုသည် မရှိသလောက် နည်းပါးသည်မှာ ခေတ်အဆက်ဆက် ပင် ဖြစ်သည်။

နာဂဒေသကို တွေ့ရစဉ်

ထို့ကြောင့် နာဂဒေသတွင် ဖြစ်ပေါ်နေသည့် ကျန်းမာရေးဝန်ထမ်း လိုအပ်ချက်ကို ဖြေရှင်းနိုင်ရန်အတွက် နိုင်ငံတော်အစိုးရအနေဖြင့် နာဂတိုင်းရင်းသားများကို ဆေးပညာသင်ကြားနိုင်ရန် အထူးအခွင့်အရေးအနေဖြင့် စီမံကိန်းတစ်ရပ် လုပ်ဆောင်ပေးရန် လိုအပ်သည်ဟု နာဂအမျိုးသားပါတီ(NNP)ဥက္ကဋ္ဌ ဦးရှုမောင်က CNI သတင်းဌာနသို့ ပြောသည်။

၎င်းက “ကျနော်တို့ နာဂမှာရှိတဲ့ ၁၀ တန်းအောင်ပြီးသား ယောကျာ်းလေးတွေ၊ ၁၀ တန်းအောင်ပြီးသား မိန်းကလေးတွေ တက္ကသိုလ် ဘွဲ့ရတဲ့ဟာတွေ ဒါလေးတွေကို အထူးစီမံကိန်းနဲ့ပဲဖြစ်ဖြစ် အရည်အချင်း တစ်ခုခု သတ်မှတ်ပြီးတော့ပဲဖြစ်ဖြစ် အဲဒီကနေ ကျနော်တို့ နာဂတောင်တန်းဒေသအတွက် သီးသန့်ဆိုပြီးတော့မှ သူနာပြု သင်တန်းကို ကျနော်တို့ မထားနိုင်ခဲ့ရင် သူနာပြုသင်တန်း အယောက် ၅၀၊ အယောက် ၂၀ အဲဒီလိုမျိုးခေါ်၊ ဆရာဝန် ဆိုလည်း တစ်တိုင်းပြည်လုံးမှာ ရန်ကုန်၊ မန္တလေး အလုပ်သင် ဘယ်လောက် သတ်မှတ်လဲ၊ နာဂဒေသမှာ အဲဒီ လောက် မဟုတ်ဘဲနဲ့ နည်းနည်း အရည်အချင်းသာတဲ့သူတွေ ရှိမယ်ဆိုရင် သူတို့ကို ဆရာဝန်ဘွဲ့ ရနိုင်တဲ့ MBS ကျောင်း ဆေးတက္ကသိုလ်မျိုးတွေကို တက်အောင် အခွင့်အလမ်းမျိုးတွေ နိုင်ငံတော်က ဖန်တီးပေးထားနိုင်တယ် ဆိုရင် ဒေသခံ နာဂဆရာဝန်လည်း ပေါ်ထွန်းလာမယ်။ ဒေသခံ နာဂသူနာပြုတွေလည်း ပေါ်ထွန်းလာမယ်။ အဲဒီလို အဓိက,က သူတို့ကိုယ်တိုင် နာဂတွေ ဖြစ်တဲ့အတွက်ကြောင့်မို့ အဲဒီနယ်မြေတွေမှာ တာဝန်ထမ်းဆောင်ကြလိမ့် မယ်လို့ သေချာပါတယ်။ အဲဒါကြောင့်မို့လို့ အဲဒီလိုနည်းနဲ့သာ ဖြေရှင်းမယ်ဆိုရင် ရေရှည်မှာ အခုလောလောဆယ် ဖြစ်နေတဲ့ပြဿနာ နောင် ၁၀ နှစ်၊ နှစ်ပေါင်း ၂၀၊ ၃၀ မှာတော့ မရှိနိုင်တော့ဘူး။ သူ့ဟာသူ အဆင်ပြေသွားမယ်။ ဒါကြောင့်မို့လို့ အဲဒီအခွင့်အလမ်းတွေကို ကျနော်တို့ လိုအပ်တယ်ပေါ့နော်” ဟု ပြောသည်။

ပြီးခဲ့သည့် NLD အစိုးရလက်ထက်တွင် နာဂကိုယ်ပိုင်အုပ်ချုပ်ခွင့်ရဒေသရှိ ကျေးရွာများတွင် ကျေးလက် ဆေး ပေးခန်းများ ဆောက်လုပ်ရန် ချမှတ်ပေးခဲ့ပြီး ၂၀၂၂ ခုနှစ်တွင် ဆောက်လုပ်ပြီးစီး သွားပြီဖြစ်ကြောင်း သိရသည်။

သို့သော်လည်း ကျန်းမာရေး ဝန်ထမ်းများ မရောက်လာသည့်အတွက် ဒေသခံပြည်သူများ အနေဖြင့် မြို့ပေါ်အထိ တက်ရောက်ပြီး ဆေးကုသမှု ခံယူနေကြရသည်။

CNI News

၂၀၂၄ ခုနှစ်၊ ဒီဇင်ဘာ ၅

ကချင်ပြည်နယ်၊ ပူတာအိုခရိုင်တွင် အိမ်သုံးဆေးဝါးပြတ်လပ်နေပြီး တချို့သော ဆေးဝါးများသည် ဈေးနှုန်း အဆမတန် မြင့်တက်သွားသည်ဟု ပူတာအို ဒေသခံများထံမှ သိရသည်။

ပူတာအိုမြို့နယ်တွင် မကြာခဏ ဆေးဝါး ပြတ်လပ်မှုနှင့် ကြုံတွေ့လေ့ရှိပြီး ပြီးခဲ့သည့် ဩဂုတ်လမှစတင်၍ ဆေးဝါး တင်သွင်းခြင်းကို ကန့်သတ်လာသည့်အပြင် လက်ရှိတွင် ဆေးဝါးသယ်ယူပို့ဆောင်သည့် မြစ်ကြီးနား - ပူတာအို လမ်းကြောင်းကို အသုံးပြုရန် မလွယ်ကူခြင်းကြောင့် လေယာဉ်ဖြင့် သယ်ဆောင်ရသည့်အတွက် ဈေးနှုန်း မြင့်တက်လာကြောင်း သိရသည်။

ယခင်က ၁၀၀၀ တန်ဆေးသည် လက်ရှိတွင် ၆၀၀၀ ကျပ်အထိ မြင့်တက်နေသည်ဟု ပူတာအို ဒေသခံတစ်ဦးက CNI သတင်းဌာနသို့ ပြောသည်။

ဆေးဆိုင် တစ်ဆိုင်ကိုတွေ့ရစဉ်

၎င်းက “တချို့ဟာတွေတော့ အကုန်လုံး ပြတ်တာ မဟုတ်ဘူး။ ရှိတော့ရှိတယ်။ ဒါပေမယ့် စုံစုံလင်လင် မရတာ။ ဆေးရောင်းတဲ့သူတွေ ပြောတာက အရင်တုန်းက ကားနဲ့ တိုက်ရိုက်၊ ကားလမ်းကောင်းတော့ တိုက်ရိုက် ရောက် လာတယ်။ လွယ်လွယ်ကူကူနဲ့ ရတာပေါ့။ ဆေးကုမ္ပဏီတွေ အကုန်လုံးက ရန်ကုန်မှာပဲ ထိုင်ကြတာ။ အခု နောက်ပိုင်း ကားလမ်းတွေက ပျက်သွားတော့ ကားလမ်းတွေက တိုက်ရိုက်မရတော့ လှမ်းမှာရင် လေကြောင်း ကနေပဲ အဓိက ထားရတော့ တင်ဖို့မလွယ်ဘူး။ ဆေးဆိုရင် အရမ်းကြီး ခက်ခဲတယ်။ ပြီးတော့ တအားကြီး ပိုက်ဆံလည်း ပိုတောင်းတယ်။ အရင်တုန်းက ကျနော်သောက်နေတဲ့ဆေးက ၁၀၀၀/၁၅၀၀ ကနေ အခုဆိုရင် ၆၀၀၀ လောက် ဖြစ်နေပြီ။ နောင်မွန်တို့ ခေါင်လန်ဖူးတို့ဆိုရင် ပိုဆိုးတာပေါ့” ဟု ပြောသည်။

လက်ရှိတွင် ကချင်ပြည်နယ်၌ အသုံးပြုနေသည့် ဆေးဝါး၏ ၈၀ ရာခိုင်နှုန်းခန့်ကို လေကြောင်းဖြင့် တင်သွင်းနေရ ကြောင်း၊ ကားလမ်းကြောင်းဖြင့် တင်သည့် ဆေးဝါးသည်လည်း မြစ်ကြီးနားအထိသာ ရောက်ရှိသည့် အခြေအနေ ဖြစ်နေပြီး တခြားမြို့နယ်များသို့ အနည်းငယ်သာ ရောက်ရှိကြောင်း သိရသည်။

ဆေးဝါး ပြတ်လပ်မှုကြောင့် ဆေးခန်းများတွင်လည်း ဆေးကုသမှု ကုန်ကျစရိတ်သည် ယခင်က ၁၀,၀၀၀ ကျပ် ရှိသည့်နေရာသည် လက်ရှိတွင် ၃၀,၀၀၀ ကျပ်ခန့် ပေးဆောင်နေရသည်။

ဆေးဆိုင် တစ်ဆိုင်ကိုတွေ့ရစဉ်

နာတာရှည် ရောဂါဝေဒနာရှင်များ သောက်သုံးသည့် ဥပမာ ဆီးချို၊ သွေးကျဆေး၊ နှလုံးဆေး စသည့် ဆေးများ သည် ဝယ်ယူ၍ ရသော်လည်း ဈေးနှုန်း မြင့်တက်နေသည်ဟု သိရသည်။

လက်ရှိတွင် ဆေးအမျိုးအစား၊ တံဆိပ် အမျိုးမျိုး မရရှိတော့ဘဲ တံဆိပ်ရွေးပြီး ရောင်းချ၍မရသည့် အခြေအနေ ဖြစ်နေသည်ဟု ပူတာအိုမြို့နယ်မှ ဆေးအမျိုးမျိုး ရောင်းချနေသူတစ်ဦးက CNI သတင်းဌာနသို့ ပြောသည်။

၎င်းက “လမ်းက ဖွင့်ပေမယ့် ဆေးက မဝင်ဘူး ဖြစ်နေတာ။ တရုတ်ဘက်ကနေ ဝင်တဲ့ ဆေးတွေပေါ့၊ တရုတ် ကုမ္ပဏီက ဆေးတွေလည်း ပြတ်တယ်။ မြန်မာဆေးတွေလည်း မန္တလေး - မြစ်ကြီးနားလမ်းပိုင်းက အလွန်ဆုံး ၅ ရက်၊ ပြီးတော့ ဈေးတက်တာကြောင့်မို့လို့ သိပ်မရှိတော့ဘူး အရင်တုန်းကလို။ အရင်တုန်းကလိုမျိုး တံဆိပ် အမျိုးမျိုး တင်လို့မရတော့ဘူး။ ဒီတစ်မျိုးဆို ဒီတစ်မျိုးပဲရှိတာပဲ ရောင်းရတော့တာ။ သောက်တဲ့သူတွေလည်း ရွေးချယ်ခွင့် မရှိတော့ဘူး။ တံဆိပ်ရွေးပြီး သောက်လို့မရတော့ဘူး။ ရှိတဲ့တံဆိပ်ပဲ သောက်ရတော့တာ အကောင်း ဖြစ်ဖြစ်၊ အညံ့ဖြစ်ဖြစ် အဲဒီလိုမျိုးပေါ့”  ဟု ပြောသည်။

ကချင်ပြည်နယ်ကို ပြီးခဲ့သည့် ဇွန်လမှစတင်၍ ကုန်းကြောင်းဖြင့် ဆေးဝါး တင်သွင်းခွင့်ကို စစ်ကိုင်းတိုင်းအတွင်းမှ တင်းကြပ်ထားသည့်အတွက် ဆေးဝါးရှားပါးမှု၊ ပြတ်လပ်မှုသည် ပိုမိုဆိုးရွားလာနေခြင်း ဖြစ်သည်။

CNI News

၂၀၂၄ ခုနှစ်၊ စက်တင်ဘာ ၃၀

စစ်ကိုင်းတိုင်းဒေသကြီး၊ ဗန်းမောက်မြို့နယ်အတွင်းမှာ အသက် ၁ နှစ်မှ ၅ နှစ်အတွင်း ကလေးငယ်များနှင့် ကိုယ်ဝန်ဆောင် မိခင် များကို ရှမ်းနီအမျိုးသားများတပ်မတော်(SNA)က စက်တင်ဘာ ၃၀ ရက်နေ့တွင် ကာကွယ်ဆေးများ ထိုးပေးလျက်ရှိကြောင်း ဒေသခံများက ပြောသည်။

SNA သည် ဗန်းမောက်မြို့နယ် မံလောင်ပေပင်အုပ်စုမှ ၆ ရွာနှင့် မံအင်မင်းကုန်းအုပ်စုမှ ၇ ရွာ စုစုပေါင်း အိမ်ခြေ ၁၀၀၀ ကျော်မှ အသက် ၁ နှစ်မှ  ၅ နှစ်အတွင်း ကလေးငယ်များနှင့် ကိုယ်ဝန်ဆောင် မိခင်များကို ကာကွယ်ဆေး များ ထိုးပေးနေခြင်းဖြစ်ကြောင်း သိရသည်။ 

SNA မှ ဆေးမှူးနှင့်အဖွဲ့က ဗန်းမောက်မြို့နယ် ဆရာဝန်နှင့်အဖွဲ့တို့ဖြင့် ပူးပေါင်း၍ ဆုံဆို၊ ကြက်ညာ၊ မေးခိုင်၊ အသည်းရောင်အသားဝါ(ဘီ)၊ ဦးနှောက်အမြှေးရောင် ငါးမျိုးစပ်ကာကွယ်ဆေးများ ထိုးပေးလျက်ရှိသည်။

 ၂၀၂၄ ခုနှစ်၊ စက်တင်ဘာ ၃၀ ရက်နေ့က ဗန်းမောက်မြို့နယ်အတွင်းမှာ SNA က ကာကွယ်ဆေးထိုးပေးနေစဉ်

ထို့အပြင် ပြင်းထန်အဆုတ်ရောင်(pcp)၊ ပိုလီယို၊ ဂျပန်ဦးနှောက်ရောင်၊ ဝက်သက်၊ ဂျိုက်သိုး စသည့် ရောဂါ ကာကွယ်ဆေးများလည်း ထိုးပေးနေကြောင်း ဒေသခံများက ပြောသည်။

SNA သည် ၂၀၂၄ ခုနှစ်၊ သြဂုတ် ၂၈ ရက်နေ့ကလည်း ပထမအကြိမ်အဖြစ် အသက် ၁ နှစ်မှ ၅ နှစ်အတွင်းနှင့် ကိုယ်ဝန်ဆောင် မိခင်များကို ကာကွယ်ဆေးများ ထိုးပေးခဲ့ရာ ယနေ့ (စက်တင်ဘာ ၃၀ ရက်)တွင် ဒုတိယ အကြိမ် ကာကွယ်ဆေးထိုးပေးခြင်း ဖြစ်ကြောင်း သိရသည်။

SNA တပ်ဖွဲ့သည် စစ်ကိုင်းတိုင်းဒေသကြီးအတွင်းရှိ ဗန်းမောက်မြို့နယ်၊ ဟုမ္မလင်းမြို့နယ်၊ တမူး-အောင်ဇေယျာ ဒေသ၊ ခန္တီးမြို့နယ်၊ ရွှေပြည်အေးမြို့နယ် အပါအဝင် မြန်မာ-အိန္ဒိယ နယ်စပ်တစ်လျှောက် တည်ငြိမ်အေးချမ်းရေး အတွက် လုံခြုံရေးများ ဆောင်ရွက်နေသလို ဒေသတွင်းနေ ပြည်သူများကို ကျန်းမာကူညီစောင့်ရှောက်မှုများ လုပ်ဆောင်ပေးလျက်ရှိနေသည်ဟု ဒေသခံများက ပြောသည်။

CNI News

၂၀၂၄ ခုနှစ်၊ သြဂုတ် ၂၈

ရှမ်းနီအမျိုးသားများတပ်မတော်(SNA)က စစ်ကိုင်းတိုင်းဒေသကြီး၊ ဗန်းမောက်မြို့နယ်အတွင်းရှိ ကျေးရွာများမှ ဒေသခံများကို အသက် ၁ နှစ်မှ ၅ နှစ်အတွင်း ကလေးငယ်များနှင့် ကိုယ်ဝန်ဆောင် မိခင်များကို ရောဂါကာ ကွယ်ဆေးများ ထိုးပေးနေကြောင်း သိရသည်။

ဗန်းမောက်မြို့ အနောက်ခြမ်း အရှေ့ကုန်းကျေးရွာရှိ ဓမ္မာရုံမှာ SNA မှ ဆေးမှူး ဆေဆန်းကျေည်နှင့်အဖွဲ့က ဗန်းမောက်မြို့နယ် ဆရာဝန်နှင့်အဖွဲ့တို့ ပူးပေါင်း၍ ဆုံဆို၊ ကြက်ညာ၊ မေးခိုင်၊ အသည်းရောင်အသားဝါ(ဘီ)၊ ဦးနှောက်အမြှေးရောင် ငါးမျိုးစပ်ကာကွယ်ဆေးများ ထိုးပေးလျက်ရှိသည်။

ထို့အပြင် ပြင်းထန်အဆုတ်ရောင်(pcp)၊ ပိုလီယို၊ ဂျပန်ဦးနှောက်ရောင်၊ ဝက်သက်၊ ဂျိုက်သိုး စသည့် ရောဂါ ကာကွယ်ဆေးများလည်း ထိုးပေးနေကြောင်း ဒေသခံများက ပြောသည်။

SNA တပ်ဖွဲ့သည် စစ်ကိုင်းတိုင်းဒေသကြီးအတွင်းရှိ ဗန်းမောက်မြို့နယ်၊ ဟုမ္မလင်းမြို့နယ်၊ တမူး-အောင်ဇေယျာ ဒေသ၊ ခန္တီးမြို့နယ်၊ ရွှေပြည်အေးမြို့နယ် အပါအဝင် မြန်မာ-အိန္ဒိယ နယ်စပ်တစ်လျှောက် တည်ငြိမ်အေးချမ်း ရေးအတွက် လုံခြုံရေးများ ဆောင်ရွက်နေသလို ဒေသတွင်းနေ ပြည်သူများကို ကျန်းမာကူညီစောင့်ရှောက်မှုများ လုပ်ဆောင်ပေးလျက်ရှိနေသည်ဟု ဒေသခံများက ပြောသည်။

CNI News 

၂၀၂၄ ခုနှစ်၊ သြဂုတ် ၂၃

နိုင်ငံဖြတ်ကျော် ဝင်/ထွက်ပေါက်များတွင် မျောက်ကျောက်ရောဂါ စောင့်ကြပ်ကြည့်ရှုခြင်း လုပ်ငန်းများအား ပြည်တွင်း/ပြည်ပ ခရီးသွားလာမှုကို မထိခိုက်စေဘဲ အထူးအလေးထား၍ ဆောင်ရွက်သွားမည်ဖြစ်ကြောင်း ပြည်ထောင်စုဝန်ကြီး ပါမောက္ခဒေါက်တာသက်ခိုင်ဝင်းက ပြောသည်။

ထိုအကြောင်းအရာနှင့်ပတ်သက်၍ သြဂုတ် ၁၉ ရက်နေ့က ပြုလုပ်ခဲ့သည့် မျောက်ကျောက်ရောဂါ ကာကွယ် ထိန်းချုပ်ရေးလုပ်ငန်းများ အရှိန်အဟုန်မြှင့်တင်ရေး လုပ်ငန်းညှိနှိုင်းဆွေးနွေးပွဲတွင် ၎င်းက ပြောကြားခဲ့ခြင်း ဖြစ်သည်။

မျောက်ကျောက်ရောဂါနှင့် ပတ်သတ်၍ မိမိတို့ အိမ်နီးချင်းနိုင်ငံများနှင့် ဒေသတွင်း နိုင်ငံများတွင်လည်း မျောက်‌ကျောက်ရောဂါ ဖြစ်ပွားမှုနှင့် သေဆုံးမှုများရှိနေသည်ကို တွေ့ရှိရသဖြင့် မြန်မာနိုင်ငံအတွင်းသို့ မျောက်ကျောက်ရောဂါ ကူးစက်ဝင်ရောက် ပြန့်ပွားမှုမရှိစေရေး အထူးအလေးထား ဆောင်ရွက်လျက်ရှိသည်ဟု ပါမောက္ခ ဒေါက်တာသက်ခိုင်ဝင်းက ပြောသည်။

၎င်းက “ကမ္ဘာ့ကျန်းမာရေးအဖွဲ့မှ အကြံပြုချက်များအား တိကျစွာ ထုတ်ပြန်ထားရှိရာ မိမိတို့နိုင်ငံ အနေဖြင့်လည်း ကဏ္ဍအလိုက် ဆောင်ရွက်ရမည့် အကြံပြုချက်များကို ဝန်ကြီးဌာနများနှင့်ပူးပေါင်း၍ အရှိန်အဟုန်မြှင့်တင်၍ စနစ်တကျ အကောင်အထည်ဖော် ဆောင်ရွက်သွားမည်”ဟု ပြောသည်။

မျောက်ကျောက်‌ရောဂါ သံသယရှိသူ ကလေးငယ်ကို ကြည့်ရှုစစ်ဆေးနေစဥ်

နိုင်ငံဖြတ်ကျော် ဝင်/ထွက်ပေါက်များ အပါအဝင် လူထုအတွင်း ရောဂါစောင့်ကြပ်ကြည့်ရှုခြင်းအား တိုးမြှင့်ဆောင် ရွက်ခြင်း၊ သီးခြားထားရှိကုသမှုပေးခြင်း၊ ကာကွယ်ဆေးထိုးနှံခြင်း၊ စံကိုက်ကုထုံးများ သတ်မှတ်ခြင်း၊ ရောဂါပိုး ထိန်းချုပ်ခြင်း၊ ဆေးနှင့်ဆေးပစ္စည်းများ စုဆောင်းထားရှိခြင်း၊ ကျန်းမာရေး ပညာပေးခြင်းလုပ်ငန်းများ စသည် တို့ကို ဆွေးနွေးခဲ့ကြောင်း သိရသည်။

လက်ရှိတွင် အာဖရိကတိုက် နေရာအနှံ့အပြားတွင် ဖြစ်ပေါ်နေသည့် မျောက်ကျောက်ရောဂါသည် ကူးစက်ပြန့်ပွား မှုနှုန်း မြင့်တက်လျက်ရှိသည်။

ထို့နောက် ကမ္ဘာ့ကျန်းမာရေးအဖွဲ့ (WHO) က နိုင်ငံတကာကျန်းမာရေး အရေးပေါ်အခြေအနေအဖြစ် သြဂုတ်လ ၁၄ ရက်နေ့တွင် ကြေညာခဲ့သည်။

မြန်မာနိုင်ငံတွင် ၂၀၂၂ ခုနှစ်မှ လက်ရှိအချိန်အထိ သံသယလူနာများ၏ ဓာတ်ခွဲနမူနာ (၁၂၉) ခုကို ဓာတ်ခွဲ စစ်‌ဆေးခဲ့ရာမှာ မျောက်ကျောက်ရောဂါ အတည်ပြုလူနာ မရှိသေးကြောင်း ကျန်းမာရေးဝန်ကြီးဌာနက သြဂုတ်လ ၁၉ ရက်နေ့ ထုတ်ပြန်ချက်မှာ ဖော်ပြထားသည်။

မျောက်ကျောက်ရောဂါသည် တိရိစ္ဆာန်မှ လူကို ကူးစက်သော်လည်း တစ်ယောက်နှင့်တစ်ယောက် နီးနီးစပ်စပ် နေထိုင်ပါက လူမှလူကိုလည်း ကူးစက်တက်သည်။

မျောက်ကျောက်ရောဂါ လက္ခဏာကို တွေ့ရစဥ်

မျောက်ကျောက်ရောဂါ ကူးစက်ပြန့်ပွားချိန်သည် ၂၁ ရက်ထိတိုင် ကြာမြင့်နိုင်ပြီး ရောဂါကူးစက်ချိန်အား အချိန်ကာလ ၂ ခုပိုင်းခြားနိုင်သည်။

ရောဂါဖြစ်ပွားချိန် ပထမဆုံး ၅ ရက်အတွင်းတွင် ဖျားခြင်း၊ ပြင်းထန်စွာခေါင်းကိုက်ခြင်း၊ ပြန်ရည်အိတ်များ ရောင်ရမ်းခြင်း၊ ခါးနာခြင်း၊ ကြွက်သားများ နာကျင်ကိုက်ခဲခြင်းနှင့် အားအင်ချိနဲ့ခြင်း စသည်တို့ ခံစားရနိုင်သည်။

ဖျားပြီးနောက် ၁ ရက်မှ ၅ ရက်အကြာ ခန္ဓကိုယ်၌ အနီစက် သို့မဟုတ် အနီပြင်များဖြစ်ပေါ်ခြင်း၊ အရည်ဖုများ၊ ပြည်ဖုများ စသည်ဖြင့် အဆင့်ဆင့်ဖြစ်ပေါ်ပြီးနောက် အနာများဖြစ်ပေါ်ကာ နောက်ဆုံးတွင် အနာများပျောက်ကင်း သွားပြီး အမာရွတ်အဖြစ် ကျန်ခဲ့နိုင်သည်။

မျောက်ကျောက်ရောဂါသည် ကူးစက်ရောဂါဖြစ်သည့်အတွက် တစ်ကိုယ်ရေသန့်ရှင်းမှုက အထူးအရေးကြီးသည်။

တစ်ကိုယ်‌ရေသန့်ရှင်းရေးနှင့် ပတ်ဝန်းကျင်သန့်ရှင်းရေး ကောင်းမွန်စွာဆောင်ရွက်ခြင်း စသည့် နည်းလမ်းများအား စနစ်တကျ လုပ်‌ဆောင်ခြင်းဖြင့်လည်း မျောက်ကျောက်ရောဂါကို ကာကွယ်နိုင်သည်။

CNI News 

၂၀၂၄ ခုနှစ်၊ သြဂုတ် ၂၂

မြန်မာနိုင်ငံတွင် ၂၀၂၂ ခုနှစ်မှ လက်ရှိအချိန်အထိ သံသယလူနာများ၏ ဓာတ်ခွဲနမူနာ (၁၂၉) ခုကို ဓာတ်ခွဲ စစ်‌ဆေး ခဲ့ရာမှာ မျောက်ကျောက်ရောဂါ အတည်ပြုလူနာ မရှိသေးဘူးလို့ ကျန်းမာရေးဝန်ကြီးဌာနက သြဂုတ်လ ၁၉ ရက် နေ့ ထုတ်ပြန်ချက်မှာ ဖော်ပြထားသည်။

မျောက်ကျောက်ရောဂါ ကာကွယ်ထိန်းချုပ်ရေး လုပ်ငန်းများ အရှိန်အဟုန် မြှင့်တင်‌နေလျက်ရှိပြီး ကမ္ဘာ့ကျန်းမာ ရေးအဖွဲ့မှ အကြုံပြုချက်များအား မိမိတို့နိုင်ငံအနေဖြင့် ကဏ္ဍအလိုက် ဝန်ကြီးဌာနများနှင့် ပူးပေါင်း၍ အကောင် အထည်ဖော် ဆောင်ရွက်သွားမှာဖြစ်ကြောင်း ပြည်ထောင်စုဝန်ကြီး ပါမောက္ခ ဒေါက်တာသက်ခိုင်ဝင်းက ပြော သည်။

ထို့နောက် နိုင်ငံဖြတ်ကျော် ဝင်/ထွက်ပေါက်များတွင် မျောက်ကျောက်‌ရောဂါ စောင့်ကြပ်ကြည့်ရှုခြင်း၊ လူထု အတွင်း ရောဂါစောင့်ကြပ်ကြည့်ရှုခြင်းအား တိုးမြှင့်‌ဆောင်ရွက်ခြင်း၊ သီးခြားထားရှိ ကုသမှုပေးခြင်း၊ ကာကွယ် ဆေး ထိုးနှံခြင်း၊ စံကိုက်ကုထုံးများကုသခြင်း၊ ရောဂါပိုး ထိန်းချုပ်ခြင်း၊ ဆေးနှင့်ဆေးပစ္စည်းများ စုဆောင်းထား ရှိခြင်း စသည်တို့ကို ဆောင်ရွက်သွားမှာဖြစ်ကြောင်း ပြည်သူ့ကျန်းမာရေးဦးစီးဌာန ညွှန်ကြားရေးမှူးချုပ် ဒေါက်တာမြင့်မြင့်သန်းမှ ပြောကြားခဲ့သည်။

အာဖရိကတိုက် နေရာအနှံ့အပြားတွင် ဖြစ်ပေါ်နေသည့် မျောက်ကျောက်ရောဂါ ကူးစက်ပြန့်ပွားမှုနှုန်း မြင့်တက်လျက်ရှိသည်။

ထို့နောက် ကမ္ဘာ့ကျန်းမာရေးအဖွဲ့ (WHO) က နိုင်ငံတကာကျန်းမာရေး အရေးပေါ်အခြေအနေအဖြစ် သြဂုတ်လ ၁၄ ရက်နေ့တွင် ကြေညာခဲ့သည်။

မျောက်ကျောက်ရောဂါ ဖြစ်ပွားမှု အစောပိုင်းကာလတွင် အာဖရိကတိုက်တွင်သာ တွေ့ရလေ့ရှိသော်လည်း ယခုအခါ အာရှနိုင်ငံအချို့သို့ စတင်ပျံ့နှံ့လျက်ရှိသည်။

ရောဂါဖြစ်ပွားမှု သိသိသာသာ တိုးလာပြီး ကွန်ဂိုတွင် ယခုနှစ်စကတည်းက မျောက်ကျောက်ရောဂါ ကူးစက်ခံရ သူပေါင်း ၁၅၆၀၀ ကျော်နှင့် သေဆုံးသူ ၅၃၇ ဦး အထိရှိခဲ့သည်။

မျောက်ကျောက်‌ရောဂါ သံသယရှိသူ ကလေးငယ်ကို ကြည့်ရှုစစ်ဆေးနေစဥ်

မျောက်ကျောက်ရောဂါသည် တိရိစ္ဆာန်မှ လူကိုကူးစက်ခြင်း၊ လိင်မှတစ်ဆင့် ကူးစက်ခြင်း၊ အရေပြားမှတစ်ဆင့် ကူးစက်ခြင်းအပြင် ရောဂါရှိသူနှင့် အနီးကပ်စကားပြောခြင်း၊ အနီးကပ်နေထိုင်ခြင်း၊ အနီးကပ်အသက်ရှုခြင်း စသော အသက်ရှုလမ်းကြောင်းဆိုင်ရာ အမှုန်အမွှားနှင့် အရည်များမှ တစ်ဆင့်လည်း ကူးစက်တတ်သည်။

ထို့ပြင် ချုံပုတ်အရွက်များကို ကိုင်တွယ်မိခြင်း၊ ရောဂါကူးစက် ဖြစ်ပွားနေသော လူ သို့မဟုတ် တိရိစ္ဆာန်နှင့် အနီးကပ်ထိတွေ့ခြင်း၊ တိရိစ္ဆာန် ကိုက်ခံရခြင်း သို့မဟုတ် ခြစ်မိခြင်း၊ ရောဂါဖြစ်နေသော အနာခွက်များကို ထိတွေ့ ကိုင်မိခြင်း၊ ခန္ဓာကိုယ်မှ ထွက်ရှိသောအရည် (တံတွေး၊ နှာရည်၊ သွေး၊ ချွေး၊ ဆီးနှင့် လိင်အင်္ဂါ ထွက်သောအရည်)၊ အရေပြားပေါ်တွင် အနီအဖုအပိမ့်ထွက်သူများ အသုံးပြုခဲ့သော အဝတ်အထည်၊ အိပ်ရာ၊ စောင် စသည့် အသုံး အဆောင်များမှ တစ်ဆင့်လည်း မျောက်ကျောက်ရောဂါ ကူးစက်ပျံ့နှံ့နိုင်သည်။

မျောက်ကျောက်ရေဂါ ကူးစက်ပြန့်ပွားချိန်သည် ၂၁ ရက်ထိတိုင် ကြာမြင့်နိုင်ပြီး ရောဂါကူးစက်ချိန်အား အချိန်ကာလ ၂ ခုပိုင်းခြားနိုင်သည်။

ရောဂါဖြစ်ပွားချိန် ပထမဆုံး ၅ ရက်အတွင်းတွင် ဖျားခြင်း၊ ပြင်းထန်စွာခေါင်းကိုက်ခြင်း၊ ပြန်ရည်အိတ်များ ရောင်ရမ်းခြင်း၊ ခါးနာခြင်း၊ ကြွက်သားများ နာကျင်ကိုက်ခဲခြင်းနှင့် အားအင်ချိနဲ့ခြင်း စသည်တို့ ခံစားရနိုင်သည်။

ဖျားပြီးနောက် ၁ ရက်မှ ၅ ရက်အကြာ ခန္ဓကိုယ်၌ အနီစက် သို့မဟုတ် အနီပြင်များဖြစ်ပေါ်ခြင်း၊ အရည်ဖုများ၊ ပြည်ဖုများ စသည်ဖြင့် အဆင့်ဆင့် ဖြစ်ပေါ်ပြီးနောက် အနာများဖြစ်ပေါ်ကာ နောက်ဆုံးတွင် အနာများ ပျောက် ကင်းသွားပြီး အမာရွတ်အဖြစ် ကျန်ခဲ့နိုင်သည်။

မျောက်ကျောက်ရောဂါသည် ကူးစက်ရောဂါ ဖြစ်သည့်အတွက် တစ်ကိုယ်ရေ သန့်ရှင်းမှုက အထူးအရေးကြီးသည်။

မျောက်ကျောက်ရောဂါ လက္ခဏာကို တွေ့ရစဥ်

မျောက်ကျောက် (Mpox) ရောဂါလက္ခဏာ ခံစားနေရသူများနှင့် အနီးကပ်ထိတွေ့ခြင်းအား ရှောင်ကြဥ်ခြင်း၊ လက်ကို ဆပ်ပြာနှင့်ရေ သို့မဟုတ် အယ်လ်ကိုဟော အနည်းဆုံး ၆၀ ရာခိုင်နှုန်းပါဝင်သော ရေမလို လက်သန့်စင် ဆေးရည် အသုံးပြု၍ စနစ်တကျဆေးကြောခြင်း၊ ပါးစပ်နှင့် နှာခေါင်းစည်း (Mask) ကို စနစ်တကျ တပ်ဆင်ခြင်း၊ တစ်ဦးနှင့်တစ်ဦး ခပ်ခွာခွာနေခြင်းတို့ဖြင့် ကာကွယ်နိုင်သည်။

ထို့အပြင် နှာချေ ချောင်းဆိုးသည့်အခါ လက်ကိုင်ပဝါ သို့မဟုတ် တံတောင်ကွေးဖြင့် လုံခြုံစွာဖုံးအုပ်ခြင်း၊ အသား ငါးများကို ကျက်အောင်ချက်စားခြင်း၊ တောရိုင်းတိရိစ္ဆာန်များကို အကာအကွယ်မပါဘဲ ထိတွေ့ခြင်းကို ရှောင်ကြဥ် ခြင်း၊ လက်မဆေးဘဲ ပါးစပ်၊ နှာခေါင်းနှင့် မျက်လုံးများကို ကိုင်တွယ်ခြင်းကို ရှောင်ကြဥ်ခြင်း၊ အများသုံးနေရာ များအား ထိတွေ့မှုများကို အထူးဂရုစိုက်ခြင်း၊ တစ်ကိုယ်‌ရေ သန့်ရှင်းရေးနှင့် ပတ်ဝန်းကျင် သန့်ရှင်းရေး ကောင်းမွန်စွာ ဆောင်ရွက်ခြင်း စသည့် နည်းလမ်းများအား စနစ်တကျ လုပ်‌ဆောင်ခြင်းဖြင့် မျောက်ကျောက် ရောဂါကို ကာကွယ်နိုင်သည်။

ယခုအခါ မျောက်ကျောက်ရောဂါသည် အရှေ့တောင်အာရှ နိုင်ငံများအထိပါ ကူးစက်လာနေပြီဖြစ်သည်။

မြန်မာနိုင်ငံနှင့် အိမ်နီးချင်းနိုင်ငံဖြစ်သော ထိုင်းနိုင်ငံတွင် မျောက်ကျောက်ရောဂါ ကူးစက်ခံထားရသော သံသယ ဖြစ်ဖွယ် ပထမဆုံးလူနာကို နိုင်ငံတွင်းမှာ တွေ့ရှိခဲ့သည်ဟု ထိုင်းအာဏာပိုင်များမှ သြဂုတ်လ ၂၁ ရက်နေ့တွင် သတင်းထုတ်ပြန်ခဲ့သည်။

ထို့ကြောင့် ထိုင်းနိုင်ငံအတွင်းရှိ မြန်မာနိုင်ငံသားများအနေဖြင့် စိုးရိမ်မှုများ မြင့်တက်နေကြသည်။

ထို့အတူ မျောက်ကျောက်ရောဂါ ကူးစက်ခံထားရသော ပထမဆုံးလူနာအား နိုင်ငံတွင်းတွင် တွေ့ရှိခဲ့သည်ဟု ဖိလစ်ပိုင်အာဏာပိုင်များမှ ပြီးခဲ့တဲ့သြဂုတ်လ ၁၉ ရက်နေ့တွင် ထုတ်ပြန်ပြောကြားထားသည်။

CNI News
၂၀၂၄ ခုနှစ်၊ ဇူလိုင် ၁၈

ယာယီသမ္မတ ဦးမြင့်ဆွေသည် ကျန်းမာရေးအခြေအနေ တိုးတက်ကောင်းမွန်မှု မရှိသေးခြင်းကြောင့် နစက၏ စီမံဆောင်ရွက်ပေးမှုဖြင့် အနီးကပ် ကျန်းမာရေးစောင့်ရှောက်မှု ခံယူနေရသည်ဟု နစက-က ၂၀၂၄ ခုနှစ်၊ ဇူလိုင် ၁၈ ရက်နေ့တွင် သတင်းထုတ်ပြန်ခဲ့သည်။

ယာယီသမ္မတ ဦးမြင့်ဆွေသည် ၂၀၂၃ ခုနှစ်၊ နှစ်ဆန်းပိုင်းမှစ၍ လှုပ်ရှားရာတွင် တုန့်နှေးခြင်းနှင့် အစားအ သောက်နည်းခြင်းတို့ကို စတင်ခံစားခဲ့ရသည့်အတွက် အထူးကု ပါရဂူကြီးများ ပါဝင်သော ဆေးကုသမှုအဖွဲ့ဖြင့် ပုံမှန်ဆေးကုသမှုခံယူခဲ့သည်ဟု ထုတ်ပြန်ချက်တွင် ဖော်ပြထားသည်။

ထို့နောက် ကျန်းမာရေး စစ်ဆေးစမ်းသပ်ချက်များအရ အာရုံကြောများ နှေးကွေးတုန့်ဆိုင်းသည့် ရောဂါ၊ ၎င်းနှင့် ဆက်စပ်ဖြစ်ပေါ်သော အာရုံကြော အားနည်းရောဂါတို့အား ခံဏားနေရသည်ကို တွေ့ရှိရသည့်အတွက် ၂၀၂၄ ခုနှစ်၊ ဧပြီ ၁၅ ရက်မှ ၁၉ ရက်အထိ စင်္ကာပူနိုင်ငံ၊ Mount Elizabeth Medical Centre တွင် ဦးနှောက်နှင့် အာရုံ ကြောပိုင်းဆိုင်ရာ စစ်ဆေးကုသမှုများခံယူခဲ့ပြီး မေလ ၂၇ ရက်မှ ဇွန်လ ၁၈ ရက်အထိ အမှတ်(၂) တပ်မတော် ဆေးရုံကြီး(ကုတင် ၁၀၀၀)တွင် ဆေးကုသမှုခံယူခဲ့သည်ဟု နစက-က ထုတ်ပြန်ခဲ့သည်။

ထိုကာလအတွင်း ယာယီသမ္မတ ဦးမြင့်ဆွေ၏ ဝဲ၊ ယာ မျက်စိများတွင် ဖြစ်ပွားလျက်ရှိသော အတွင်းတိမ်များကို ခွဲစိတ်ကုသခဲ့ရာ အမြင်အာရုံပြန်လည် ကောင်းမွန်လာခဲ့သော်လည်း အာရုံကြော အားနည်းရောဂါကို ဆက် လက်ခံစားနေရသဖြင့် ၂၀၂၄ ခုနှစ်၊ ဇွန်လ ၁၈ ရက်မှ ဇူလိုင် ၃၀ ရက်အထိ ဆေးခွင့်ယူ၍ နေအိမ်တွင် အထူး ဆေးကုသမှုအဖွဲ့၏ အနီးကပ် ကျန်းမာရေးစောင့်ရှောက်မှု ခံယူလျက်ရှိကြောင်း ထုတ်ပြန်ခဲ့သည်။

ထို့နောက် ဇွန်လ ၃၀ ရက်နှင့် ဇူလိုင် ၁၄ ရက်တို့တွင် ကျန်းမာရေးဝန်ကြီး ပါမောက္ခဒေါက်တာ သက်ခိုင်ဝင်းနှင့် ၈ ဦးပါဝင်သော အထူးဆေးကုသမှုအဖွဲ့ဖြင့် ကျန်းမာရေးစစ်ဆေးမှုကို ပြုလုပ်ခဲ့ရာ ကျန်းမာရေး အခြေအနေမှာ တိုးတက်ကောင်းမွန် လာခြင်းမရှိသေးဘဲ အစားအသောက် စားသုံးခြင်း အပါအဝင် နေ့စဉ် ပုံမှန်သွားလာလှုပ် ရှားမှုကို လုပ်ဆောင်နိုင်မှု မရှိသေးသောကြောင့် နစက၏ စီမံဆောင်ရွက်ပေးမှုဖြင့် အနီးကပ် ကျန်းမာရေး စောင့်ရှောက်မှုများ ဆောင်ရွက်နေသည်ဟု နစက-က ထုတ်ပြန်ခဲ့သည်။

ဦးမြင့်ဆွေသည် အမျိုးသားဒီမိုကရေစီအဖွဲ့ချုပ်(NLD) အစိုးရလက်ထက်တွင် ဒုသမ္မတ(၁)ဖြစ်ပြီး ၂၀၂၁ ခုနှစ်၊ ဖေဖော်ဝါရီ ၁ ရက်က NLD အစိုးရဖြုတ်ချခံရပြီးနောက် ယာယီသမ္မတဖြစ်လာခဲ့သည်။

နစကသည် အရေးပေါ်ကာလ သက်တမ်း ၆ လတိုးထားသည်မှာ ဇူလိုင် ၃၁ ရက်နေ့တွင် ပြည့်မည်ဖြစ်၍ လာမည့်ကာလတွင် ယာယီသမ္မတ ဦးမြင့်ဆွေကို အနားပေးမည်လား သို့မဟုတ်  မည်သို့ ဆက်သွားမည်မှာ စိတ်ဝင် စားစရာကောင်းသည်ဟု နိုင်ငံရေးအသိုင်းအဝိုင်းကြား သုံးသပ်လျက်ရှိနေကြသည်။

CNI News

၂၀၂၃ ခုနှစ်၊ ဇူလိုင် ၂၅

မွေးကင်းစကလေးအရွယ်မှ အသက်ခြောက်လမတိုင်ခင်အထိ မိခင်နို့ကလွဲပြီး တခြားသော အစားအစာများ ကျွေးရန်မသင့်ကြောင်း ကျန်းမာရေးပညာရှင်များက ပြောသည်။

ကလေးများကို ခြောက်လမတိုင်ခင် ထမင်းများနှင့် တခြားပြင်ပအစားအစာများကျွေးပါက ကလေးများတွင် အူစွပ်ရောဂါဖြစ်လာနိုင်ကြောင်း Hello ဆရာဝန်ပေ့ချ်ကို တည်ထောင်သူ ဒေါက်တာသူရိန်လှိုင်ဝင်းက CNI သတင်းဌာနကို ပြောသည်။

 “ကလေးကို အမေနို့တိုက်နေတာကနေပြီးတော့ တခြားဟာတစ်ခုခုပြောင်းတိုက်တော့မယ်ဆိုရင် winning diet လုပ်ရတယ်လို့ခေါ်တယ်။ ကျနော်တို့ စပြီးတော့နည်းနည်းချင်းဆီ စကျွေးရတာပေါ့နော်။ အဲဒါကြောင့်မို့ ကျနော် တို့က ခြောက်လနောက်ပိုင်းပဲ ကျွေးခိုင်းတာပေါ့နော်။ ခြောက်လအရှေ့ပိုင်းမှာဆို ရေတောင်မတိုက်ရဘူးလေ။ အမေနို့ကိုပဲ အမြဲတိုက်ရမယ်ပေါ့နော်။ အဲ့လိုမျိုးလုပ်တဲ့အခါမှာ ကလေးတွေရဲ့ အူကတော့ လူကြီးလို မဟုတ်ဘူး ပေါ့။ သေချာအလုပ်မလုပ် နိုင်သေးဘူးပေါ့နော်။ လုပ်တဲ့နည်းလမ်းတွေက သေချာမမှန်သေးဘူး။ အူက အဆင်သင့် မဖြစ်ခင်မှာ အစားအသောက်က လွဲသွားတယ်ပေါ့နော်။ မှားပြီးကျွေးလိုက်မိတယ်။ ဘာညာဖြစ်တဲ့အခါကျတော့ သူ့ အူက လှုပ်ရှားမှုလွဲပြီးတော့ အူတစ်ခုနဲ့တစ်ခု စွပ်သွားတယ်။ အများအားဖြင့် ကလေးတွေမှာဖြစ်တတ်တယ်။ ဒါက အမေနို့ကို မတိုက်လို့တော့မဟုတ်ဘူး။ဒါပေမယ့် တခြားအစာတစ်ခုကို ကျွေးလိုက်တဲ့အချိန် ဒီလိုမျိုးဖြစ်လေ့ ဖြစ်ထရှိတယ်။ အူစွပ်တယ်ဆိုတာ ကလေးတွေအတွက် အရေးပေါ်အခြေအနေပေါ့နော်”ဟု ပြောသည်။

မွေးကင်းစမှ အသက်ခြောက်လ မပြည့်သေးသော ကလေးငယ်များကို မိခင်နို့တစ်မျိုးထဲသာ တိုက်ကျွေးခြင်းသည် ကလေးငယ်များအတွက် ဥာဏ်ပိုကောင်းပြီး အကယ်၍ မိခင်နို့မထွက်သောအခြေအနေမှသာ နို့မှုန့် တိုက်ကျွေး သင့်ကြောင်း ရန်ကုန်တိုင်းဒေသကြီး အင်းစိန်မြို့နယ်မှ ကျန်းမာရေးဝန်ထမ်းတစ်ဦးဖြစ်သူ ကိုသန်းထိုက်ဇော်က CNI ကို ပြောသည်။

ကိုသန်းထိုက်ဇော်က “မိခင်နို့တိုက်တဲ့ဟာတော့ အကောင်းဆုံးပဲ။တကယ်လို့မိခင်နို့မတိုက်နိုင်လို့ရှိရင် မိခင်နို့ မတိုက်နိုင်ဘူးဆိုတဲ့ အနေအထားမှာမှ တခြားဟာတွေဖြစ်ကြတာ။ ဒါပေမယ့် လက်ရှိမှာ အကုန်လုံး လုပ်ပေး နေကြတာပဲ။ သနပ်ခါးတွေလည်း ကျွေးနေကြတာပဲ။ လူးပေးနေတာပဲ။ တကယ်လို့ အကိုတို့က ခေါင်းတွေလည်း ခြောက်လကျော်မှ ရိတ်ရတယ်ဆိုပြီး ပြောတယ်။ ဒါပေမယ့်သူတို့တွေ ခေါင်းရိတ်တာကအစ သူတို့ ကျန်းမာရေးနဲ့ ပတ်သက်တဲ့ အကြောင်းအရာ တိတိကျကျထက် ကိုယ့်အမေတွေက အဖွားတွေ၊ အဘိုးတွေ ပြောနေကြတဲ့ စကားအတိုင်းကိုပဲ လုပ်နေကြတာပဲ အများစုကတော့လေ။ပုံမှန်လို့ ပြောမယ်ဆိုလို့ရှိရင် မိခင်နို့ မတိုက်ကျွေး တာနဲ့တခြား အပြင်နို့တိုက်တဲ့ကလေးတွေနဲ့ ယှဥ်မယ်ဆိုလို့ရှိရင်တော့ မိခင်နို့တိုက်တဲ့ ကလေးတွေကတော့ ဥာဏ်ပိုကောင်းလာနိုင်တာမျိုးတော့ ရှိတာပေါ့နော်” ဟု ပြောသည်။

အူစွပ်ရောဂါလက္ခဏာများမှာ ဗိုက်မခံမရပ်နိုင်အောင့်လာခြင်း၊ အဖျားဝင်လာနိုင်ခြင်း၊ အန်လာခြင်း၊ သွေးပေါင် ကျပြီး ချွေးစီးပြန်လာခြင်း၊ ဝမ်းသွားသည့်အခါ သွေး၊ချွဲပါလာနိုင်ခြင်းများ ခံစားလာရခြင်းနှင့် အဆိုပါရောဂါသည် အသက် ၃ လနှင့် ၅ နှစ်အကြား ဖြစ်တတ်ကြောင်း ကျန်းမာရေးဆိုင်ရာ အကြံပေးသူများက ပြောသည်။

အူစွပ်ရောဂါခံစားရသည့် ကလေးငယ်များမှာ အသက်ငယ်ရွယ်လွန်းသည့်အရွယ်တွင် ခွဲစိတ်ရသောကြောင့် အသက်အန္တရာယ်ပါ ထိခိုက်နိုင်ကြောင်း ကျန်းမာရေးဆိုင်ရာ ကျွမ်းကျင်ပညာရှင်များက ပြောသည်။

ကလေးငယ်များကို ခြောက်လမပြည့်ခင် အတတ်နိုင်ဆုံး ဖြည့်စွက်စာများ မကျွေးကြရန်နှင့် ဖြည့်စွက်စာ စ ကျွေး မည်ဆိုပါက ကလေးများ၏ အမူအယာကအစ အထူးဂရုစိုက်ကြရန် လိုအပ်ကြောင်း ကျန်းမာရေးဆိုင်ရာ ပညာ ရှင်များက အကြံပြုထားသည်။

CNI News

၂၀၂၃ ခုနှစ်၊ ဇူလိုင် ၁၄

ရာသီအကူးအပြောင်းမှာ ဖြစ်လေ့ဖြစ်ထရှိသည့် တုပ်ကွေးရောဂါသည် ၁၀ စုနှစ်အတွင်း ဖြစ်ပွားခဲ့တဲ့ ရောဂါ များထက် အပြင်းထန်ဆုံးဖြစ်သော်လည်း စိုးရိမ်စရာမရှိကြောင်း ကျန်းမာရေး ကျွမ်းကျင်ပညာရှင်များက ပြောသည်။

ယခုနှစ် တုပ်ကွေးရောဂါသည် ယခင်နှစ်များကထက် ပြင်းထန်ပြီး တုပ်ကွေးရောဂါ၏ နောက်ဆက်တွဲ အဆုတ်လေပြွန်ရောင်ရောဂါသည်လည်း လက်ရှိမှာ ဖြစ်ပေါ်နေကြောင်း Hello ဆရာဝန်ပေ့ချ်ကို တည်ထောင်သူ ဒေါက်တာ သူရိန်လှိုင်၀င်းက CNI သတင်းဌာနကို ပြောသည်။

ဒေါက်တာ သူရိန်လှိုင်၀င်းက “တုပ်ကွေးကတော့ အခုက တွဲဖက်ဖြစ်တယ်လို့ ပြောရမှာပေါ့နော်။ တုပ်ကွေး ဖြစ်တယ် တုပ်ကွေးကနေတစ်ဆင့် တခါ အဆုတ်ရောင်တွေ ဖြစ်ကြတာပေါ့နော်။ အဆုတ်ရောင်ထက် အဆုတ်လေပြွန်ရောင်တဲ့ရောဂါဗျ။ အခုဖြစ်နေတဲ့ ပြဿနာကလေ အဆုတ်ကိုရောင်တဲ့ နမိုးနီးယားလိုမျိုး ပြဿနာမဟုတ်ဘဲနဲ့ လေပြွန်လေးတွေ ရောင်တဲ့ပြဿနာ ဖြစ်နေတယ်ပေါ့နော်။ အဲ့ဒါက ဘာလဲဆိုတော့ တုပ်ကွေးကတော့ ပုံမှန်အတိုင်းပါပဲ။ နှစ်တိုင်းက ဒီအချိန်က တုပ်ကွေးရာသီပဲ ဆိုတော့လေ။ အေးတဲ့အချိန် စိုစွတ်တဲ့အချိန် တုပ်ကွေးတွေက ပြန့်ကြတယ်လေ။ ပြန့်ကြတယ်ဆိုတော့ အခုလည်း အဲ့လိုဖြစ်ကြတယ် လေ။ ဒါပေမယ့် တစ်ခုရှိတာကတော့ ဒီနှစ် တုပ်ကွေးက နည်းနည်းတော့ ပြင်းထန်တယ်။ အရင်နှစ် တွေထက် စာရင်တော့ ပိုပြင်းထန်တယ်လို့ ပြောတယ်။ တချို့ USCBC တို့ ပြောထားတာအရဆိုတော့ ဒီနှစ် တုပ်ကွေးကတော့ ဆယ်စုနှစ် တစ်ခုလောက်မှာ တော်တော်ပြင်းထန်တဲ့ အနေအထားရှိတယ်။ သတိပို ထားရမယ်ဆိုပြီးတော့ ပြောထားပါတယ်”ဟု ပြောသည်။

တုပ်ကွေးနှင့် ဆက်စပ်သည့် တွဲဖက် အဆုတ်လေပြွန်ရောင်ရောဂါသည် လေမှတဆင့် ကူးစက်တတ်သည့် ရောဂါဖြစ်သော်လည်း စိုးရိမ်လွန်စရာမလိုကြောင်း ဒေါက်တာသူရိန်လှိုင်ဝင်းက ဆက်ပြောသည်။

“အဲဒါကတော့ ဘယ်လောက်ထိ ပြင်းထန်လဲဆိုတာ ပမာဏမရှိဘူးပေါ့နော်။ ဒါပေမယ့် ကိုယ်ပူတာ အပူချိန် ပိုမြင့်တယ်။ ကိုယ်တွေ လက်တွေ ပိုပြီးတော့ နာတယ်။ နောက်တစ်ခုကကျတော့ နှုံးတာ တအားဆိုး တယ်လို့ ပြောတယ်။ 

ကလေးတွေမှာ ချောင်းဆိုးတာ တော်တော်ဆိုးတယ်လို့ ပြောပါတယ်။ ဘယ်လောက် ပိုပြင်းထန်လဲ ဆိုတာတော့မသိဘူး။ ဆယ်စုနှစ်တစ်ခုအတွင်းမှာ အပြင်းထန်ဆုံး တုပ်ကွေးလို့တော့ သူတို့ ပြောကြတယ်ပေါ့နော်။ ဒီရောဂါပိုးတွေကလေ အရင်တုန်းကလည်း ဖြစ်ပါတယ်။ နှစ်စဥ်နှစ်တိုင်း ဒီလို တုပ်ကွေးရာသီဆို ဖြစ်လေ့ဖြစ်ထရှိပါတယ်။ ဒီနှစ်ကတော့ ပိုပြင်းတာပေါ့နော်။ ဒါပေမယ့်လည်း အရမ်းကြီး စိုးရိမ်တစ်ကြီးလည်း ဖြစ်နေစရာမလိုပါဘူး။ကိုယ်က အာဟာရ ပြည့်ဝအောင်စားမယ်။ ကောင်းကောင်း နားနားနေနေနေမယ်။ကိုယ်လက်လှုပ်ရှားလည်းလုပ်။နားနားနေနေလုပ်။ ဂရုစိုက်တယ်ဆိုရင် သိပ် အဆိုးကြီးလည်း မဟုတ်ပါဘူး” ဟု ပြောသည်။

ယခုလိုကာလတွင် ကျောင်းသားမိဘများအနေဖြင့် မိမိတို့၏ ကလေးများအတွက် ပိုပြီး ဂရုစိုက် ပေးသင့် ကြောင်း ရခိုင်ပြည်နယ်၊ စစ်တွေမြို့နယ်မှ ကျောင်းသားမိဘတစ်ဦးဖြစ်သူ ဒေါ်နှင်းနှင်းဇံက CNI  သတင်း ဌာနသို့ ပြောသည်။
“ကျောင်းတက်နေတဲ့ကလေးတွေအတွက် ဆိုလို့ရှိရင် လုံခြုံမှုတွေ စဥ်းစားရမှာပေါ့နော်။ ကလေးလေးတွေ အတွက်ဆိုလို့ရှိရင် ခြင်မကိုက်တဲ့ Sticker လေးတွေ ကပ်ပေးလို့ရတယ်။ ပြီးတော့ ခြင်မကိုက်တဲ့ လိမ်း ဆေးတွေ လိမ်းပေးလို့ရပါတယ်ရှင့်”ဟု ပြောသည်။

လက်ရှိ မြန်မာနိုင်ငံတွင် ဖြစ်ပွားနေသည့် အဆုတ်လေပြွန်ရောင်ရောဂါကြောင့် ရန်ကုန်တိုင်းဒေသကြီးမှ ပုဂ္ဂလိက ကျောင်းတစ်ချို့ကို ပိတ်ထားခြင်းများလည်းရှိကြောင်း သတင်းမီဒီယာတစ်ချို့တွင် ဖော်ပြထား သည်။

ရာသီပေါ်တုပ်ကွေး၏ နောက်ဆက်တွဲ အဆုတ်လေပြွန်ရောင်ရောဂါသည် အသက် ၅ နှစ်အောက်အရွယ် ကလေးငယ်များနှင့် အသက် ၆၅ နှစ်အထက် သက်ကြီးပိုင်းများတွင်ဖြစ်တတ်ပြီး မပေါ့ဆသင့်ဘဲ သေချာ ဂရုစိုက်ကြရန် လိုအပ်ကြောင်းကျန်းမာရေး အကြံပြုသူများက ပြောသည်။