CNI News
၂၀၂၂ ခုနှစ်၊ ဧပြီ ၁၈
မြန်မာ- ထိုင်း နှစ်နိုင်ငံကုန်သွယ်ရေး အဓိက လမ်းကြောင်းတစ်ခုဖြစ်သည့် မြဝတီ-ကော့ကရိတ် အာရှလမ်းမကြီးကို အချိန် အကန့်အသတ်ဖြင့် ဖြတ်သန်းသွားလာခွင့် ပြုထားသော်လည်း နယ်မြေလုံခြုံရေးနှင့် ကုန်ကားငှားရမ်းမှု ခက်ခဲခြင်းကြောင့် ထိုင်းနိုင်ငံသို့ ကုန်စည်တင်ပို့မှု သုံးပုံ တစ်ပုံခန့် ကျဆင်းသွားကြောင်း မြဝတီကုန်သည်များထံမှ သိရသည်။
မြဝတီ- ကော့ကရိတ် အာရှလမ်းမကြီးကို နံနက် ၆ နာရီမှ ည ၇ နာရီအတွင်းသာ ဖြတ်သန်း သွားလာကြရန် ကရင်လက်နက် ကိုင် (KNU)၏ ဒူးပလာယာခရိုင်က ယနေ့(ဧပြီ ၁၈ ရက်)တွင် ထုတ်ပြန်ထားသည်။
ထိုင်းနိုင်ငံသို့ ကုန်စည်ပို့ဆောင်နေသည့် ကုန်သည်တစ်ဦးက “ပုံမှန်ထက်ကိုပေါ့နော်၊ မြဝတီသွားတာ နည်းသွားတယ်။ ၃ ပုံ ၁ ပုံလောက် မြဝတီသွားတာ နည်းသွားတယ်ပေါ့နော်။ ၃ ချိုး ၁ ချိုး၊ ၄ ချိုး ၁ ချိုးလောက်ပဲ တက်နိုင်တယ်။ ကားငှားရတာလည်း ခက်တယ်။ ကားကလည်း အန္တရာယ်များလို့ သိပ်မသွားကြဘူး” ဟု CNI သတင်းဌာနသို့ ပြောသည်။
KNU ၏ အာရှလမ်းဖြတ်သန်းမှု စည်းကမ်းချက်
မြဝတီ- ကော့ကရိတ် အာရှလမ်းပေါ်တွင် ပြီးခဲ့သည့် မတ်လ ၂၇ ရက်က မြန်မာ့တပ်မတော်နှင့် KNU-PDF ပူးပေါင်းတပ်တို့ တိုက်ပွဲ ဖြစ်ပွားခဲ့သည့်အတွက် အဆိုပါ အာရှလမ်းမကြီးကို ပိတ်ထားခဲ့ရသည်။
ထို့နောက် ယခုအခါမှာတော့ အချိန်အကန့်အသတ်ဖြင့် ပြန်လည် ဖွင့်ပေးသော်လည်း ကုန်တင်ကားများ အနေဖြင့် အခြေ အနေ အရပ်ရပ်ကို စောင့်ကြည့်၍ ချိန်ဆ သွားလာနေရကြောင်း ပြောင်းကုန်သည် ဦးသန့်ဇင်ထွန်းက CNI သတင်းဌာနသို့ ပြောသည်။
ဦးသန့်ဇင်ထွန်းက “အခုလည်း မြဝတီကို ပြောင်းကားတွေလည်း ပစ်သံ ခတ်သံကြားတယ် သွားလို့အဆင်မပြေဘူးဆိုရင် ရောက်တဲ့နေရာမှာ အိပ်ပေါ့။ အေးချမ်းသွားလို့ သွားလို့ လာလို့ရနေတယ်၊ ဘယ်သူတွေ တက်သွားပြီ အဲကျတော့ သွားပေါ့။ သွားတာတော့ သွားနေကြတာပဲ။ လုံးလုံးကြီးကို ပြတ်တောက် သွားတယ်မျိုးဆိုတာတော့ ၁ ရက်၊ ၂ ရက် ဖြစ်တာမျိုးတို့၊ နာရီပိုင်း ဖြစ်တာမျိုးတို့တော့ ဖြစ်တယ်။ လုံးလုံးကြီး ၁၅ ရက် ပိတ်ထားတယ်၊ ၁၀ ရက် ပိတ်ထားတယ်မျိုးတော့ မရှိပါဘူး။ သွားတော့ သွားနေကြတာပဲ”ဟု ပြောသည်။
တပ်မတော်နဲ့ KNU တိုက်ပွဲကြောင့် အာရှလမ်းပေါ်မှာ မီးလောင်နေတဲ့ ကားများ
မြဝတီ- ကော့ကရိတ် လမ်းမကြီးသည် မြန်မာ-ထိုင်း နှစ်နိုင်ငံ ကုန်သွယ်တင်ပို့ရာတွင် အသုံးပြုသည့် အဓိက လမ်းမကြီး ဖြစ်သည်။
မြဝတီ- ကော့ကရိတ် လမ်းမကြီးကို အသုံးပြု၍ မြန်မာနိုင်ငံမှ ဆန်ကွဲ၊ ပြောင်း၊ ငရုတ်၊ ကော်ဖီထုပ်နှင့် ရေထွက်ကုန်များ စ သည့် ကုန်စည်များကို တင်ပို့လျက်ရှိကြောင်း၊ ထိုင်းနိုင်ငံဘက်ကတော့ စက်သုံးဆီနှင့် အိမ်ဆောက်ပစ္စည်းများ၊ အသီးအနှံ များနှင့် လူသုံးကုန်ပစ္စည်းများ ပြန်လည် ဝင်ရောက်ကြောင်း သိရသည်။
