CNI News

၂၀၂၆ ခုနှစ်၊ မေ ၂၂

နိုင်ငံတော်သမ္မတ၏ လမ်းညွှန်ချက်ဖြင့် ဆောင်ရွက်နေသည့် ရက် ၁၀၀ စီမံကိန်းတွင် တရားမဝင် ကုန်စည်များကို ဖမ်းဆီးခြင်းကနေ ပြည်တွင်း၌ ကုန်ပစ္စည်းများ ပြတ်လပ်ကာ ကုန်စျေးနှုန်းများလည်း မြင့်တက်လာနေသည်ဟု စီးပွားရေးလုပ်ငန်းရှင်များနှင့် စီးပွားရေးလေ့လာသုံးသပ်သူများက ပြောသည်။

ယခု မေလ ပထမပတ်ကနေ စတင်ပြီး ရှမ်းပြည်နယ်(မြောက်ပိုင်း)မှ ဝင်ရောက်သည့် တရုတ်ကုန်စည် တင်ဆောင် သော ကုန်ကားများနှင့် မြဝတီနယ်စပ်ဘက်မှ ဝင်ရောက်သည့် ထိုင်းကုန်စည် တင်ဆောင်သော ကုန်ကားများကို စစ်ဆေးရေး တင်းကျပ်ကာ ဖမ်းဆီးမှုများ ပြုလုပ်လာခဲ့သည်။

စိုက်ပျိုးရေးသုံး ကုန်စည်များ၊ မော်တော်ယာဉ်သုံး ပစ္စည်းများ၊ အိမ်သုံးကုန်ပစ္စည်းများ၊ လူသုံးကုန်ပစ္စည်းများ၊ စားသောက်ကုန်များ၊ ဆောက်လုပ်ရေး ပစ္စည်းများအပြင် အဝတ်အထည်များကိုပါ ဖမ်းဆီးလျက်ရှိသည်။

တခြားသော တင်ဆောင်၍ရသည့် ကုန်စည်များ အနေဖြင့်လည်း ယခုကဲ့သို့ တရားမဝင် ကုန်စည် ဖမ်းဆီးခြင်း ကြောင့် ကုန်တင်ကားများ အနေဖြင့် တင်ဆောင်ရန် မဝံ့ရဲဘဲ ဖြစ်လာကြောင်း၊ ထို့ကြောင့် တန်ဆာခဈေးနှုန်း အဆမတန် ကောက်ခံပြီး အရဲစွန့်တင်လာခြင်းနှင့် လမ်းကြောင်းတစ်လျှောက် စစ်ဆေးရေးဂိတ်များကို ပေးဆောင်ရသည့် ဂိတ်ကြေးများကြောင့် ပြည်တွင်းတွင် ဈေးနှုန်းများ မြင့်တက်လျက် ရှိနေသည်။

ကုန်ပစ္စည်းများကို တွေ့ရစဉ်

ထိုသို့ ဖမ်းဆီးမှုများကြောင့် တစ်နိုင်တစ်ပိုင် လုပ်ငန်းများတွင် အသုံးပြုနေသည့် ကုန်ကြမ်းပစ္စည်းများသည် သယ်ယူပို့ဆောင်ရေးစရိတ်ကြောင့် ဈေးနှုန်း ၃ ဆခန့် မြင့်တက်လျက်ရှိနေကြောင်း၊ အများပြည်သူ သုံးစွဲနေသည့် စားသောက်ကုန်များနှင့် လူသုံးကုန်များသည်လည်း ဈေးနှုန်းများ တဖြည်းဖြည်း မြင့်တက်လာနေသည်ဟု စီးပွားရေးလေ့လာသုံးသပ်သူ ဦးသက်ဇော်က CNI သတင်းဌာနသို့ ပြောသည်။

၎င်းက “အခုကစပြီး ဖြစ်နေပြီလေ။ မြန်မာပြည်မှာ တစ်နိုင်တစ်ပိုင် သမားတွေက ဒုက္ခရောက်တယ်ဗျ။ ရှင်းရှင်း ပြောရရင် Ocean တို့၊ City Mart တို့၊ Marko တို့ဘာတို့က ပစ္စည်းက သိပ်ပြဿနာ မရှိဘူး။ သူတို့ ဘာနဲ့ သွင်း မလဲ။ စဉ်းစားကြည့်ရင် အကြီးသမားတွေက အကြီးလိုပဲ ဖြတ်သန်းနေသလား။ တစ်နိုင်တစ်ပိုင် သမားတွေက လုပ်လို့ မရဘူးလား။ အခုဥစ္စာက နယ်စပ်ကုန်သွယ်ရေးကနေ စက်ပစ္စည်းတွေ တင်သွင်းရင် မလွယ်ဘူးတဲ့။ တရုတ်ကုန်သွယ်ရေးမှာ ကျနော် စုံစမ်းကြည့်တာ ရွှေလီကပစ္စည်းကို ရွှေလီကနေ မူဆယ်ကို သယ်ရတာ ခက်သွား ပြီ။ မူဆယ်ကနေ ရှမ်းကို သယ်ရတာ ပိုခက်သွားပြီ။ ဆိုတော့ ၁ kg မှာ သုံးတဲ့ပစ္စည်းရဲ့ ၃ ဆလောက်က သယ်ယူ ပို့ဆောင်စရိတ်မှာ သုံးနေတယ်။ ပစ္စည်းက ဈေးပေါပေါနဲ့ လုပ်သားပြည်သူ လက်ထဲကို မရောက်ဘူး” ဟု ပြော သည်။

ထို့အပြင် စစ်ဆေးရေးဂိတ်များတွင် ကုန်စည်များကို ဖမ်းဆီးပြီး ငွေကြေးတောင်ခံမှုများ လုပ်ဆောင်နေခြင်း ကြောင့် ယင်းဂိတ်များတွင် တာဝန်ထမ်းဆောင်ရန်အတွက် တချို့သော စစ်သားနှင့် ရဲတပ်သား ဝန်ထမ်းများသည် အထက်အရာရှိများအား လာဘ်ထိုးကာ လုပ်ဆောင်လာခြင်းများလည်း ရှိနေသည်။

ကုန်ကားများကို စစ်ဆေးနေစဉ်

အစိုးရ၏ နယ်စပ်ကုန်သွယ်ရေးလမ်းကြောင်း ပိတ်ထားခြင်း၊ ကုန်စည် သယ်ဆောင်ခြင်းများ ကန့်သတ်ခြင်းနှင့် ဖမ်းဆီးခြင်းများကြောင့် လုပ်ငန်းရှင် အပါအဝင် စားသုံးသူ ပြည်သူလူထုများ ဒုက္ခရောက်နေသည်ဟု နိုင်ငံရေး လေ့လာသုံးသပ်သူ ဦးထက်အောင်ကျော်က CNI သတင်းဌာနသို့ ပြောသည်။

၎င်းက “ကုန်စည်ကားတစ်စီးကို သိန်း ၉၀၀ ပေးပြီးတော့မှ ဝင်လာတဲ့ ဟာတွေလည်းရှိတယ်။ အဲဒီလိုမျိုး မြန်မာနိုင်ငံရဲ့ စီးပွားရေးကလေ နဂိုကတည်းကမှ gray ဇုန် များတယ်ပေါ့နော်၊ မီးခိုးရောင် နယ်မြေထဲမှာ ဖြစ် နေတာကိုး။ အမှန်တကယ် ဒါတွေက ဝိသမလောဘတွေလည်း မဟုတ်ဘူး။ တကယ့်ကို မူးယစ်ဆေးဝါး ဘာညာ ဟိုလိုမျိုး လက်နက်လိုမျိုး အဲဒီလိုမျိုးလည်း မဟုတ်ဘူး။ ကောင်းရောင်းကောင်းဝယ် ဆိုတဲ့ဟာပဲ။ အစိုးရက ကောင်းရောင်းကောင်းဝယ်လို့ သတ်မှတ်လိုက်ရင် ကောင်းရောင်းကောင်းဝယ် တကယ့်ကို ကောင်း ကောင်းမွန်မွန် လုပ်စားတဲ့သူဖြစ်မှာ။ အဲဒါကို ဟိုကပိတ်ဆို့ ဒီကပိတ်ဆို့နဲ့ လူတွေအကုန်လုံးက အလုပ်လုပ်ရတဲ့ဟာက gray ဇုန် ထဲမှာ လုပ်နေရတဲ့ အခါကျတော့ အကုန်လုံး လုပ်ငန်းလုပ်ရတဲ့သူလည်း ဒုက္ခရောက်တယ်၊ စားသုံးသူပြည်သူလူထု လည်း ဒုက္ခရောက်တယ်၊ အကုန်လုံး ဒုက္ခရောက်တယ်” ဟု ပြောသည်။

လက်ရှိတွင် အစိုးရ၏ ရက် ၁၀၀ စီမံကိန်း၌ တရားမဝင် ကုန်စည်များကို စစ်ဆေး ဖမ်းဆီးမှု တင်းကျပ်နေခြင်း ကြောင့် တရုတ်ကုန်စည်နှင့် ထိုင်းကုန်စည် တင်သွင်းနေကြသည့် ကုန်စည်တင်ပို့သည့် လုပ်ငန်းများ ရပ်ဆိုင်းထား ရသည်ဟု လုပ်ငန်းရှင်များထံမှ သိရသည်။

ထို့အပြင် ပြည်တွင်း၌ ကုန်စည်သယ်ဆောင်ရာတွင်လည်း တိုင်းဒေသကြီးနှင့်ပြည်နယ် တစ်ခုကြား  သယ်ဆောင် သည့် နေရာတွင်လည်း အရေအတွက် အကန့်အသတ်နှင့် ကုန်စည်ကန့်သတ်ချက်များလည်း ရှိနေသည်ကို တွေ့ရသည်။