CNI International News
ဘန်ကောက်၊ နိုဝင်ဘာ ၃၀
ဂျပန်ကားကုမ္ပဏီ ၆ ခုက လာမည့်နှစ်အတွင်း မော်တော်ယာဉ်ကဏ္ဍ ဖွံ့ဖြိုးတိုးတက်မှုကို မြှင့်တင်ရန်အတွက် ထိုင်းနိုင်ငံအတွင်း ၎င်းတို့၏ ကားထုတ်လုပ်ရေး စက်ရုံများကို ဆက်လက် လည်ပတ်သွားမည်ဖြစ်ကြောင်း ထိုင်း စက်မှုဝန်ကြီးဌာနကို ပြောကြားခဲ့သည်ဟု The Nation မှ ဖော်ပြခဲ့သည်။
ရင်းနှီးမြှုပ်နှံမှုပမာဏ ဘတ် ၁၂၀ ဘီလျံနှင့်အတူ ဂျပန်ကားကုမ္ပဏီများနှင့် ဆွေးနွေးမှုများသည် တိုးတက်မှုရှိခဲ့ ကြောင်း ထိုင်းစက်မှုဝန်ကြီး အကာနတ် ပရွန်ဖန် (Akanat Promphan) က နိုဝင်ဘာ ၂၉ ရက်တွင် အတည်ပြုခဲ့ သည်။
အကာနတ်က သူသည် သမားရိုးကျကားများနှင့် လျှပ်စစ်ကားများအတွက် ထုတ်လုပ်မှုများကို ထောက်ပံ့ပေးရန် အတွက် အခွန်လျှော့ချမှု အစီအစဉ်များနှင့် အခြားအကျိုးရှိစေမည့် အစီအစဉ်များကို ကမ်းလှမ်းသွားမည်ဟု ကတိပြုခဲ့သည်။
ဂျပန်ကားကုမ္ပဏီ တာဝန်ရှိသူများနဲ့ ထိုင်းအစိုးရအဖွဲ့ကိုတွေ့ရစဉ်
ထို့ပြင် စက်မှုဝန်ကြီးဌာနသည် ထိုင်းနိုင်ငံ၏ မော်တော်ယာဉ်လုပ်သား ၄၄၅,၀၀၀ ခန့်၏ စားဝတ်နေရေးကို ကာကွယ်ရန်နှင့် ထောက်ပံ့သူများအတွက် ပြည်တွင်း အရင်းအမြစ်များ အသုံးပြုမှုကို မြှင့်တင်သွားမည်ဟုလည်း ၎င်းက ဆိုသည်။
လာမည့်နှစ်အတွက် စျေးကွက် နာလန်ထူမှုတွင် ယုံကြည်ချက်ရှိကြောင်း ဖော်ပြသည့် အနေဖြင့် အကာနတ်က "စက်မှုဝန်ကြီးဌာနဟာ လက်ရှိ ကြုံတွေ့နေရတဲ့ စိန်ခေါ်မှုတွေကြားထဲက ထိုင်းမော်တော်ယာဉ်ကဏ္ဍမှာ ယုံကြည် မှုကို ပြန်လည်တည်ဆောက်သွားမှာ ဖြစ်ပါတယ်။ အဲဒီအထဲမှာ ဂျပန်ကားကုမ္ပဏီတွေရဲ့ စက်ရုံတွေကို နေရာ ပြန်လည်ချထားရေးတွေလည်း ပါဝင်ပါတယ်" ဟု ပြောကြားခဲ့သည်။
ထိုင်းနိုင်ငံတွင် ယခုနှစ်ပထမ ၁၀ လတာ ကာလအတွင်း ကားအစီးရေ ၁ ဒသမ ၂၄ သန်းကို ထုတ်လုပ်ခဲ့ပြီး ထိုပမာဏသည် ပြီးခဲ့သည့်နှစ် ကာလတူက ထုတ်လုပ်ခဲ့သည့် ကားအစီးရေ ပမာဏနှင့် နှိုင်းယှဉ်ပါက ၁၉ ဒသမ ၂၅ ရာခိုင်နှုန်း လျော့ကျခဲ့
ကြောင်း ထိုင်းစက်မှုလုပ်ငန်းများအဖွဲ့ချုပ်၏ ထုတ်ပြန်ချက်တွင် ဖော်ပြထားသည်။
Source: The Nation
