CNI International News
ဘန်ကောက် ၊ ဧပြီ ၈
အီရန်ပဋိပက္ခကြောင့် ကမ္ဘာ့ရေနံဈေးနှုန်းများ အရှိန်အဟုန်ဖြင့် မြင့်တက်လာမှုသည် ထိုင်းနိုင်ငံ၏ ငါးဖမ်းလုပ်ငန်း ကဏ္ဍအပေါ် ကြီးမားသော ရိုက်ခတ်မှုများ ဖြစ်ပေါ်စေကြောင်း Nikkei Asia မှ ဖော်ပြခဲ့သည်။
ငါးဖမ်းလုပ်ငန်း၏ ကုန်ကျစရိတ် ၇၀ ရာခိုင်နှုန်းခန့်မှာ လောင်စာဆီ စရိတ်ဖြစ်သဖြင့် လက်ရှိ ဈေးနှုန်းများအရ ပင်လယ်ထဲသို့ ငါးဖမ်းထွက်ပါက အရှုံးပေါ်နိုင်ခြေ ပိုများနေသည်။
လက်ရှိတွင် သင်္ဘော အများအပြားသည် ဆိပ်ကမ်းများတွင်သာ ရပ်နားထားရပြီး အချို့မှာ လုပ်ငန်းများကို ယာယီ ရပ်ဆိုင်းထားရကြောင်း ထိုင်းငါးဖမ်းလုပ်ငန်းအဖွဲ့ချုပ်က ပြောကြားခဲ့သည်။
ယခုကဲ့သို့ ငါးဖမ်းသင်္ဘောများ ပင်လယ်ပြင် မထွက်နိုင်ခြင်းက ပြည်တွင်း ပင်လယ်စာ ဈေးကွက်တွင် ကုန်ပစ္စည်း ပြတ်လပ်မှုနှင့် ဈေးနှုန်းကြီးမြင့်မှုကို ဖြစ်ပေါ်စေနိုင်သည်။
ထိုင်းစက်သုံးဆီဆိုင်ကို တွေ့ရစဉ်
ထိုင်းအစိုးရ အနေဖြင့် ငါးဖမ်းသမားများအတွက် လောင်စာဆီ ထောက်ပံ့ကြေးပေးရန် စဉ်းစားနေသော်လည်း ဘဏ္ဍာရေး ဝန်ထုပ်ဝန်ပိုးကြောင့် အခက်တွေ့နေသည်ဟု ဆိုသည်။
စစ်ပွဲကြာရှည်လာသည်နှင့်အမျှ ထိုင်းနိုင်ငံ၏ ပင်လယ်စာ ပို့ကုန်ကဏ္ဍသည်လည်း ကမ္ဘာ့ဈေးကွက်တွင် ယှဉ်ပြိုင် နိုင်စွမ်း ကျဆင်းလာမည့် အရေးကို စိုးရိမ်နေကြကာ ငါးဖမ်းသမားများနှင့် ရေလုပ်သား ထောင်ပေါင်းများစွာမှာ လည်း နေ့စဉ်ဝင်ငွေ မရှိတော့ဘဲ စားဝတ်နေရေး အကျပ်အတည်းနှင့် ရင်ဆိုင်နေရသည်။
သယ်ယူပို့ဆောင်ရေးနှင့် အအေးခန်း သိုလှောင်မှု စရိတ်များပါ မြင့်တက်လာခြင်းကြောင့် ငါးဖမ်းလုပ်ငန်းခွင် တစ်ခုလုံး၏ ထောက်ပံ့ရေးကွင်းဆက်မှာ ကမောက်ကမ ဖြစ်နေသည်။
အကယ်၍ လောင်စာဆီ ဈေးနှုန်းများ ဆက်လက် မြင့်တက်နေပါက ထိုင်းငါးဖမ်းလုပ်ငန်း၏ ရေရှည်တည်တံ့မှုမှာ ကြီးမားသော ခြိမ်းခြောက်မှုအောက်သို့ ရောက်ရှိသွားမည်ဖြစ်သည်။
Source: Nikkei Asia
