CNI International News
ဘန်ကောက်၊ မတ်လ ၂၄
ထိုင်းဘဏ္ဍာရေးဝန်ကြီးဌာနသည် စီးပွားရေးလုပ်ငန်းများ တောင့်ခံနိုင်သည့် အဆင့်တွင် စက်သုံးဆီ လက်လီ ဈေးနှုန်းများအား ထိန်းညှိရန်အတွက် ရေနံအပေါ် ကောက်ခံသော အခွန်နှုန်းထား လျှော့ချပေးမည့် ပမာဏကို စဉ်းစားတွက်ချက်နေကြောင်း ဘန်ကောက်ပို့စ်မှ ဖော်ပြခဲ့သည်။
ထိုသို့ အခွန်လျှော့ချမှုကြောင့် တစ်ဖက်တွင်လည်း အစိုးရ၏ အခွန်ဘဏ္ဍာငွေအပေါ် အလွန်အကျွံ ထိခိုက်မှု မရှိစေရန် ဂရုတစိုက် စဉ်းစားသုံးသပ်နေသည်။
ဒီဇယ်အပေါ် ကောက်ခံသည့် အခွန်ကို ၁ ဘတ် လျှော့ချမည်ဆိုပါက အစိုးရအနေဖြင့် အခွန်ဘဏ္ဍာငွေ စုစုပေါင်း ဘတ် ၂ ဘီလျံခန့် ဆုံးရှုံးမည်ဖြစ်ပြီး ဓာတ်ဆီအတွက်မူ ဘတ် သန်း ၈၀၀ ခန့် ဆုံးရှုံးနိုင်ကြောင်း အမည်မဖော်လို သည့် ဝန်ကြီးဌာန သတင်းရင်းမြစ်တစ်ခုက ပြောကြားခဲ့သည်။
ဝန်ကြီးဌာန အနေဖြင့် ရေနံနှင့် ရေနံထွက် ပစ္စည်းများအပေါ် ကောက်ခံသည့် အခွန်ကို တစ်လီတာလျှင် မည်မျှ အထိ လျှော့ချပေးသင့်သည်ကို ဆုံးဖြတ်နိုင်ရန် လက်လီ စက်သုံးဆီ ဈေးနှုန်းနှင့် စီးပွားရေး အခြေအနေကို နှိုင်းယှဉ်ပြီး လေ့လာဆန်းစစ်နေသည်ဟု ဆိုသည်။
အခွန်လျှော့ချမှုများနှင့်ပတ်သက်ပြီး အစိုးရ၏ ခန့်မှန်းခြေ စုစုပေါင်း အခွန်ရရှိမှုနှင့် ဝင်ငွေအပေါ် သက်ရောက်နိုင် သည့် အတိုင်းအတာတို့ကိုပါ ထည့်သွင်း စဉ်းစားရမည် ဖြစ်သည်။
ထိုင်းစက်သုံးဆီဆိုင်ကို တွေ့ရစဉ်
ယခုဘဏ္ဍာရေးနှစ်၏ ပထမလေးလပတ် ကာလ (၂၀၂၅ ခုနှစ်၊ အောက်တိုဘာလမှ ၂၀၂၆ ခုနှစ်၊ ဇန်နဝါရီလအထိ) အတွင်း အစိုးရ၏ အသားတင် အခွန်ဘဏ္ဍာငွေ ရရှိမှုသည် ဘတ် ၈၆၈ ဘီလီယံ ရှိခဲ့သည်။
ထိုပမာဏသည် လျာထားချက်ထက် ဘတ် ၉ ဒသမ ၅၆ ဘီလျံ (သို့မဟုတ် ၁.၁ ရာခိုင်နှုန်း) ပိုမိုများပြားခဲ့ပြီး ယခင်နှစ် အလားတူ ကာလထက် ၄ ဒသမ ၇ ရာခိုင်နှုန်း ပိုမိုမြင့်တက်လာခြင်းဖြစ်သည်။
ရုရှား-ယူကရိန်း စစ်ပွဲအတွင်း ပရာယွတ် ချန်အိုချာ (Prayut Chan-o-cha) အစိုးရလက်ထက်တွင် ဒီဇယ်လက်လီ ဈေးနှုန်းကို တစ်လီတာလျှင် ဘတ် ၃၀ ဖြင့် ထိန်းချုပ်နိုင်ရန် ဒီဇယ်အခွန်အား တစ်လီတာလျှင် ၃ ဘတ်နှုန်း လျှော့ချပေးခဲ့ပြီး နောက်ပိုင်းတွင် ၅ ဘတ်အထိ လျှော့ချပေးခဲ့ကြောင်း ထိုင်းအစိုးရ သတင်းရင်းမြစ်က ပြောသည်။
ထိုသို့ အခွန် လျှော့ချပေးခဲ့မှုကြောင့် အစိုးရ၏ အခွန်မှ ရရှိသည့် ဘဏ္ဍာငွေသည် ဘတ် ၁၀၀ ဘီလျံကျော် ဆုံးရှုံး ခဲ့ရသည်။
Source: ဘန်ကောက်ပို့စ်
