CNI News
၂၀၂၄ ခုနှစ်၊ မေလ ၁၀
မြန်မာနိုင်ငံမှ ထွက်ရှိသည့် ပြောင်းများကို ယခုနှစ်တွင် ဈေးကွက်သစ်အနေဖြင့် အိန္ဒိယနိုင်ငံသို့ တင်ပို့လျက်ရှိ နေကြောင်း မြန်မာနိုင်ငံပြောင်းလုပ်ငန်းအသင်းထံမှ သိရသည်။
ယခင်က အိန္ဒိယနိုင်ငံသို့ ပြောင်းတင်ပို့မှုသည် အနည်းငယ်သာရှိပြီး ယခုနှစ်တွင် အိန္ဒိယနိုင်ငံ၏ ပြောင်းလိုအပ် ချက်အရ ပြောင်းတန်ချိန် အမြောက်အများ တင်ပို့သွားရန် ရှိနေကြောင်း၊ လက်ရှိတွင် တန်ချိန် ၂၀၀၀ မှ ၃၀၀၀ ကြားရှိ သင်္ဘော ၄ စီးခန့် တင်ပို့ထားပြီးဖြစ်ကြောင်း မြန်မာနိုင်ငံပြောင်းလုပ်ငန်းအသင်း ဒုတိယဥက္ကဋ္ဌ ဦးသန့်ဇင်ထွန်းက CNI သတင်းဌာနသို့ ပြောသည်။
၎င်းက “အရင်တုန်းကတော့ နည်းနည်းပါးပါးတော့ ပို့တာ ရှိတယ်လေ။ ဒီနှစ်ကတော့ တော်တော်များများစားစား ပို့တယ်။ ဒါကတော့ အိန္ဒိယရဲ့ လိုအပ်ချက်ပေါ့။ လက်ရှိ ပို့ထားတာကတော့ တန် ၂၀၀၀ နဲ့ ၃၀၀၀ ကြား သင်္ဘော ၄ စီးလောက်တော့ ရှိပြီပေါ့နော်။ အရင်တုန်းကပို့တာ သိပ်မသိဘူးပေါ့နော် နည်းတယ်။ ရံဖန်ရံခါမှ ပို့တာပေါ့နော်။ သီးခြားကုမ္ပဏီ အသေးလေးကနေ ဝယ်လိုက်တယ် ပို့လိုက်တယ် ကွန်တိန်နာ ဘယ်နှစ်လုံး အဲဒီလောက်ပဲ ပို့တာပေါ့နော်။ အခုလိုတော့ သင်္ဘောကြီးတွေအလိုက်သွားတာတော့ ၂၀၂၄ မှာ ဈေးကွက်အသစ်လို့တောင် ပြောလို့ရတာပေါ့နော်” ဟု ပြောသည်။
အိန္ဒိယသို့ တင်ပို့ရာတွင် အချိန်မြန်ဆန်ခြင်းနှင့် ကုန်ကျစရိတ် သက်သာခြင်းကြောင့် တောင်သူများထံမှတဆင့် ကုန်သည်များ ဝယ်ယူရာတွင် ပြောင်းကို ဈေးကောင်းပေး၍ ဝယ်ယူလာနိုင်သည်ဟု သိရသည်။
ကုန်သည်များအနေဖြင့် အိန္ဒိယသို့ ပြောင်းတင်ပို့ရာတွင် ဈေးနှုန်းအဆင်ပြေပါက စာချုပ်များ ထပ်ချုပ်သွားရန် လည်း ရှိသေးကြောင်း သိရသည်။
ကွန်တင်နာများဖြင့် တင်ပို့ရန် ထားရှိထားသည့် ပြောင်းအိတ်များကို ဆိပ်ကမ်းတွင်တွေ့ရစဉ်
လက်ရှိတွင် မြန်မာ့ပြောင်း ဝယ်ယူမှုအနေဖြင့် ထိုင်းနိုင်ငံနှင့် အိန္ဒိယနိုင်ငံသည် အပြိုင်အဆိုင် ဖြစ်နေသည်ဟု မြန်မာနိုင်ငံ ပြောင်းလုပ်ငန်းအသင်း ဒုတိယဥက္ကဋ္ဌ ဦးသန့်ဇင်ထွန်းက CNI သတင်းဌာနသို့ ပြောသည်။
“ကမ္ဘာ့ပြောင်းပေါက်ဈေးတွေနဲ့ပဲ ယှဉ်ပြီး ဝယ်ကြတာပဲ၊ သို့သော် သယ်ယူပို့ဆောင်တဲ့နေရာမှာ သင်္ဘောကြီးတွေနဲ့ သွားရတယ်။ နည်းနည်း ရက်တိုတယ်၊ အဲဒီအပေါ်မှာ စရိတ်စက သက်သာတယ်။ သက်သာတော့ ပြောင်းဈေးလေး နည်းနည်း ပိုပေးဝယ်လို့ရတာပေါ့။ လက်ရှိစာချုပ်အရတော့ နောက်ထပ်ပို့ဖို့တွေ ရှိသေးတယ်။ ဈေးကိုက်ရင် စာချုပ်တွေ ထပ်ချုပ်သွားမှာပေါ့နော်။ စာချုပ်တွေကလည်း အပြီး ဘယ်လောက်ရယ်မဟုတ်ဘူး။ သူတို့က တစ်ပိုင်းပြီးမှ တစ်ပိုင်း သွားကြတာပေါ့နော်။ ဒီနိုင်ငံရဲ့ မူဝါဒကလည်း သင်္ဘောတစ်ကြောင်း ထွက်ပြီးမှ နောက် တစ်ကြောင်းအတွက်ကို လိုင်စင်ထုတ် ဘာထုတ်ရှိသေးတယ်လေ။ အိန္ဒိယက ဝယ်ချင်တာတောင် ဒီဘက်ကနေ ပြီးတော့ ရောင်းနိုင်ဖို့နဲ့ဟာတွေ ရှိသေးတော့ ဘယ်အချိန်မှာ ဘာဖြစ်မယ်ဆိုတာတော့ အတိအကျတော့ ပြောလို့ မတတ်ဘူး။ သို့သော် ဒီတစ်လဝန်းကျင်လောက်မှာတော့ မေလထဲအထိကတော့ ရောင်းဖို့ရှိပါသေးတယ်။ လောလောဆယ်တော့ ထိုင်းနဲ့ အိန္ဒိယနဲ့အပြိုင် ဝယ်နေကြတဲ့သဘောပေါ့နော်။ အခြား ဗီယက်နမ်တို့ဘာတို့တော့ ရှိတော့ ရှိတာပေါ့နော်။ ဒါပေမယ့် ထိုင်းနဲ့ အိန္ဒိယနဲ့အပြိုင် ဝယ်တဲ့သဘောလောက် ဖြစ်သွားတာပေါ့။ ဈေးကွက် လေး နည်းနည်းကျယ်သွားတာပေါ့” ဟု ပြောသည်။
မြန်မာနိုင်ငံမှ ထွက်ရှိသည့် ပြောင်းသီးနှံ၏ ၇၅ ရာခိုင်နှုန်းကို နှစ်စဉ် ဖေဖော်ဝါရီလမှ ဩဂုတ်လအထိ အခွန် ကင်းလွတ်ခွင့်ဖြင့် ထိုင်းနိုင်ငံသို့ တင်ပို့လျက်ရှိနေပြီး ယခုနှစ်တွင် အိန္ဒိယနိုင်ငံသို့ ဈေးကွက်သစ်အနေဖြင့် တင်ပို့ခြင်းဖြစ်သည်။
မြန်မာနိုင်ငံတွင် ရှမ်းပြည်နယ်ဘက်မှ ထွက်ရှိသည့် ပြောင်းသီးနှံကို ပြည်ပသို့ အများဆုံးတင်ပို့ပြီး ဧရာဝတီတိုင်း ဒေသကြီးမှ ထွက်ရှိသည့် ပြောင်းကိုလည်း တင်ပို့လျက် ရှိသည်။
