CNI News
၂၀၂၄ ခုနှစ်၊ မေလ ၈
ကိုဗစ် - ၁၉ ရောဂါ ထိန်းချုပ်မှုနှင့် မြန်မာနိုင်ငံအတွင်း တိုက်ပွဲဖြစ်ပွားမှုများကြောင့် ၄ နှစ်နီးပါးခန့် ပိတ်ထားခဲ့ ရသော မြန်မာ - အိန္ဒိယ နယ်စပ်ကုန်သွယ်ရေး၏ အဓိက ကုန်သွယ်ရေးလမ်းကြောင်း တစ်ခုဖြစ်သည့် ကလေး - တမူး - ကလေးဝ နယ်စပ်ကုန်သွယ်ရေးသည် လက်ရှိတွင် တခြားသောလမ်းကြောင်းကို အသုံးပြု၍ ကုန်သွယ်မှု ရှိနေကြောင်း တမူးကုန်သည်များထံမှ သိရသည်။
အိန္ဒိယက နယ်စပ်ကုန်သွယ်ရေးကို ပိတ်ထားသည့်အပြင် ကလေး - တမူး လမ်းကြောင်းတလျှောက်တွင်လည်း နယ်မြေတည်ငြိမ်မှု မရှိသည့်အတွက် ကုန်သွယ်ရေး လုပ်ဆောင်ရာတွင် တောတွင်းလမ်းကြောင်းများနှင့် ရေလမ်းကြောင်းကိုသာ အသုံးပြု၍ အိန္ဒိယကုန်စည်များကို တင်သွင်းနေကြသည်ဟု ကုန်သည်များက ပြောသည်။
အိန္ဒိယဘက်က နယ်စပ်ကုန်သွယ်ရေးဂိတ်ကို ဖွင့်လှစ်ခဲ့သည်ရှိသော် မြန်မာနိုင်ငံအတွင်း လမ်းကြောင်း အခြေအနေ ကောင်းမွန်မှုမရှိပါက တောလမ်းကြောင်းဖြင့်သာ သွားလာကြရမည်ဖြစ်သည်ဟု တမူးကုန်သည် ကိုမင်းကိုက CNI သတင်းဌာနသို့ ပြောသည်။
တမူး PDF ကို တွေ့ရစဉ်
၎င်းက “အခုလည်း တခြားလမ်းကြောင်းကနေ သွားနေရတာပဲ။ ကလေးကို ရောက်ဖို့အတွက် ကားလမ်းမကြီးက ပြဿနာများလို့ ပိတ်တယ်ဆိုရင် တမူးနဲ့ ကလေးကြားမှာ တောထဲကနေပြီးတော့ ကိုယ့်ဘာသာကိုယ် လမ်းတွေ ဖောက်ပြီးတော့ ဆိုင်ကယ်နဲ့ ကဲ့တာရှိတယ်။ အိန္ဒိယဘက်က ရွာတွေကို ဖြတ်လိုက်၊ မြန်မာဘက်ကို ဖြတ်လိုက် ကလေးရောက်ဖို့အရေးကို ကိုယ့်နည်းကိုယ့်ဟန်နဲ့ လုပ်နေကြတာပဲ။ ရေလမ်းကြောင်းဆိုတာကလည်း ကလေးနဲ့ ကလေးဝရှိတယ်။ အဓိက ကလေးနဲ့ ကလေးဝ ရောက်ဖို့ပဲလိုတယ် တမူးကနေ အိန္ဒိယပစ္စည်းတွေက။ ရေလမ်းကြောင်း ဆိုတာကလည်း ဒီကနေ ရောက်ဖို့က ယူချောင်းလို့ ခေါ်တာပေါ့၊ ယူချောင်းကနေ သယ်တာရှိ တယ်။ လမ်းမှာ ခမ်းပတ်ဆိုတဲ့ ရွာနားလေးအထိ ရောက်အောင်သယ်၊ အဲဒီကနေပြီးတော့ ကားနဲ့ တခါ ကလေးကို ကဲ့တယ်။ တချို့ကလည်း အဲဒီကနေ ကလေးဝကို သယ်တယ်။ ကလေးဝ ကနေပြီးတော့ မုံရွာအထိကျတော့ တကယ်လို့ ကလေးနဲ့ မုံရွာဘက်က လမ်းကြောင်းတွေက ပိတ်တယ်ဆိုလို့ရှိရင် ကလေးဝကနေ မုံရွာအထိကို ရေလမ်းနဲ့သယ်တာ ချင်းတွင်းမြစ်ကနေ။ လမ်းကြောင်းတွေ အဆင်ပြေသလို သယ်နေကြတာပဲလေ။ ဒါပေမယ့် ပြောချင်တာက အိန္ဒိယက ဘယ်လောက်ပဲပွင့်ပွင့် ကိုယ့်ဘက်က လမ်းကြောင်း မငြိမ်သက်ဘူးဆိုတော့လည်း ဒေသခံတွေအနေနဲ့ ကိုယ်အဆင်ပြေရာ လုပ်ကိုင်စားရတာပေါ့” ဟု ပြောသည်။
မြန်မာ - အိန္ဒိယ နယ်စပ်ကုန်သွယ်ရေးဖြစ်သည့် တမူး - မိုးရေး နယ်စပ်ကုန်သွယ်ရေးတွင် တမူး-ကလေးဝ-တန့်ဆည်-ရေဦး-မုံရွာလမ်း(မဟာမြိုင်လမ်း)-မန္တလေး၊ တမူး-ကလေးဝ-မုံရွာ (ယာကြီးလမ်း)- မန္တလေး၊ တမူး-ကလေး-ဂန့်ဂေါ-ပုလဲ-မုံရွာ-မန္တလေး စသည့် လမ်းကြောင်း ၃ သွယ်ကိုအသုံးပြု၍ ယခင်က ကုန်သွယ်မှု လုပ်ဆောင်ကြသည်။
သို့သော် လက်ရှိတွင် ထိုလမ်းကြောင်း အားလုံးသည် နယ်မြေတည်ငြိမ်မှု မရှိသည့်အတွက် အသုံးပြုနိုင်ခြင်း မရှိပေ။
မဏိပူရ်ပြည်နယ်တွင် ဖြစ်ပွားသည့် လူမျိုးရေးအဓိကရုဏ်းကြောင့် အိန္ဒိယက နယ်စပ်ကုန်သွယ်ရေးကို ပိတ်ထား ခြင်းဖြစ်ပြီး ထိုလူမျိုးရေး အကျပ်အတည်း ပြေလည်မှသာ နယ်စပ်ကုန်သွယ်ရေး ပြန်လည်လုပ်ဆောင်၍ ရမည်ဟု တမူး - ကလေး - ကလေးဝ နယ်စပ်ကုန်သည်များအသင်းမှ ဦးလှမောင်က CNI သတင်းဌာနသို့ ပြောသည်။
တမူး PDF ကို တွေ့ရစဉ်
၎င်းက “ကျနော်တို့ မြန်မာနိုင်ငံက အဓိကမကျဘူး။ အိန္ဒိယနိုင်ငံက အဓိကကျတယ်။ အိန္ဒိယနိုင်ငံ မဏိပူရ် ပြည်နယ်မှာ ကူကီးနဲ့ ကသည်းနဲ့ လူမျိုးစု ပြဿနာပေါ့နော်၊ ဖျက်နေတာကြာပြီ။ သူတို့ဆီမှာ လုံခြုံမှု မရှိဘူးပေါ့ နော်။ အဲဒီဟာ ရှိနေတဲ့အခါကျတော့ ဒီကုန်သွယ်ရေးက ပြန်လုပ်လို့ ရပါ့မလားဆိုတာ လောလောဆယ်တော့ အဲဒီ ပြဿနာ မပြေလည်မချင်း လုပ်လို့မရသေးဘူး။ သူတို့နိုင်ငံထဲမှာကို ပြဿနာက ရှုပ်ထွေးနေတာ။ ကိုယ့်နိုင်ငံထဲက ကိစ္စကို အသာထား၊ သူတို့နိုင်ငံထဲမှာကို ပြဿနာ ဖြစ်နေတာ” ဟု ပြောသည်။
မြန်မာ - အိန္ဒိယ နယ်စပ်ကုန်သွယ်ရေး၏ ဂိတ်ပေါက်တစ်ခုဖြစ်သည့် တမူး - မိုရေး နယ်စပ်ကုန်သွယ်ရေး ပြန်လည်ဖွင့်လှစ်ပါက တမူးဒေသခံများအတွက် အလုပ်အကိုင် အခွင့်အလမ်းများ အဆင်ပြေလာမည်ဖြစ်ပြီး ကုန်ဈေးနှုန်းကြီးမြင့်ခြင်းနှင့် ကုန်စည်ပြတ်လပ်ခြင်းများလည်း လျော့ကျလာမည်ဖြစ်သည်။
လက်ရှိတွင် အိန္ဒိယက မြန်မာနိုင်ငံနှင့် ထိစပ်နေသည့် တမူး - မိုရေး နယ်စပ်ကုန်သွယ်ရေး၊ တမူး- ကလေး - ကလေးဝ နယ်စပ်ကုန်သွယ်ရေး၊ ပလက်ဝ - မီဇိုရမ် နယ်စပ်ကုန်သွယ်ရေးနှင့် နာဂတောင်တန်းဒေသဘက်ရှိ ပန်ဆောင်နယ်စပ် ကုန်သွယ်ရေးဂိတ် အားလုံးကို ပိတ်ထားသည်။
ထို့ကြောင့် မြန်မာ- အိန္ဒိယ နယ်စပ်ကုန်သွယ်ရေးကို တရားမဝင် ကုန်သွယ်ရေးဖြင့်သာ လုပ်ဆောင်မှု ရှိနေသည်ဟု သိရသည်။
