CNI News
၂၀၂၄ ခုနှစ်၊ မေလ ၁၀
တရုတ်နိုင်ငံသို့ သွားရောက်အလုပ်လုပ်ကိုင်ရန် မူဆယ်မြို့၌ UID စမတ်ကဒ်အတွက် တုံကင်ရယူထားမှုသည် ၂၀၂၅ ခုနှစ်အထိသို့ ရောက်ရှိနေပြီဖြစ်ကြောင်း မူဆယ်မြို့ရှိ ပရဟိတအသင်းအဖွဲ့များက CNI သတင်းဌာနသို့ ပြောသည်။
မူဆယ်မြို့၌ UID စမတ်ကဒ် ထုတ်ပေးသည့် စက်မှာတစ်လုံးတည်းသာရှိပြီး တုံကင်လာယူကြသူ ဦးရေမှာ တစ်ပတ်လျှင် ခုနှစ်ထောင်မှ တစ်သောင်းဝန်းကျင်ခန့်အထိ ရှိသောကြောင့် စက်နှင့် လူဦးရေနှုန်းထားမှာ မျှတမှု မရှိသည့်အတွက် ကြန့်ကြာမှုများရှိကြောင်း ထောက်ပြကြသည်။
လက်ရှိ မူဆယ်မြို့တွင် UID စမတ်ကဒ်အား တစ်ရက်လျှင် လူဦးရေ ၁၀၀ ခန့်ကိုသာ ပြုလုပ်ပေးနိုင်ကြောင်း မူဆယ်မြို့ရှိ ကမ်းလက်ကူညီပရဟိတအသင်းမှ တာဝန်ရှိသူတစ်ဦးက CNI သတင်းဌာနသို့ ပြောသည်။
“မူဆယ်မှာဆိုရင် စက်တစ်လုံးရှိတယ်။ နမ့်ခန်းက စက်တစ်လုံးရှိတယ်။ နမ့်ခမ်းက နမ့်ခမ်းမြို့နယ်အတွက် ရိုက်ရ တာပေါ့။ မူဆယ်က မူဆယ်အတွက် ရိုက်တော့ အဲဒီမှာ အနယ်နယ် အရပ်ရပ်က လာတဲ့လူတွေ သိန်းချီရှိတယ်။ သိန်းချီရှိတော့ တုံကင်စနစ်နဲ့ သွားရတယ်။ တစ်ရက်ကိုလည်း လူဦးရေ ၁၀၀ လောက်ပဲ ပေးနိုင်တာကို။ တုံကင် ကတော့ ၂၀၂၅၊ ၆ လပိုင်းလောက်အထိ ရောက်သွားပြီ။ ဒါပေမယ့် သက်ဆိုင်ရာဌာနတွေကလည်း စက်ထပ် တိုးပေးဖို့ အစီအစဉ်ရှိတယ်ပေါ့လေ။ လူရော စက်ရောပေ့ါ။ အဲဒီကြတော့ တစ်ရက်ကို ၅၀၀ လောက်၊ ၆၀၀ လောက်ထုတ်ပေးနိုင်ရင်တော့ မကြာခင် ဒီပြဿနာက ပြီးသွားမှာပေါ့။ စနေနေ့မှာပေးရင် လာသမျှ လူအားလုံး ကိုပေးလိုက်တာ။ လူဦးရေ ထောင်ချီ၊ သောင်းချီ လာကြတာပဲ။ အနည်းဆုံး ခုနှစ်ထောင်နဲ့ တစ်သောင်းအထက်မှာ ရှိတယ်။ အဲဒီကြတော့ တစ်ရက်ကို ၁၀၀ နှုန်းနဲ့ တစ်လကို ၃ ထောင်ပေါ့နော်” ဟု ၎င်းက ပြောသည်။
မူဆယ်မြို့၌ UID စမတ်ကဒ်လာရောက်လျှောက်ထားကြသည့် လူတန်းကြီးကို တွေ့ရစဉ်
မူဆယ်မြို့သို့ UID စမတ်ကဒ် ထုတ်ပေးသည့် စက်အသစ်များထပ်ရောက်လာမည်ဆိုပါက ယခုထုတ်ပေးနေသည့် နှုန်းထားထက် ၅ ဆခန့် ပိုမြန်သွားနိုင်ကြောင်းလည်း သုံးသပ်ကြသည်။
တရုတ်၊ ထိုင်းနှင့် အိန္ဒိယနိုင်ငံဘက်သို့ သွားရောက်ရန် နယ်စပ်ဖြတ်သန်းခွင့်လျှောက်ထားမည့်သူများအနေဖြင့် ပြီးခဲ့သည့် မေလ ၁ ရက်မှစတင်ကာ နိုင်ငံသား စိစစ်ရေးကဒ်ပြားတစ်ခုတည်းပါရှိရုံဖြင့် မရတော့ဘဲ UID စမတ် ကဒ် ပါမှသာ နယ်စပ်ဖြတ်သန်းခွင့်လက်မှတ်များ ထုတ်ပေးမည်ဖြစ်ကြောင်း လူဝင်မှုကြီးကြပ်ရေးဝန်ကြီးဌာနမှ ထုတ်ပြန်ထားခြင်းဖြစ်သည်။
မူဆယ်မြို့မှ တရုတ်နိုင်ငံထဲသို့ သွားရောက်အလုပ်လုပ်ကိုင်ကြသည့် မြန်မာနိုင်ငံသားဦးရေမှာ တစ်ရက်လျှင် ပျမ်းမျှ လူဦးရေ ၃၀၀ မှ ၆၀၀ ခန့်အထိ ရှိကြောင်း သိရသည်။
မူဆယ်မြို့တွင် လက်ရှိ UID စမတ်ကဒ်အတွက် တုံကင်လျှောက်ထားကြသူများမှာ ဒေသအသီးသီးမှ တရုတ်သို့ သွားရောက်အလုပ်လုပ်ကိုင်လိုကြသူများဖြစ်သောကြောင့် ပွဲစားများဖြင့် ပြုလုပ်ကြရာတွင် သိန်းဆယ်ချီအထိ ပေါက်ဈေးများရှိနေကြောင်း နှလုံးလှပရဟိတအသင်းအဖွဲ့မှ တာဝန်ရှိသူတစ်ဦးက CNI သတင်းဌာနသို့ ပြောသည်။
“အဲဒီကိစ္စနဲ့ပတ်သက်လာရင် ပိုက်ဆံတွေ အများကြီး တောင်းနေကြတာ။ တချို့ကလည်း ပွဲစားတွေနဲ့တွေ့ အလိမ်ခံရတယ်။ အလိမ်ခံရတယ် အလုပ်တောင်မလုပ်လိုက်ရဘူး။ ရှိတဲ့ပါတဲ့ ပိုက်ဆံလေးတွေ ကုန်ပြီးတော့မှ အသင်းရောက်လာတဲ့ဟာတွေရော။ ၁၂၊ ၁၅၊ ၃၀ ကျော်(သိန်း) အဲဒါမျိုးတွေ။ ဒီမှာ မူဆယ်မြို့ကတော့ ဘာမှန်း မသိဘူး။ အရမ်းလုပ်စားတွေများတယ်။ တကယ့်ဘောစိတွေကတော့ လုပ်တယ်။ မူဆယ်မှာမလုပ်ဘူးဆိုတာ မရှိဘူး။ လုပ်တဲ့လူရှိတယ်။ လုပ်တဲ့လူရှိလာလို့ အဲဒီဈေးကလည်း ပေါက်သွားတာ။ သူတို့ကတော့ အချိန်ကာလ တစ်ခု စောင့်ရတဲ့ ဒုက္ခပေါ့။ ပိုက်ဆံမရှိရင်ပြန်ပေါ့ ဒီကြားထဲ။ ဆွေမျိုးအသိုင်းအဝိုင်းရှိရင်တော့ ဒီမှာနေပြီး လုပ်ပေါ့။ အဲဒီလိုပဲရှိတယ်” ဟု ၎င်းက ပြောသည်။
UID စမတ်ကဒ် ပြုလုပ်ရာတွင် နိုင်ငံတော်မှ အခမဲ့ ဆောင်ရွက်ပေးနေခြင်းဖြစ်သော်လည်း သက်ဆိုင်ရာဌာနမှ နယ်စပ်ဂိတ်ပေါက်များမှ ဖြတ်သန်းသွားလာမည့်သူများအား ယခုကဲ့သို့ UID စမတ်ကဒ်ပါရှိရန် သတ်မှတ်လိုက် ပြီးနောက် ပွဲစားများ၏ ဈေးကွက်မှာ ပေါ်ပေါက်လာခြင်းဖြစ်သည်။
အလားတူ မြဝတီမြို့တွင်လည်း UID စမတ်ကဒ်ပြုလုပ်ရာတွင် ၁ သိန်းဝန်းကျင်ခန့်အထိ အမြန်ကြေးအဖြစ် ပေါက်ဈေးများရှိနေသဖြင့် လူပြောများခဲ့ပြီးနောက် တုံကင်ထုတ်ပေးမှုအား မေလ ၈ ရက်နေ့မှစတင်ကာ ယာယီ ရပ်နားထားကြောင်း သိရသည်။
