CNI Article News

၂၀၂၂ ခုနှစ်၊ မတ်လ ၁၃

ယခုအခါသမယတွင်တော့ ဇာလန်းစကီးသည် ဗလာဒီမာပူတင်၏ ရုရှားကျူးကျော်ရေးတပ်များ သာလွန်အင်အားကို မနည်း ကြံ့ကြံ့ခံ တွန်းလှန်နေရသည့် ယူကရိန်း၏ ခုခံရေး မျက်နှာစာအဖြစ် ကမ္ဘာ့အာရုံစိုက်မှု အထူးရနေသည်။

သို့သော်လည်း မစ္စတာဇာလန်းစကီးသည်  နိုင်ငံရေး အတွေ့အကြုံနှင့် အစဉ်အလာ အနည်းငယ်ဖြင့်သာ အာဏာရလာခြင်း ဖြစ်သည်။

မျက်မှောက်ကာလ ဖေဖော်ဝါရီ ၂၄ ရက် ရုရှားတိုက်ခိုက်မှု စတင်ကတည်းက မစ္စတာဇာလန်းစကီးသည် ကိယက်ဗ်မြို့လယ်ရှိ သမ္မတရုံးမှနေ၍ Telegram၊ Facebook နှင့် Instagram တို့အပေါ်သို့ ၎င်းရိုက်ကူးထားသော ဗွီဒီယိုဖိုင်များ အကြိမ်ကြိမ် လွှင့် တင်၍ ရုရှားတို့၏ ထိုးစစ်အပေါ် ရင်ကိုမြေကတုတ်လုပ်၍ ခုခံတွန်းလှန်သွားကြရန် ယူကရိန်းပြည်သူများနှင့် ရဲဘော်များကို တိုက်တွန်းနှိုးဆော်နေခဲ့သည်။

တိုင်းပြည်၏ အထွတ်အထိပ် ခေါင်းဆောင်တစ်ဦးအနေဖြင့် စစ်အတွင်းကာလ ဗုံးသံ၊ အမြောက်သံများကြားမှ စိတ်ဓာတ် ခွန်အားကို မြှင့်တင်ပေးနေခြင်းကြောင့် ကမ္ဘာနှင့် ယူကရိန်းပြည်သူများ၏ နှလုံးသားကို ညို့ယူဖမ်းစားနိုင်ခဲ့သည်။

ယူကရိန်းပြည်သူတွေကို စကားပြောနေစဉ်(GETTY IMAGES)

အနောက်အုပ်စု၏ စစ်ရေးအရ စွက်ဖက်လိုစိတ် မရှိသဖြင့် ဇာလန်းစကီးလည်း စိတ်ပျက်လာခဲ့သည်မှာ အမှန်ပင် ဖြစ်သည်။

၎င်းသည် ယူကရိန်း ဝေဟင်ပိုင်နက်အပေါ် “မပျံသန်းရ” ဇုန်ကို သတ်မှတ် ကျင့်သုံးပေးဖို့ မြောက်အတ္တလန္တိတ်စာချုပ်အဖွဲ့ (နေတိုး)အား ထပ်ခါတလဲလဲ ဖိအားပေးခဲ့သော်လည်း နေတိုးမဟာမိတ် နိုင်ငံများကတော့ ရုရှားနှင့် ထိပ်တိုက် မတွေ့လိုကြ ပေ။ ဤအခြေအနေမျိုးတွင် ယူကရိန်း၏ နေတိုးဘက်သို့ ယိမ်းသော ခြေလှမ်းများကို ဇာလန်းစကီး ပြန်ဆုတ်ခဲ့ရသည်။

ထို့ပြင် ဇာလန်းစကီးသည် သူ့ကို ကရင်မလင်က လုပ်ကြံသတ်ဖြတ်ရန် လူလွှတ် စေခိုင်းထားခြင်းကိုလည်း ကောင်းစွာသိရှိ သည်။ ကရင်မလင် စီစဉ်ရေးဆွဲထားသည့် လုပ်ကြံသတ်ဖြတ်ရန် သို့မဟုတ် ဖမ်းဆီးရန် အဓိကခေါင်းဆောင် စာရင်း၌ သူထိပ် ဆုံးမှပါသည်ကို သိသော်လည်း စစ်ဒဏ်ကြောင့် စုတ်ပြတ်သတ်နေသော တိုင်းပြည်ကို ထိန်းသိမ်းရန် ကြိုးပမ်းနေရင်း သူရော သူ့မိသားစုပါ ယူကရိန်းကို ကျောခိုင်း ထွက်ခွာသွားမည် မဟုတ်ကြောင်း အခိုင်အမာ ပြောကြားနေခဲ့သည်။

ဇာလန်းစကီး အခု ဘယ်မှာလဲ

*****************************

သူသည် မကြာသေးမီ ရက်ပိုင်းအတွင်း ကိယက်ဗ်ရုံးမှ စကားပြောခဲ့သော်လည်း ၎င်း၏ တည်နေရာ အတိအကျမှာ လုံခြုံရေး ကိစ္စကြောင့် ထုတ်ဖော်နိုင်ဖို့ မဖြစ်ပေ။ မကြာသေးမီက ABC သတင်းဌာနနှင့် အင်တာဗျူး တစ်ခုတွင် ၎င်းက အခြေအနေများ ပိုမိုဆိုးရွားလာပါက နိုင်ငံတွင်းမှ ဘေးကင်းစွာ ထွက်ခွာခွင့် ရှိပါသော်လည်း ဆက်လက် ရှိနေဦးမည်ဟု ပြောကြားခဲ့သည်။

 ယူကရိန်းပြည်သူတွေကြားက ဇာလန်းစကီး(GETTY IMAGES)

ဇာလန်းစကီး၏ လတ်တလောကာလအထိ သဘောထားမှတ်ချက်တွေက ဘာတွေလဲ

*******************************************************************************

နိုင်ငံတောင်ပိုင်းရှိ မြို့တော်ဝန်တစ်ဦးကို ပြန်ပေးဆွဲခံရမှုနှင့် မြို့ဆင်ခြေဖုံးများတွင် လေကြောင်း တိုက်ခိုက်မှုအသစ်များ ပြုလုပ်ပြီးနောက် ယူကရိန်းရှိ ရုရှားတပ်ဖွဲ့များ၏ “အကြမ်းဖက်မှုအဆင့်သစ်”ကို မတ်လ ၁၂ ရက် (စနေနေ့)၌ ဇာလန်းစကီး က သတိပေးခဲ့သည်။

ရုရှားလေကြောင်း တိုက်ခိုက်မှုကြောင့် မာရီယူပေါလ်မြို့က သားဖွားဆေးရုံကို ထိမှန်ပြီးနောက် ဇာလန်းစကီးက တွစ်တာမှ တဆင့် “ရက်စက်ကြမ်းကြုတ်မှုနှင့် ကြောက်မက်ဖွယ်ကိစ္စကို လျစ်လျူရှုသည့် ကြံရာပါအဖြစ် ကမ္ဘာကြီးက ဘယ်လောက် ကြာကြာ ရှိနေဦးမှာလဲ” ဟု မေးခွန်းထုတ်ခဲ့သည်။

ရုရှားကျူးကျော်မှုကို ဇာလန်းစကီး ဘယ်လိုကိုင်တွယ်ခဲ့သလဲ

*********************************************************

စစ်မတင်မီ အစောပိုင်းတွင် ရုရှားတပ်ဖွဲ့ဝင်များ စုစုပေါင်း ၁၉၀,၀၀၀ အထိ ယူကရိန်း နယ်စပ်တလျှောက် ဖြန့်ကြက်လာချိန် တွင် ဇာလန်းစကီးသည် တည်ငြိမ်စွာဖြင့် ယူကရိန်းတပ်ဖွဲ့များကို အင်အားစုစည်းပြီး ခုခံတွန်းလှန်ရေး ပြင်ဆင်ဖို့ ညွှန်ကြားနေ ခဲ့သည်။

မကြာမီ ကျရောက်တော့မည့် ကျူးကျော်ဝင်ရောက်လာမည့် အမေရိကန် သတိပေးချက်များမှာ ထပ်တလဲလဲ လွန်ကဲလွန်းပါ က ယူကရိန်းစီးပွားရေးကို ထိခိုက်စေကြောင်း နိုင်ငံရေးနှင့် စစ်ရေးပရိယာယ်သုံး၍ ပြောကြားရင်း ပြီးခဲ့သည့် နွေဦးရာသီက ရုပ်သိမ်းသွားခဲ့သော ကြီးမားလှသည့် ရုရှား အစုအဝေးကို ဇာလန်းစကီး လက်ညိုးထိုးပြခဲ့သည်။

သို့သော် ဖေဖော်ဝါရီ ၂၄ ရက်က ကိယက်ဗ်နှင့် အခြားယူကရိန်းမြို့များကို ပထမဆုံး ရုရှားတိုက်ခိုက်မှု စတင်ခဲ့ပြီးနောက်တွင် အနောက်နိုင်ငံများ၏ အကူအညီကို တတ်နိုင်သမျှ ရယူခဲ့ပြီး ယူကရိန်း၏ ကာကွယ်ရေးကို ဇာလန်းစကီးက အပြင်းအထန် တွန်းအားပေးနေခဲ့သည်။

ပူတင်နဲ့ဇာလန်းစကီး လွန်ခဲ့တဲ့နှစ်က ဆွေးနွေးရန်ဆုံကြစဉ်(GETTY IMAGES)

“နိုင်ငံကနေ ထွက်ပြေးသွားပြီ” ဟု ရုရှားဝါဒဖြန့်မှုများကို ပြောင်းပြန်လှန်ခဲ့ပြီး ယူကရိန်း နိုင်ငံသားများနှင့်အတူ သည်မြေ သည်ရေတွင် အတူရှိနေကြောင်း ဆော်ဩဖို့ ကိယက်ဗ်မြို့ သမ္မတအိမ်တော်ရှေ့မှာ လမ်းပေါ်ထွက်ပြီး သူ့ကိုယ်သူ selfie ရိုက်ကူးထားသော ဗွီဒီယိုဖိုင်များကို အင်တာနက်ပေါ် လွှင့်တင်နေခဲ့သည်။ ထို့နောက် Telegram နှင့် Facebook မှ ကြည့်ရှုသူ သန်းပေါင်းများစွာကို သူက ဆွဲဆောင်စည်းရုံးနေခဲ့သည်။ စစ်ဝတ်အင်္ကျီများ ဝတ်စုံများနှင့် ချည်နှောင်မှုများ ပျောက်ကွယ်သွား ခဲ့သည်။

ရုရှား၏ စစ်ရေးတိုးမြှင့်မှုကို တားဆီးရန် မျှော်လင့်ချက်ဖြင့် မော်စကိုအပေါ် ပိတ်ဆို့အရေးယူမှုများ အရှိန်တင်ဖို့ အနောက် နိုင်ငံ ခေါင်းဆောင်များနှင့် ဇာလန်းစကီး မျက်မှောက်ကာလ မကြာခဏ စကားပြောဆိုနေခဲ့သည်။

မော်စကိုအပေါ် ပြင်းပြင်းထန်ထန် အရေးယူ ဆောင်ရွက်ရန် ဥရောပခေါင်းဆောင်များကို ဗွီဒီယို call ဖြင့် သူက ပန်ကြားခဲ့ သည်။ ဇာလန်းစကီးကို ကျန်းမာရွှင်လန်းစွာဖြင့် မြင်တွေ့ခဲ့ရကြောင်း သံတမန် အများအပြား၏ ပြောကြားချက်အရ သိရ သည်။

ဇာလန်းစကီးနှင့် စကားပြောဆိုခဲ့သည့် အတွေ့အကြုံနှင့်ပတ်သက်၍ “သူ့အခန်းထဲက တိတ်ဆိတ်တည်ငြိမ်မှုက အထင်ကြီး စရာပါပဲ” ဟု ဥရောပသမဂ္ဂ (EU) အကြီးတန်းအရာရှိတစ်ဦးက မီဒီယာများသို့ ပြောကြားခဲ့သည်။ မကြာသေးမီက မော်စကို၏ ရန်လိုမှုကို အနောက်အုပ်စုနိုင်ငံများက တင်းမာစွာ တုံ့ပြန်ခဲ့ရာ နိုင်ငံ ၂၇ နိုင်ငံ ပါဝင်သည့် EU အစုအဖွဲ့သည် ၎င်း၏ အစီအမံ များကို သိသိသာသာ တိုးချဲ့လာနေခဲ့သည်။

(ဆက်လက်ဖော်ပြပါမည်)

Source: The Wall Street Journal

(ဝေါစထရိဂျာနယ်၏ ဝက်ဘ်ဆိုက်တွင် မတ်လ ၁၂ ရက် ရက်စွဲဖြင့် ဖော်ပြခဲ့သည့် မူရင်းဆောင်းပါးရှင် James Hookway ၏ ဆောင်းပါးကို CNI သတင်းဌာနက ဆီလျော်အောင် ဘာသာပြန်ဆိုတင်ဆက်ပေးလိုက်ပါသည်)

အပိုင်း(၁) ဖတ်ရန်-----https://cnimyanmar.com/index.php/article-2/opinoin/4767-2022-03-06-03-56-02