CNI Article News

၂၀၂၂ ခုနှစ်၊ မတ်လ ၆

ပြီးခဲ့သည့် နှစ်အနည်းငယ်အထိ ဗိုလိုဒီမီယာ ဇာလန်းစကီးသည် ယူကရိန်းနိုင်ငံရှိ ရုပ်သံလိုင်း တင်ဆက်မှု၌ ဟာသ သရုပ်ဆောင်အဖြစ် ရှိနေခဲ့သည်။

ယခု အခါသမယတွင်တော့ သူသည် ရုရှားကျူးကျော်မှုကို သူ့နိုင်ငံအတွက် ကြံ့ကြံ့ခံပြီး စီမံညွှန်ကြားနေရသည့် စစ်အတွင်း လက်တွေ့ဘဝ၌ သမ္မတအဖြစ် ဦးစီးဦးဆောင်နေရသည်။

ဇာလန်းစကီးသည် ကရင်မလင်၏ နံပါတ် ၁ ပစ်မှတ်ဖြစ်လာသည်ဟုဆိုသော်လည်း မြို့တော်မှ စွန့်ခွာထွက်ပြေးဖို့ ငြင်းဆန် ခြင်းဖြင့် ယူကရိန်းလူထု၏ လေးစားမှုကို ရရှိခဲ့သည်။

ကျောခိုင်းထွက်ပြေးမည့်အစား ကျည်ဆန်မိုး တဖွဲဖွဲကြားမှ ကိယက်ဗ်မြို့၏ လမ်းများပေါ်တွင် ဇာလန်းစကီး လျှောက်လှမ်းနေ ခဲ့ပြီး ဥရောပခေါင်းဆောင်များ၏ မဲဆန္ဒရှင်လူထု၏ စိတ်နှလုံးကို ညှိ့ယူဖမ်းစားလျက် အောင်မြင်သော ဆက်သွယ်ဗျူဟာကို ဖန်တီးနေခဲ့သည်။ ပြည်ပကျူးကျော်မှုကို တွန်းလှန်ရန် ယူကရိန်းနိုင်ငံသားများကို သူက အဆက်မပြတ် ဆော်ဩတိုက်တွန်း နေခဲ့သည်။

မော်စကို၏ ကြီးမားသော သာလွန်အင်အားရှိနေကြောင်း အသိအမှတ်ပြုသော်လည်း ဇာလန်းစကီး၏ ခေါင်းဆောင်မှု အခန်း ကဏ္ဍမှာ ယူကရိန်း၏ သန္နိဋ္ဌာန်ကို ခိုင်မာစေသည်ဟု အနောက်အုပ်စုအစိုးရများက ပြောကြသည်။

ယူကရိန်းသမ္မတ ဇာလန်းစကီးကို တွေ့ရစဉ်

ဗိုလိုဒီမီယာ ဇာလန်းစကီးဆိုတာ ဘယ်လိုလူလဲ

******************************************

အသက် ၄၄ နှစ်ရှိ ဇာလန်းစကီးသည် ယခင်က ဟာသသရုပ်ဆောင်(လူရွှင်တော်)၊ ရုပ်သံအစီအစဉ် တင်ဆက်သူနှင့် မင်းသား တစ်ဦးဖြစ်ပြီး ယခုအခါ ယူကရိန်းနိုင်ငံ၏ ထိပ်ဆုံးအကြီးအကဲ ဖြစ်နေသည်။

သူသည် ယူကရိန်းအလယ်ပိုင်းရှိ ခရိုင်ဗာရိုင်ရာရေ့ချ် (Kryvyi Rih) စက်မှုမြို့၌ မွေးဖွားခဲ့ပြီး သာမန် ဆိုဗီယက် ဂျူးမိသားစု တစ်စုအတွင်းမှ ကြီးပြင်းလာသူဖြစ်ကြောင်း ၎င်းက ထုတ်ဖော်ပြောကြားခဲ့သည်။

ရုရှားသမ္မတ ဗလာဒီမာပူတင်က ယူကရိန်းကို ကျူးကျော်တိုက်ခိုက်ခြင်းအတွက် နာဇီလက်သစ်များကို ဖယ်ရှားသည့် စစ်ဆင် ရေးဟု မည်သို့ပင် ကြွေးကြော်စေခဲ့ကာမူ ဇာလန်းစကီးကတော့ ဂျူးလူမျိုး အစစ်အမှန် ဖြစ်နေသည်။ ဂျူးလူမျိုးများသည် ဒုတိယကမ္ဘာစစ်အတွင်း ဥရောပမြေပေါ်တွင် ဂျာမန်နာဇီ အစုလိုက်အပြုံလိုက် ရက်ရက်စက်စက် (လူမျိုးသုဉ်း) သတ်ဖြတ်မှု ကို ခံခဲ့ရသည်။

ယူကရိန်းသမ္မတ ဇာလန်းစကီးကို တွေ့ရစဉ်

ဇာလန်းစကီး၏ အဘိုးသည် ယူကရိန်းကို ဂျာမန်နာဇီတို့ သိမ်းပိုက်ခြင်းမှ လွတ်မြောက်အောင် ကြိုးပမ်းခဲ့သည့် ညီအစ်ကို ၄ ယောက်အနက် တစ်ဦးဖြစ်သည်။

ဇာလန်းစကီးသည် ၂၀၀၀ ပြည့်နှစ်တွင် ကိယက်ဗ် အမျိုးသားစီးပွားရေးတက္ကသိုလ်မှ ဥပဒေဘွဲ့ရရှိခဲ့သည်။ သို့သော် မကြာခင် ၌ သူသည် ဟာသသရုပ်ဆောင် ပြိုင်ပွဲများတွင် ပါဝင်ယှဉ်ပြိုင်ခဲ့ပြီး ရုပ်သံလိုင်းမြင်ကွင်းတွင် ထွက်ပေါ်လာခဲ့သည်။

သူသည် ရုပ်သံဇာတ်လမ်း ထုတ်လုပ်ရေး ကုမ္ပဏီတစ်ခုကို ပူးတွဲတည်ထောင်ခဲ့ပြီး ၂၀၁၅ ခုနှစ်မှာ စတင်ပြသခဲ့သည့် ‘လူထု၏ အစေခံ’ (Servant of the People) ဇာတ်ကားတွင် ယူကရိန်းသမ္မတနေရာမှ ပါဝင်သရုပ်ဆောင်သူအဖြစ် ရေပန်းစား ကျော် ကြားလာခဲ့သည်။

သူ့ကိုယ်သူ ထူထောင်ရေး ဆန့်ကျင်တတ်သူဟု တံဆိပ်ကပ်ခဲ့သည့် နိုင်ငံရေး အတွေ့အကြုံမရှိသူ ဇာလန်းစကီးသည် ၂၀၁၉ ခုနှစ်တွင် ယူကရိန်းသမ္မတ ဖြစ်လာခဲ့သည်။

 သရုပ်ဆောင် ဇာလန်းစကီးကို  တွေ့ရစဉ်

သမ္မတကြီး ဇာလန်းစကီးအဖြစ်သို့

*********************************

ဇာလန်းစကီးသည် ၂၀၁၉ ခုနှစ်၊ ဧပြီလ ၂၁ ရက်တွင် သမ္မတအဖြစ် ရွေးချယ်ခန့်အပ်ခံရပြီးနောက် တစ်လခန့်အကြာတွင် ကျမ်းသစ္စာကျိန်ဆိုခဲ့သည်။

ယူကရိန်း စွမ်းအင်ကုမ္ပဏီ၏ အဖွဲ့ဝင်တစ်ဦးဖြစ်သူ အမေရိကန်သမ္မတ ဂျိုးဘိုင်ဒန်၏သား ဟန်တာ (Hunter)အပေါ် အကျင့် ပျက်ခြစားမှု စုံစမ်းစစ်ဆေးဖို့ သမ္မတဟောင်း ဒေါ်နယ်ထရမ့်က ဇာလန်းစကီးထံသို့ တယ်လီဖုန်းခေါ်ဆိုပြီးသည့် နောက်ပိုင်း တွင် ဇာလန်းစကီးကို အမေရိကန်ပြည်တွင်း၌ အထူးအာရုံစိုက်လာခဲ့ ကြသည်။

ဇာလန်းစကီး သမ္မတအဖြစ် ကျမ်းကျိန်ပြီးနောက် ဘိုင်ဒန်၏သားအပေါ် စုံစမ်းစစ်ဆေးသည့် အခြေအနေနှင့် ပတ်သက်၍ ထရမ့်နှင့်ဇာလန်းစကီးတို့အကြား အမေရိကန်သမ္မတ၏ ဘဲဥပုံရုံးခန်း၌ တွေ့ဆုံမှုဖြစ်နိုင်ခြေမှာ အကြောင်းကြောင်းကြောင့် လွဲချော်သွားခဲ့သည်။

၂၀၁၉ ခုနှစ်၊ ဇူလိုင်လ ၂၅ ရက်တွင် ထရမ့်က ဇာလန်းစကီးကို တယ်လီဖုန်းခေါ်ဆိုမှု၌ “မောင်ရင် … ကျုပ်တို့ကို တစ်ခု လောက် ကျေးဇူးပြုပေးပါလား” ဟု တောင်းဆိုခဲ့သည်။ ထိုတောင်းဆိုချက်သည် ထရမ့်၏ စွပ်စွဲ အပြစ်တင်မှုအတွက် မှတ်သားဖွယ်ရာ ကိုးကားစရာတစ်ခုအဖြစ် နောင်အခါ ထင်ရှားလာခဲ့သည်။

အဆိုပါ ဖုန်းခေါ်ဆိုမှု မတိုင်မီ ရက်ပိုင်းအလိုတွင် ထရမ့်သည် ယူကရိန်းအတွက် စစ်ရေးအကူအညီ ဒေါ်လာသန်း ၄၀၀ နီးပါး ဖယ်ချန်ထားရန် အစိုးရအဖွဲ့အတွင်း အမိန့်ပေးခဲ့သည်။ ထိုငွေကြေးပမာဏကို နောက်ထပ် ၂ လနီးပါး အကြာတွင် တရားဝင် ထုတ်ပြန်ခဲ့သည်။

ယူကရိန်းသမ္မတ ဇာလန်းစကီးနဲ့ အမေရိကန်သမ္မတဟောင်း ဒေါ်နယ်ထရမ့်ကိုတွေ့ရစဉ်

ဇာလန်းစကီး ဘယ်လိုရုပ်သံအစီအစဉ်တွေနဲ့ ရုပ်ရှင်တွေမှာ ပါဝင်ခဲ့ဖူးသလဲ

******************************************************************

သမ္မတအဖြစ် အရွေးမခံရမီက ဇာလန်းစကီးသည် ယူကရိန်း ဖျော်ဖြေရေးမျက်နှာစာတွင် အတော်ပင် ရေပန်းစားခဲ့သည်။ ယခု အခါသမယတွင်တော့ ကမ္ဘာကြီးကပါ ယူကရိန်းကို အာရုံစိုက်လာကြသဖြင့် ဇာလန်းစကီး ယခင်က ဖျော်ဖြေတင်ဆက်မှု၊ သရုပ်ဆောင်ပုံနှင့် အကအလှ ဗွီဒီယိုင်ဖိုင်များမှာ လူမှုကွန်ရက်(ဆိုရှယ်မီဒီယာ)တို့တွင် လူကြည့် အများဆုံး ဖြစ်နေသည်။

ဇာလန်းစကီးသည် ဟာသအစီအစဉ် တစ်ခုဖြစ်သည့် Liga Semha (ရယ်မောခြင်းလိဂ်)ကို ပုံမှန်တင်ဆက်ခဲ့ရာ ၂၀၀၆ ခုနှစ် အတွက် ယူကရိန်းနိုင်ငံ၏ ‘ကြယ်ပွင့်များနှင့်ကခုန်ခြင်း’ (Dancing With the Stars) ၌ အထူးအောင်မြင်ခဲ့သည်။

အဆိုပါ အစီအစဉ်သည် အမေရိကန်အကပြိုင်ပွဲ ရုပ်သံစီးရီးတစ်ခုဖြစ်ပြီး ABC မီဒီယာက ၂၀၀၅ ခုနှစ်၊ ဇွန်လ၌ စတင်ခဲ့ခြင်း ဖြစ်သည်။

ဇာလန်းစကီးသည် အမှန်ဟုတ်အောင် အသံသရုပ်ဆောင် တတ်သူလည်း ဖြစ်သည်။ Paddington ကာတွန်းဇာတ်လမ်းကို ယူကရိန်းဗားရှင်းအဖြစ် ပြောင်းလဲရာ၌ ဇာလန်းစကီးက ကာတွန်းဇာတ်ကောင် ဝက်ဝံလေးနေရာမှနေ၍ ဝက်ဝံအသံ သရုပ်ဆောင်ခဲ့ရာတွင်လည်း ပရိသတ် အထူးစွဲမက် နှစ်ခြိုက်ခဲ့ကြသည်။

ယူကရိန်းသမ္မတ ဇာလန်းစကီးကိုတွေ့ရစဉ်

ထို့ပြင် ဒေါ်လာသန်းပေါင်းများစွာ ရင်းနှီးမြှုပ်နှံထားသည့် Studio Kvartal 95 ထုတ်လုပ်ရေးကုမ္ပဏီ အောင်မြင်လာစေရန် လည်း ဇာလန်စကီးက များစွာ အထောက်အကူ ပေးခဲ့သည်။

သို့သော် သူ့ကို အောင်မြင်မှု အထွတ်အထိပ် ရောက်စေခဲ့သည့် သရုပ်ဆောင်ချက်မှာ ယူကရိန်းနိုင်ငံရေးလောက အဂတိ လိုက်စားမှုနှင့်ပတ်သက်၍ ရူးသွပ်စွာ ပြောဆိုနေတတ်သည့် သမိုင်းဆရာ၊ ကဗျာစာဆို ဗာဆေးဟောလိုဘိုရိုခို (Vasyl Holoborodko) အကြောင်း ရိုက်ကူးထားသည့် ပြည်သူ့ဝန်ထမ်း (Servant of the People) ရုပ်သံဇာတ်လမ်းတွဲထဲတွင် ဖြစ်သည်။

ထိုဇာတ်လမ်းတွဲသည် ဇာလန်းစကီးကို လျှမ်းလျှမ်းတောက် အောင်မြင်စေခဲ့ပြီး ယူကရိန်းပရိသတ်အကြား အထူး ရေပန်းစား ခဲ့သည်။

ထို့နောက် တီဗွီဖန်သားပြင်ပေါ်မှ သမ္မတနေရာ သရုပ်ဆောင်ရသူ ဇာလန်းစကီးအတွက် အိပ်မက်များမှာ လက်တွေ့ဖြစ်လာခဲ့ သည်။ မျက်မှောက်ကာလ ယူကရိန်းနိုင်ငံရေး အသိုင်းအဝိုင်းတွင်လည်း အကျင့်ပျက်ခြစားမှုမှာ အဓိကပြဿနာအဖြစ် ပေါ် ထွက် နေချိန်၌ လက်ရှိခေါင်းဆောင်အပေါ် လူကြိုက်နည်းလာသည့်အချိန် ဇာလန်းစကီးသည် ယူကရိန်းသမ္မတရုံးတွင် ရုံးထိုင်နိုင်ရေးအတွက် လက်တွေ့ဘဝ၌ တိုင်းပြည်၏ အမြင့်ဆုံးရာထူးကို ပါဝင်ယှဉ်ပြိုင်ရန် ဆုံးဖြတ်ခဲ့လေသည်။

(ဆက်လက်ဖော်ပြပါမည်)

Source: Washington Post

(ဝါရှင်တန်ပို့စ်ဝက်ဘ်ဆိုက်တွင် မတ်လ ၁ ရက် ရက်စွဲဖြင့် ဖော်ပြခဲ့သည့် မူရင်းဆောင်းပါးရှင်များဖြစ်ကြသည့် Bryan Pietsch နှင့် Sammy Westfall တို့၏ရေးသားမှုကို CNI သတင်းဌာနက ဆီလျော်အောင် ဘာသာပြန်ဆိုတင်ဆက်ပေးလိုက်ပါသည်)