CNI News

၂၀၂၃ ခုနှစ်၊ ဖေဖော်ဝါရီ ၂၇

မြန်မာနိုင်ငံ၏ လက်ရှိခရီးသွားကဏ္ဍတွင် ပြည်ပခရီးသွားဝင်ရောက်မှုမှာ မရှိသလောက် နည်းပါးသောကြောင့် ပြည်တွင်းခရီးသွားများကိုသာ အဓိကအားပြုနေရကြောင်း ခရီးသွားလုပ်ငန်းရှင်များနှင့် ဟိုတယ်လုပ်ငန်းရှင်များ က CNI သတင်းဌာနသို့ ပြောသည်။

လက်ရှိ မြန်မာနိုင်ငံ၏ ခရီးသွားလုပ်ငန်းအခြေအနေမှာ အခြားနိုင်ငံများကဲ့သို့ တစ်ရှိန်ထိုး ပြန်တိုးတက်ပြီး ကိုဗစ် မတိုင်ခင်ကာလများကဲ့သို့ ဖြစ်ရန်မှာ မလွယ်ကူသေးကြောင်း၊ လက်ရှိတွင် ခရီးသွားလုပ်ငန်းများမှာ လည်ပတ်သည့် အနေအထားဖြင့် ကြိုးစားရုန်းကန်သွားနေရမည့်အချိန်မှာသာ ရှိသေးကြောင်း မြန်မာနိုင်ငံ ခရီးသွား လုပ်ငန်းရှင်များအသင်းမှ ဥက္ကဋ္ဌ ဦးနောင်းနောင်းဟန်က CNI သတင်းဌာနသို့ ပြောသည်။

၎င်းက “အခုဟာက ခရီးသွားလုပ်ငန်းမှာ အဓိကမောင်းနှင်အားက ပြည်တွင်းခရီးသွားလုပ်ငန်း ဖြစ်နေတယ်ပေါ့။ ဒီ ပြည်တွင်းခရီးသွားလုပ်ငန်းကနေပဲ ဟိုတယ်တွေ၊ ဒေသတွင်း စီးပွားရေးတွေကို အားပေးသလို ဖြစ်နေတာပေါ့။ ဒါကြောင့်မို့လို့ ကျနော်တို့အနေနဲ့ကတော့ အလေးထားသင့်တယ် ပြည်တွင်းခရီးသွားကိုပေါ့ ဒီအချိန်မှာ။ အဲဒီဟာလည်း ဆက်ပြီးတိုးတက်နေဦးမှာပါပဲ။ ပြည်ပခရီးသွားဝင်ရောက်မှုမှာတော့ နိုင်ငံတကာလေကြောင်းလိုင်းတွေ ပျံတဲ့အတွက် ဧည့်သည်တွေကတော့ ကြိုကြား ကြိုကြား ဝင်နေတာတွေရှိတယ်။ အများကြီးမဟုတ်ပေမယ့်လည်း ဝင်ရောက်မှုတော့ ရှိနေတယ်လို့ ပြောလို့ရပါတယ်။ ပြည်တွင်းခရီးသွားကဏ္ဍက ဒီအချိန်မှာ ခဏလေးအေးသွားပြီးတော့ ဒီနှစ်လပိုင်းအကုန် သုံးလပိုင်းဆိုရင် ကျောင်းတွေပိတ်ပြီဖြစ်တဲ့အတွက် အကုန်လုံး ပြည်တွင်းခရီးသွားက ပြန်ပြီးတော့ အမြင့်ဆုံးအချိန်ကို ပြန်တက်လာပြီပေါ့နော်။ တော်တော်များများက ကမ်းခြေဒေသတွေနဲ့ အောက်မြန်မာပြည်ဒေသ ဧရာဝတီတိုင်းဘက်ကို သွားကြတာများတယ်။ ပြည်တွင်းခရီးသွားကတော့ New Year အချိန်မှာ တက်ခဲ့တယ်။ ပြီးတော့ ဇန်နဝါရီနဲ့ ဖေဖော်ဝါရီမှာ အနည်းငယ် နည်းနည်းလေး ပြန်ကျဆင်းလာပေမယ့် အခု ဒီအချိန်မှာတော့ တစ်ရှိန်ထိုး အမြင့်ဆုံးအထိအောင် တက်ဖို့အတွက် လာပါတော့မယ်” ဟု ပြောသည်။

ရွှေတိဂုံဘုရားသို့ ဘုရားဖူး လာရောက်ကြသူများ

ပြည်တွင်း၊ ပြည်ပခရီးသွားဝင်ရောက်မှုသည် ၂၀၂၁ ခုနှစ်ဖြင့် နှိုင်းယှဉ်ပါက ပြီးခဲ့သည့် ၂၀၂၂ ခုနှစ်အတွင်း၌ တိုးတက်လာသဖြင့် ယခု ၂၀၂၃ ခုနှစ်တွင် ပိုမိုတိုးတက်အောင်လုပ်ဆောင်ရန် ဟိုတယ်နှင့် ခရီးသွားလာရေးဝန်ကြီးဌာန ပြည်ထောင်စုဝန်ကြီးမှ တိုက်တွန်းထားသည်။

သို့သော် ယခုနှစ်ခရီးသွားရာသီကာလဖြစ်သည့် အောက်တိုဘာလမှ စတင်ကာ ပြည်ပခရီးသွားများ ဝင်ရောက် လာသည်ဆိုပါက ကိုဗစ်မတိုင်ခင်ကာလများနှင့်နှိုင်းယှဉ်ကြည့်လျှင် ၁၀ ရာခိုင်နှုန်းခန့် မပြည့်သည့် အခြေအနေ သို့သာ ပြန်ရောက်မှာဖြစ်ကြောင်း၊ များပြားလှသည့် ပမာဏအရေအတွက်သို့ ရောက်ရှိဦးမည်မဟုတ်ကြောင်း မြန်မာနိုင်ငံ ခရီးသွားလုပ်ငန်းရှင်များအသင်းမှ ဥက္ကဋ္ဌ ဦးနောင်းနောင်းဟန်က သုံးသပ်သည်။

ထို့ကြောင့် လက်ရှိ အဓိကအားထားနေရသည့် ပြည်တွင်းခရီးသွားများ သွားရောက်ကြသော ခရီးစဉ်များအပေါ် မူတည်ကာ ဝန်ဆောင်မှုနှင့်လုံခြုံမှု ယခုထက်ပိုမိုပေးနိုင်ပါက ပြည်တွင်းခရီးသွားလာမှု လျော့ကျမသွားစေရန် အတွက် ကောင်းမွန်ကြောင်း ရှမ်းပြည်နယ်မြောက်ပိုင်း ဟိုတယ်လုပ်ငန်းရှင်များအသင်းမှ ဥက္ကဋ္ဌ ဦးဇော်ဇော်က CNI သတင်းဌာနသို့ ပြောသည်။

သို့သော် နိုင်ငံတစ်နိုင်ငံ၏ ခရီးသွားလုပ်ငန်းသည် ပြည်တွင်းခရီးသွားတစ်ခုတည်းဖြင့် အဆင်မပြေသည့်အတွက် ပြည်ပခရီးသွားများ မြန်မာနိုင်ငံသို့ လာရောက်လည်ပတ်ကြစေရန်အတွက်လည်း လုပ်ဆောင်သင့်ကြောင်း ၎င်းက ပြောသည်။

ပုဂံဘုရားဖူးများကို တွေ့ရစဉ်

“ဟိုတယ်တွေဆိုရင် နိုင်ငံခြားသားဆိုရင် ဒေါ်လာ ၂၅ ပဲ တွက်၊ အခုလက်ရှိ ဒေါ်လာပေါက်ဈေးနဲ့ဆိုရင် ကျပ်ငွေနဲ့ ပြောင်းလိုက်ရင်တော့ ပိုရတာတော့ ရှိပါတယ်။ စားသောက်ဆိုင်တွေမှာလည်း ဒီလိုပါပဲ။ နိုင်ငံခြားသားဆိုရင် နိုင်ငံခြားသားဈေးနဲ့ ယူတာလေးတွေ တချို့ဆိုင်တွေမှာ ရှိတယ်။ အဲဒါမျိုးလေးတွေကျတော့ မြန်မာကျပ်ငွေထက် စာရင် ဒေါ်လာရတဲ့ ဟိုတယ်တို့ သူတို့သုံးတာဖြုန်းတာက ကျနော်တို့နိုင်ငံအတွက်တော့ အကျိုးရှိပါတယ်။ နိုင်ငံတော်ကတော့ သူတို့ဝင်လာပြီဆိုကတည်းက သူတို့ဆီကနေ အခွန်ရရှိမှုက ရှိသွားပြီဖြစ်ပါတယ်။ ပြည်ပက ကျနော်တို့ သိထားသလောက် ကျနော်တို့နိုင်ငံကို မငြိမ်းချမ်းဘူးထင်နေတာပေါ့လေ။ အဓိကကတော့ ကျနော်တို့ ဆီမှာ ငြိမ်းချမ်းပါတယ်ဆိုတာလေး၊ လာရင်လည်း safety ဖြစ်ပါတယ်၊ ဘေးအန္တရာယ်ကင်းရှင်းစွာလာလို့ရပါတယ်ဆိုတာတော့ အဓိကကတော့ awareness ပေးဖို့လိုတယ်ပေါ့။ သူတို့ကို လာလို့ရပြီ။ လိုအပ်တဲ့ဖြေလျှော့မှု တွေလည်း ပေးထားပြီဆိုတဲ့ သူတို့သိရှိလောက်တဲ့အချိန်ကျရင်တော့ အရင်လို ပြန်ဝင်လာမယ်လို့ ထင်ပါတယ်။ အခုတချို့က သိရသလောက်ဆိုရင် လာလည်တဲ့လူထက်စာရင် business ကိစ္စနဲ့ လာတဲ့နိုင်ငံခြားသားတွေ များတယ်ပေါ့” ဟု ၎င်းက ပြောသည်။

လက်ရှိတွင် ပြည်ပခရီးသွားများအား ဆွဲဆောင်နိုင်ရန်အတွက် နိုင်ငံတကာတွင် ပြုလုပ်မည့် ခရီးသွားပြပွဲများတွင် မြန်မာနိုင်ငံမှ ခရီးသွားလုပ်ငန်းကုမ္ပဏီအချို့မှ သွားရောက်ပြသရန် လုပ်ဆောင်လျက်ရှိသည်။

လက်ရှိတွင် မြန်မာနိုင်ငံသို့ လာရောက်လည်ပတ်သည့် ပြည်ပခရီးသွားများတွင် ထိုင်းနိုင်ငံသားခရီးသွားများမှာ အဓိကအများဆုံးဖြစ်ကြောင်းနှင့် လာမည့် သင်္ကြန်ပိတ်ရက်တွင် ပြည်တွင်းခရီးသွားများ ယခင်နှစ်ထက်ပို၍ တိုးတက်များပြားလာမည်ဖြစ်ကြောင်းလည်း ခရီးသွားလုပ်ငန်းရှင်များထံမှ သိရသည်။

 CNI News

၂၀၂၃ ခုနှစ်၊ ဖေဖော်ဝါရီ ၂၂

မြန်မာနိုင်ငံတွင် ၂၀၂၁ ခုနှစ် နောက်ပိုင်းမှ စတင်ကာ ပြည်တွင်း အလုပ်အကိုင်ရှားပါးမှု၊ လုပ်ခလစာနည်းပါးမှု၊ စီးပွားရေးနှင့် နိုင်ငံရေးအခြေအနေ စသည်တို့ကြောင့် ပြည်ပနိုင်ငံများသို့ ထွက်ခွာသူဦးရေမှာ အလွန် များပြား လာသည်ကို တွေ့ရသည်။

ပြည်ပသို့ထွက်ခွာကာ သွားရောက်အလုပ်လုပ်ကိုင်မှု နည်းပါးစေလိုလျှင် မြန်မာနိုင်ငံတွင် အလုပ်အကိုင် အခွင့် အလမ်း ပေါများလာရန် လိုအပ်သော်လည်း ပြည်တွင်းလုပ်ခလစာမှာ နည်းပါးနေသေးပါက ပြည်ပထွက်ခွာမှုမှာ လျော့နည်းမသွားနိုင်ကြောင်း တောင်ကိုရီးယားနိုင်ငံ ဘူဆန်မြို့ရှိ အလုပ်သမား ရွှေ့ပြောင်းနေထိုင်သူများ ကူညီထောက်ပံ့ရေး စင်တာ မှ တာဝန်ခံ ကိုခန့်နေကြည်က CNI သတင်းဌာနသို့ ပြောသည်။

၎င်းက “ကျနော်တို့ဆီကတော့ အလုပ်အကိုင်ပေါရုံနဲ့တင်တော့ မရသေးဘူးဗျ။ လုပ်အားခနှုန်းတွေကိုလည်း ကြည့်ရဦးမယ်။ လူတွေက အလုပ်လုပ်ချင်တာက အဓိကမဟုတ်ဘူးလေ။ လုပ်အားခလိုချင်တာက အဓိကကို။ လုပ်အားခ လိုချင်လို့ အလုပ်လုပ်တာဖြစ်တဲ့အတွက် အလုပ်တော့လုပ်ရမယ် ထမင်းပဲကျွေးမယ်ဆိုရင်တော့ မလုပ်နိုင်ဘူးပေါ့နော်။ အလုပ်အကိုင်နေရာတွေကတော့ရှိတယ် ထမင်းပဲကျွေးမယ်ဆိုရင်တော့လည်း မရ သေးဘူး။ လစာတော့ ပေးတယ်ဆိုလည်းပဲ အနည်းဆုံး ကျနော်တို့က ထိုင်းလောက် အနီးအနားက စင်ကာပူ လောက် အဲဒီလို လစာနှုန်းတွေ တက်လာမှသာလျှင် လူတွေကလည်းပဲ ကိုယ့်နိုင်ငံထဲမှာပဲ အခြေချပြီးတော့ တည်တည်ငြိမ်ငြိမ်လုပ်ကြရမယ့်သဘော။လူတွေကို လွတ်လပ်စွာ ရွေးချယ်ခွင့်ပေးမယ်ဆိုရင်တော့ ထွက်နေ ကြမှာပါပဲ။ စင်ကာပူက လူတွေလည်း စင်ကာပူမှာမလုပ်ဘဲ ဂျပန် သွားလုပ်နေကြတာလေ။ အမေရိကကို သွားလုပ်နေတာပဲ။ ထို့အတူပဲ မြန်မာနိုင်ငံသားတွေလည်း သူ့ထက်သာတဲ့ နိုင်ငံတွေ သွားလုပ်ကြမှာပဲ။ ပြည်တွင်း ထဲမှာ လုပ်ဖို့ဆိုရင်တော့ မျှတတဲ့ လုပ်အားခနှုန်းထားတွေသာ မြင့်တက်လာဖို့ လိုမယ်ထင်ပါတယ်”ဟု ပြောသည်။

ပြည်ပထွက်ခွာကြမည့် မြန်မာနိုင်ငံသားများကို လေဆိပ်တွင်တွေ့ရစဉ်

အမှန်တကယ်၌ မြန်မာနိုင်ငံတွင် အလုပ်အကိုင်မှာ မရှားပါးသည့်အပြင် လက်ရှိ၌လည်း ခေါ်ယူနေသည့် အလုပ် ခေါ်စာတို့မှာ အများအပြားရှိကြောင်းနှင့် အဓိကပြဿနာမှာ လုပ်ခလစာသာဖြစ်ကြောင်း လုပ်ငန်းရှင်တချို့က သုံးသပ်သည်။

အလုပ်သမားများဘက်မှ ကြည့်ပါက ရရှိသည့် လုပ်ခလစာနှင့် လက်ရှိ ကုန်ဈေးနှုန်းကြီးမြင့်မှုများကြောင့် တွက်ခြေမကိုင်သဖြင့် ပြည်ပနိုင်ငံများသို့ သွားရောက်ကာ အလုပ်လုပ်ကိုင်ကြခြင်းဖြစ်ကြောင်း လုပ်ငန်းရှင် အချို့က သုံးသပ်ကြသည်။

အလုပ်လာလျှောက်သူများထဲတွင် အချို့သည် ထိုလုပ်ငန်းခွင်ရာထူးနှင့်ပတ်သက်၍ အတွေ့အကြုံများ၊ ကျွမ်းကျင်မှုများ မရှိသည့်အပြင် တောင်းဆိုသော မျှော်မှန်းလစာမှာ များပြားသောကြောင့် လုပ်ငန်းရှင်များ အတွက် အခက်အခဲဖြစ်ကြောင်း ရှမ်းပြည်နယ်မြောက်ပိုင်း ဟိုတယ်လုပ်ငန်းရှင်များအသင်းမှ ဥက္ကဋ္ဌ ဦးဇော်ဇော်က CNI သတင်းဌာနသို့ ပြောသည်။

၎င်းက “တချို့ အလုပ်သမားတွေ လစာဘာလို့မရလဲ၊ လစာဘာလို့ တိုးမပေးလဲဆိုရင် ကျနော်တို့လုပ်ငန်းရှင်တွေ မှာ အခု ခက်ခဲနေတာက တော်တော်များများ အလုပ်သမားတွေက လာရင် သူတို့ရဲ့ skill ဘယ်လောက်ရှိလဲဆိုတာ သူတို့ မပြနိုင်ဘူး။ လစာဘယ်လောက်ရမလဲဆိုတာပဲ။ မျှော်မှန်းလစာ ဘယ်လောက်ရှိလဲဆို တောင်းလိုက်ရင် ၅ သိန်းတွေ၊ ၆ သိန်း တွေ အဲဒီလိုတောင်းတယ်။ ဒါပေမယ့် တကယ်တမ်း သူတို့ skill နဲ့ ဒီအပေါ်မှာ ဘာအတွေ့ အကြုံရှိလဲဆို ဘာမှမရှိဘူး။ သူတို့ကမေးတယ် အဲဒါဆို ကျမတို့ကို ခိုင်းလေ၊ ခိုင်းတာလုပ်ပေးမှာပေါ့။ လစာကျ တော့ ပိုလိုချင်တယ်၊ အလုပ်ကျတော့ ကျွမ်းကျွမ်းကျင်ကျင် မရှိတာက တစ်ပိုင်း၊ နောက်တစ်ခုကလည်း အလုပ် အပေါ်မှာလည်း အလုပ်တွေက များနေတာဖြစ်တဲ့အတွက် အလုပ်တွေအပေါ်မှာလည်း ၂ ရက် ၃ ရက်လောက် လုပ်ကြည့်လိုက်၊ ပြီးရင် ပြောင်းသွားလိုက် အဲဒီလိုအလုပ်သမားတွေ လတ်တလော မြန်မာနိုင်ငံမှာ များနေတာ ပေါ့နော်။ လစာများများ လိုချင်တယ်ဆိုရင် skill utility ကောင်းကောင်း ဆောင်ရွက်ပေး၊ သူတို့ရဲ့ quality တွေ မြင့်အောင် သူတို့လုပ်ပေး၊ သူတို့တာဝန်ကျတဲ့ အလုပ်တွေမှာ သေသေချာချာအားထည့်ပြီး လုပ်မယ်ဆိုရင် အဲဒီလို ပုဂ္ဂိုလ်တွေကတော့ လစာများများရမယ်လို့ ထင်ပါတယ်” ဟု ပြောသည်။

ပြည်တွင်း အထည်ချုပ်စက်ရုံတစ်ခု

လက်ရှိတွင် မြန်မာနိုင်ငံမှ လူအများအပြား ပြည်ပနိုင်ငံသို့ ထွက်ခွာကြရာ၌ တောင်ကိုရီးယား၊ ဂျပန်၊ ထိုင်း၊ မလေးရှား၊ တရုတ်၊ စင်ကာပူ၊ ယူအေအီး အစရှိသည့် နိုင်ငံများသို့ အဓိကအများဆုံး ထွက်ခွာကြပြီး အနောက် နိုင်ငံများသို့လည်း ထွက်ခွာနေကြသည်။
သို့သော် လက်ရှိတွင် မြန်မာနိုင်ငံကူးလက်မှတ်ထုတ်ပေးရေးရုံးများအား ပိတ်ထားဆဲဖြစ်သည့်အတွက် အိမ်နီးချင်းနိုင်ငံများသို့ တရားမဝင်ခိုးထွက်မှု များပြားလာနိုင်ပြီး ထိုသို့ တရားမဝင်ထွက်ခွာခြင်းကြောင့် နိုင်ငံတော် အတွက် အခွန်ဝင်ငွေမရရှိနိုင်သလို အခြားသော ဆုံးရှုံးမှုများလည်း ရှိကြောင်း ရွှေ့ပြောင်း အလုပ်သမားအရေး ကူညီဆောင်ရွက်ပေးနေသူ ကိုသားကြီးက CNI သတင်းဌာနသို့ ပြောသည်။

၎င်းက“တစ်ချက်ကတော့ နိုင်ငံတော်ရဲ့ အခွန်ဝင်ငွေနစ်နာတယ်။ လူသားအရင်းအမြစ်တွေ ပိုမိုပြီးတော့မှ ဆုံးရှုံး စေတယ်။ ခိုးသွားရမယ်ဆိုရင် အသက်မပြည့်တဲ့ အိမ်က သားသမီးတွေ ၁၅၊ ၁၆ အလုပ်လုပ်နိုင်တဲ့ သားသမီး တွေကိုပဲ ကယ်ရီနဲ့ လူပွဲစားနဲ့ ခိုးထွက်အောင် ခေါ်သွားလို့ရပြီ။ နိုင်ငံကူးလက်မှတ် လုပ်စရာမလိုတော့ဘူး။ နိုင်ငံကူးလက်မှတ်ကို ပိတ်ထားတယ်ဆိုကတည်းက ပြည်တွင်းထဲမှာရှိတဲ့လူကို ပြည်ပမထွက်အောင် ထိန်းချုပ် ထားတာပဲ မဟုတ်ဘူး။ ပိုမိုပြီးတော့မှ လွယ်ကူစွာထွက်နိုင်အောင် လမ်းကြောင်း ဖွင့်ပေးလိုက်သလို ဖြစ်သွား တယ်”ဟု ပြောသည်။

လက်ရှိတွင် ပြည်ပနိုင်ငံများသို့ ထွက်ခွာကြသူများထဲတွင် အလုပ်လုပ်ကိုင်ရန်နှင့် ပညာသင်ရန် သွားရောက်ကြသူ အများစုဖြစ်ပြီး အခြေခံ အလုပ်အကိုင်များ လုပ်ကိုင်ရန် သွားရောက်ကြသူဦးရေမှာ ပိုမိုများပြားကြောင်း၊ ပညာရှင် အဆင့် အလုပ်အကိုင်များ လုပ်ကိုင်ရန်အတွက် သွားရောက်ကြသူဦးရေမှာ အတန်အသင့် ရှိကြောင်း ပြည်ပနိုင်ငံ များတွင် မြန်မာအလုပ်သမားအရေး ဆောင်ရွက်နေသူများက ပြောသည်။