CNI News
၂၀၂၂ ခုနှစ်၊ သြဂုတ် ၂၅
ဒီမိုကရေစီလိုလားသည့် အတိုက်အခံများကို ကွပ်မျက်ခဲ့သည့်လုပ်ရပ်က မြန်မာ့တပ်မတော်သည် မြန်မာ ပြည်သူများ၏ အသက်ကို ကမ်းကုန်အောင် အရေးမထားကြောင်း ဖော်ပြနေသည်ဟု အမေရိကန်နိုင်ငံခြားရေး ဝန်ကြီး အန်တိုနီဘလင်ကင်က သြဂုတ် ၂၅ ရက်နေ့တွင် ထုတ်ပြန်ခဲ့သည်။
မြန်မာနိုင်ငံကနေ ရခိုင်ပြည်နယ်မှ မွတ်ဆလင်ဒုက္ခသည် ဘင်္ဂလားဒေ့ရှ်နိုင်ငံသို့ ထွက်ပြေး တိမ်းရှောင်ရခြင်းနှင့် သတ်ဖြတ်ခံရခြင်း ငါးနှစ်ပြည့်အနေဖြင့် အမေရိကန်နိုင်ငံခြားရေးဝန်ကြီးက သဘောထား ထုတ်ပြန်ခဲ့ရာမှာ အခု လို ထည့်သွင်း ပြောထားခြင်း ဖြစ်သည်။
ရာဇဝတ်မှုများကို ကျူးလွန်ခဲ့သည့် တပ်မတော်အဖွဲ့ဝင်များသည် ၂၀၂၁ ခုနှစ်၊ ဖေဖော်ဝါရီ အာဏာသိမ်းမှု နောက်ပိုင်းတွင်လည်း မြန်မာနိုင်ငံ၏ ဒီမိုကရေစီ အနာဂတ်ကို အဆုံးသတ်စေရန် ပြောင်ပြောင်တင်းတင်း ကြိုး ပမ်းရာတွင် မြန်မာပြည်သူများကို နှိပ်ကွပ်ခြင်း၊ ညှဉ်းပန်းနှိပ်စက်ခြင်းနှင့် သတ်ဖြတ်ခြင်းများ ကျူးလွန်ခဲ့ကြသည် ဟု အမေရိကန်နိုင်ငံခြားရေးဝန်ကြီးက ထုတ်ပြန်ခဲ့သည်။
နိုင်ငံခြားရေးဝန်ကြီး ဘလင်ကင်က “ ဒီမိုကရေစီလိုလားသည့် အတိုက်အခံ ခေါင်းဆောင်များကို စစ်အာဏာရှင် အဖွဲ့အစည်းက လောလောလတ်လတ် ကွပ်မျက်ခဲ့သည့် လုပ်ရပ်က စစ်တပ်သည် မြန်မာပြည်သူများ၏ အသက် ကို ကမ်းကုန်အောင် အရေးမထားကြောင်း ဖော်ပြသည့် ပူပူနွေးနွေးသာဓက တစ်ခုသာ ဖြစ်ပါသည်”ဟု ပြော သည်။
မြန်မာ့ ဒီမိုကရေစီအရေး တောင်းဆိုနေခြင်း
နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က အကြမ်းဖက်မှုများကို မိမိတို့က ဆောင်ရွက်နေခြင်းမဟုတ်ဘဲ အစိုးရနှင့် နိုင်ငံ့ဝန်ထမ်းများကို အကြမ်းဖက်သမားများက လာရောက် တိုက်ခိုက်၍သာ မိမိတို့အနေဖြင့် ပြန်လည် ခုခံရခြင်းဖြစ်ကြောင်း မြန်မာနိုင်ငံဆိုင်ရာ ကုလသမဂ္ဂအထူးကိုယ်စားလှယ် မစ္စနိုလင်းဟေဇာနှင့် ၂၀၂၂ ခုနှစ်၊ သြဂုတ် ၁၇ ရက်က တွေ့ဆုံစဉ် ပြောကြားခဲ့သည်။
နစကဥက္ကဋ္ဌက “၂၀၂၂ ခုနှစ်၊ သြဂုတ် ၁၇ ရက် နံနက်ပိုင်းတွင် မန္တလေးတိုင်းဒေသကြီး၏ အနောက်ဘက် စစ်ကိုင်းတိုင်းဒေသကြီးရှိ တံတားပေါ်၌ ကားတစ်စီးပေါ်ရှိ ခရီးသည်များအား အကြမ်းဖက်သမားများက ဓားစာခံ လုပ်၍ ပစ်ခတ်မှုများ ပြုလုပ်ခဲ့ရာ ခရီးသည်များနှင့် အဆိုပါ အကြမ်းဖက်သမားများ သေဆုံးမှုဖြစ်ပွားခဲ့ပါသည်။ ပညာရေးဝန်ထမ်းများ၊ ကျန်းမာရေးဝန်ထမ်းများကို သတ်ဖြတ်ခြင်း၊ သံဃာတော်များကို သတ်ဖြတ်ခြင်း စသည့် အကြမ်းဖက်မှုများကိုလည်း ပြုလုပ်ခဲ့ကြပါသည်။ အဆိုပါ အကြမ်းဖက်မှုများသည်။
အထွေထွေရွေးကောက်ပွဲမှ တဆင့် ဖြစ်ပေါ်လာသည့် ကိစ္စများဖြစ်ပါသည်။ သို့ရာတွင် နိုင်ငံတကာ အသိုက်အဝန်းအနေဖြင့် အဆိုပါ အကြမ်းဖက်မှုကိစ္စများကို ပြောကြားခြင်းမရှိဘဲ နိုင်ငံတော်စီမံအုပ်ချုပ်ရေးကောင်စီ၏ အုပ်ချုပ်မှုကို ဒီမိုကရေစီ နည်းလမ်းကျစွာ ဆောင်ရွက်ခြင်းမရှိဟူ၍ ပြောကြားလျက်ရှိပါသည်။ ကုလသမဂ္ဂအနေဖြင့် မြန်မာနိုင်ငံ၌ ဖြစ်ပွား လျက်ရှိသည့် ကိစ္စရပ်များနှင့်ပတ်သက်၍ အခြေအနေအမှန်ကို သုံးသပ်စေလိုပါသည်”ဟု ပြောသည်။
ဗိုလ်ချုပ်မှူးကြီးမင်းအောင်လှိုင်နဲ့ ကုလကိုယ်စားလှယ် နိုလင်းဟေဇာ
အမေရိကန်နိုင်ငံခြားရေးဝန်ကြီး ဘလင်ကင်ကတော့ မြန်မာ့တပ်မတော်၏ တိုးမြှင့်ဆောင်ရွက်လာနေသည့် အကြမ်းဖက်မှုများက လူသားချင်း စာနာထောက်ထားမှု အကူအညီပေးရေး အခြေအနေများကို ပိုမိုဆိုးဝါး လာစေပြီး အထူးသဖြင့် နိုင်ငံအတွင်းရှိ ထိခိုက်အလွယ်ဆုံးနှင့် ဘေးဖယ်ထားခြင်း အခံရဆုံး အသိုက်အဝန်းများ ထဲတွင် ယနေ့ထိတိုင် ဆက်လက်ရှိနေဆဲဖြစ်သည့် မွတ်ဆလင် (မူရင်း- ရိုဟင်ဂျာလူမျိုးများ) အပါအဝင် လူနည်းစု တိုင်းရင်းသားနှင့် ဘာသာခြား အသိုက်အဝန်းများအတွက် ပိုမို ဆိုးဝါးစေသည်ဟု ပြောသည်။
ထို့နောက် အမေရိကန်ပြည်ထောင်စုသည် သတ်ဖြတ်ခံခဲ့ရသူများနှင့် အသက်ရှင် ကျန်ရစ်သည့်သူများအားလုံး နှင့် တစ်သားတည်း ရှိပြီး မွတ်ဆလင် ဒုက္ခသည်များနှင့် မြန်မာပြည်သူများအတွက် တရားမျှတမှု ရှာဖွေရေးနှင့် တာဝန်ယူမှု တာဝန်ခံမှု ရှိစေရေးအတွက် မိမိတို့၏ သံန္နိဋ္ဌာန်ကို ထပ်လောင်း အတည်ပြုပါသည်ဟု အမေရိကန် နိုင်ငံခြားရေးဝန်ကြီး ဘလင်ကင်က ပြောသည်။
