CNI International News
ဗာတီကန်စီးတီး၊ ဇွန်လ ၁၅
ရုရှား-ယူကရိန်းစစ်ရေးအကျပ်အတည်းနှင့် ကမ္ဘာတလွှားရှိ အခြားပဋိပက္ခများ ရောယှက်လာသော အခြေအနေ များက သက်သေထူလာပြီဖြစ်၍ တတိယကမ္ဘာစစ်ဖြစ်နေပြီဟု ဆိုနိုင်ကြောင်း ပုပ်ရဟန်းမင်းကြီး ဖရန်စစ်က ပြောကြားခဲ့သည်ဟု အာရ်တီသတင်းဌာနက ရေးသားဖော်ပြသည်။
“နှစ်အနည်းငယ်အတွင်းမှာပဲ တတိယကမ္ဘာစစ်ဆိုတာ ကြုံနေရပြီဖြစ်တယ်။ ဒီကနေ့ တတိယကမ္ဘာစစ်ဆိုတာ ကြေညာပြီးပြီလို့တောင် ပြောလို့ရနေပါပြီ” ဟု ကက်သလစ်အသင်းတော်၏အထွတ်အထိပ်ဖြစ်သော ပုပ်ရဟန်း မင်းကြီးက ပြောကြားခဲ့ကြောင်း ဇွန်လ ၁၄ ရက်ထုတ် ဂျီစု (Jesuit) မီဒီယာများနှင့် အင်တာဗျူးကဏ္ဍတွင် ဖော်ပြ ထားသည်။ ၎င်းအင်တာဗျူးမှာ ပြီးခဲ့သည့် မေလ ၁၉ ရက်ကတည်းက ဖြစ်သည်။
“မိမိတို့အာရုံက ယူကရိန်းစစ်ကို ပိုရောက်နေကြောင်း၊ တစ်ချိန်တည်းမှာပင် နိုက်ဂျီးရီးယားမြောက်ပိုင်းနှင့် မြန်မာနိုင်ငံကဲ့သို့ နေရာများတွင် စစ်ပွဲများ ဆက်လက်ဖြစ်ပွားနေကြောင်း၊ ကမ္ဘာကြီးတွင် စစ်မက်ဖြစ်ပွားမှုကို ခေတ္တရပ်တန့်ပြီး အဖြေရှာကြရမှာဖြစ်ကြောင်း” ၎င်းက ဆက်လက်ပြောကြားခဲ့သည်။
ရုရှားသမ္မတ ဗလာဒီမာပူတင်ကို ရှုတ်ချရန် ပျက်ကွက်ခဲ့ခြင်းအတွက် ပုပ်ရဟန်းမင်းကြီးကို အပြစ်တင်ဝေဖန်မှု များလည်း ရှိခဲ့သည်။ မြောက်အတ္တလန္တိတ်စစ်စာချုပ်အဖွဲ့(နေတိုး)ကို ရုရှားတံခါးပေါက်အထိ ချဲ့ထွင်ခြင်းသည် အကျပ်အတည်းတစ်ရပ် နှိုးဆွသလိုဖြစ်နိုင်ကြောင်း ၎င်းက ယခင်ကပင် မှတ်ချက်ချခဲ့ရာ “မိမိသည် ပူတင်ကို လိုလားသူမဟုတ်ကြောင်း” ပုပ်ရဟန်းမင်းကြီး ဖရန်စစ်က ငြင်းပယ်ခဲ့သည်။
“အရင်းခံအကြောင်းတရားနဲ့ ကိုယ်ကျိုးစီးပွားကို ထည့်မစဉ်းစားဘဲ လူကောင်းနဲ့လူဆိုးကြားက ကွဲပြားပြီး ရှုပ်ထွေးတဲ့အခြေအနေတစ်ရပ် ပြောင်းလဲတာကို ဆန့်ကျင်တာသာဖြစ်ပါတယ်။ ရုရှားတပ်တွေရဲ့ ရက်စက် ကြမ်းကြုတ်မှုတွေကို အခုလိုမြင်နေရတဲ့အချိန်မှာ ပြဿနာတွေကို မမေ့သင့်သလို ဖြေရှင်းဖို့ ကြိုးစားသင့်တယ်” ဟု ဖရန်စစ်က ဆက်လက်ပြောကြားခဲ့သည်။
“လက်နက်စမ်းသပ်ရောင်းချတာတွေကို လူတွေ စိတ်ဝင်စားလာကြတာ သတိပြုမိပါတယ်။ အင်မတန် ဝမ်းနည်း စရာကောင်းပေမယ့် အဆုံးသတ်မှာတော့ အဲဒီအတိုင်း ဖြစ်လာတော့တာပါပဲ” ဟု ၎င်းက မှတ်ချက်ချခဲ့သည်။
၎င်းတို့နိုင်ငံကို ကာကွယ်ရာ၌ ယူကရိန်းပြည်သူများ၏သူရဲကောင်းဆန်မှုကို ဖရစ်စစ်က ချီးကျူးခဲ့သော်လည်း ပြည်ပအကျိုးစီးပွားများက ၎င်းတို့အပေါ် အန္တရာယ်ဖြစ်စေခဲ့ကြောင်း ထောက်ပြခဲ့သည်။
“အခု ကျနော်တို့မျက်စိရှေ့မှာတင် ဖြစ်ပျက်နေတာ ကမ္ဘာစစ်အခြေအနေပါပဲ။ တကမ္ဘာလုံး အကျိုးစီးပွားရှာတာ တွေ၊ လက်နက်ရောင်းဝယ်တာတွေ၊ ပထဝီဝင်နိုင်ငံရေးလျာထားချက်တွေနဲ့ သူရဲကောင်းပီသတဲ့ လူအများကို သတ်ဖြတ်နေကြပါတယ်” ဟု ပုပ်ရဟန်းမင်းကြီး ဖရန်စစ်က ပြောကြားခဲ့သည်။
Source: အာရ်တီသတင်းဌာန
