CNI International News
တီဟီရန်၊ မတ်လ ၂၄
အီရန်နိုင်ငံကို ကျူးကျော် ဝင်ရောက်မည်ဆိုပါက ပါရှန်းပင်လယ်ကွေ့ တစ်ခုလုံးတွင် ရေမြှုပ်မိုင်းများ ထောင်မည် ဟု အီရန်က ခြိမ်းခြောက် ပြောကြားခဲ့ကြောင်း အေပီမှ ဖော်ပြခဲ့သည်။
ထို့ပြင် အမေရိကန်သမ္မတ ဒေါ်နယ်ထရမ့် (Donald Trump) က အီရန်ရှိ လျှပ်စစ်ဓာတ်အားပေး စက်ရုံများကို ဗုံးကြဲ တိုက်ခိုက်မည်ဆိုသည့် ခြိမ်းခြောက်မှုကို အကောင်အထည်ဖော်ပါက အရှေ့အလယ်ပိုင်းရှိ လျှပ်စစ် ဓာတ်အားပေး စက်ရုံများကို ပြန်လည် တိုက်ခိုက်မည်ဟု အီရန်က သတိပေးခဲ့သည်။
အီရန်၏ ခြိမ်းခြောက်မှုကြောင့် ပင်လယ်ကွေ့ အာရပ်နိုင်ငံများရှိ လျှပ်စစ်ဓာတ်အားနှင့် ရေပေးဝေရေး အဆောက် အအုံများသည် အန္တရာယ်ရှိလာနိုင်သည်။
အထူးသဖြင့် ပင်လယ်ကွေ့ရှိ သဲကန္တာရနိုင်ငံများသည် ၎င်းတို့၏ လျှပ်စစ်ဓာတ်အားပေး စက်ရုံများနှင့် သောက်သုံး ရေ ရရှိရန် ပင်လယ်ရေကို ရေချိုအဖြစ် ပြောင်းလဲထုတ်လုပ်သည့် စက်ရုံများကို ပေါင်းစပ် တည်ဆောက်ထားသော ကြောင့် ဖြစ်သည်။
ထိုသို့ ခြိမ်းခြောက်ပြီးနောက် အီရန်၏ Fars သတင်းအေဂျင်စီက ယူအေအီးနိုင်ငံရှိ နျူကလီးယား ဓာတ်အားပေး စက်ရုံ အပါအဝင် အခြေခံ အဆောက်အအုံများ၏ စာရင်းကို ထုတ်ပြန်ခဲ့သည်။
အီရန်အလံကိုင်ထားသူကို တွေ့ရစဉ်
ပြီးခဲ့သည့် ရက်များအတွင်းကလည်း အီရန်သည် အစ္စရေးနိုင်ငံရှိ ဒီမိုနာ (Dimona) မြို့ကို ဒုံးကျည်များဖြင့် ပစ်ခတ် တိုက်ခိုက်ခဲ့သည်။
ထိုမြို့သည် အစ္စရေး၏ နျူကလီးယား လက်နက် စီမံကိန်းအတွက် အရေးပါသော အဆောက်အအုံ ရှိသည့်နေရာ ဖြစ်သည်။
သို့သော် အီရန်၏ တိုက်ခိုက်မှုကြောင့် အစ္စရေး၏ နျူကလီးယား အဆောက်အအုံ ထိခိုက်ပျက်စီးမှု မရှိခဲ့ပေ။
အစ္စရေးကမူ မတ်လ ၂၃ ရက်တွင် အီရန်၏ တီဟီရန် (Tehran) မြို့တော်သို့ တိုက်ခိုက်မှုအသစ်များ ပြုလုပ်ခဲ့ပြီး တီဟီရန်ရှိ အခြေခံ အဆောက်အအုံ ပစ်မှတ်များကို အကြီးစား စစ်ဆင်ရေးလှိုင်းဖြင့် စတင် တိုက်ခိုက်နေပြီဟု ပြောကြားခဲ့သော်လည်း အသေးစိတ် အချက်အလက်များကိုမူ ချက်ချင်းထုတ်ပြန်ခြင်း မရှိသေးပေ။
အမေရိကန် မရိန်းတပ်သားများ အရှေ့အလယ်ပိုင်း ဒေသတွင်းသို့ ရောက်ရှိလာနိုင်ခြေနှင့် ပတ်သက်ပြီး အီရန်တွင် စိုးရိမ်မှုများ မြင့်တက်နေစဉ် အီရန် ကာကွယ်ရေးကောင်စီက ကျူးကျော်ဝင်ရောက်လာမည့် အစီအစဉ်အပေါ် သတိပေး ပြောကြားခဲ့သည်။
“ရန်သူဘက်က အီရန်ရဲ့ ကမ်းရိုးတန်းတွေ ဒါမှမဟုတ် ကျွန်းတွေကို ပစ်မှတ်ထားဖို့ ကြိုးပမ်းလာမယ်ဆိုရင် သတ်မှတ်ထားတဲ့ စစ်ရေး လုပ်ထုံးလုပ်နည်းတွေနဲ့အညီ ပါရှန်းပင်လယ်ကွေ့နဲ့ ကမ်းရိုးတန်း တစ်လျှောက်မှာရှိတဲ့ ဝင်ပေါက်လမ်းကြောင်း အားလုံးမှာ ရေမြှုပ်မိုင်းတွေ ထောင်သွားမှာ ဖြစ်ပါတယ်”ဟု အီရန်အစိုးရ၏ ထုတ်ပြန် ချက်တွင် ဖော်ပြထားသည်။
Source: အေပီ
