CNI News
၂၀၂၆ ခုနှစ်၊ ဇန်နဝါရီ ၂၆

နိုင်ငံတော်လုံခြုံရေးနှင့်အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် မြန်မာနိုင်ငံ ဆိုင်ရာ ထိုင်းသံအမတ်ကြီး H.E.Mr.Mongkol Visiststump တို့ ၂၀၂၆ ခုနှစ်၊ ဇန်နဝါရီ ၂၆ ရက်က နေပြည်တော် မှာ တွေ့ဆုံ ဆွေးနွေးကြသည်။

ထိုင်းသံအမတ်ကြီးသည် တာဝန်ပြီးဆုံး၍ မြန်မာနိုင်ငံကနေ ပြန်လည် ထွက်ခွာတော့မည်ဖြစ်ပြီး မြန်မာနိုင်ငံက မထွက်ခွာခင် လာရောက်တွေ့ဆုံခြင်းဖြစ်သည်။

ထိုသို့ တွေ့ဆုံစဉ် မြန်မာနိုင်ငံတွင် ပါတီစုံဒီမိုကရေစီ အထွေထွေရွေးကောက်ပွဲအား နိုင်ငံတကာမှ ရွေးကောက်ပွဲ စောင့်ကြည့် လေ့လာရေးအဖွဲ့များနှင့်အတူ ထိုင်းနိုင်ငံမှလည်း ပါဝင်လေ့လာခဲ့မှုနှင့် မဲဆန္ဒရှင် ပြည်သူများအနေ ဖြင့် မည်သည့် တိုက်တွန်းချက်မှ မပါရှိဘဲ ၎င်းတို့၏ကိုယ်ပိုင် သဘောဆန္ဒအလျောက် လာရောက်၍ ဆန္ဒမဲများပေး ကြသည်ကို တွေ့ရှိရမှု၊ ရွေးကောက်ပွဲကို လွတ်လပ်ပြီး တရားမျှတသည့် ရွေးကောက်ပွဲ၊ သန့်ရှင်းသည့် ရွေး ကောက်ပွဲအဖြစ် ကျင်းပနိုင်ခဲ့မှုတို့ကို ဆွေးနွေးခဲ့ကြသည်။

ထို့နောက် နှစ်နိုင်ငံ ကုန်သွယ်မှု၊ ကုန်စည်စီးဆင်းမှုများ ပြန်လည် ကောင်းမွန်ရေးအတွက် နယ်စပ်ဒေသ တည်ငြိမ် အေးချမ်းရေးကို နှစ်နိုင်ငံအစိုးရနှင့်တပ်မတော် နှစ်ရပ်အကြား ပူးပေါင်းဆောင်ရွက်ရန်လိုအပ်မှု၊ အွန်လိုင်းလိမ် လည် လောင်းကစားမှုများနှင့် မူးယစ်ဆေးဝါး တိုက်ဖျက်ရေး လုပ်ငန်းစဉ်များကို မြန်မာနိုင်ငံအစိုးရအနေဖြင့် အမျိုးသားရေး တာဝန်တစ်ရပ်အဖြစ် ခံယူ၍ အင်တိုက်အားတိုက် ဆောင်ရွက်လျက်ရှိမှု၊ နှစ်နိုင်ငံ နယ်စပ်ဒေသ ပတ်ဝန်းကျင် ထိန်းသိမ်းရေးလုပ်ငန်းများ ပူးပေါင်းဆောင်ရွက်လျက်ရှိမှု အခြေအနေများကို ဆွေးနွေးခဲ့ကြသည်။

ထိုင်းသံအမတ်နှင့် တွေ့ဆုံမှုတွင် ကော်မရှင်အတွင်းရေးမှူး ဗိုလ်ချုပ်ကြီးရဲဝင်းဦး၊ နိုင်ငံခြားရေးဝန်ကြီးဌာန ဒုဝန်ကြီး ဦးကိုကိုကျော်တို့လည်း တက်‌ရောက်ခဲ့ကြသည်။