CNI News
၂၀၂၆ ခုနှစ်၊ ဇန်နဝါရီ ၂၆
လက်ရှိ ကျင်းပခဲ့သည့် ရွေးကောက်ပွဲက ပြည်သူများ၏ ပါတီစုံဒီမိုကရေစီစနစ်ကိုသွားရန် ရည်ရွယ်ခဲ့ခြင်းဖြစ်ပြီး ထိုဆုံးဖြတ်ချက်အတိုင်း ဆက်သွားရမှာဖြစ်သည်ဟု နိုင်ငံတော်လုံခြုံရေးနှင့် အေးချမ်းသာယာရေးကော်မရှင် ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။
၂၀၂၆ ခုနှစ်၊ ဇန်နဝါရီ ၂၅ ရက်က ရွေးကောက်ပွဲအပိုင်း ၃ ကျင်းပသည့် မန္တလေးမြို့ရှိ မဲရုံများကို လိုက်လံကြည့် ရှုရင်း မီဒီယာများ၏ မေးမြန်းချက်ကို ပြန်လည်ဖြေဆိုရာတွင် ၎င်းက အထက်ပါအတိုင်း ပြောကြားခဲ့ခြင်း ဖြစ် သည်။
၎င်းက “မြန်မာနိုင်ငံက ကျနော်တို့က နဂိုထဲကကို ပြည်သူလူထုက ပါတီစုံဒီမိုကရေစီစနစ်ကို သွားဖို့ ရည်ရွယ်ပြီး လုပ်ခဲ့တာ။ ဒီတိုင်းပဲသွားရမှာ။ ပြည်သူက ရွေးချယ်တဲ့လမ်းပဲ။ ကျနော်တို့ ရွေးတာမဟုတ်ဘူး။ ပြည်သူကရွေးတဲ့ လမ်း။ ကျနော်တို့လည်း ပြည်သူထဲက အစိတ်အပိုင်းပဲ၊ ကျနော်တို့လည်း ဒီဟာ ထောက်ခံတယ်။ ဒီတိုင်းပဲ ပါတီစုံ ဒီမိုကရေစီစနစ် အတိုင်းပဲ ကျနော်တို့သွားမယ်။ အနာဂတ်မှာ ကျနော်တို့ သွားပါမယ်”ဟု ပြောသည်။
မြန်မာနိုင်ငံတွင် ကျင်းပသည့် ၂၀၂၅ အထွေထွေရွေးကောက်ပွဲသည် ပါတီစုံ ဝင်ရောက် ယှဉ်ပြိုင်ခဲ့ကြသော်လည်း ဒီမိုကရက်တစ်ပါတီများ ပါဝင်မှု အားနည်းခဲ့ကြောင်း၊ ပါဝင်ခွင့် ပိတ်ပင်ခံရမှုများလည်း ရှိခဲ့ကြောင်း နိုင်ငံရေးလေ့ လာ စောင့်ကြည့်သူများက ထောက်ပြကြသည်။
ဗိုလ်ချုပ်မှူးကြီးမင်းအောင်လှိုင် မဲဆန္ဒရှင်များကို တွေ့ဆုံစဉ်
၂၀၂၅ အထွေထွေရွေးကောက်ပွဲမှာ ဒီမိုကရက်တစ်ပါတီများ ပါဝင်ခွင့်ရမှု နည်းသည်ဟု နိုင်ငံရေးလေ့လာ သုံးသပ်သူ ဦးကျော်ထက်က CNI သတင်းဌာနသို့ ပြောသည်။
၎င်းက “ရွေးကောက်ပွဲက ပါတီစုံပြီးတော့ ဒီမိုကရေစီ ဆန်သလားဆိုတဲ့ ကိစ္စမှာတော့၊ ဒီမိုကရက်တစ်ပါတီတွေ ပေါ့ဗျာ၊ ပါတီတွေရဲ့ အချိုးစားပေါ့၊ ပါဝင်ခွင့်ရမှုက နည်းတယ်လို့ ယူဆတယ်ပေါ့။ နိုင်ငံရေးအရ။ အမှန်ဆိုလို့ရှိရင် ဒါဒီမိုကရက်တစ်ပါတီတွေ ပါဝင်ခွင့် ပိုများတယ်ဆိုလို့ရှိရင် ဒီရွေးကောက်ပွဲက ပိုပြီးတော့မှ All inclusive ပိုဖြစ် တာပေါ့။ ပြည်တွင်းအတွက်ရော အရမ်းလှတဲ့ မျက်နှာစာ၊ နိုင်ငံတကာ အခင်းအကျင်း မျက်နှာစာလည်း ဖြစ်လာ နိုင်တယ်။ ပြည်တွင်းမှာလည်း ကျနော်တို့ အမျိုးသားယုံကြည်မှုပေါ့၊ အမျိုးသားပြန်လည် ရင်ကြားစေ့ရေးဆိုတဲ့ ခေါင်းစဥ် တစ်ခုကနေ ယုံကြည်မှုကို တည်ဆောက်နိုင်တဲ့ အနေအထားတစ်ခု ဖြစ်လာနိုင်တယ်။ ဒါဒီမိုကရက် တစ်ပါတီတွေပါ ရွေးကောက်ပွဲမှာ ပါဝင်တယ်ဆိုတဲ့ သဘောပေါ့”ဟု ပြောသည်။
ပြည်သူလူထုသည် စားဝတ်နေရေးအတွက် ရုန်းကန်နေရခြင်းကြောင့် မြန်မာနိုင်ငံတွင် ကျင်းပသည့် ရွေးကောက်ပွဲ အပေါ် စိတ်ဝင်စားမှု အားနည်းခြင်းဖြစ်သည်ဟု နိုင်ငံရေးလေ့လာစောင့်ကြည့်သူများက ထောက်ပြကြသည်။
ယခုကျင်းပခဲ့သည့် ရွေးကောက်ပွဲတွင် လူထုသိထားပြီးသား နိုင်ငံရေးခေါင်းဆောင်အချို့ အနိုင်ရရှိသည်ကို မတွေ့ ရကြောင်း၊ ဒီမိုကရက်တစ်ပါတီများ ပါဝင်ခွင့် အခန်းကဏ္ဍ လျှော့ပါးခြင်းကြောင့်ပါသည်ဟု နိုင်ငံရေးလေ့လာသုံး သပ်သူ ဦးကျော်ထက်က CNI သတင်းဌာနသို့ ပြောသည်။
ပြည်သူ့ပါတီဥက္ကဋ္ဌ ဦးကိုကိုကြီး မဲပေးခဲ့စဉ်
၎င်းက “ဒီရွေးကောက်ပွဲက ဘာရှိလဲဆိုလို့ရှိရင် ရွေးကောက်ပွဲ ဥပဒေတွေ၊ ပါတီမှတ်ပုံတင်ခြင်း ဥပဒေတွေရှိတယ်၊ ရွေးကောက်ပွဲ စနစ်ကလည်း အသစ်ပေါ့၊ ဒီဟာက တကယ်တမ်းကျတော့ ကျနော်တို့ ကျင့်သုံးတဲ့ စနစ်ပုံစံကျ တော့ ပြည်ထောင်စုရွေးကောက်ပွဲကော်မရှင် သူကပဲ ဆုံးဖြတ်ပြီးတော့ ကျင့်သုံးတဲ့ ပုံစံဆိုတာကိုလည်း တွေ့ရ တယ်ပေါ့ဗျာ။ နိုင်ငံတကာမျက်နှာစာ အနေအထားရ ကြည့်ရင်ပဲဖြစ်ဖြစ်၊ ပါတီစုံဒီမိုကရေစီ အခင်းအကျင်း ကိုပဲ ဖြစ်ဖြစ်၊ နောက်ပြီးတော့ လူထုရဲ့ နိုင်ငံရေး စိတ်ဝင်စားမှု အခြေအနေတွေကိုပဲ ပြန်လည် စမ်းစစ်ကြည့်ခြင်းအား ဖြင့် သော်လည်းကောင်းပေါ့၊ အဲ့ဒီ အခြေနေ အရပ်ရပ်ကို ကြည့်ခြင်းအားဖြင့်တော့ ရွေးကောက်ပွဲကတော့ အလုံးစုံ အောင်မြင်တယ်လို့တော့ ကျနော်တို့ နိုင်ငံရေးအရ သုံးသပ်လို့တော့ မရနိုင်ဘူး။ ဘာလို့လဲဆို ပါဝင်သင့် ပါဝင်ထိုက် တဲ့ ပါတီတွေ ပါဝင်လာခြင်း မရှိသေးတာ၊ ရွေးကောက်ပွဲမှာ အနိုင်ရရှိသင့်လောက်တဲ့ ကိုယ်စားလှယ်လောင်းတွေပေါ့ဗျာ၊ ထင်ရှားကျော်ကြားပြီး နိုင်ငံရေးအရ တိုင်ရေးပြည်ရေးကိစ္စတွေမှာ အဆိုတင်သွင်းနိုင်မယ်ဆိုတဲ့ သူတွေပေါ့၊ ပါတီ ခေါင်းဆောင် ဥက္ကဋ္ဌလုပ်တဲ့ လူထု သိထားပြီးသား နိုင်ငံရေးခေါင်းဆောင်အချို့ ပါဝင်ယှဥ်ပြိုင်တာကို တွေ့ရတယ်။ သူတို့ပင်လျှင် ရွေးကောက်ပွဲမှာ အနိုင်ရရှိတာကို ကျနော် မတွေ့ရဘူး။ ပါဝင်သင့်ပါဝင် ထိုက်သော ဒါဒီမိုကရက် တစ် ပါတီတွေ ပါဝင်ခွင့် အခန်းကဏ္ဍက လျော့ပါးတာကြောင့်လည်း ပါတယ်ပေါ့”ဟု ပြောသည်။
မြန်မာနိုင်ငံတွင် ကျင်းပသည့် ရွေးကောက်ပွဲကို ပြည်ထောင်စုအဆင့်ပါတီ ၆ ပါတီ၊ တိုင်းဒေသကြီး သို့မဟုတ် ပြည်နယ်တစ်ခုအတွင်း ပြိုင်တဲ့ပါတီ ၅၁ ပါတီ စုစုပေါင်း နိုင်ငံရေးပါတီ ၅၇ ပါတီနှင့် တစ်သီးပုဂ္ဂလ ကိုယ်စား လှယ် ၄၈၆၃ ဦး ဝင်ရောက် ယှဉ်ပြိုင်ခဲ့သည်။
ထို့နောက် မတ်လတွင် လွှတ်တော်ခေါ်၍ ဧပြီလ၌ အစိုးရသစ် ဖွဲ့စည်းမည်ဖြစ်ကြောင်း၊ ရွေးကောက်ပွဲ အနိုင်ရ ရှိသည့် ပါတီကို နိုင်ငံတော်အာဏာ လွှဲပြောင်းပေးမည်ဖြစ်ကြောင်း ဗိုလ်ချုပ်မှူးကြီးမင်းအောင်လှိုင်က ပြောသည်။
