CNI International News
ဒါကာ၊ ဒီဇင်ဘာ ၂
ဘင်္ဂလားဒေ့ရှ်နိုင်ငံ ဒါကာမြို့တော်ရှိ တရားရုံးက ဝန်ကြီးချုပ်ဟောင်း ရှိတ်ဟာဆီနာကို အဂတိလိုက်စားမှုဖြင့် ထောင်ဒဏ် ၅ နှစ်ချမှတ်ခဲ့ပြီး ၎င်း၏ တူမဖြစ်သည့် ဗြိတိန်နိုင်ငံ၏ လေဘာပါတီမှ လွှတ်တော်အမတ် ကျူးလစ် ဆစ်ဒစ် (Tulip Siddiq) ကိုလည်း အဂတိလိုက်စားမှုဖြင့် ထောင်ဒဏ် ၂ နှစ် ချမှတ်ခဲ့သည်ဟု အေပီမှ ဖော်ပြခဲ့ သည်။
ဟာဆီနာသည် ဝန်ကြီးချုပ်အဖြစ် တာဝန်ထမ်းဆောင်ခဲ့ချိန်က အစိုးရ၏ မြေယာ ပရောဂျက်တစ်ခုတွင် အာဏာ အလွဲသုံးစားလုပ်ခဲ့ပြီး ဆစ်ဒစ်သည်လည်း အဒေါ်ဖြစ်သူ ဟာဆီနာ၏ အာဏာကို အသုံးပြု၍ ၎င်း၏ မိခင်ဖြစ်သူနှင့် မောင်နှမ ၂ ဦးကို မြေယာ ရရှိပိုင်ဆိုင်ရန် လုပ်ဆောင်ခဲ့သည်ကို ပြစ်မှုထင်ရှား တွေ့ရှိခဲ့သည်ဟု ဒါကာမြို့တော်၏ အထူးတရားသူကြီးခုံရုံးမှ တရားသူကြီး ရာဘီယူ အလမ် (Rabiul Alam) က ပြောကြားခဲ့သည်။
ဆစ်ဒစ်၏ မိခင်ဖြစ်သူ ရှိတ် ရာဟီနာ (Sheikh Rehana) ကိုလည်း တရားရုံးက ထောင်ဒဏ် ၇ နှစ် ချမှတ်ခဲ့သည်။
ထို့ပြင် တရားသူကြီးက ဟာဆီနာ၊ ဆစ်ဒစ်နှင့် ရာဟီနာတို့ကို ဒဏ်ကြေးငွေအဖြစ် တစ်ဦးလျှင် ၈၁၃ ဒေါ်လာစီ ချမှတ်ခဲ့ပြီး ရာဟီနာ၏ မြေကွက်ပိုင်ဆိုင်မှုကိုလည်း ဖျက်သိမ်းခဲ့သည်။
ထိုအမှုနှင့်ပတ်သက်ပြီး နောက်ထပ် သံသယရှိသူ ၁၄ ဦးလည်းရှိကြောင်း တရားသူကြီးက ပြောကြားခဲ့သည်။
ရှေ့နေအဖွဲ့ကို တွေ့ရစဉ်
အဂတိလိုက်စားမှု စောင့်ကြည့်ရေးအဖွဲ့၏ အစိုးရရှေ့နေ ခမ်းမိုဟာမက် မာအီနူ ဟက်ဆန် (Khan Mohammed Mainul Hasan) က ထိုအမှုတွင် အဓိက တရားခံများကို ထောင်ဒဏ် တစ်သက်တစ်ကျွန်းအထိ ချမှတ်ခံရရန် ကြိုးပမ်းခဲ့ကြောင်း ပြောကြားခဲ့သည်။
"ကျနော်တို့က ထောင်ဒဏ် တစ်သက်တစ်ကျွန်းအထိ ချမှတ်လိမ့်မယ်လို့ မျှော်လင့်ခဲ့တာပါ။ ဒါပေမယ့် မဖြစ်ခဲ့ ပါဘူး။ ကျနော်တို့ဟာ နောက်ထပ် အရေးယူမှုတွေ ပြုလုပ်ဖို့အတွက် စုံစမ်းစစ်ဆေးရေးကော်မရှင်နဲ့ တိုင်ပင် သွားမှာပါ" ဟု ဟက်ဆန်က ပြောကြားခဲ့သည်။
ဟာဆီနာသည် နိုဝင်ဘာ ၁၇ ရက်က လူသားမျိုးနွယ်အား ဆန့်ကျင်သည့် ရာဇဝတ်မှုများဖြင့် သေဒဏ် ချမှတ်ခံ ခဲ့ရပြီး နိုဝင်ဘာ ၂၇ ရက်တွင်လည်း အဂတိလိုက်စားမှုဖြင့် ထောင်ဒဏ် ချမှတ်ခံခဲ့ရသည်။
ယခုပြစ်ဒဏ်သည် ဟာစီနာအတွက် သီးခြား အဂတိလိုက်စားမှုဖြင့် ထောင်ဒဏ် ၅ နှစ် ထပ်မံ ချမှတ်ခံခဲ့ရခြင်း ဖြစ်သည်။
Source: အေပီ
