CNI International News
ကာရာကက်စ်၊ ဩဂုတ် ၂၇
အမေရိကန်စစ်သင်္ဘောများ စေလွှတ်လာသည့်အတွက် ဗင်နီဇွဲလားက စစ်အင်အား ၁၅,၀၀၀ ကို ကိုလံဘီယာ နယ်စပ်မှာ ဖြန့်ကြက်ချထားလိုက်ကြောင်း South China Morning Post မှ ဖော်ပြခဲ့သည်။
အမေရိကန်သမ္မတ ဒေါ်နယ်ထရမ့် (Donald Trump) ၏ အစိုးရအဖွဲ့က ကာရစ်ဘီယံ (Caribbean) ဒေသ တောင်ပိုင်းသို့ စစ်သင်္ဘောများ စေလွှတ်ထားသဖြင့် ဗင်နီဇွဲလားသည် ကိုလံဘီယာနှင့် ထိစပ်နေသည့် ၎င်း၏ နယ်စပ်ဒေသတစ်လျှောက်တွင် လုံခြုံရေးများကို တိုးမြှင့်မည်ဟု ပြောကြားခဲ့သည်။
ဗင်နီဇွဲလားသမ္မတ မာဒူရို (Nicolas Maduro) လက်နက် အပြည့်အစုံ တပ်ဆင်ထားပြီး လေ့ကျင့်ရည် ပြည့်ဝနေ သည့် စစ်သားများနှင့် စစ်သမီး ၁၅,၀၀၀ ကို ဇူလီယာ (Zulia) နှင့် တာချီရာ (Tachira) ပြည်နယ်များတွင် ဖြန့်ကြက်ချထားရန် အမိန့်ပေးထားကြောင်း အတည်ပြုခဲ့သည်။
ထို့ပြင် အမေရိကန်သည် ချက်ချင်းပျက်စီး သွားစေနိုင်သည့် အန္တရာယ်ကို အရဲစွန့်ပြီး လှုပ်ရှားနေသည်ဟုလည်း မာဒူရိုက အမေရိကန်နိုင်ငံခြားရေးဝန်ကြီး မာကိုရူဘီယို (Marco Rubio) ကို ရည်ညွှန်းပြောဆိုခဲ့သည်။
ရူဘီယိုသည် ရွှေ့ပြောင်း နေထိုင်သူများပြဿနာ၊ မူးယစ်ဆေးဝါး ပြဿနာများနှင့် ပတ်သက်ပြီး ဗင်နီဇွဲလားကို ဝေဖန်ပြောဆိုခဲ့ခြင်းကြောင့် ဖြစ်သည်။
အမေရိကန် စစ်သင်္ဘောတွေကို တွေ့ရစဉ်
“စိတ်မကောင်းစရာ တစ်ခုကတော့ အဲဒီလူကြီးလူကောင်း (ရူဘီယို) ဟာ သူ့ရဲ့ မိုက်မဲမှု၊ အစွန်းရောက်မှုတွေ ကြောင့် လက်တင်အမေရိကန်နဲ့ ကာရစ်ဘီယံ ဒေသတွေမှာ ထရမ့်အတွက် အဆိုးရွားဆုံး အခြေအနေတွေနဲ့ ရင်ဆိုင်ရစေနိုင်ပါတယ်။ ကျနော်တို့က ဒီအခြေအနေကနေ အောင်ပွဲဆင်နိုင်ပါလိမ့်မယ်” ဟု မာဒူရိုက ပြောကြား ခဲ့သည်။
ဗင်နီဇွဲလား တပ်ဖွဲ့များနှင့်အတူ သင်္ဘောများ၊ လေယာဉ်များ၊ ဒရုန်းများကိုပါ ဖြန့်ကြက်ချထားမည်ဖြစ်ကြောင်း ဗင်နီဇွဲလားပြည်ထဲရေးဝန်ကြီး ဒီအိုစဒါဒို ကာဘယ်လို (Diosdado Cabello) က ပြောကြားခဲ့သည်။
လက်ရှိတွင် အမေရိကန်သင်္ဘောသားများနှင့် မရိန်းတပ်ဖွဲ့ဝင် ၄၀၀၀ ကျော်ကို တင်ဆောင်ထားသည့် အမေရိကန် စစ်သင်္ဘော ၃ စင်းသည် မူးယစ်ဆေးဝါး ဂိုဏ်းများကို နှိမ်နင်းရန် ကာရစ်ဘီယံဒေသသို့ ချဉ်းကပ်ရန် စီစဉ်ထား သည်။
ထရမ့်ကလည်း ဖြစ်လာနိုင်ခြေရှိသည့် စစ်ဆင်ရေးများအတွက် ပြင်ဆင်ထားရန် ကာကွယ်ရေးဝန်ကြီးဌာနကို အမိန့်ထုတ်ပြန်ခဲ့သဖြင့် လက်တင်အမေရိကန် ခေါင်းဆောင်များကို စိုးရိမ်စေခဲ့သည်။
ဗင်နီဇွဲလားသည် နယ်စပ်တွင် လုံခြုံရေးကို တိုးမြှင့်ရန်အတွက် ကိုလံဘီယာ ကာကွယ်ရေးဝန်ကြီးဌာနနှင့်လည်း ဆွေးနွေးမှုများ ပြုလုပ်ခဲ့ကြောင်း မာဒူရိုက ပြောကြားခဲ့သည်။
Source: South China Morning Post
