CNI International News
နယူးဒေလီ၊ မေ ၂၆
အိန္ဒိယနယ်စပ်လုံခြုံရေးတပ်ဖွဲ့(BSF) သည် မေလ ၂၃ ရက်က ပါကစ္စတန်နိုင်ငံအတွင်းမှ အိန္ဒိယနိုင်ငံအတွင်းသို့ နယ်စပ်ဖြတ်ကျော် ဝင်ရောက်ခဲ့သည့် ပါကစ္စတန်အမျိုးသားတစ်ဦးကို ပစ်ခတ်သတ်ဖြတ်ခဲ့ကြောင်း DW သတင်းတွင် ဖော်ပြခဲ့သည်။
BSF သည် အိန္ဒိယပြည်ထဲရေးဝန်ကြီးဌာ နလက်အောက်တွင်ရှိသည့် လက်နက်ကိုင် ရဲတပ်ဖွဲ့ဖြစ်သည်။
ထိုအမျိုးသားသည် မေလ ၂၃ ရက် မွန်းလွဲပိုင်းက အိန္ဒိယ၏ အနောက်ဘက် ဂူဂျာရက် (Gujarat) ပြည်နယ် ဘာနာစကန်သာ (Banaskantha) ခရိုင်ကို ဝင်ရောက်လာခဲ့ကြောင်း BSF က ထုတ်ပြန်ခဲ့သည်။
ဂူဂျာရက်ပြည်နယ်သည် ပါကစ္စတန်၏ အရှေ့တောင်ပိုင်း ဆင်း (Sindh) ပြည်နယ်နှင့် နယ်စပ်ခြင်း ထိစပ်နေ သည်။
“အိန္ဒိယစစ်သားတွေက ကျူးကျော်သူကို ရပ်ဖို့ သတိပေးခဲ့ပါတယ်။ ဒါပေမယ့် သူက ဆက်ပြီးဝင်ရောက် လာတာ ကြောင့် ပစ်ခတ်ခဲ့ရပါတယ်။ ကျူးကျော်သူဟာ ပွဲချင်းပြီးသေဆုံးခဲ့ပါတယ်”ဟု ထုတ်ပြန်ချက်တွင် ဖော်ပြခဲ့သည်။
နယ်စပ်ကင်းလှည့်နေသည့် လုံခြုံရေးတပ်ဖွဲ့ကိုတွေ့ရစဉ်
ဧပြီ ၂၂ ရက်က အိန္ဒိယဘက်ခြမ်းရှိ ကက်ရှ်မီးယားဒေသတွင် စစ်သွေးကြွများ၏ တိုက်ခိုက်မှုကြောင့် လူ ၂၆ ဦး သေဆုံးခဲ့ပြီးနောက် အိန္ဒိယနှင့် ပါကစ္စတန်ကြား တင်းမာမှုများ မြင့်တက်ခဲ့သည်။
အိန္ဒိယက ပါကစ္စတန်သည် စစ်သွေးကြွများကို ထောက်ခံပေးနေကြောင်း အပြစ်တင်ခဲ့ပြီး Operation Sindoor အမည်ရှိ စစ်ဆင်ရေး ပြုလုပ်ခဲ့ကာ ပါကစ္စတန်နိုင်ငံအတွင်း လေကြောင်းတိုက်ခိုက်မှုများ ပြုလုပ်ခဲ့သည်။
ပါကစ္စတန်ကမူ အိန္ဒိယ၏ စွပ်စွဲချက်များကို ငြင်းဆိုခဲ့ပြီး အိန္ဒိယ၏ ပစ်မှတ်များကို လေကြောင်းတိုက်ခိုက်မှုများ ပြုလုပ်ခဲ့သည်။
ထိုတိုက်ခိုက်မှုများအတွင်း လူပေါင်း ၅၀ ခန့် သေဆုံးခဲ့ကာ မေလ ၁၀ ရက်တွင် အမေရိကန်၏ ကြားဝင်စေ့စပ်မှု ဖြင့် အပစ်အခတ်ရပ်စဲရေး သဘောတူညီမှု ရရှိခဲ့သည်။
Source: DW
