CNI News

၂၀၂၅ ခုနှစ်၊ မေလ ၁၄

မြန်မာနိုင်ငံတွင် လက်နက်ကိုင်ပဋိပက္ခများ ကြီးထွားလာခြင်းနှင့်အတူ ပြည်နယ်နှင့်တိုင်းဒေသကြီး နယ်နိမိတ်များ ပြောင်းလဲရေး အပါအဝင် ခွဲထွက်ရေး ကြိုးပမ်းလာနိုင်သော အခြေအနေများအတွင်းမှာ နယ်နိမိတ်များကို လက်ရှိ အတိုင်းထားရန် ဆန္ဒရှိသူပိုများသည်ဟု Blue Shirt Initiative က ထုတ်ပြန်ခဲ့သော စစ်တမ်းမှာ ဖော်ပြထားသည်။

Blue Shirt Initiative ပြည်နယ်နှင့်တိုင်းဒေသကြီး နယ်နိမိတ်များကို လက်ရှိအတိုင်း ထားရန် ဆန္ဒရှိသလား၊ ပြည်နယ်နှင့်တိုင်းဒေသကြီး အသစ်များ ဖွဲ့စည်းခြင်းကို ခွင့်ပြုသင့်လား အပါအဝင် ခွဲထွက်ရေးကို လက်ခံလား လက်မခံဘူးလားဆိုသော မေးခွန်းများ ပါဝင်သော စစ်တမ်းတစ်ရပ်အား ၂၀၂၅ ခုနှစ်၊ မတ်လ ၂၁ ရက်မှ ၂၅ ရက် အတွင်း ပြည်သူလူထု၏ သဘောထားဆန္ဒကို ကောက်ခံ၍ ဆောင်ရွက်ခဲ့သည်။

အဆိုပါ စစ်တမ်းတွင် ပြည်နယ်နှင့်တိုင်းဒေသကြီး ၁၄ ခုနှ မြို့နယ် ၂၃၅ ခုတွင် ကောက်ယူခဲ့ခြင်းဖြစ်ပြီး ပါဝင် ဖြေဆိုသူ ၃၁၈၅ ဦးရှိကြောင်း၊ Survey Link မှ ဖြေဆိုမှု ၁၈၄၀ ခု၊ မျက်နှာချင်းဆိုင် တွေ့ဆုံမေးမြန်းမှု ၁၂၄၂ ခု၊ တယ်လီဖုန်းဖြင့် ဖြေဆိုမှု ၇၂ ခုရှိကြောင်း Blue Shirt Initiative က ထုတ်ပြန်ခဲ့သည်။

ခွဲထွက်ရေး ခွင့်ပြုသင့်/မပြုသင့် စစ်တမ်းအဖြေလွှာကိုတွေ့ရစဉ်

ထို့နောက် ပြည်နယ်နှင့်တိုင်းဒေသကြီး နယ်နိမိတ်များကို လက်ရှိအတိုင်းထားရန် ဆန္ဒရှိကြောင်း နိုင်ငံတစ်ဝန်းလုံး တွင် ၄၆ ရာခိုင်နှုန်းရှိပြီး ပြည်နယ်အသစ်များ ဖွဲ့စည်းခြင်းကို ခွင့်ပြုသင့်သည်ဟု ဆန္ဒရှိသူက နိုင်ငံတစ်ဝန်းလုံး၌ ၃၃ ရာခိုင်နှုန်းရှိကြောင်း၊ မသိသူနှင့် မဖြေဆိုလိုသူက ၂၂ ရာခိုင်နှုန်းရှိသည်။

ထိုမေးခွန်းကိုပဲ ပြည်နယ်များတွင် လက်ရှိအတိုင်းထားလိုသူ ၄၂ ရာခိုင်နှုန်းရှိပြီး ခွင့်ပြုသင့်သည်ဟု ဆန္ဒရှိသူ ၃၆ ရာခိုင်နှုန်းနှင့် မသိသူနှင့်မဖြေဆိုလိုသူက ၂၁ ရာခိုင်နှုန်းရှိကြောင်း၊ တိုင်းဒေသကြီးများမှာတော့ လက်ရှိအတိုင်း ထားလိုသူ ၄၇ ရာခိုင်နှုန်းရှိပြီး ခွင့်ပြုသင့်သည်ဟု ဆန္ဒရှိသူက ၃၁ ရာခိုင်နှုန်းနှင့် မသိသူနှင့်မဖြေလိုသူက ၂၁ ရာခိုင်နှုန်းရှိသည်။

အလားတူ ရန်ကုန်မြို့မှာတော့ ၄၆ ရာခိုင်နှုန်းက လက်ရှိအတိုင်းထားလိုကြပြီး ၃၁ ရာခိုင်နှန်းကတော့ ခွင့်ပြုသင့် ကြောင်း ဆန္ဒရှိကြသလို ၂၂ ရာခိုင်နှုန်းကတော့ မသိသူနှင့်မဖြေလိုသူများဖြစ်ကြသည်။

စစ်ကိုင်းနှင့်မကွေးတိုင်းမှာတော့ ၅၁ ရာခိုင်နှုန်းက လက်ရှိအတိုင်းထားလိုကြပြီး ၃၅ ရာခိုင်နှုန်းက ခွင့်ပြုသင့်သည် ဟု ဆန္ဒရှိကြသလို ၁၄ ရာခိုင်နှုန်းက မသိသူနှင့် မဖြေလိုသူများဖြစ်ကြသည်။

မြန်မာနိုင်ငံကို ခွဲထွက်ခွင့် ပြုသင့်ကြောင်းနှင့် လက်ရှိအတိုင်း စုစည်းထားသင့်ကြောင်း ဘယ်လို ဆန္ဒရှိလဲဆိုသော မေးခွန်းကိုတော့ နိုင်ငံတစ်ဝန်းလုံးတွင် ၄၇ ရာခိုင်နှုန်းက လက်ရှိအတိုင်း စုစည်းထားသင့်ကြောင်း ဆန္ဒရှိကြပြီး ၃၃ ရာခိုင်နှုန်းကတော့ ခွဲထွက်ခွင့် ပြုသင့်ကြောင်း၊ ၂၀ ရာခိုင်နှးန်ကတော့ မသိသူနှင့်မဖြေလိုသူများဖြစ်ကြောင်း Blue Shirt Initiative စစ်တမ်းမှာ ဖော်ပြထားသည်။

ထို့နောက် ပြည်နယ်များတွင် ၄၀ ရာခိုင်နှုန်းက လက်ရှိအတိုင်း စုစည်းထားသင့်ကြောင်းနှင့် ၄၂ ရာခိုင်နှုန်းက ခွဲထွက်ခွင့်ပြုသင့်ကြောင်း ဆန္ဒရှိကြသလို ၁၉ ရာခိုင်နှုန်းကတော့ မသိသူနှင့် မဖြေလိုသူများ ဖြစ်ကြသည်။

အလားတူ တိုင်းဒေသကြီးများ၌ ၄၉ ရာခိုင်နှုန်းက လက်ရှိအတိုင်း စုစည်းထားသင့်ကြောင်းနှင့် ၃၀ ရာခိုင်နှုန်းက ခွဲထွက်ခွင့် ပြုသင့်ကြောင်း ဆန္ဒရှိကြသလို ၂၁ ရာခိုင်နှုန်းက မသိသူနှင့် မဖြေလိုသူများဖြစ်ကြသည်။

လက်နက်ကိုင် အင်အားစုကိုတွေ့ရစဉ်

ရန်ကုန်မြို့မှာတော့ ၄၄ ရာခိုင်နှုန်းက လက်ရှိအတိုင်း စုစည်းထားသင့်ကြောင်းနှင့် ၃၂ ရာခိုင်နှုန်းက ခွဲထွက်ခွင့်ပြု သင့်ကြောင်း ဆန္ဒရှိကြသလို ၂၄ ရာခိုင်နှုန်းက မသိသူနှင့် မဖြေလိုသူများ ဖြစ်ကြသည်။

စစ်ကိုင်းနှင့်မကွေးတိုင်းတွင်လည်း ၅၅ ရာခိုင်နှုန်းက လက်ရှိအတိုင်း စုစည်းထားသင့်ကြောင်းနှင့် ၃၁ ရာခိုင်နှုန်းက ခွဲထွက်ခွင့် ပြုသင့်ကြောင်း ဆန္ဒရှိကြသလို ၁၃ ရာခိုင်နှုန်းက မသိသူနှင့်မဖြေလိုသူများ ဖြစ်ကြသည်။

လက်ရှိ မြန်မာနိုင်ငံ တစ်ဝန်းတွင် မြန်မာ့တပ်မတော်နှင့် လက်နက်ကိုင် အင်အားစုများကြားလည်းကောင်း၊ လက်နက်ကိုင် အင်အားစု အချင်းချင်းကြား၌လည်းကောင်း တိုက်ပွဲများ အပြင်းအထန် ဖြစ်ပွားနေကြသည်။

အဆိုပါ တိုက်ပွဲများအတွင်း ပြည်နယ်နှင့်တိုင်းဒေသကြီး နယ်နိမိတ်များ ပြင်ဆင်ဖွဲ့စည်းရေး၊ ခွဲထွက်ရေး၊ ကိုယ်ပိုင် အထူးဒေသများ ရရှိရေး၊ နစကနှင့်မြန်မာ့တပ်မတော် ဖြုတ်ချရေး စသည့် မတူညီသော ရည်မှန်းချက်များပါဝင်နေ ကြသည်။