CNI International News
ဘန်ကောက်၊ ဧပြီ ၅
နှစ်နိုင်ငံဆက်ဆံရေးကို ထိခိုက်စေသည့် စကားလုံးများကို ရှောင်ကြဉ်ရန် အိန္ဒိယဝန်ကြီးချုပ် မိုဒီ (Narendra Modi ) က ဘင်္ဂလားဒေ့ရှ် ကြားဖြတ်အစိုးရအဖွဲ့ခေါင်းဆောင် မိုဟာမက် ယူနွတ် (Muhammad Yunus) ကို တိုက်တွန်းခဲ့သည်ဟု ရိုက်တာမှ ဖော်ပြခဲ့သည်။
ဘင်္ဂလားဒေ့ရှ်တွင် ဝန်ကြီးချုပ် ရှိတ်ဟာဆီနာ (Sheikh Hasina) ဖြုတ်ချခံခဲ့ရပြီးနောက် မိုဒီနှင့် ယူနွတ်တို့သည့် ဧပြီ ၄ ရက်က ထိုင်းနိုင်ငံ၊ ဘန်ကောက်မြို့တော်၌ ပြုလုပ်သည့် BIMSTEC အစည်းအဝေးမှာ သီးသန့်တွေ့ဆုံချိန် မိုဒီက ထိုကဲ့သို့ ပြောကြားခဲ့ခြင်းဖြစ်သည်ဟု အိန္ဒိယနိုင်ငံခြားရေးဝန်ကြီးဌာနက ပြောကြားခဲ့သည်။
ဟာဆီနာ လက်ထက်က အိန္ဒိယနှင့် ဘင်္ဂလားဒေ့ရှ် နှစ်နိုင်ငံဆက်ဆံရေးများ ကောင်းမွန်ခဲ့သော်လည်း ပြီးခဲ့သည့်နှစ် ဩဂုတ်လက ကျောင်းသားများ ဦးဆောင်သည့် ဆူပူအုံကြွမှုကြောင့် ဟာဆီနာသည် အိန္ဒိယနိုင်ငံသို့ ထွက်ပြေးတိမ်းရှောင်ခဲ့ပြီးနောက် နှစ်နိုင်ငံဆက်ဆံရေးများ ယိုယွင်းခဲ့သည်။
“ဆက်ဆံရေးကို ထိခိုက်စေတဲ့ စကားအသုံးအနှုန်း မှန်သမျှကို ရှောင်ရှားဖို့ ဝန်ကြီးချုပ်မိုဒီက တိုက်တွန်းခဲ့ပါ တယ်” ဟု အိန္ဒိယနိုင်ငံခြားရေးဝန်ကြီး ဗစ်ကရမ် မစ္စရီ (Vikram Misri) က သတင်းထောက်များကို ပြောကြား ခဲ့သည်။
မိုဒီသည် ဒီမိုကရေစီဆန်သော၊ တည်ငြိမ်သော၊ ငြိမ်းချမ်းမှုရှိသော၊ တိုးတက်ပြီး ဘက်စုံပါဝင်နိုင်သော ဘင်္ဂလားဒေ့ရှ်နိုင်ငံ ဖြစ်မြောက်လာစေရေးအတွက် အိန္ဒိယ၏ ထောက်ခံမှုကို ထပ်လောင်း အတည်ပြုခဲ့သည်ဟု မစ္စရီက ပြောသည်။
အိန္ဒိယဝန်ကြီးချုပ် မိုဒီနဲ့ ဘင်္ဂလားဒေ့ရှ်ကြားဖြတ်အစိုးရအဖွဲ့ခေါင်းဆောင် ယူနွတ်တို့ တွေ့ဆုံစဉ်
ထို့ပြင် လက်တွေ့ကျသည့် စိတ်ဓာတ်ကို အခြေခံပြီး ဘင်္ဂလားဒေ့ရှ်နှင့် အပြုသဘောဆောင်ကာ ခိုင်မာမှုရှိသည့် ဆက်ဆံရေးကို လိုလားသော အိန္ဒိယ၏ သဘောထားကိုလည်း မိုဒီက အလေးထား ပြောဆိုခဲ့သည်ဟု ဆိုသည်။
အိန္ဒိယသည် ဟာဆီနာကို ခိုလှုံခွင့်ပေးထားသည့် ဆုံးဖြတ်ချက်ကြောင့် ဘင်္ဂလားဒေ့ရှ်၏ လူထုအမြင်သည် အိန္ဒိယ ကို ဆန့်ကျင်သော အမြင်များ ရှိနေကြသည်။
အိန္ဒိယကလည်း ဟာဆီနာအား တရားစီရင်ရန်အတွက် ပြန်ပို့ပေးရန် ဘင်္ဂလားဒေ့ရှ်အစိုးရ၏ တောင်းဆိုချက်ကို တုန့်ပြန်ခဲ့ခြင်းမရှိပေ။
ထို့ပြင် မိုဒီနှင့် ယူနွတ်တို့သည် ဟာစီနာအား ပြန်လည်လွှဲပြောင်း ပို့ဆောင်ပေးရန် ဘင်္ဂလားဒေ့ရှ်၏ တောင်းဆို ချက်ကိုလည်း ဆွေးနွေးခဲ့ကြောင်း မစ္စရီက ပြောကြားခဲ့သော်လည်း အသေးစိတ် ထုတ်ပြန်ခဲ့ခြင်းမရှိပေ။
Source: ရိုက်တာ
