CNI News
၂၀၂၅ ခုနှစ်၊ ဧပြီ ၅

အာဆီယံအလှည့်ကျဥက္ကဋ္ဌ မလေးရှားနိုင်ငံ၏ နိုင်ငံခြားရေးဝန်ကြီး ဒါတိုမိုဟာမက် ဟာဆမ်နှင့် ထိုင်းနိုင်ငံခြားရေး ဝန်ကြီး မာရစ်ဆတ်ငီရမ်ဖုန်တို့သည် ၂၀၂၅ ခုနှစ်၊ ဧပြီ ၅ ရက်က မြန်မာနိုင်ငံသို့ ရောက်ရှိခဲ့သည်။

ထို့နောက် နစက၏ ဒုဝန်ကြီးချုပ်နှင့် နိုင်ငံခြားရေးဝန်ကြီး ဦးသန်းဆွေဖြင့် နေပြည်တော်မှာ တွေ့ဆုံ၍ ပူးတွဲ အစည်းအဝေး ကျင်းပခဲ့သည်။

ဝန်ကြီး ဦးသန်းဆွေက “ အရေးပေါ် ရှာဖွေကယ်ဆယ်ရေးကာလ လွန်ပြီးသည့် နောက်ပိုင်းတွင် ထိခိုက်ခံစားရ သည့် ဒေသများအတွက် ပြန်လည်ထူထောင်ရေးဆိုင်ရာ လိုအပ်ချက်များဖြစ်သည့် ရွေ့လျားဆေးရုံများနှင့် ကျန်း မာရေး အထောက်အပံ့ပစ္စည်းများ၊ ရေထောက်ပံ့မှုစနစ်များနှင့် ကယ်ဆယ်ရေး ပစ္စည်းများကို ဆက်လက်ကူညီပံ့ ပိုးပေးပါရန်”ပြောကြားခဲ့သည်။

မလေးရှားနှင့်ထိုင်း နိုင်ငံခြားရေးဝန်ကြီးတို့က အာဆီယံ မိသားစုအနေဖြင့် မြန်မာနိုင်ငံ၏ ပြည်သူများနှင့်အတူ စည်းလုံးညီညွတ်စွာ ရပ်တည်လျက်ရှိကြောင်း၊ ငလျင်ဒဏ်သင့် ဒေသများ၌ လိုအပ်ချက်များကို ဆက်လက်ပံ့ပိုး ကူညီပေးသွားမည်ဖြစ်ကြောင်း ပြောကြားခဲ့သည်။

ထို့နောက် အာဆီယံဘေးအန္တရာယ်ဆိုင်ရာ လူသားချင်း စာနာထောက်ထားမှု အကူအညီ ညှိနှိုင်းရေးဗဟိုဌာန(AHA Center)၏ ပံ့ပိုးမှုဖြင့် လူသားချင်း စာနာထောက်ထားမှု အကူအညီများ၊ ကယ်ဆယ်ရေး လုပ်ငန်းများကို ထိရောက် စွာ ညှိနှိုင်းဆောင်ရွက်ခြင်းနှင့် ပြည်သူများအတွက် ပြန်လည်တည်ဆောက်ရေး လုပ်ငန်းများအား ဦးစားပေး ဆောင်ရွက်နိုင်ရေး မလေးရှားနှင့်ထိုင်း နိုင်ငံခြားရေးဝန်ကြီးတို့က ဆွေးနွေးခဲ့ကြောင်း သိရသည်။

လက်ရှိတွင် မလေးရှားနှင့်ထိုင်းနိုင်ငံတို့သည် မြန်မာငလျင်ဘေးသင့် ပြည်သူများအတွက် ကူညီကယ်ဆယ်ရေး အဖွဲ့များ စေလွှတ်ပေးလျက်ရှိသလို လူသားချင်း စာနာထောက်ထားမှု အကူအညီများလည်း ထောက်ပံ့ပေးလျက် ရှိသည်။