CNI News
၂၀၂၅ ခုနှစ်၊ ဇန်နဝါရီ ၃၁
ကရင်အမျိုးသားအစည်းအရုံး(KNU)၏ ဌာနချုပ်၊ ကလို့ယော်လေး ကွင်းပြင်အနားမှာ ၂၀၂၅ ခုနှစ်၊ ဇန်နဝါရီ ၃၁ ရက် နံနက် ၇ နာရီကျော်က ကာမီကာဇီဒရုန်း(Kamikaze Drone)ဖြင့် တိုက်ခိုက်ခံခဲ့ရကြောင်း သိရသည်။
KNU ဌာနချုပ်သည် တပ်မဟာ ၇ ၏ နယ်မြေအတွင်းတွင်ရှိပြီး (၇၆)နှစ်မြောက် ကရင့်တော်လှန်ရေးနေ့မှာ တိုက်ခိုက်ခံခဲ့ရခြင်း ဖြစ်သည်။
အဆိုပါ အသေခံဒရုန်းဖြင့် တိုက်ခိုက်ခံရမှုကြောင့် အဆောက်အအုံတစ်ခု၊ ကားတစ်စီး ထိခိုက်ပျက်စီးခဲ့သလို လူတစ်ဦးလည်း ခြေထောက်မှာ ဒဏ်ရာရရှိခဲ့ကြောင်း ဒေသတွင်း သတင်းရင်းမြစ်များက ပြောသည်။
KNU ဌာနချုပ်အနီးမှာ ၂၀၂၄ ခုနှစ်၊ အောက်တိုဘာ ၂၂ ရက်ကလည်း ကာမီကာဇီဒရုန်း ၄ လုံးဖြင့် တိုက်ခိုက်မှု ခံခဲ့ရသေးသည်။
KNU သည် တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ်(NCA)ထိုးထားသည့် ကရင်လက်နက်ကိုင် အဖွဲ့ဖြစ်ပြီး တပ်မတော်က NLD အစိုးရကို ဖြုတ်ချ၍ အာဏာရယူလိုက်သည့် ၂၀၂၁ ခုနှစ်၊ ဖေဖော်ဝါရီ ၁ ရက် နောက်ပိုင်းတွင် NCA ဖျက်သွားပြီးဟု ကြေညာကာ တိုက်ပွဲများ ဖော်ဆောင်ခဲ့သည်။
ထို့နောက် ကရင်ပြည်နယ်၊ မွန်ပြည်နယ်၊ တနင်္သာရီတိုင်းဒေသကြီး၊ ပဲခူးတိုင်းဒေသကြီးတို့မှာ မြန်မာ့တပ်မတော် နှင့် KNU ကြား တိုက်ပွဲများ ဖြစ်ပွားနေသည်။
