CNI News
၂၀၂၄ ခုနှစ်၊ ဒီဇင်ဘာ ၁၈
ဗိုလ်ချုပ်ကြီး တင်အောင်စန်းနှင့် ဗိုလ်ချုပ်ကြီး မောင်မောင်အေးကို ရာထူး/တာဝန် အပြောင်းအလဲ လုပ်သည်ကို နစက-က ၂၀၂၄ ခုနှစ်၊ ဒီဇင်ဘာ ၁၈ ရက်နေ့က ထုတ်ပြန် ကြေညာခဲ့သည်။
ဗိုလ်ချုပ်ကြီးတင်အောင်စန်းကို ကာကွယ်ရေးဝန်ကြီး တာဝန်ကနေ နိုင်ငံတော်ဝန်ကြီးချုပ်ရုံး ဒုတိယဝန်ကြီးချုပ်နှင့် ပြည်ထောင်စုဝန်ကြီးအဖြစ် ပြောင်းရွှေ့ တာဝန်ပေးလိုက်ကြောင်း နစက-က သတင်းထုတ်ပြန်ခဲ့သည်။
ထို့နောက် တပ်မတော်ညှိနှိုင်းကွပ်ကဲရေးမှူး(ကြည်း၊ရေ၊လေ) တာဝန်ယူထားသည့် ဗိုလ်ချုပ်ကြီး မောင်မောင်အေး ကို ဒုတိယဝန်ကြီးချုပ်နှင့် ကာကွယ်ရေးဝန်ကြီးအဖြစ် ပြောင်းလဲ ခန့်အပ် တာဝန်ပေးလိုက်ကြောင်း နစက-က သတင်းထုတ်ပြန်ခဲ့သည်။
ဗိုလ်ချုပ်ကြီး တင်အောင်စန်းသည် ၂၀၁၅ ခုနှစ်၊ ဩဂုတ် ၁၁ ရက်မှ ၂၀၂၁ ခုနှစ်၊ ဖေဖော်ဝါရီလအထိ ကာကွယ်ရေး ဦးစီးချုပ်(ရေ)အဖြစ် တာဝန်ထမ်းဆောင်ခဲ့ပြီး ၂၀၂၁ ခုနှစ်၊ ဖေဖော်ဝါရီ ၃ ရက်မှ ၂၀၂၃ ခုနှစ်၊ ဩဂုတ် ၃ ရက်အထိ ပို့ဆောင်ရေးနှင့် ဆက်သွယ်ရေးဝန်ကြီးအဖြစ်လည်းကောင်း၊ ၂၀၂၃ ခုနှစ်၊ ဩဂုတ် ၃ ရက်မှ ၂၀၂၄ ခုနှစ်၊ ဒီဇင်ဘာ ၁၇ ရက်အထိ ကာကွယ်ရေးဝန်ကြီးအဖြစ်လည်းကောင်း အသီးသီး တာဝန် ထမ်းဆောင်ခဲ့သူ ဖြစ်သည်။
နစက ထုတ်ပြန်ချက်ကို တွေ့ရစဉ်
လက်ရှိအချိန်မှာလည်း နစက အဖွဲ့ဝင်အဖြစ်လည်း တာဝန်ထမ်းဆောင်လျက်ရှိသည်။
ဗိုလ်ချုပ်ကြီး မောင်မောင်အေးသည် ၂၀၂၁ ခုနှစ်၊ ဖေဖော်ဝါရီ ၁ ရက်မှ ၂၀၂၄ ခုနှစ်၊ ဒီဇင်ဘာ ၁၇ ရက်နေ့အထိ တပ်မတော် ညှိနှိုင်းကွပ်ကဲရေးမှူး (ကြည်း၊ရေ၊လေ)အဖြစ် တာဝန်ထမ်းဆောင်ခဲ့သလို ၂၀၂၃ ခုနှစ်၊ စက်တင်ဘာ ၂၅ ရက်မှ လက်ရှိအချိန်ထိ နစကအဖွဲ့ဝင်အဖြစ် တာဝန်ထမ်းဆောင်ခဲ့သည်။
ထို့နောက် နစက အဖွဲ့ဝင်အဖြစ်လည်းကောင်း၊ ဒုတိယဝန်ကြီးချုပ်နှင့် ကာကွယ်ရေးဝန်ကြီး တာဝန်များကိုလည်း ပူးတွဲ တာဝန်ထမ်းဆောင်မည်ဖြစ်သည်။
