CNI International News
အစ္စလာမ်မာဘက်၊ ဇူလိုင် ၂၄
ပါကစ္စတန်တွင် အကျဉ်းချခံထားရသည့် အသက် ၇၁ နှစ်အရွယ် ဝန်ကြီးချုပ်ဟောင်း အီမရန်ခန်း (Imran Khan) ၏ PTI ပါတီကို ပိတ်ပင်မှုသည် ပါကစ္စတန်၏ ကျိုးပျက်လွယ်သည့် ဒီမိုကရေစီကို ယုတ်လျော့စေနိုင်ကြောင်း Islam Khabar သတင်းဝက်ဘ်ဆိုက်မှ ဖော်ပြခဲ့သည်။
ပြည်ပမှ ရန်ပုံငွေထောက်ပံ့မှု၊ မေလ ၉ ရက် ဆူပူအုံကြွမှုများသည် PTI ကို ပိတ်ပင်ရသည့် ခိုင်လုံသော သက်သေ အထောက်အထားများဖြစ်သည်ဟု ဇူလိုင် ၁၅ ရက်တွင် ပါကစ္စတန် ပြန်ကြားရေးဝန်ကြီး အက်တူလာ တာရာ (Attaullah Tarar) က ပြောကြားခဲ့သည်။
ထိုလုပ်ဆောင်ချက်သည် ပါကစ္စတန်တွင် အာဏာကို ရယူထားသူများက ၎င်းတို့၏ နိုင်ငံရေးရည်မှန်းချက်များ ကိုသာ ရှေ့တန်းတင်ပြီး နိုင်ငံ၏ ဒီမိုကရေစီ စံတန်ဖိုးများကို ဖျက်ဆီးနေခြင်းဖြစ်ကြောင်း လေ့လာသူများက ပြောကြားခဲ့သည်။
PTI ပါတီကိုတွေ့ရစဉ်
ဖေဖော်ဝါရီလက ပြုလုပ်ခဲ့သည့် ရွေးကောက်ပွဲတွင် ဝန်ကြီးချုပ် ရှာဘက် ရှရစ်ဇ် (Shehbaz Sharif) ဦးဆောင် သည့် အစိုးရအဖွဲ့ အာဏာရလာခဲ့ပြီးနောက် ထိုအစိုးရအဖွဲ့သစ်သည် နိုင်ငံ၏ အနာဂတ်ကို တောက်ပစေရန်နှင့် ကောင်းမွန်စွာ အုပ်ချုပ်နိုင်လိမ့်မည်ဟု ပြည်သူများက မျှော်လင့်ခဲ့ကြသည်။
သို့သော် အစိုးရအဖွဲ့သစ်၏ နိုင်ငံရေးအယူအဆမှာ ပြောင်းလဲခဲ့ပုံမပေါ်ဘဲ နိုင်ငံ၏ စီးပွားရေး အကျပ်အတည်း၊ ပြည်သူများ၏ စားဝတ်နေရေးနှင့် နိုင်ငံ၏ ဒီမိုကရေစီကို တိုးတက်ကောင်းမွန်အောင် လုပ်ဆောင်ခြင်းထက် အတိတ်ကာလက PTI နှင့် မကျေလည်မှုများကိုသာ ဖြေရှင်းရန် ဦးစားပေး လုပ်ဆောင်ခဲ့သည်။
အစိုးရသည် ယခင်အာဏာရပါတီဟောင်းဖြစ်သည့် PTI ကို ပြီးခဲ့သည့်နှစ်က ဖြစ်ပွားခဲ့သော ဆူပူအုံကြွမှုများကို သွေးထိုးလှုံ့ဆော်မှု၊ လျှို့ဝှက်ချက်များ ပေါက်ကြားစေမှုတို့ဖြင့် စွပ်စွဲခဲ့ပြီး ပိတ်ပင်ကြောင်း ကြေညာခဲ့ခြင်းဖြစ် သည်။
PTI ပါတီကိုတွေ့ရစဉ်
ထိုဆုံးဖြတ်ချက်သည် ယခင်ကတည်းက ပါတီပေါင်းစုံပါဝင်သည့် နိုင်ငံရေးအခင်းအကျင်းမှ သွေဖည်နေသော အငြင်းပွားမှုများ၊ ပဋိပက္ခများကို ပိုမိုဆိုးရွားစေကာ အာဏာရှင်အစိုးရ ဖြစ်လာနိုင်သည့် အခြေအနေသို့ ဦးတည်သွားစေနိုင်သည်။
ထို့ပြင် PTI ပါတီအား ပိတ်ပင်သည့် အစိုးရ၏ လုပ်ဆောင်ချက်သည် နိုင်ငံရေးအရ စေ့ဆော်မှုဖြစ်နိုင်ခြေရှိပြီး အထူးသဖြင့် တရားရုံးချုပ်က PTI ကို တရားဝင်ပါတီအဖြစ် အသိအမှတ်ပြုထားသည့်တိုင် အစိုးရအဖွဲ့က ပိတ်ပင်လိုက်ခြင်းဖြစ်သည်။
ထိုကဲ့သို့ PTI ပါတီအား ပိတ်ပင်မှုကြောင့် အမေရိကန်ကဲ့သို့ ပထဝီနိုင်ငံရေး မဟာမိတ်များနှင့် နိုင်ငံရေး ကျွမ်းကျင်သူများအကြား လက်ရှိ ပါကစ္စတန်အစိုးရသစ်၏ ဒီမိုကရေစီအပေါ် ထားရှိသည့် မူဝါဒများကို သံသယများ ကြီးထွားလာစေခဲ့သည်ဟု ကျွမ်းကျင်သူများက ပြောကြားခဲ့သည်။
Source: Islam Khabar
