CNI International News
မနီလာ၊ ဇူလိုင် ၂၃
ဖိလစ်ပိုင်သမ္မတ ဖာဒီနန်မားကို့စ် ဂျူနီယာ (Ferdinand Marcos Jr.) သည် ဇူလိုင် ၂၂ ရက်တွင် နိုင်ငံတော်မိန့်ခွန်း ပြောကြားမည်ဖြစ်ပြီး ထိုမိန့်ခွန်း မပြောကြားမီ အတိုက်အခံများ၏ ဆန့်ကျင်မှုများကို အောက်လွှတ်တော်က ပိတ်ပင်ခဲ့ကြောင်း အယ်လ်ဂျာဇီးယားမှ ဖော်ပြခဲ့သည်။
လွန်ခဲ့သည့် ၁၀ စုနှစ်အတွင်း ဖိလစ်ပိုင်တွင် သမ္မတ၏ နှစ်ပတ်လည် နိုင်ငံတော်မိန့်ခွန်း ပြောကြားပွဲများကို ကြီးကျယ်ခမ်းနားစွာ ကျင်းပခဲ့ပြီး လွှတ်တော်အမတ်များ၊ အရာရှိများနှင့် ဖိတ်ကြားထားသည့် ဧည့်သည်တော်များ တက်ရောက်ခဲ့ကြသည်။
ထို့ပြင် အတိုက်အခံ လွှတ်တော်အမတ်များ၊ အတိုက်အခံ ခေါင်းဆောင်များသည် သမ္မတ၏ နိုင်ငံတော်မိန့်ခွန်း ပြောကြားပွဲကို ဆန့်ကျင်သည့် ဆောင်ပုဒ်များ၊ ရုပ်ပုံများကို ၎င်းတို့၏ အင်္ကျီများတွင် ရိုက်နှိပ်ပုံဖော်ကာ တက်ရောက်ကြလေ့ရှိသည်။
သို့သော် ယခုနှစ် နိုင်ငံတော်မိန့်ခွန်း ပြောကြားစဉ်တွင် အောက်လွှတ်တော်က သမ္မတအား ဆန့်ကျင်ရာရောက်သည့် ထိုကဲ့သို့ လှုပ်ရှားမှုများကို တားမြစ်ပိတ်ပင်ခဲ့သည်။
"ဒါက ဆန္ဒပြရမယ့်နေ့ မဟုတ်ပါဘူး" လွှတ်တော်တွင် အမိန့်ထုတ်ပြန်မှုများ၊ ဆုံးဖြတ်ချက်များကို ချမျတ်ရသည့် အောက်လွှတ်တော် အတွင်းရေးမှူးချုပ် ရီဂျင်နယ် ဗယ်လ်လက်စ်ကို (Reginald Nelasco)က ယခုလအစောပိုင်း တွင် သတင်းထောက်များကို ပြောကြားခဲ့သည်။
အခြေခံလူတန်းစားကိုတွေ့ရစဉ်
ထို့ပြင် သမ္မတမိန့်ခွန်း ပြောကြားမည့် လွှတ်တော် အဆောက်အအုံအဝေးတွင် ဆန္ဒပြသူများ မရှိစေရန် ရဲတပ်ဖွဲ့ဝင် ၂၂,၀၀၀ ခန့်ကို ဖြန့်ကြက်ချထားခဲ့ပြီး လုံခြုံရေးကို တင်းကျပ်ထားခဲ့သည်။
ဖိလစ်ပိုင်အစိုးရသည် ထိုအခမ်းအနားအတွက် တက်ရောက်လာမည့် ဧည့်သည်တော် ၂၀၀၀ ကျော်အတွက် အစားအစာ ကျွေးမွေးဧည့်ခံမှု အပါအဝင် အခြားပြင်ဆင်မှုများအတွက် ဖိလစ်ပိုင် ပီဆိုငွေကြေး သန်း ၂၀ (ဒေါ်လာ ၃၄၂၀၀၀) ခန့် သုံးစွဲခဲ့သည်။
ဆန္ဒပြမှုများကို ဦးဆောင်ပြုလုပ်လေ့ရှိသည့် တက်ကြွလှုပ်ရှားသူများ ညွှန့်ပေါင်းအဖွဲ့ဖြစ်သော BAYAN အဖွဲ့ကို ဦးဆောင်သည့် ရီနက်တို ရီးယက်စ် ဂျူနီယာ (Renato Reyes Jr) ကမူ ထိုနိုင်ငံတော်မိန့်ခွန်း ပြောကြားမှု အခမ်းအနားသည် အခြားသူများကို ကိုယ်ချင်းမစာသည့် ကြီးကျယ်သည့် ပွဲတစ်ခုဖြစ်ကြောင်း ဝေဖန်ခဲ့သည်။
"စစ်မှန်တဲ့ နိုင်ငံတော်အခြေပြမိန့်ခွန်းဆိုတာ စင်မြင့်ပေါ်မှာ စကားတွေ ပြောနေရမှာ မဟုတ်ပါဘူး။ လမ်းမတွေ ပေါ်က လူတွေရဲ့ခံစားချက်တွေ၊ အခြေခံ လူတန်းစားတွေရဲ့ အမြင်တွေကို ပြောကြားရမှာဖြစ်ပါတယ်" ဟု ရီးယက်စ်က ပြောကြားခဲ့သည်။
Source: အယ်လ်ဂျာဇီးယား
