CNI News
၂၀၂၁ ခုနှစ်၊ နိုဝင်ဘာ ၉
ကုလသမဂ္ဂဆိုင်ရာ အမေရိကန်သံအမတ်ဟောင်း မစ္စတာဘီလ်ရစ်ချတ်ဆန်သည် မြန်မာပြည်သို့ ကောင်းသော ဆန္ဒနှင့်သွား သော ခရီးအဖြစ် ယူဆသော်လည်း အချိန်မှား၌ သွားရောက်ပြီး နစက (မူရင်း-စစ်အုပ်စု)အား တရားဝင်ဖြစ်ကြောင်း အားပေး ထောက်ခံရာရောက်သည့် ခရီးစဉ်တစ်ခုအဖြစ် ခံယူပါသည်ဟု ၁၉၉၀ ပြည်သူ့ လွှတ်တော်ကိုယ် စားလှယ်များအဖွဲ့(MUP)က နိုဝင်ဘာ ၈ ရက်နေ့စွဲဖြင့် ထုတ်ပြန်ခဲ့သည်။
အဆိုပါ ထုတ်ပြန်ချက်တွင် အမေရိကန်ပြည်ထောင်စု၏ စွမ်းအင်ဝန်ကြီးဟောင်း၊ ကုလသမဂ္ဂဆိုင်ရာ သံအမတ်ကြီးဟောင်း နှင့် ဘီလ်ရစ်ချတ်စင်တာ၏ အကြီးအကဲဖြစ်သူ မစ္စတာရစ်ချတ်ဆန်၏ မြန်မာနိုင်ငံတွင်းရှိ အရေး ပေါ် လူသားချင်းစာနာမှု ဆိုင်ရာ အကူအညီများ၊ ကိုဗစ်-၁၉ ကပ်ရောဂါ ကာကွယ်ရေး ဆေးဝါး အကူအညီ လို အပ်နေသူများကို ဖြန့်ဝေပေးနိုင်မည့် နည်းလမ်းများ ရှာဖွေရန် သွားရောက်ခဲ့သော ပုဂ္ဂလိက ခရီးစဉ်အား သတိ ဖြင့် ကြိုဆိုလိုက်ပါသည်ဟု ဖော်ပြထားသည်။
ထို့နောက် မစ္စတာဘီလ်ရစ်ချတ်ဆန်သည် မြန်မာပြည်သူတို့၏ တခုတည်းသော တရားဝင်အစိုးရဖြစ်သည့် အမျိုးသား ညီညွတ်ရေးအစိုးရနှင့် လုံးဝကြိုတင်ညှိနှိုင်းတိုင်ပင်မှုမရှိ၊ စစ်အုပ်စု၏ တာဝန်ရှိသူများနှင့်သာ ချိတ် ဆက်၍ စီစဉ်သွား ရောက်ခဲ့သော ခရီးစဉ်သည် အမြင်ဝေဝါးရှုပ်ထွေးမှုများစွာ ဖြစ်ပေါ်စေခဲ့ပါသည်ဟုလည်း MUP ထုတ်ပြန်ချက်မှာ ဆိုထား သည်။
MUP က “အာဆီယံနှင့် ၎င်း၏ နိုင်ငံတကာမိတ်ဆွေများက မြန်မာစစ်အာဏာရှင်များကို အဆက်မပြတ် ဆက်လက်ဖိအား ပေးနေချိန်တွင် သွားရောက်ခဲ့သော ဤခရီးစဉ်သည် ကောင်းသော ဆန္ဒနှင့်သွားသော ခရီးအဖြစ် ယူဆသော်လည်း အချိန်မှား ၌ သွားရောက်ပြီး စစ်အုပ်စုအား တရားဝင်ဖြစ်ကြောင်း အားပေးထောက်ခံရာ ရောက်သည့် ခရီးစဉ်တစ်ခုအဖြစ် ခံယူပါသည်” ဟု ထုတ်ပြန်ချက်တွင် ပြောထားသည်။
မြန်မာပြည်သူများ ကြုံတွေ့ခံစားနေရကြရသော ဘေးဒုက္ခများလျော့နည်း ပပျောက်စေရေးအတွက် ကြိုးပမ်း ဆောင်ရွက် ကူညီနေကြသူများအားလုံးကို လှိုက်လှဲစွာကျေးဇူးတင်ရှိသော်လည်း ကုလသမဂ္ဂဆိုင်ရာ အမြဲတမ်း ကိုယ်စားလှယ်အဖွဲ့နှင့် မြန်မာသံအမတ်ကြီးအဖြစ် တရားဝင်လက်ခံမှုရရှိရေးအား သွယ်ဝိုက်၍သော်လည်း တိုက်ရိုက်သော်လည်း ထိပါးသက်ရောက် စေမည့် မည်သည့် လုပ်ရပ်မျိုးကိုမဆို လက်ခံလိမ့်မည်မဟုတ်ကြောင်း MUP ၏ ထုတ်ပြန်ချက်မှာ ဖော်ပြထားသည်။
အဆိုပါ ထုတ်ပြန်ချက်နှင့်ပတ်သက်ပြီး MUP မှ ဆက်သွယ်မေးမြန်းရန် ပေးအပ်ထားသော လူပုဂ္ဂိုလ်များကို CNI သတင်း ဌာနက ဆက်သွယ်ခဲ့သော်လည်း ဖုန်းလက်ခံဖြေကြားခြင်းမရှိပေ။
မစ္စတာဘီလ်ရစ်ချတ်ဆန်ကတော့ RFA နှင့် အင်တာဗျူးတစ်ခုမှာ နစကဥက္ကဋ္ဌ(မူရင်း-စစ်ခေါင်းဆောင်)နှင့် တွေ့ဆုံ၍ ဓာတ်ပုံ အရိုက်ခံခြင်းက တရားဝင်အစိုးရဖြစ်စေသည့်သဘောမျိုး သက်ရောက်သွားစေသည်ဟု ဝေဖန်ပြစ်တင် မည်ဆိုလျှင် ဝေဖန်မှုကိုခံရန် အသင့်ပဲဟု ဆိုသည်။
မစ္စတာဘီလ်ရစ်ချတ်ဆန်က “စစ်ခေါင်းဆောင်နဲ့တွေ့ဆုံပြီးတော့ ဓာတ်ပုံရိုက်ခံခဲ့တာအတွက် ဝေဖန်မယ်ဆိုရင်တော့ ဝေဖန် နိုင်ပါတယ်။ဒီခရီးစဉ်မှာ ကျနော့်ဘက်က အချက်သုံးချက် အောင်မြင်အောင်လုပ်နိုင်ခဲ့ပါတယ်။ အကျဉ်းကျခံနေရတဲ့ ကျနော် တို့ ဝန်ထမ်းကို ထောင်ကနေ လွတ်အောင်လုပ်နိုင်ခဲ့တယ်။ ကာကွယ်ဆေးနဲ့ လူ သားချင်းစာနာမှု အကူ အညီတွေ ပေးနိုင်တဲ့ အခြေအနေတွေကို တိုးတက်လာအောင်လုပ်နိုင်ခဲ့တယ်။ အကျဉ်း ထောင်တွေကို ကြက်ခြေနီအဖွဲ့က ဝင်ရောက်ကြည့်ရှုခွင့် ရအောင် ဆွေးနွေးနိုင်ခဲ့တယ်။ ဒါတွေအောင်မြင်ဖို့ စစ်ခေါင်းဆောင်နဲ့တွေ့ပြီးတော့ ဓာတ်ပုံ အရိုက်ခံတာကို အပြစ်ရှိတယ်လို့ ဝေဖန်မယ်ဆိုရင်တော့ ဝေဖန်သမျှခံဖို့ အသင့်ပါပဲ။ ကျနော်က နောက်တန်းမှာပဲ နေပြီးတော့ မိန့်ခွန်းတွေပဲ ပြောနေတဲ့ လူမျိုး မဟုတ်ပါဘူး၊ ကျနော်က ရှေ့တန်းထိ သွားပြီးတော့ အပြောင်းအ လဲတွေဖြစ်အောင် လုပ်ခဲ့တဲ့လူပါ”ဟု RFA နှင့် အင်တာဗျူး မှာ ပြောကြားခဲ့သည်။
မစ္စတာဘီလ်ရစ်ချတ်ဆန်သည် နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်နှင့် နိုဝင်ဘာ ၂ ရက်နေ့က နေပြည်တော်မှာ တွေ့ဆုံကာ ကိုဗစ်-၁၉ ကာကွယ်ဆေး ကူညီထောက်ပံ့နိုင်ရေး၊ လူသားချင်းစာနာ ထောက် ထားမှု အကူအညီများ ပေးအပ် နိုင်ရေး ကိစ္စများကို ဆွေးနွေးခဲ့ကြသည်။
အဆိုပါ ခရီးစဉ်တွင် မစ္စတာ ဘီလ်ရစ်ချတ်ဆန်က နံပါတ်(၁) ကိုဗစ်-၁၉ ကာကွယ်ဆေးများ ပေးအပ်ရေး သဘောတူညီမှု ရယူနိုင်ခဲ့ခြင်း၊ နံပါတ်(၂) အကျဉ်းထောင်များအတွင်းသို့ ကြက်ခြေနီအဖွဲ့ ဝင်ရောက် ကြည့် ရှု နိုင်ရေး သဘောတူညီမှု ရယူ နိုင်ခဲ့ခြင်း၊ နံပါတ် (၃) ရစ်ချတ်ဆန် ဖောင်ဒေးရှင်းမှ ဝန်ထမ်းဖြစ်သူ မအေးမိုးကို ထောင်ကနေ လွတ်မြောက်စေပြီး နေအိမ်သို့ ပြန်လည်ပို့ဆောင်နိုင်ခဲ့ခြင်း စသည့် အချက် ၃ ချက်ကို ဆောင်ရွက်နိုင်ခဲ့သည်ဟု ဆိုသည်။
