CNI International News
ဆိုးလ်၊ ဇန်နဝါရီ ၂၉
မြောက်ကိုရီးယားနိုင်ငံသည် သီတင်းတစ်ပတ် မပြည့်မီအချိန်အတွင်း ဒုတိယမြောက် ဒုံးကျည်ပစ်လွှတ်မှုအဖြစ် ဇန်နဝါရီ ၂၈ ရက်တွင် အရှေ့ဘက်ကမ်းလွန် ရေပြင်များအတွင်းသို့ ခရုဇ်ဒုံးကျည်များ ပစ်လွှတ်ခဲ့သည်ဟု တောင်ကိုရီးယား ပူးတွဲစစ်ဦးစီးချုပ်များအဖွဲ့ (JCS) က ပြောကြားခဲ့သည်ဟု ရိုက်တာမှ ဖော်ပြခဲ့သည်။
ထိုဒုံးကျည်များကို ဒေသစံတော်ချိန် နံနက် ၈ နာရီခန့်က ပစ်လွှတ်ခဲ့ခြင်းဖြစ်ပြီး တောင်ကိုရီးယားနှင့် အမေရိကန် ထောက်လှမ်းရေး အာဏာပိုင်များက လေ့လာဆန်းစစ်နေကြောင်း JCS က ထုတ်ပြန်ခဲ့သည်။
အဆိုပါ ဒုံးကျည်များသည် အကွာအဝေးမည်မျှအထိ ပျံသန်းခဲ့သည်ဆိုခြင်းကိုမူ အသေးစိတ် ပြောကြားခဲ့ခြင်း မရှိပေ။
"ထောက်လှမ်းရေးသတင်း စုဆောင်းမှုများကို သတိဝီရိယထားပြီး လုပ်ဆောင်နေမှုနှင့်အတူ မိမိတို့ စစ်တပ်သည် အမေရိကန်နှင့် အနီးကပ် ပူးပေါင်းဆောင်ရွက်နေပြီး မြောက်ကိုရီးယား၏ နောက်ထပ် လှုပ်ရှားမှုများကို အနီးကပ် စောင့်ကြည့်နေကြောင်း” JCS က ထုတ်ပြန်ခဲ့သည်။
မြောက်ကိုရီးယားခေါင်းဆောင်ကို တွေ့ရစဉ်
မြောက်ကိုရီးယားသည် နျူကလီးယား တပ်ဆင်နိုင်သည်ဟု ပြောကြားထားသည့်် Pulhwasal-3-31 အမည်ရှိ မဟာဗျူဟာမြောက် ခရုဇ်ဒုံးကျည် အသစ်တစ်စင်းကို စမ်းသပ်ပစ်လွှတ်ခဲ့ပြီးနောက် ရက်ပိုင်းအကြာတွင် ယခုလို ဒုံးကျည်များ ထပ်မံပစ်ခတ်ခဲ့ခြင်းဖြစ်သည်။
မြောက်ကိုရီးယားသည် နျူကလီးယားတိုက်ခိုက်ရေး စွမ်းဆောင်ရည်များရှိသည့် Pulhwasal-3-31 ခရုဇ်ဒုံးကျည် ကို ဇန်နဝါရီ ၂၄ ရက်က စမ်းသပ်ခဲ့ခြင်းဖြစ်ပြီး ထိုဒုံးကျည်အမျိုးအစား စမ်းသပ်မှုသည် ၂၀၂၁ ခုနှစ် နိုဝင်ဘာလ နောက်ပိုင်း ပထမဆုံးအကြိမ်ဖြစ်သည်။
မြောက်ကိုရီးယားသည် အမေရိကန်နှင့် ၎င်း၏ မဟာမိတ်များအား ထိပ်တိုက်တွေ့မှုကို တိုးမြှင့်နေသော်လည်း မကြာမီအချိန်အတွင်း စစ်ရေးအရ အရေးယူလုပ်ဆောင်မည့် အရိပ်လက္ခဏာများကို မတွေ့ရကြောင်း အမေရိကန် နှင့် တောင်ကိုရီးယားအရာရှိများက ပြောကြားခဲ့သည်။
မြောက်ကိုရီးယားသည် တောင်ကိုရီးယားနှင့် ငြိမ်းချမ်းစွာ ပြန်လည်ပေါင်းစည်းရေး ရည်ရွယ်ချက်ကို ဖျက်သိမ်း ခဲ့ပြီး တရုတ်၊ ရုရှားတို့နှင့် ပူးပေါင်းဆောင်ရွက်မှုများအား မြှင့်တင်လျက်ရှိသည်။
မြောက်ကိုရီးယားက ဒုံးကျည်ပစ်လွှတ်နေတဲ့သတင်းကို ကြေညာနေစဉ်
ထို့နောက် ပဲ့ထိန်းဒုံးကျည်စီမံကိန်းတွင် တိုးတက်မှုများ ရရှိခဲ့ပြီးနောက် ရန်လိုသည့် လုပ်ဆေင်ချက်များကို ဆက်လက် လုပ်ဆောင်ဖွယ်ရှိသည်ဟု ကျွမ်းကျင်သူများက ပြောကြားခဲ့သည်။
ဇန်နဝါရီ ၂၈ ရက် အစောပိုင်းကလည်း မြောက်ကိုရီးယားနိုင်ငံပိုင် KCNA သတင်းအေဂျင်စီက မကြာသေးမီ သီတင်းပတ်များအတွင်းက ပြုလုပ်ခဲ့သည့် အမေရိကန်နှင့် တောင်ကိုရီးယားတို့၏ စစ်ရေးလကျင့်မှုများကို ရှုတ်ချခဲ့ပြီး နောက်ဆက်တွဲ အကျိုးဆက်များ ရှိလာလိမ့်မည်ဟု သတိပေးခဲ့သည်။
၂၀၂၄ ခုနှစ် စတင်ခဲ့ချိန်ကတည်းက မိမိတို့နိုင်ငံကို ဆန့်ကျင်သည့် နျူကလီးယားစစ်ရေး လေ့ကျင့်မှုများအား ပိုမို ရမ်းကားစွာ ပြုလုပ်လာသဖြင့် မိမိတို့သည် ပြင်းထန်သည့် စစ်ပွဲအတွက် အလုံးစုံ ပြင်ဆင်မှုများ ပြုလုပ်ခဲ့သည်ဟု KCNA က ဖော်ပြခဲ့သည်။
Source: ရိုက်တာ
