CNI News
၂၀၂၃ ခုနှစ်၊ စက်တင်ဘာ ၈
မြန်မာ့နိုင်ငံရေး ပြဿနာများကို ကိုင်တွယ်ဖြေရှင်းနိုင်ရေး အာဆီယံအလှည့်ကျဥက္ကဋ္ဌ အပါအဝင် နိုင်ငံ ၃ နိုင်ငံက ပူးတွဲတာဝန်ယူမည့်နည်းလမ်းမှာ အလုပ်ဖြစ်နိုင်/ မဖြစ်နိုင် မြန်မာ့နိုင်ငံရေးအသိုင်းအဝိုင်း အကြား သုံးသပ်ဆွေးနွေးနေကြသည်။
အင်ဒိုနီးရှားနိုင်ငံ ဂျကာတာမြို့မှာ ကျင်းပသည့် အာဆီယံထိပ်သီး အစည်းအဝေးတွင် အာဆီယံအလှည့် ကျဥက္ကဋ္ဌအသစ်နှင့် ဥက္ကဋ္ဌဟောင်း ၂ ဦး စုစုပေါင်း အလှည့်ကျဥက္ကဋ္ဌ သုံးဦး ပူးတွဲ၍ မြန်မာ့အရေးကို နည်းလမ်းသစ်ဖြင့် ကိုင်တွယ် ဖြေရှင်းရန် သဘောတူညီခဲ့ကြသည်။
လက်ရှိ မြန်မာ့အရေးကို ကိုင်တွယ်နေသည့် အာဆီယံဥက္ကဋ္ဌ၏ ပုံစံမျိုးကို ဆက်လက် ကိုင်တွယ်နိုင်မည့် အခင်းအကျင်းကို ဖန်းတီးခြင်းဟု သုံးသပ်မိကြောင်း ရခိုင်အမျိုးသားပါတီ (ANP)မှဥက္ကဋ္ဌ ဦးသာထွန်းလှ က CNI သတင်းဌာနသို့ ပြောသည်။
မြန်မာ့တပ်မတော်ကို ကန့်ကွက် ဆန္ဒပြနေကြစဉ်
၎င်းက “ကျနော်သုံးသပ်တာက အာဆီယံမှာက အရင်ဥက္ကဋ္ဌက တစ်နှစ်တစ်ယောက် အလှည့်ကျဆိုတော့ မြန်မာ့အရေးကို ကိုင်တွယ်ရာမှာလည်း တစ်နှစ်မှာ တစ်နိုင်ငံက ကိုင်တွယ်နေတဲ့ ပုံစံမျိုးကို အခု လက်ရှိ အင်ဒိုနီးရှားက မြန်မာ့အရေးကို ကိုင်တွယ်နေတဲ့ ပုံစံကို ဆက်ပြီး ကိုင်တွယ်သွားလို့ ရအောင်အတွက် အဲဒီလို ပူးတွဲလုပ်တယ်လို့ပဲ သုံးသပ်မိတယ်၊ ဒါပေမဲ့ အဲဒီလို ပူးတွဲ ကိုင်တွယ်မှုက ဘယ်လောက်ထိ ရောက်မလဲ ဆိုတာတော့က စောင့်ကြည့်ရဦးမယ်လို့ မြင်တယ်” ဟု ပြောသည်။
၂၀၂၁ ခုနှစ်၊ ဖေဖော်ဝါရီ ၁ ရက်နောက်ပိုင်း ပြောင်းလဲခဲ့သည့် နိုင်ငံရေး အခင်းအကျင်းများအရ မြန်မာနိုင်ငံတွင် အကျပ်အတည်းများဖြင့် ရင်ဆိုင်နေရသည်။
အဆိုပါ နိုင်ငံရေး အကျပ်အတည်းများကို ဖြေရှင်းနိုင်ရေး အာဆီယံ ဘုံသဘောတူညီချက် ၅ ချက်အား သဘောတူခဲ့ကြသော်လည်း အကောင်အထည်ဖော်နိုင်ခြင်း မရှိကြောင်း သုံးသပ်မှုများလည်း ရှိနေသည်။
ထို့နောက် အာဆီယံအနေဖြင့် မြန်မာ့အရေး ကိုင်တွယ်ဖြေရှင်းနိုင်ရေး ပုံစံပြောင်းလဲကာ ၃ နိုင်ငံ ပူးတွဲ တာဝန်ယူမည်ဖြစ်ကြောင်း သိရသည်။
လုံခြုံရေးတပ်ဖွဲ့က ဆန္ဒပြသူများကို ဖမ်းဆီးနေစဉ်
အာဆီယံအနေဖြင့် ၎င်းတို့ နည်းဟန်ဖြင့် မြန်မာ့အရေးကို ဖြေရှင်းရန် ကြိုးစားခြင်းဖြစ်ကြောင်း အပစ်ရပ် တိုင်းရင်းသား လက်နက်ကိုင် အဖွဲ့အစည်းများဖြင့် ဖွဲ့စည်းထားသော ငြိမ်းချမ်းရေး လုပ်ငန်းစဉ် ဦးဆောင် အဖွဲ့(PPST) မှ ပြောခွင့်ရပုဂ္ဂိုလ် ဗိုလ်မှူးကြီး စောကျော်ညွန့်က CNI သတင်းဌာနသို့ ပြောသည်။
၎င်းက “ဒါလည်း အခင်းအကျင်းသစ် တစ်မျိုးပေါ့လေ၊ သူတို့လည်း သူတို့နည်း၊ သူတို့ဟန်နဲ့ သူတို့ စဉ်းစားချက်တွေနဲ့တော့ ထိုးဖောက်မှု အမျိုးမျိုး တွေနဲ့ သူတို့လည်း ကြိုးစားမှုတွေ ရှိမှာပါ။ ဘယ်လိုပဲ ဖြစ်ဖြစ် ကျနော်တို့ အမြင်ကတော့ ကျနော်တို့ နားလည်သလောက်ကတော့ သူ့ရဲ့အတိုင်းအတာ အရ တော့ သူကြိုးပမ်း ဆောင်ရွက်မှုတွေ ရှိတယ်၊ သို့သော်လည်းပဲ ကျနော်တို့ အတွေ့အကြုံအရဆိုရင်လည်း ဒီနှစ်နှစ်ကျော် ကာလအတွင်းမှာ ဆိုရင်လည်းပဲ အဓိက ဒီဖြစ်ပေါ် တိုးတက်ပြောင်းလဲမှုတွေကတော့ ကျနော်တို့ မတွေ့ရှိရတာတော့ ပကတိအခြေအနေပဲ ဖြစ်ပါတယ်ခင်ဗျ။ ဒီအပေါ်မှာတော့ အမြင်တွေက အမျိုးမျိုး ရှိကြမယ်ထင်ပါတယ်။ သို့သော်လည်းပဲ ကျနော်အနေနဲ့ကတော့ ကျနော်ဥာဏ်ရည်မှီ သလောက်ဆိုရင်တော့ အဓိက ဒီအပေါ်မှာ တစ်စုံတစ်ရာ မှတ်ချက်ပေးပြောဖို့ ဆိုဖို့ကတော့ ကျနော် လက်လှမ်း မမှီသေးပါဘူးဗျ၊ ရိုးရိုးသားသား ပြောတာပါ” ဟု ပြောသည်။
လက်ရှိ ၂၀၂၃ ခုနှစ်၊ နှစ်ကုန်အထိ ကမ္ဘောဒီးယား၊ အင်ဒိုနီးရှားနှင့် လာအိုတို့က တာဝန်ယူမှာဖြစ်ပြီး ၂၀၂၄ မှာ အင်ဒိုနီးရှား၊ လာအိုနှင့် မလေးရှားတို့ ကိုင်တွယ်ကာ မြန်မာ့အရေးဖြေရှင်းကြမှာ ဖြစ်ကြောင်း သိရ သည်။
