CNI News
၂၀၂၃ ခုနှစ်၊ ဇွန်လ ၁၀
ရခိုင်ပြည်နယ်မှာ ခရီးသွားလာခွင့် ကန့်သတ်ချက်ကြောင့် ပြည်သူလူထုများ အခက်တွေ့နေကြောင်း ဒေသခံများ ထံက သိရသည်။
ရခိုင်ပြည်နယ်မှာ ခရီးသွားလာခွင့်ကို ဇွန်လ ၇ ရက်ကစ၍ ပိတ်ပင်ကြောင်း ရခိုင်ပြည်နယ်အစိုးရရုံးကို နစက၏ လုံခြုံရေးနှင့် နယ်စပ်ရေးရာဝန်ကြီးဌာနက အကြောင်းကြားခဲ့သည်။
လမ်းများ ပိတ်ထားခြင်းကြောင့် အလှူရှင်များ မလာရောက်တော့ကြောင်း မြောက်ဦးမြို့နယ်၊ စင်းဘောကိုင်း တိုက်ပွဲရှောင် စခန်းတာဝန်ခံ ဦးညီပုက CNI သတင်းဌာနသို့ ပြောသည်။
ဦးညီပုက “ပြီးရင် ဒီအလှူရှင်တွေ ဘာတွေလည်း သိပ်မလာကြတော့ဘူး။ လမ်းတွေ ဘာတွေ ပိတ်ထားကြတာ ဆိုတော့လေ၊ ပစ္စည်းတွေက လာလှူမယ့် သူတွေရှိတယ်၊ သူတို့က ခွင့်ပြုချက်မရလို့ မလာရဆိုတာကြီးပဲ ပြောနေ ကြတယ်။ လမ်းတွေကိုတော့ ပြန်ပြီးတော့ ဖွင့်စေချင်တယ်၊ ဘာလဲဆိုတော့ ဒီစစ်ဘေးရှောင်တွေက အလှူရှင်တွေ မလာတော့တဲ့အချိန်က တော်တော်လေး အခက်အခဲ ဖြစ်တယ်။ အဲဒါကြောင့် ဒီလမ်းတွေကို ပြန်ပြီးတော့ ဖွင့်ပေး စေချင်တယ်ပေါ့” ဟု ပြောသည်။
ခရီးသွားလာခွင့် ကန့်သတ်ရသည့် အခြေအနေနှင့် ပတ်သက်၍ အကြောင်းစုံ သိရှိနိုင်ရေး ရခိုင်ပြည်နယ်ကောင်စီ နယ်စပ်ရေးရာဝန်ကြီး ဗိုလ်မှူးကြီး ကျော်သူရထံ CNI က ဖုန်းဆက်သွယ်ခဲ့သော်လည်း အစည်းအဝေးထဲ ရောက် နေ သောကြောင့် ၎င်းကိစ္စအား မဖြေကြားနိုင်သေးဟု ပြောသည်။
ရခိုင်မှာ မုန်တိုင်းကြောင့် ပျက်စီးမှုများကိုတွေ့ရစဉ်
လိုအပ်ချက် တစ်ခုကြောင့်သာ အသွားအလာ ပိတ်ခြင်းဖြစ်နိုင်ကြောင်း၊ ရက်ရှည်ပိတ်ထားမှာ မဟုတ်ကြောင်း မြန်မာ့နိုင်ငံရေး လေ့လာသုံးသပ်သူ ဒေါက်တာအောင်မျိုးက CNI သတင်းဌာနသို့ ပြောသည်။
၎င်းက “အသွားအလာ ပိတ်တယ်ဆိုတာ ဘာညာဆိုတာ ဒါလည်း အကြာကြီး ပိတ်လို့ မရဘူးဆိုတာ သူတို့လည်း သိမှာပါလေ။ ဒါက ခဏတစ်ဖြုတ်ပါ။ အတိုင်းအတာတစ်ခု လိုအပ်ချက် တစ်ခုအရပဲပေါ့နော်၊ ဒါပြီးလို့ ရှိရင်တော့ ခက်တာက သူက ရိုးရိုးမဟုတ်ဘူး။ သူက စစ်ရေးစစ်ရာနဲ့ ပတ်သက်လို့ ဖြစ်နေတာဆိုတဲ့ အခါကြတော့ ကျနော်တို့ က သူ့ကို မှန်တယ်၊ မှားတယ်ဆိုတာ ဝေဖန်ဖို့ မသင့်တော်သလို သူ့ရဲ့ လိုအပ်ချက်တစ်ခုကြောင့် ဖြစ်ပါလိမ့်မယ်၊ ကျနော်အဲဒီလို ယူဆတယ်၊ ဒါပေမဲ့ ဒါက ကြာမှာတော့ မဟုတ်ပါဘူး။ အတိုင်းအတာ တစ်ခုအထိပါပဲ” ဟု ပြော သည်။
အဆိုပါ အသွားအလာ ကန့်သတ်သည့် ကိစ္စနှင့် ပတ်သက်၍ လေ့လာကာ ညှိနှိုင်းသွားမည်ဖြစ်ကြောင်း၊ လက်ရှိ မိမိအနေဖြင့် အဝေးကို ရောက်ရှိနေသည့်အတွက် အကြောင်းစုံကို မသိရှိရသေးကြောင်း ရခိုင်ပြည်လွတ်မြောက် ရေးပါတီ(ALP)ဥက္ကဋ္ဌ ဒေါ်စောမြရာဇာလင်းက CNI သတင်းဌာနသို့ ပြောသည်။
မုန်တိုင်းကြောင့် ရခိုင်ပြည်လည်ထူထောင်ရေး အလှူငွေပေးအပ်နေစဉ်
၎င်းက “ဟုတ်တယ်၊ ကျမကလည်း အဝေးကို ရောက်နေပါတယ်။ အဝေးကို ရောက်နေတဲ့ အခါမှာ ကျမတို့ ရခိုင် ပြည်ရဲ့ အနေအထားတွေနဲ့တော့ ကျမ ၁၀ ရက်လောက်ကို အလှမ်းဝေးသွားပါတယ်၊ ကျမကတော့ ဒီရိက္ခာတို့ စားဝတ်နေရေးတို့ အားလုံးကို တစ်ခါတည်းနဲ့ မပြေလည်ဘူးဆိုရင်တောင်မှ ကျမတို့ ပြည်သူတွေကို ပြေလည် စေ ချင်ပါတယ်။ အားလုံးလည်း ကျမ်းကျမ်းမာမာ ရှိစေချင်တယ်၊ ဆေးဝါးတွေ ပြည်သူလက်တွင်းကို ရောက်စေချင် တယ်၊ နောက်ပြီးတော့ အစားအသောက်တွေကို ပြည်သူ့လက်တွင်းကို ရောက်စေချင်တယ်၊ ဒါဟာတော့ ကျမတို့ရဲ့ ဆန္ဒပါ။ ဆိုရင် ဘာအကြောင်းကြောင်း ဒီလိုဖြစ်လာသလဲဆိုတာမျိုးကတော့ ကျမ လက်လှမ်း မမှီလိုက်ပါဘူး။ လေ့လာဖို့အတွက်လေ ကျမ ကျမ်းမာရေး ထိခိုက်နေတယ်၊ ပြီးလို့ရှိရင် အလုပ်ကလည်း တအားပိသွားတယ် ဆိုတော့ ဘာကြောင့် ဒီလိုဖြစ်သွားသလဲ ဆိုတာမျိုးကတော့ လေ့လာဖို့အတွက် ကျမ အချိန်နည်းနည်း လိုပါသေး တယ်” ဟု ပြောသည်။
ပြီးခဲ့သည့် မေလ ၁၄ ရက်က ရခိုင်ပြည်နယ်အတွင်းသို့ မိုခါမုန်တိုင်း ဝင်ရောက် တိုက်ခတ်မှုကြောင့် နေအိမ်ပျက်စီး မှု၊ လမ်းပျက်စီးမှု၊ ဓါတ်တိုင်ကျိုးကျမှု၊ လူသေဆုံးမှုများ ရှိခဲ့ပြီး လက်ရှိအချိန်အထိ ပြန်လည်ထူထောင်ရေးများ လုပ် ဆောင်ရန် လိုအပ်ချက်များ ရှိနေသေးကြောင်း သိရသည်။
ရခိုင်ပြည်နယ် ကူညီကယ်ဆယ်ရေးနှင့် ပြန်လည်ထူထောင်ရေး လုပ်ငန်းများအတွက် နစကက ကျပ်သိန်းပေါင်း ၇ သောင်း ထောက်ပံ့ပေးထားသလို စားနပ်ရိက္ခာများနှင့် အိမ်ဆောက်ပစ္စည်းများကို နေ့စဉ် ပို့ဆောင်၍ ကူညီ ကယ် ဆယ်ရေး လုပ်ငန်းများ လုပ်နေသည်။
