CNI International News
နယူးယောက်၊ ဇွန်လ ၃
မြန်မာနိုင်ငံမှ မက်သာဖက်တမင်း (methamphetamines) များအား မှောင်ခိုလုပ်ရန် အာရှမူးယစ်ဆေးဝါး ကွန် ယက်များသည် ရေလမ်းကြောင်းကို အသုံးပြုမှု မြင့်တက်လာကာ ဈေးကွက်ချဲ့ထွင်ရန် အတွက်လည်း ကတ်တ မင်း(ketamine) ထုတ်လုပ်မှုကို တိုးမြှင့်လုပ်ဆောင်လာကြောင်း ကုလသမဂ္ဂ (UN)က ဇွန်လ ၂ ရက်တွင် ပြော သည်ဟု ဘန်ကောက်ပို့စ် သတင်းမှာ ဖော်ပြထားသည်။
တရုတ်နှင့် ထိုင်းနိုင်ငံ တစ်လျှောက်ရှိ လမ်းကြောင်းများတွင် ကင်းလှည့်မှုများ တင်းကြပ်လာခြင်းကို ရှောင်လွဲရန် အတွက် မြန်မာနိုင်ငံအရှေ့မြောက်ပိုင်း ရှမ်းပြည်နယ်မှ မက်သာဖက်တမင်းများကို လှေများဖြင့် မှောင်ခိုကူးလျက်ရှိ သည်ဟု ကုလ၏ မူးယစ်ဆေးဝါးနှင့် ရာဇဝတ်မှုရုံး (UNODC) က နှစ်ပတ်လည် ကြေညာချက်တွင် ဖော်ပြထား သည်။
မြန်မာ၊ လာအိုနှင့် ထိုင်းနယ်စပ်ဒေသသည် တရားမဝင် မူးယစ်ဆေးဝါးထုတ်လုပ်မှု၊ ရောင်းဝယ်မှုတို့အတွက် နာမည်ဆိုးဖြင့် ကာလရှည် ထင်ရှားခဲ့ကာ အထူးသဖြင့် မက်သာဖက်တမင်းနှင့် ဘိန်းဖြူတို့ ဖြစ်သည်။
တရုတ်နိုင်ငံ အနောက်တောင်ပိုင်း ယူနန် (Yunan) ပြည်နယ်နှင့် ထိုင်း-မြန်မာ နယ်စပ်တစ်လျှောက် ကင်းလှည့်မှု များ မြင့်တက်လာခြင်းကြောင့် မှောင်ခိုသမားများက ပုံမှန်မဟုတ်သော ရေကြောင်းလမ်းကို အသုံးပြုလာ ကြသည့် အတွက် ၂၀၂၂ ခုနှစ်အတွင်း ထိုင်းနှင့်တရုတ် အာဏာပိုင်များဘက်က ဖမ်းဆီးရမိသည့် မက်သာဖက်တမင်း အရေ အတွက် ကျဆင်းသွားခဲ့သည်။
ထိုင်း-မြန်မာ-တရုတ်-လာအို မဲခေါင်မြစ်ကြောင်းကိုတွေ့ရစဉ်
မှောင်ခိုသမားများက လာအိုနှင့်ထိုင်း မြောက်ပိုင်းတစ်လျှောက် မူးယစ်ဆေးဝါး အရေအတွက် အမြောက်အများကို ပို့ဆောင်နေကြဆဲ ဖြစ်သော်လည်း တစ်ချိန်တည်းမှာပင် ၎င်းတို့သည် မြန်မာနိုင်ငံ အလယ်ပိုင်း တစ်လျှောက်မှ အက်ဒမန်ပင်လယ် (Andaman Sea) သို့ လုံခြုံရေးနည်းပါးသည့် ရေကြောင်းလမ်းမှ ပို့ဆောင်မှုများလည်း သိသိ သာသာ မြင့်တက်လာခဲ့သည်ဟု UNODC ၏ ဒေသဆိုင်ရာ ကိုယ်စားလှယ် ဂျရမီ ဒေါက်ဂလက်စ် (Jeremy Douglas) က ပြောသည်။
မြန်မာနိုင်ငံထုတ် မက်သာဖက်တမင်းများသည် အိန္ဒိယနှင့် ဘင်္ဂလားဒေ့ရှ်တို့သို့ အလုံးအရင်းနှင့် ဝင်ရောက်နေ သည်ဟုလည်း ယင်းတွင် ဖော်ပြထားသည်။
အရှေ့နှင့် အရှေ့တောင်အာရှ ဒေသတလွှားရှိ ရဲတပ်ဖွဲ့များသည် ၂၀၂၂ ခုနှစ်တွင် မက်သာဖက်တမင်း ၁၅၁ တန် နီးပါး ဖမ်းဆီးရမိခဲ့သော်လည်း ယင်းက ၂၀၂၁ ခုနှစ်က ၁၇၂ တန်ထက် လျော့ကျသွားခြင်း ဖြစ်သည်။
ဒေသတွင်းရှိ မက်သာဖက်တမင်း လက်လီ/လက္ကား ဈေးနှုန်းများသည်လည်း ၂၀၂၂ ခုနှစ်တွင် စံချိန်တင် ကျဆင်း သို့မဟုတ် မပြောင်းလဲဘဲ ရှိနေခဲ့သည်။
ဒေသတွင်းရှိ အင်အားအကြီးဆုံး မှောင်ခိုကွန်ယက်များသည် ၎င်းတို့လုပ်နိုင်သည် သို့မဟုတ် အဖမ်းမခံရနိုင် ဆိုသည်ကို သေချာမှု မြင့်မားစွာဖြင့် ရောင်းဝယ်မှုများ လုပ်ဆောင်နိုင် နေသည်ဟု ကုလ၏ ထုတ်ပြန်ချက်တွင် ဖော်ပြထားသည်။
ဖမ်းမိ မက်သာဖက်တမင်းများကို တွေ့ရစဉ်
မှောင်ခိုင်ကွန်ယက်များသည် ၎င်းတို့ ရောင်းချနေသည့် အရာများကို ချဲ့ထွင်ရန် စီစဉ်နေသည့် အထောက်အထား များကိုပါ မြင်တွေ့လာရသည်ဟု လေ့လာသူများက ပြောသည်။
၂၀၂၂ ခုနှစ်တွင် ဒေသတစ်ဝန်းရှိ အာဏာပိုင်များသည် ကတ်တမင်း ၂၇ ဒသမ ၄ တန် ဖမ်းဆီးရမိခဲ့ပြီး ယင်းက ၂၀၂၁ ခုနှစ်နှင့်ယှဉ်လျှင် ၁၆၇ ရာခိုင်နှုန်း မြင့်တက်လာခြင်း ဖြစ်သည်။
ကတ်တမင်းကို အကြီးစား ထုတ်လုပ်ရောင်းချနေမှုများကို ရှာဖွေတွေ့ရှိခဲ့မှုသည် ဒေသအတွက် အချက်ပေးသံပင် ဖြစ်သည်ဟု ဆိုသည်။
မက်သာဖက်တမင်းနှင့် ကတ်တမင်းတို့ကို အများအပြား ပူးတွဲတင်ပို့ ရောင်းချနေခြင်းက ကောင်းစွာ စုဖွဲ့ထား သော ရာဇဝတ်အဖွဲ့များအနေဖြင့် စိတ်ကြွရူးသွပ်ဆေးများအတွက် ဝယ်လိုအားကို မြှင့်တင်ရန် ဆေးနှစ်မျိုးပါ ပတ်ကေ့စ် တစ်ခုအဖြစ် ရောင်းချရန် ကြိုးပမ်းနေခြင်း ဖြစ်သည်ဟုလည်း ကုလ၏ ကြေညာချက်တွင် ဖော်ပြထား သည်။
Source: ဘန်ကောက်ပို့စ်
