CNI International News
ကွာလာလမ်ပူ၊ နိုဝင်ဘာ ၁၀
နိုဝင်ဘာ ၁၉ ရက်တွင် ကျင်းပမည့် မလေးရှားနိုင်ငံ၏ ရွေးကောက်ပွဲ၌ အစဉ်အလာ ကြီးမားသော မလေး အမျိုးသား ပေါင်းစည်းရေးပါတီ (UMNO) သည် အရှိန်အဟုန်ဖြင့် တကျော့ပြန် ရေပန်းစားလာမည်ဟု မျှော်လင့် ရကြောင်း အေပီသတင်းဌာနက ရေးသားဖော်ပြသည်။
၎င်းပါတီသည် အခွန်ဖြတ်တောက်မှုများနှင့် ပြုပြင်ပြောင်းလဲရေး အချို့အတွက် လူကြိုက်များ စေရန် အခွန် လျှော့ပေါ့ပေးမည်၊ ငွေကြေး အထောက်အပံ့များ သယ်ဆောင်လာမည်ဟု ကြေညာရင်း တည်ငြိမ်ရေး၊ ချမ်းသာ ကြွယ်ဝရေးတို့ကို ကြွေးကြော်နေသည်။
မလေးရှားနိုင်ငံကို ခေတ်မီဖွံ့ဖြိုးတိုးတက်အောင် စွမ်းဆောင်ပေးနိုင်သည့် နိုင်ငံရေးအင်အားစု တစ်ရပ်သည် အစိုးရအတွင်း အကျင့်ပျက်ခြစားမှုအပေါ် လူထုဒေါသကြောင့် ၂၀၁၈ ခုနှစ် ရွေးကောက်ပွဲတွင် မထင်မှတ်ဘဲ ရှုံးနိမ့်ခဲ့သည်။
မလေး အမျိုးသား ပေါင်းစည်းရေးပါတီ (UMNO)ကိုတွေ့စဉ် (AP)
အဆိုပါ အင်အားစုသည် အစိုးရသစ်တွင် တစိတ်တပိုင်း ပါဝင်ခဲ့ပြီး ၂၀၂၀ ပြည့်နှစ်၌ ပြန်လည် အားယူခဲ့သော်လည်း ၎င်း၏နိုင်ငံရေး မဟာမိတ်များနှင့် ဆက်ဆံရေး ပျက်ပြားလာခဲ့သည်။ သို့ဖြစ်၍ ၎င်းအင်အားစု၏ ဗဟိုချက်ဖြစ် သော UMNO ပါတီသည် ပြန်လည် အာဏာရရှိရေးအတွက် လတ်တလော အားသွန်ခွန်စိုက် ကြိုးပမ်းနေရသည်။
ကွဲပြားနေသည့် အတိုက်အခံများနှင့် နိုင်ငံရေး မတည်ငြိမ်မှုများ၊ ငွေကြေးဖောင်းပွမှုနှင့် စီးပွားရေးနှေး တုံ့ဆိုင်းနေ ခြင်းတို့အပေါ် ငြီးငွေ့နေသော မဲဆန္ဒရှင် ပြည်သူများထံမှ မဲများများ ရရှိရေးမှာ ပါတီ၏လိုလားချက် ဖြစ်သည်။
အခြားတဖက်တွင်လည်း UMNO ပါတီအတွင်း ၎င်း၏ ထိပ်တန်း ခေါင်းဆောင်များကို အကျင့်ပျက် ခြစားမှုဖြင့် တရားစွဲ ခံရနေပြီး ယုံကြည်မှု တည်ဆောက်ရေးအတွက် ဘတ်ဂျက်လိုငွေ ပြမှုကိုလည်း ရင်ဆိုင်နေရသည်။
မလေးရှားနိုင်ငံတွင် မုတ်သုံမိုးကြောင့် ရေကြီးရေလျှံ ဖြစ်နိုင်ခြေရှိသော်လည်း ရွေးကောက်ပွဲကို စောစောကျင်းပ ပေးဖို့ လိုလားချက်များလည်း ပြည်သူများအတွင်း ရှိနေသည်။
မလေး အမျိုးသား ပေါင်းစည်းရေးပါတီ (UMNO)ကိုတွေ့စဉ် (AP)
ပါတီ၏ ပြုပြင်ပြောင်းလဲရေး ပေါ်ပေါက်စေဖို့ တွန်းအားတစ်ရပ်မှာ ယခင်ရွေးကောက်ပွဲ ရှုံးနိမ့်ပြီး ၂၂ လအကြာ အစိုးရ အပြောင်းအလဲကြောင့် နောက်ပြန်ဆုတ် သွားခဲ့ကြောင်း ပြည်သူ့ရေးရာနှင့် နိုင်ငံရေး စွန့်စားမှုအကြံပေး KRA အဖွဲ့မှ မဟာဗျူဟာရေးရာ ဒါရိုက်တာ အေမာဖာရက်ရာဟင်က ပြောကြားခဲ့သည်။
“UMNO ပါတီရဲ့ ထိပ်ပိုင်း ခေါင်းဆောင်တွေ အနည်းနဲ့အများဆိုသလို အလားအလာ အတူတူပါပဲ။ ဆိုလိုချင်တာ ကတော့ အပျက်သဘောဆောင်တဲ့ ခံယူချက်ဆိုင်ရာ ပြဿနာတွေနဲ့ ပြည်သူတွေရဲ့ ယုံကြည်မှု အားနည်းတာတွေ ရှိနေသေးတယ်” ဟု ၎င်းက သုံးသပ်ပြသည်။
UMNO ဦးဆောင်ပါသော ဘာရီဆန် အမျိုးသားတပ်ဦး ညွန့်ပေါင်းအဖွဲ့သည် မလေးရှားနိုင်ငံ လွတ်လပ်ရေး ရပြီး ကတည်းက ၂၀၁၈ ခုနှစ်အထိ အုပ်ချုပ်လာခဲ့သည်။
ပါတီဥက္ကဋ္ဌသည် နိုင်ငံ၏ တရားဝင် အုပ်ချုပ်သူအဖြစ် ဝန်ကြီးချုပ်ရာထူးကို ထမ်းဆောင်ရသည်။
Source: AP
