CNI International News
ဝါရှင်တန်၊ နိုဝင်ဘာ ၁၁
ယူကရိန်းကို ပံ့ပိုးရန်အတွက် အမေရိကန်သည် တောင်ကိုရီးယားကာကွယ်ရေးပစ္စည်းထုတ်လုပ်သူများထံမှ ဟောင်ဝစ်ဇာအမြောက် အရေအတွက် ၁၀၀,၀၀၀ (တစ်သိန်း) ကို ဝယ်ယူသွားမည်ဖြစ်ကြောင်း အမေရိကန် အစိုးရတာဝန်ရှိသူတစ်ဦးက နိုဝင်ဘာ ၁၀ ရက်တွင် ပြောကြားခဲ့သည်ဟု အေပီသတင်းအရ သိရသည်။
အဆိုပါဝယ်ယူရေး သဘောတူညီချက်အတွက် နှစ်နိုင်ငံအစိုးရများသည် အချိန်အတန်ကြာအောင် ညှိနှိုင်းခဲ့ ကြသည်။
စစ်ပွဲအတွင်း ရုရှားတို့ သိမ်းယူခဲ့သောနေရာများကို ပြန်လည်သိမ်းယူသည့် တန်ပြန်ထိုးစစ်အတွက် အခွင့် ကောင်းယူရန် ယူကရိန်းခေါင်းဆောင်များက လက်နက်နှင့်အခြားအကူအညီများ ပိုရဖို့ ကြိုးပမ်းနေကြချိန်၌ အထက်ပါ သဘောတူညီချက် ထွက်ပေါ်လာခဲ့သည်။
ထို့အပြင် ယူကရိန်းသို့ အမေရိကန်၏ ပင်တဂွန်စစ်ဌာနချုပ်ထံမှ ဟောင်ဝစ်ဇာအမြောက်သုံး ခဲယမ်းမီးကျောက် များကို အဆက်မပြတ်လွှဲအပ်ပေးပို့နေရသဖြင့် လက်နက်သိုလှောင်ရုံအတွင်း ပစ္စည်းပြတ်လပ်သွားမည့်အရေး စိုးရိမ်နေကြသည့် အမေရိကန်စစ်တပ်အတွင်း အထူးသဖြင့် ကြည်းတပ်နှင့် မရိန်းတပ်ဖွဲ့များအကြား စိတ် သက်သာရာရစေသည်။
ယူကရိန်းနိုင်ငံ ကိယက်ဗ်မြို့ရှိ လွတ်လပ်ရေးရင်ပြင်(ဓါတ်ပုံ-အေပီ)
တောင်ကိုရီးယားနှင့် သဘောတူစာချုပ်ပါ အချက်အလက်များကို အခြားအမေရိကန်ကာကွယ်ရေးအရာရှိများက အတည်ပြုခဲ့ကြပြီး ယူကရိန်းတပ်ဖွဲ့များ အလျင်အမြန် သုံးစွဲနေသည့် ဟောင်ဝစ်ဇာခဲယမ်းမီးကျောက်များ အပါအဝင် လက်နက်သိုလှောင်နိုင်ရေးစွမ်းရည်ကို ဆက်လက်ပံ့ပိုးပေးသွားမည်ဟု ပြောကြားခဲ့ကြသည်။
ယူကရိန်းသည် နေ့စဉ် အမြောက်ကျည်ဆန်ပေါင်း ၇,၀၀၀ ခန့် ပစ်ခတ်သုံးစွဲနေပြီး ရုရှားဘက်မှ နေ့စဉ် အမြောက်ကျည် ၂၀,၀၀၀ ခန့် ပစ်ခတ်နေကြောင်း အမေရိကန်ကာကွယ်ရေးအရာရှိတစ်ဦးက သတင်း ထောက်များကို ယခင်သီတင်းပတ်တွင် ပြောကြားခဲ့သည်။
သို့ရာတွင် တောင်ကိုရီးယားနှင့် လက်နက်ဝယ်ယူရေး သဘောတူညီချက်အသေးစိတ်ကိုတော့ အများသိစေရန် ထုတ်ပြန်ခြင်းမရှိကြောင်း အမည်မဖော်လိုသူ အမေရိကန်အရာရှိများက ပြောကြားခဲ့ကြသည်။
အမေရိကန်၏လက်နက်တိုက်အတွင်း လျော့ပါးလာသည့် အရေအတွက် ကန့်သတ်မထားသော ၁၅၅ မီလီမီတာ အမြောက်ကျည်များ တင်ပို့ရန်အတွက် ဆက်လက်ဆွေးနွေးနေကြောင်း တောင်ကိုရီးယား ကာကွယ်ရေး ဝန်ကြီးဌာနက ကြေညာချက်တစ်စောင် ထုတ်ပြန်ခဲ့သည်။
သို့သော် ယခုဆွေးနွေးနေမှုအခြေအနေမှာ အမေရိကန်သည် ယခုလက်နက်များကို နောက်ဆုံးသုံးစွဲသူ (end user) မည်သူမည်ဝါဖြစ်ရမည်ဟု အဆုံးအဖြတ်ပေးသူနေရာ၌ ရပ်တည်လျက် ယူဆောင်အသုံးပြုမည်ဖြစ်ကြောင်း၊ ဆိုးလ်အစိုးရသည် ယူကရိန်းထံသို့ လူအသေအပျောက်နည်းစေမည့် လက်နက်အထောက်အပံ့မျိုးသာ တိုက်ရိုက်ပေးအပ်သွားမည့် မူဝါဒကို ဆက်လက်ထိန်းသိမ်းထားကြောင်း အဆိုပါကြေညာချက်တွင် ရေးသား ထားသည်။
Source: AP
