CNI Sport News
၂၀၂၂ ခုနှစ်၊ မတ်လ ၁၀
ဗြိတိန်စီးပွားရေး လုပ်ငန်းရှင် နစ်ခ်ကမ်တီဟာ ချယ်လ်ဆီးအသင်းကို ဝယ်ယူဖို့ အလားအလာရှိတဲ့ ကမ်းလှမ်းမှုတွေအတွက် ရွေးချယ်စရာတွေကို တက်ကြစွာ ရှာဖွေနေတယ်လို့ ဘီဘီစီ သတင်းမှာ ဖော်ပြထားပါတယ်။
နစ်ခ်ကမ်တီဟာ ငယ်ဘဝကတည်းက ချယ်လ်ဆီးအသင်းကို အားပေးတဲ့ ပရိသတ်ဖြစ်ပြီး နိုင်ငံတကာ ရင်းနှီးမြုပ်နှံသူ အများ အပြားနဲ့ လုပ်ငန်းစုဖွဲ့ဖို့ ကြိုးစားနေတာပါ။
ချယ်လ်ဆီး အသင်းပိုင်ရှင် အေဘရာမိုဗစ်ချ်ဟာ ယူကရိန်းကို ရုရှားရဲ့ ကျူးကျော်မှုတွေကြောင့် ပိတ်ဆို့ခံရနိုင်တဲ့အတွက် အသင်းကို ရောင်းချဖို့ စီစဉ်ခဲ့တာ ဖြစ်ပါတယ်။ အေဘရာမိုဗစ်ချ်ဟာ ၂၀၀၃ မှာ ချယ်လ်ဆီး အသင်းကို ပေါင်သန်း ၁၄၀ နဲ့ ဝယ်ယူခဲ့တာဖြစ်ပြီး ရောင်းစျေးအနေနဲ့ ပေါင် ၃ ဘီလီယံ သတ်မှတ်ထားတာပါ။
အေဘရာမိုဗစ်ချ်က ပိုင်ရှင်အသစ်တွေအနေနဲ့ အသင်းမှာ ဆက်လက် ရင်းနှီးမြုပ်နှံဖို့ တောင်းဆိုထားတာ ဖြစ်ပါတယ်။ ရုရှား ဘီလျံနာဟာ ပေါင် ၂ ဒသမ ၂ ဘီလီယံခန့် ကုန်ကျမယ့် စတမ်းဖို့ဘရစ်ချ် ပြန်လည်တည်ဆောက်မယ့် ပရောဂျက်ကို ချယ်လ်ဆီး အသင်းပိုင်ရှင် အသစ်တွေကို ကတိပေးစေလိုနေတာပါ။
နစ်ခ်ကမ်တီကတော့ ချယ်လ်ဆီး အသင်းကို ကမ်းလှမ်းမှုပြုလုပ်ဖို့ လုပ်ငန်းအစုအဖွဲ့ ပါတီအများစုနဲ့ စကားပြောခဲ့ဖူးတယ်လို့ ပြောခဲ့ပါတယ်။
အေဘရာမိုဗစ်ချ်ကိုတွေ့ရစဉ် (Bloomberg)
“နစ်ခ်ကမ်တီဟာ ချယ်လ်ဆီးအတွက် ဖြစ်နိုင်ချေရှိတဲ့ ကမ်းလှမ်းမှုတစ်ခုကို ပြုလုပ်ဖို့ ရွေးချယ်စရာတွေကို ရှာဖွေနေပါတယ်။ ဘယ်လို ကမ်းလှမ်းမှု လေလံကိုမဆို အခြားပါတီတွေ ဒါမှမဟုတ် လုပ်ငန်းစုတွေနဲ့ တွဲဖက်ပြီး ပြုလုပ်မှာပါ။ မစ္စတာ ကမ်တီ ဟာ ချယ်လ်ဆီးနဲ့ ကြီးမားတဲ့ ဆက်ဆံရေး ရှိပါတယ်။ သူ့အဖေက ဒီကလပ်အတွက် ကစားခိုင်းပြီး သူ(၄)နှစ်သား ကတည်းက စတမ်းဖို့ဘရစ်ချ်မှာ ပွဲတွေကြည့်ခဲ့တယ်”လို့ သူ့ရဲ့ ပြောရေးဆိုခွင့်ရှိသူရဲ့ ထုတ်ပြန်ချက်မှာ ဖော်ပြထားတာပါ။
ချယ်လ်ဆီး အသင်းဟာ ၂၀၁၅ က စတမ်းဖို့ဘရစ်ချ်မှာ ပရိသတ် ၆၀၀၀၀ ဆံ့ ကွင်းသစ်ကြီးကို တည်ဆောက်မယ်လို့ ကြေညာ ခဲ့ပေမယ့် ၃ နှစ်အကြာမှာတော့ ဒီစီမံကိန်းကို အကန့်အသတ်မရှိ ရပ်ဆိုင်းခဲ့တာ ဖြစ်ပါတယ်။
ချယ်လ်ဆီး အသင်းကို ဆွစ်ဘီလျံနာ ဝက်စ်နဲ့ အမေရိကန်စီးပွားရေး လုပ်ငန်းရှင် တော့တ်ဘိုလီတို့က ပူးပေါင်းဝယ်ယူဖို့ စိတ်ဝင်စားနေကြသလို တူရကီဘီလျံနာ မူဆင်ဘေရတ်ခ်ကလည်း ဝယ်ယူဖို့ ဆုံးဖြတ်ထားပြီး ကမ်းလှမ်းမှု ပြုလုပ်ထား ပါတယ်။
လန်ဒန်ကလပ်ကို ဝယ်ယူဖို့ နယူးယော့ခ်ဂျတ်စ်ပိုင်ရှင် ဂျွန်ဆင်နဲ့ ဆော်ဒီနိုင်ငံ အခြေစိုက် လုပ်ငန်းစုတို့ကလည်း စိတ်ဝင် စားနေတာ ဖြစ်ပါတယ်။
Source: BBC
