၂၀၂၂ ခုနှစ်၊ ဇန်နဝါရီ ၂၂
မန်ချက်စတာယူနိုက်တက် အသင်းနောက်ခံလူ လင်ဒီလောဖ့်ဟာ အင်္ဂလန် အနောက်မြောက်ပိုင်းမှာရှိတဲ့ သူတို့ရဲ့ နေအိမ်ဖောက်ထွင်းခံရပြီးနောက် သူ့ရဲ့ဇနီး၊ ကလေးနဲ့အတူ ဇာတိဖြစ်တဲ့ ဆွီဒင်ကို ပြန်လည်ရောက်ရှိသွားခဲ့ပြီဖြစ်ပါတယ်။
လင်ဒီလော့ဖ်ရဲ့ ဇနီးဖြစ်သူက သူနဲ့ သူ့ရဲ့ကလေးတို့ဟာ ဖောက်ထွင်းသူတွေ အိမ်ကိုဝင်ရောက်လာတဲ့ အချိန်မှာ လုံခြုံတဲ့အခန်းမှာ သော့ခတ်ပြီး နေခဲ့ရလို့ရုပ်ပိုင်းဆိုင်ရာ ထိခိုက်မှုမရှိခဲ့ဘူးလို့ ပြောပါတယ်။ မန်ချက်စတာယူနိုက်တက် အသင်းကတော့ လင်ဒီလော့ဖ်ကို အသင်းကနေ ထွက်ခွာခွင့်ပြုခဲ့ပြီး ဝက်စ်ဟမ်းနဲ့ပွဲကို ပါဝင်နိုင်မှာမဟုတ်ဘူးလို့ အတည်ပြုခဲ့ပါတယ်။
လင်ဒီလော့ဖ်ဟာ မန်ချက်စတာယူနိုက်တက်အသင်းက ဘရန်ဖို့ဒ်အသင်းကို ၃ ဂိုး-၁ ဂိုးနဲ့ အနိုင်ရတဲ့ပွဲမှာ ဝင်ရောက်ကစားနေ ချိန် နေအိမ် ဖောက်ထွင်းခံခဲ့ရတာ ဖြစ်ပါတယ်။ လင်ဒီလော့ဖ်ရဲ့ ဇနီးဖြစ်သူကတော့ ဒီအဖြစ်အပျက်ကြောင့် ဘာမှမဖြစ်ခဲ့ပေမယ့် သူရောကလေးတွေပါ အလွန်စိတ်ထိခိုက်ပြီး ကြောက်စရာကောင်းတဲ့ အခိုက်အတန့် ဖြစ်ခဲ့တယ်လို့ ထုတ်ပြန်ခဲ့ပါတယ်။
မန်ချက်စတာယူနိုက်တက် အသင်းကလည်း မိမိတို့အနေနဲ့ သူတို့ကို အပြည့်အဝပံ့ပိုးပေးမှုတွေ လုပ်ပေးထားတယ်လို့ ထုတ်ပြန်ခဲ့ပါတယ်။
မန်ချက်စတာယူနိုက်တက်အသင်း ယာယီနည်းပြ ရက်ဂ်နစ်က လင်ဒီလော့ဖ်ဟာ ဝက်စ်ဟမ်းနဲ့ ပရီးမီးယားလိဂ်ပွဲကို ပါဝင်နိုင်မှာမဟုတ်ပဲ လက်ရှိအချိန်မှာ မိသားစုကို အပြည့်အဝပံ့ပိုးပေးဖို့ အတူရှိနေတယ်လို့ ပြောထားခဲ့တာပါ။
လင်ဒီလော့ဖ်နဲ့မိသားစုကိုတွေ့ရစဉ်။(SportMob)
ရက်ဂ်နစ်က“လင်ဒီလော့ဖ်နဲ့ မိနစ် ၂၀၊ ၂၅ မိနစ်လောက် စကားပြောခဲ့ပါတယ်။ သူ့ဇနီးနဲ့ ၃ နှစ်အရွယ်ရှိ သားအတွက် စိတ်ထိခိုက်စရာကောင်းတဲ့ အဖြစ်အပျက်တစ်ခုလို့ သူပြောပြခဲ့ပါတယ်။ အခုလောလောဆယ် သူအိမ်မှာရှိဖို့လိုပါတယ်။ သူ့ဇနီးနဲ့ ကလေးကိုတစ်ယောက်တည်း ထားခဲ့ချင်မှာ မဟုတ်ပါဘူး။ ကျနော်လည်း ကလေး ၂ ယောက် အဖေဖြစ်တာကြောင့် ဒါကို အပြည့်အဝ နားလည်ပါတယ်”လို့ ပြောပါတယ်။
လင်ဒီလော့ဖ်ဟာ အခုနောက်ပိုင်းပွဲတွေမှာ မန်ချက်စတာယူနိုက်တက်အသင်းရဲ့ ဗဟိုနောက်ခံလူ နေရာမှာ ဗာရန်းနဲ့အတူ ပွဲထွက်ခွင့်ရနေတာပါ။ ဆွီဒင် အသင်းခေါင်းဆောင်ဟာ ဒီရာသီမှာ မန်ချက်စတာယူနိုက်တက် အသင်းအတွက် ပြိုင်ပွဲစုံ ၂၁ ပွဲ ပါဝင်ကစားထားပါတယ်။
မကြာသေးခင်ကလည်း မန်စီးတီး အသင်းနောက်ခံလူ ကန်ဆယ်လိုဟာ လူ ၄ ဦးရဲ့ တိုက်ခိုက်မှုကိုခံခဲ့ရပြီး လက်ဝတ်ရတနာတွေကို ယူဆောင်သွားခံခဲ့ရသလို ပြန်တိုက်ခိုက်ခဲ့လို့ မျက်နှာမှာလည်း ဒဏ်ရာရရှိသွားခဲ့တာ ဖြစ်ပါတယ်။
Source: Goal
