CNI Sport News
၂၀၂၅ ခုနှစ်၊ စက်တင်ဘာ ၁၅
ယူနိုက်တက်အသင်းဟာ မန်စီးတီးအသင်းကို ၃ ဂိုး-ဂိုးမရှိနဲ့ အရေးနိမ့်ပြီးနောက် နည်းပြအာမိုရင်ဟာ ယူနိုက်တက် အသင်းမှာ သူ့ရဲ့ ၃-၄-၃ စနစ်ကို ပြောင်းလဲသင့်တယ်ဆိုပြီး အကြံပြုမှုတွေ ရှိနေပေမယ့် သူကတော့ ဒါကို ပြောင်းလဲချင်ရင် လူပြောင်းမှရမယ်လို့ ပြောခဲ့ပါတယ်။
အာမိုရင်က “ကျနော်ကတော့ ကျနော့်ရဲ့ အတွေးအခေါ် ကစားကွက်ပုံစံတွေကို ပြောင်းလဲမှာ မဟုတ်ပါဘူး။ ယူနိုက်တက်အသင်း အကြီးအကဲတွေ အနေနဲ့ ဒါကို ပြောင်းလဲချင်ရင် လူကိုပြောင်းလဲမှရမှာပါ။ ကစားကွက်ပုံစံကို ပြောင်းလဲချင်တဲ့ အချိန်ရောက်ရင်တော့ ပြောင်းလဲသွားမှာပါ။ အခုဖြစ်နေတဲ့ အရာတွေက ယူနိုက်တက်အသင်းမှာ ရှိသင့်တဲ့ မှတ်တမ်းတွေ မဟုတ်ဘူးဆိုတာ ကျနော် လက်ခံပါတယ်။ ကျနော် အရာအားလုံးကို နားလည်ပါတယ်။ ကျနော်တို့ ပိုကောင်းအောင် လုပ်နေပေမယ့် ရလဒ်တွေကတော့ ဒီလိုဖြစ်မလာပါဘူး။ ကျနော့် ဘက်ကတော့ အရာအားလုံးကို ပေးသွားမှာပါ”လို့ ပြောခဲ့တာပါ။
ယူနိုက်တက်အသင်းဟာ မန်စီးတီးအသင်းကို အရေးနိမ့်ပြီးနောက် ဒီရာသီ ပရီးမီးယားလိဂ်ပြိုင်ပွဲ ၄ ပွဲကစား အပြီးမှာ ရှုံးပွဲ ၂ ပွဲအထိ ကြုံတွေ့ထားပြီး ဖြစ်ပါတယ်။
ပေါ်တူဂီလူမျိုးနည်းပြ အာမိုရင်ဟာ ယူနိုက်တက်အသင်းကို ပြီးခဲ့တဲ့နှစ် နိုဝင်ဘာကနေ စတင်တာဝန်ယူပြီး ကတည်းက ပရီးမီးယားလိဂ် ပွဲပေါင်း ၃၁ ပွဲ ကိုင်တွယ်ထားတာမှာ ၈ ပွဲသာ အနိုင်ရအောင် ကိုင်တွယ်ပေး နိုင်ခဲ့တာပါ။
ယူနိုက်တက်အသင်းကို တွေ့ရစဉ်
အာမိုရင်ဟာ ပရီးမီးယားလိဂ်မှာ မှတ်တမ်းဆိုးတွေကို ပိုင်ဆိုင်ထားတာကြောင့် သူ့ရဲ့ကစားကွက်ပုံစံကို အပြောင်းအလဲလုပ်ဖို့ အကြံပြု တိုက်တွန်းခဲ့ကြပါတယ်။
ဒါပေမယ့် နည်းပြအာမိုရင်ကတော့ သူအသုံးပြုနေတဲ့ ကစားကွက်ပုံစံကို စွန့်လွှတ်သွားဖို့ စိတ်ကူးမရှိဘဲ အသင်း ဘက်က ဒါကို ပြောင်းလဲချင်ရင် နောက်ထပ် နည်းပြတစ်ဦးပြောင်းလဲရမယ်လို့ ပြောလာခဲ့တာပါ။
ယူနိုက်တက်အသင်းဟာ ဒီရာသီ ပရီးမီးယားလိဂ် ၄ ပွဲ ကစားအပြီးမှာ ရမှတ် ၄ မှတ်သာ ရရှိထားတာကြောင့် နည်းပြ ဆာအဲလက်စ်ဖာဂူဆန် လက်ထက် ၁၉၉၂-၉၃ ရာသီနောက်ပိုင်း အဆိုးရွားဆုံးရာသီ စတင်မှုနဲ့ ကြုံတွေ့ နေရတာ ဖြစ်ပါတယ်။
ကိန်းဂဏန်း အချက်အလက်တွေကို တွက်ချက်တဲ့ Opta က ယူနိုက်တက်အသင်းဟာ ထိပ်ဆုံး ၅ သင်း ထဲဝင်ဖို့ ထက် တန်းဆင်းနိုင်ခြေ ပိုများတယ်လို့ ဖော်ပြထားတာပါ။
ယူနိုက်တက်အသင်းဟာ လာမယ့် ပရီးမီးယားလိဂ် ပွဲစဉ်အဖြစ် ချယ်လ်ဆီးအသင်းကို အိမ်ကွင်းလက်ခံ ယှဉ်ပြိုင် ရမှာ ဖြစ်ပါတယ်။
Source: ESPN
