CNI News
၂၀၂၅ ခုနှစ်၊ ဩဂုတ် ၂၉
ချယ်လ်ဆီးအသင်းဟာ အာဂျင်တီနားတောင်ပံကစားသမား ဂါနာချိုကို ပြောင်းရွှေ့ကြေး ပေါင်သန်း ၄၀ နဲ့ ခေါ်ယူဖို့ ယူနိုက်တက်အသင်းနဲ့ သဘောတူညီမှု ရရှိသွားခဲ့ပြီဖြစ်ပါတယ်။
အပြောင်းအရွှေ့အတွက် လပေါင်းများစွာကြာ ဆွေးနွေးပြီးနောက် ယူနိုက်တက်အသင်းဟာ အကယ်ဒမီထွက် ကစားသမားတစ်ဦးအတွက် အကြီးမားဆုံး ပြောင်းရွှေ့ကြေးကို ရရှိတော့မှာပါ။
အသက် ၂၁ နှစ်အရွယ်ရှိ ဂါနာချိုဟာ ချယ်လ်ဆီးအသင်းထံ ပြောင်းရွှေ့ဖို့ ဆေးစစ်မှုခံယူကာ အသင်းမှာ ကာလရှည်ကြာရှိမယ့် စာချုပ်ချုပ်ဆိုတော့မှာ ဖြစ်ပါတယ်။
ချယ်လ်ဆီးအသင်းဟာ ဂါနာချိုအတွက် ပေါင်သန်း ၄၀ အပြင် သူတို့ပြန်ပြီး ရောင်းချခဲ့ရင် ပြောင်းရွှေ့ကြေးရဲ့ ၁၀ ရာခိုင်နှုန်းကို ယူနိုက်တက်အသင်းထံ ပေးချေရမှာပါ။
ယူနိုက်တက်အသင်းနည်းပြ အာမိုရင်ရဲ့ အစီအစဉ်မှာ ပါဝင်ခြင်း မရှိတော့တဲ့ ဂါနာချိုဟာ အသင်းအချို့ရဲ့ စိတ်ဝင် စားမှုကို ရရှိခဲ့ပေမယ့် ချယ်လ်ဆီးအသင်းထံ ပြောင်းရွှေ့ဖို့သာ ဆုံးဖြတ်ခဲ့တာ ဖြစ်ပါတယ်။
ဂါနာချိုကို တွေ့ရစဉ်
ဂါနာချိုအနေနဲ့ ချယ်လ်ဆီးအသင်းမှာ ကစားသမားသစ်ဖြစ်သူ ဂစ်တန်စ်နဲ့ နေရာရဖို့ ယှဉ်ပြိုင်ရမှာပါ။
ဂါနာချိုဟာ ယူနိုက်တက်အသင်းရဲ့ သမိုင်းမှာ ရော်နယ်ဒို၊ လူကာကူ၊ ဒီမာရီယာတို့ ပြီးနောက် စတုတ္ထမြောက် ပြောင်းရွှေ့ကြေး အများဆုံးရရှိတဲ့ ကစားသမားလည်း ဖြစ်ခဲ့ပါတယ်။
၂၀၂၂ ခုနှစ်မှာ ယူနိုက်တက်အသင်းကြီးအတွက် ပွဲထွက်ခွင့်ရခဲ့တဲ့ ဂါနာချိုဟာ အသင်းအတွက် ၁၄၄ ပွဲ ကစားခဲ့ပြီး ၂၆ ဂိုးသွင်းယူကာ ကာရာဘောင်းလိဂ်ဖလားနဲ့ FA ဖလားရရှိခဲ့ပါတယ်။
ယူနိုက်တက်အသင်းရဲ့ အစီအစဉ်မှာ ပါဝင်ခြင်း မရှိတော့တဲ့ တောင်ပံကစားသမား အန်တိုနီဟာ ဘက်တစ် အသင်းထံ ပြန်လည်ပြောင်းရွှေ့ဖို့ နီးစပ်နေသလို တိုက်စစ်မှူး ဟော့ဂျ်လန်းဟာ နာပိုလီအသင်းထံ ပြောင်းရွှေ့ဖို့ အပြီးသတ် လုပ်ဆောင်နေတာပါ။
ယူနိုက်တက်အသင်း ကွင်းလယ်လူ ကိုဘီမေနူးကလည်း အငှားနဲ့ထွက်ခွာဖို့ တောင်းဆိုထားပေမယ့် အသင်းဘက် က သူ့ကို ထွက်ခွာခွင့်ပြုမှာ မဟုတ်ဘူးလို့ အသိပေးခဲ့ပါတယ်။
Source: Dailymail
