CNI Sport News
၂၀၂၅ ခုနှစ်၊ ဩဂုတ် ၂၉
တူရကီကလပ် ဘက်ဆစ်တက်အသင်းဟာ ကွန်းဖရန့်လိဂ် ပလေးအော့ဖ်အဆင့်မှာ လော်ဆိန်းအသင်းကို အရေးနိမ့်ကာ ထွက်ခွာခဲ့ရပြီးနောက် နည်းပြဖြစ်သူ ဆိုးလ်ရှားကို ရာထူးကနေ ထုတ်ပယ်ခဲ့ပါတယ်။
ဘက်ဆစ်တက်အသင်းဟာ အိမ်ကွင်းမှာ ကစားခဲ့တဲ့ ပလေးအော့ဖ် ဒုတိယအကျော့ ပွဲစဉ်မှာ လော်ဆိန်းအသင်းကို ၁ ဂိုး-ဂိုးမရှိနဲ့ အရေးနိမ့်ခဲ့တာပါ။
ပထမအကျော့အဖြစ် ကစားခဲ့တုန်းက ၁ ဂိုးစီ သရေကျခဲ့တာကြောင့် လော်ဆိန်းအသင်းဟာ နှစ်ကျော့ပေါင်း ရလဒ် ၂ ဂိုး-၁ ဂိုးနဲ့ ဘက်ဆစ်တက်အသင်းကို အနိုင်ရပြီး အုပ်စုအဆင့် ယှဉ်ပြိုင်ခွင့်ရရှိခဲ့တာ ဖြစ်ပါတယ်။
ဘက်ဆစ်တက်အသင်းဟာ ကွန်းဖရန့်လိဂ်ပြိုင်ပွဲကနေ ထွက်ခွာခဲ့ရတာကြောင့် သူတို့ဟာ ဒီရာသီ ဥရောပပြိုင်ပွဲ ယှဉ်ပြိုင်ခွင့် ဆုံးရှုံးခဲ့တာပါ။
ဆိုးလ်ရှားကို တွေ့ရစဉ်
အဲဒါကြောင့် ဘက်ဆစ်တက်အသင်းရဲ့ ဒါရိုက်တာဘုတ်အဖွဲ့တွေဟာ အရေးပေါ် အစည်းအဝေး ပြုလုပ်ပြီးနောက် နည်းပြဆိုးလ်ရှားကို ထုတ်ပယ်ဖို့ ဆုံးဖြတ်ခဲ့တယ်လို့ ကြေညာချက် ထုတ်ပြန်ခဲ့ပါတယ်။
ဘက်ဆစ်တက်အသင်းဟာ အသင်းကို ကိုင်တွယ်ပေးခဲ့တဲ့ နည်းပြဆိုးလ်ရှားကို ကျေးဇူးတင်ကြောင်းနဲ့ အနာဂတ် မှာ ကံကောင်းစေဖို့ ဆုတောင်းကြောင်းလည်း ကြေညာချက်ထဲမှာ ဖော်ပြထားတာပါ။
ဆိုးလ်ရှားဟာ ယူနိုက်တက်အသင်းကနေ ထွက်ခွာခဲ့တဲ့ ၂၀၂၁ ခုနှစ်၊ နိုဝင်ဘာနောက်ပိုင်း ပထမဆုံးနည်းပြ ရာထူး အဖြစ် အခုနှစ် ဇန်နဝါရီမှာ ဘက်ဆစ်တက်အသင်းကို နည်းပြသစ်အဖြစ် စတင် ကိုင်တွယ်ခဲ့တာဖြစ်ပါတယ်။
နော်ဝေလူမျိုးနည်းပြဟာ ပြီးခဲ့တဲ့ရာသီက ဘက်ဆစ်တက်အသင်းကို တူရကီလိဂ်ပြိုင်ပွဲမှာ အဆင့် ၄ နေရာနဲ့ ရာသီအဆုံးသတ်နိုင်အောင် ကိုင်တွယ်ပေးနိုင်ခဲ့တာပါ။
ဆိုးလ်ရှားဟာ ဘက်ဆစ်တက်အသင်း ယူရိုပါလိဂ် ခြေစစ်ပွဲကနေ ထွက်ခွာပြီးကတည်းက ထုတ်ပယ်ခံရမယ်လို့ သတင်းတွေ ထွက်ခဲ့တာဖြစ်ပါတယ်။
ဆိုးလ်ရှားဟာ ဘက်ဆစ်တက်အသင်းကို ၂၉ ပွဲ ကိုင်တွယ်ခဲ့တာမှာ ၁၅ ပွဲနိုင်၊ ၅ ပွဲသရေ၊ ၉ ပွဲရှုံးနိမ့်တဲ့ ရလဒ် ထွက်ပေါ်ခဲ့တာပါ။
ဒေါ့မွန်အသင်း နည်းပြဟောင်း နူရီဆာဟင်ဟာ ဆိုးလ်ရှားရဲ့ နေရာမှာ အစားထိုး ဝင်ရောက်ပြီး ဘက်ဆစ်တက် အသင်း နည်းပြရာထူးကို ရယူဖို့ ချိတ်ဆက်မှုတွေ ခံနေရတာဖြစ်ပါတယ်။
Source: ESPN
