CNI Sport News
၂၀၂၅ ခုနှစ်၊ ဇွန်လ ၂၅
ပြင်သစ်လိဂ်ချန်ပီယံဆုကို ၇ ကြိမ် ရယူထားတဲ့ လိုင်ယွန်အသင်းဟာ ကလပ်ရဲ့ဘဏ္ဍာရေး ပြဿနာတွေကြောင့် ပြင်သစ်လိဂ် ဒုတိယတန်းကို တန်းဆင်းတဲ့ ပြစ်ဒဏ်ချမှတ်ခံရတယ်လို့ ပြင်သစ်ပရော်ဖက်ရှင်နယ်လိဂ်(LFP)က ကြေညာခဲ့ပါတယ်။
လိုင်ယွန်အသင်းပိုင်ရှင် ဂျွန်တက်စ်တာ အပါအဝင် အသင်းတာဝန်ရှိသူတွေဟာ DNCG နဲ့ တွေ့ဆုံခဲ့ပေမယ့် အသင်းရဲ့ ဘဏ္ဍာရေး အခြေအနေကို ဖြေရှင်းဖို့ တိကျသေချာတဲ့ အကြောင်းပြချက် ပေးနိုင်ခဲ့ခြင်းမရှိတာပါ။
DNCG ဟာ ပြင်သစ်ပရော်ဖက်ရှင်နယ် ကလပ်တွေရဲ့ဘဏ္ဍာရေး အခြေအနေတွေကို စစ်ဆေးမှုတွေ ပြုလုပ်ဖို့ ဖွဲ့စည်းထားတာ ဖြစ်ပါတယ်။
ပြီးခဲ့တဲ့ နိုဝင်ဘာက DNCG ဟာ အကြွေးယူရို ၁၇၅ သန်းရှိတာကြောင့် လိုင်ယွန်အသင်းကို ယာယီတန်းဆင်းတဲ့ ပြစ်ဒဏ်ချမှတ်ခဲ့ပြီး ဇန်နဝါရီအပြောင်းအရွှေ့ကိုလည်း ပိတ်ပင်ခဲ့တာပါ။
လိုင်ယွန်အသင်းကတော့ DNCG ရဲ့ ဆုံးဖြတ်ချက်ကို ဝေဖန်ခဲ့ပြီး ချက်ချင်း အယူခံဝင်သွားမယ်လို့ ကြေညာချက် ထုတ်ပြန်ခဲ့ပါတယ်။
လိုင်ယွန်အသင်းဟာ ဒီနွေရာသီ အပြောင်းအရွှေ့မှာ ကြယ်ပွင့် ကစားသမား ချာကီကို မန်စီးတီးအသင်းထံ ရောင်းချတာကနေ ယူရို ၄၂.၅ သန်းရရှိခဲ့သလို လုပ်ခလစာမြင့်မားတဲ့ ကစားသမားတွေနဲ့လည်း လမ်းခွဲခဲ့ပေမယ့် ဘဏ္ဍာရေးပြဿနာကို ဖြေရှင်းနိုင်ခဲ့ခြင်းမရှိတာပါ။
လိုင်ယွန်အသင်းကို တွေ့ရစဉ်
လိုင်ယွန်အသင်းဟာ ပြီးခဲ့တဲ့ရာသီက ယူရိုပါလိဂ်ပြိုင်ပွဲမှာ ကွာတားဖိုင်နယ်အထိ ရောက်ရှိခဲ့သလို လီဂူး-၁ ပြိုင်ပွဲ မှာလည်း အဆင့် ၆ နေရာနဲ့ အဆုံးသတ်ကာ ယူရိုပါလိဂ်ဝင်ခွင့်ရခဲ့တာ ဖြစ်ပါတယ်။
ဒါပေမယ့် တန်းဆင်းတဲ့ ပြစ်ဒဏ်ကြောင့် လိုင်ယွန်အသင်းဟာ ယူရိုပါလိဂ်ဝင်ခွင့်ကို ဆုံးရှုံးဖို့ရှိနေတာပါ။
လိုင်ယွန်အသင်း တန်းဆင်းတဲ့ ပြစ်ဒဏ်ကြောင့် ပရီးမီးယားလိဂ်ကလပ် ပဲလေ့စ်အသင်းဟာ လာမယ့်ရာသီ ယူရိုပါလိဂ် ပါဝင်ကစားခွင့်ရဖို့ အခြေအနေ ပိုကောင်းသွားခဲ့ပါတယ်။
UEFA ဟာ သူတို့ရဲ့ လက်အောက် ကျင်းပနေတဲ့ ပြိုင်ပွဲတွေမှာ ပိုင်ရှင်တူညီနေတဲ့ အသင်းတွေကို ပြိုင်ပွဲ တစ်ခုတည်းမှာ ပါဝင်ယှဉ်ပြိုင်ခွင့် ပိတ်ပင်ထားတာပါ။
လိုင်ယွန်အသင်းပိုင်ရှင် တက်စ်တာဟာ ပဲလေ့စ်အသင်းမှာလည်း ရှယ်ယာပိုင်ဆိုင်ထားပေမယ့် သူ့ရဲ့ ပဲလေ့စ် အသင်း ရှယ်ယာ ၄၃ ရာခိုင်နှုန်းကို ရောင်းချဖို့ သဘောတူညီထားတာ ဖြစ်ပါတယ်။
Source: ESPN
