CNI Sport News
၂၀၂၅ ခုနှစ်၊ ဇွန်လ ၃
ဘရန်ဖို့ဒ်အသင်း တိုက်စစ်မှူး အမ်ဘူမိုဟာ ယူနိုက်တက်အသင်းထံ ပြောင်းရွှေ့ဖို့ ရွေးချယ်ခဲ့တာကြောင့် မန်ချက်စတာကလပ်ဟာ ဘရန်ဖို့ဒ်အသင်းနဲ့ အပြောင်းအရွှေ့အတွက် တရားဝင် ဆွေးနွေးမှုတွေ ပြုလုပ်တော့မှာ ဖြစ်ပါတယ်။
နယူးကာဆယ်၊ စပါးနဲ့ အာဆင်နယ်အသင်းတို့ဟာ အမ်ဘူမိုကို ခေါ်ယူဖို့ ဆက်သွယ်မှုတွေ ပြုလုပ်ထားကြပေမယ့် ကစားသမားကတော့ ယူနိုက်တက်အသင်းထံ ပြောင်းရွှေ့ချင်တယ်လို့ ပြောခဲ့တာပါ။
အသက် ၂၅ နှစ်အရွယ်ရှိ ကင်မရွန်း တိုက်စစ်မှူးဟာ ယူနိုက်တက်အသင်း နည်းပြအာမိုရင်ရဲ့ နွေရာသီမှာ ပြန်လည် ပြင်ဆင်မှုတွေ ပြုလုပ်မယ့်အသင်းမှာ အစိတ်အပိုင်းအနေနဲ့ ပါဝင်ချင်နေတာ ဖြစ်ပါတယ်။
အမ်ဘူမိုကို တွေ့ရစဉ်
အမ်ဘူမိုဟာ ပြီးခဲ့တဲ့ ပရီးမီးယားလိဂ်ပြိုင်ပွဲမှာ သွင်းဂိုး ၂၀ သွင်းယူပြီး ဆာလက်၊ အစ်ဆက်၊ ဟာလန်းတို့ရဲ့ အနောက်မှာ သွင်းဂိုး အများဆုံး ကစားသမားအဖြစ် ရပ်တည်ခဲ့တာပါ။
ဘရန်ဖို့ဒ် အသင်းဟာ အမ်ဘူမိုအတွက် ပြောင်းရွှေ့ကြေး ပေါင်သန်း ၆၀ အထက် လိုချင်နေတာကြောင့် ယူနိုက်တက်အသင်းဟာ ပြောင်းရွှေ့ကြေး သဘောတူညီမှု ရရှိဖို့ ကြိုးပမ်းရမှာဖြစ်ပါတယ်။
ယူနိုက်တက်အသင်းဟာ ပြီးခဲ့တဲ့ရက်ပိုင်းက ဝုလ်ဗ်စ်အသင်း တိုက်စစ်မှူး ကွန်ညာကို ပေါင် ၆၂.၅ သန်းနဲ့ ခေါ်ယူ ထားပြီး နောက်ထပ် အပြောင်းအရွှေ့တွေပြုလုပ်ဖို့အတွက် အသင်းမှာရှိတဲ့ ကစားသမားအချို့ကို ရောင်းချဖို အဆင်သင့် ဖြစ်နေတာပါ။
ယူနိုက်တက်အသင်း ခေါင်းဆောင် ဘရူနိုဖာနန်ဒက်စ်ကို အယ်လ်ဟီလယ်အသင်းက ပေါင်သန်း ၁၀၀ နဲ့ ကမ်းလှမ်းမှု ပြုလုပ်ဖို့ရှိနေသလို အင်တာမီလန်အသင်းဟာ တိုက်စစ်မှူး ဟော့ဂျ်လန်းကို ခေါ်ယူဖို့ စိတ်ဝင်စားနေတာ ဖြစ်ပါတယ်။
ဂါနာချို၊ ကိုဘီမိုင်နူးနဲ့ အိုနာနာတို့အပြင် အငှားချထားတဲ့ ရက်ရှ်ဖို့ဒ်၊ အန်တိုနီနဲ့ ဆန်ချိုတို့ဟာ နွေရာသီမှာ ယူနိုက်တက်အသင်းကနေ ထွက်ခွာဖွယ်ရှိနေတာပါ။
မန်ချက်စတာကလပ်ဟာ နွေရာသီမှာ တိုက်စစ်မှူးသစ် တစ်ဦးနဲ့ ဂိုးသမားသစ် တစ်ဦးကို ခေါ်ယူနိုင်ဖို့လည်း စီစဉ်ထားတာဖြစ်ပါတယ်။
Source: Dailymail
